Éxodo

3 Moisés yeryuqʼuj wä ri rkarneʼl Jetró, ri rjinan. Jetró ya riʼ wä ri sacerdote rchë Madián. Kʼo jun q’ij, taq yerkʼwan wä äl ri karneʼl pa oeste rchë ri tzʼiran ilew, xapon kʼa Horeb, ri rjyuʼ ri kʼaslïk Dios. 2 Taq ryä kʼo chriʼ, ri r·ángel Jehová xkʼüt riʼ chwäch pa rnikʼajal jun koʼöl cheʼ ri najin wä nbʼrö pa qʼaqʼ. Moisés xtzʼët chë ri koʼöl cheʼ riʼ najin wä nbʼrö pa qʼaqʼ ye kʼa ma najin ta wä nkʼat. 3 Rma riʼ Moisés xuʼij: «Yijelun na apü rkʼë ri cheʼ rchë ntzʼët achkë rma ma najin ta nkʼat». 4 Jehová xtzʼët chë Moisés najin wä njelun rkʼë ri cheʼ riʼ. Rma riʼ Dios xskʼij pä pa rnikʼajal ri cheʼ chqä xuʼij che rä: «¡Moisés! ¡Moisés!». Y ryä xuʼij: «Aweʼ yïn kʼo wä». 5 Dios xuʼij che rä: «Ma kajelun ta pä más. Tawesaj axajabʼ, rma ri ilew akuchï yït paʼäl wä kan loqʼoläj». 6 Chqä xuʼij: «Rïn yïn ri rDios atataʼ, ri rDios Abrahán, ri rDios Isaac chqä ri rDios Jacob». Taq xkʼoxaj riʼ, Moisés xküch rpaläj rma kan nuxiʼij wä riʼ nutzʼët ri kʼaslïk Dios. 7 Y Jehová xuʼij che rä: «Rïn ntzʼeton chë ri ntinamit ri kʼo pan Egipto najin nutäj poqän chqä nkʼoxan taq kikʼutun kitoʼik chwä rma ri samaj yaʼon pa kiwiʼ. Rïn ntzʼeton chë ryeʼ kowan najin nkitäj poqän. 8 Rma riʼ xkiqä qa rchë yenbʼekoloʼ pa kiqʼaʼ ri egipcios chqä rchë yenwesaj pä chpan ri tinamït riʼ y yenkʼwaj äl chpan jun jaʼäl ilew, jun ilew ri akuchï kan kʼïy leche chqä kabʼ kʼo; chpan kilew ri cananeos, ri hititas, ri amorreos, ri perizitas, ri heveos chqä ri jebuseos. 9 Rma nkʼoxan taq ri israelitas kikʼutun kitoʼik chwä chqä ntzʼeton chë ri egipcios kan itzel kinaʼoj kibʼanon kikʼë. 10 Komä, rïn xkatintäq äl rkʼë faraón. Rït xkeʼawesaj pä ri israelitas, ri ntinamit, pan Egipto». 11 Ye kʼa Moisés xuʼij che rä ri kʼaslïk Dios: «¿Yïn achkë rïn rchë yinatäq äl rkʼë Faraón rchë yebʼenwesaj pä ri israelitas chlaʼ Egipto?». 13 Ye kʼa Moisés xuʼij reʼ che rä ri kʼaslïk Dios: «Tqabʼanaʼ che rä chë yibʼä kikʼë ri israelitas y nbʼij chkë: ‹Ri kiDios ri iwatiʼt imamaʼ xirtäq pä iwkʼë rïx›. We ryeʼ nkikʼutuj chwä: ‹¿Achkë kʼa rbʼiʼ?›, ¿achkë kʼo chë nbʼij chkë?». 14 Rma riʼ Dios xuʼij reʼ che rä Moisés: «Rïn Xkibʼeʼok ri Xtinwajoʼ Rïn chë Xkinok». Chqä xuʼij: «Ya reʼ kʼo chë naʼij chkë ri israelitas: ‹Rïn Xkibeʼok xitaqö pä iwkʼë rïx›». 15 Chrij riʼ, Dios xuʼij chik jmul che rä Moisés: «Ya reʼ ri kʼo chë naʼij chkë ri israelitas: ‹Jehová, ri Dios kichë ri awatiʼt amamaʼ, rDios Abrahán, rDios Isaac y rDios Jacob, xirtäq pä iwkʼë rïx›. Ya reʼ ri nubʼiʼ rchë xtbʼä qʼij xtbʼä säq, y ke riʼ kʼo chë xtbʼix chwä kimä jontir winäq ri xkejeʼ na.