Salmos

56 Tabʼanaʼ utzil nimaläj Dios, kinatoʼ pä, rma ri winäq —ri xa ye poqlaj— xekatäj pä chwij. Chöj jun qʼij nkiʼän chʼaʼoj wkʼë chqä nkiyaʼ kʼayewal pa nwiʼ. 3 Taq rïn nxiʼij wiʼ, nkʼuqbʼaʼ nkʼuʼx chawij rït. 4 Chrij Dios —nyaʼ rqʼij rchʼaʼäl—, chrij Dios nkʼuqbʼan wä nkʼuʼx rïn; ma nxiʼin ta wiʼ. ¿Achkë ta komä nkowin nuʼän jun winäq chwä? 8 Rït kan ataman achkë najin nqʼaxaj pa nkʼaslemal rma yïn anmajnäq pä. Takʼoloʼ ryiʼal nwäch chpan rkʼojlibʼäl ayaʼ. ¿Ma ye tzʼibʼatäl ta komä riʼ chpan awuj? 9 Ri qʼij ri xtinkʼutuj ntoʼik chawä, ri itzel nkinaʼ chwä xkinkiyaʼ qa. Rïn kan nkʼuqbʼan nkʼuʼx chrij ya re: Dios kʼo wkʼë. 11 chrij Dios nkʼuqbʼan wä nkʼuʼx rïn; ma nxiʼij ta wiʼ. ¿Achkë ta komä nkowin nuʼän jun winäq chwä? 12 Nimaläj Dios, rïn ntaman chë kʼo chë nbʼän ri xintzüj chawä. Rïn xkityoxin chawä. 13 Rït xinaköl chwäch ri kamïk chqä xinatoʼ rchë ma xinchaqʼij ta waqän, rchë yibʼiyïn chwäch Dios chkikojöl ri ye kʼäs.