Mateo

3 Xbʼeqä ri qʼij chë Juan el Bautista xchäp rtzjoxik Rchʼaʼäl Dios chpan ri desierto ri kʼo Judea. 2 Ryä nuʼij wä reʼ: «¡Titzolij iwiʼ, rma Rqʼatbʼäl Tzij Dios xa naqaj chik kʼo pä!». 4 Juan nuksaj wä jun tzyäq ri bʼanon rkʼë rsmal camello y nuxïm wä rpan rkʼë jun tzʼüm. Y ri xiʼl chqä ri ryiʼal kabʼ ya riʼ wä rway. 5 Y ri winäq aj Jerusalén, ri ye kʼo Judea chqä ri ye kʼo chkipan ri tinamït ri ye kʼo chunaqaj ri raqän yaʼ Jordán yeʼapon wä rkʼë rchë nkikʼoxaj. 6 Ryä yeruʼän wä bautizar chpan ri raqän yaʼ Jordán, y ryeʼ kan nkiʼij wä kimak chkiwäch jontir. 7 Taq xtzʼët chë kʼïy fariseos chqä saduceos xeʼapon akuchï najin yeruʼän wä ri bautismos, Juan xuʼij reʼ chkë: «¡Kal kumätz! ¿Achkë xbʼin chiwä chë yixkowin yixanmäj chwäch ryowal Dios ri ya xa npë? 8 Naʼäy, tikʼutuʼ rkʼë ri yeʼiʼän chë itzolin chik iwiʼ. 9 Ma tpë ta pan ijolon niʼij reʼ pan iwan: ‹Qatat röj ya riʼ Abrahán›, rma Dios nkowin nuʼän chë yajün le abʼäj laʼ yeʼok ralkʼwal Abrahán. 10 Ri ikäj ya kʼo chik chkixkïn ri cheʼ. Rma riʼ, xa bʼa achkë cheʼ ri ma ütz ta rwäch nuyaʼ, xtchoy chqä xtyaʼöx pa qʼaqʼ. 13 Ya riʼ taq Jesús xel äl Galilea rchë xbʼä pa raqän yaʼ Jordán rchë nbʼan bautizar rma Juan. 14 Ye kʼa Juan xrajoʼ xqʼät, y xuʼij reʼ che rä: «Yït rït ri nkʼatzin yinaʼän bautizar. ¿Achkë rma xa wkʼë rïn yapë wä?». 15 Jesús xuʼij reʼ che rä: «Ma taqʼät ta chi nwäch nbʼän reʼ, rma kan ütz chë ke reʼ rbʼanik nqaʼän jontir ri nqä chwäch Dios». Rma riʼ Juan ma xqʼät ta chik. 16 Taq Jesús xbʼan bautizar, xel pä pa yaʼ. Ya riʼ taq ri kaj xjaqatäj y Juan xtzʼët ri loqʼoläj rchqʼaʼ Dios ri xqä pä pa rwiʼ Jesús achiʼel jun paloma. 17 Ya riʼ taq Dios xuʼij pä reʼ chlaʼ chkaj: «Ya reʼ Nkʼajol ri kowan nwajoʼ. Rïn kan kiʼ nkʼuʼx rkʼë».