Juan

4 Jnan iwäch tibʼanaʼ wkʼë y rïn jnan nwäch xtinbʼän iwkʼë. Achiʼel rqʼaʼ ri uva ri ma nuyaʼ ta rwäch we ma rtunun ta riʼ rkʼë ri rcheʼel, ke riʼ chqä rïx ma xtwachin ta ikʼaslemal we ma jnan ta rbʼanon iwäch wkʼë. 5 Rïn yïn ri rcheʼel uva y rïx yïx rqʼaʼ. Ri winäq ri jnan rbʼanon rwäch wkʼë y rïn jnan rbʼanon nwäch rkʼë, ya riʼ xtwachin rkʼaslemal. Rma, we xa xtijäch äl iwiʼ, rïx majun ta xkixkowin xtiʼän. 8 Ya reʼ nbʼanö chë nyaʼöx rqʼij ri Ntataʼ: chë ronojel mul twachin ri ikʼaslemal y nikʼüt chë rïx yïx ntzeqelbʼëy. 9 Achiʼel yirajowan pä ri Ntataʼ, rïn chqä yixinjowan pä; kixjeʼ kʼa chpan wajowabʼäl. 10 We rïx yeʼismajij ri npixaʼ, ronojel mul xkixinwajoʼ, achiʼel rïn nsmajin pä rpixaʼ ri Ntataʼ y rma riʼ kowan yirajoʼ. 12 Ya reʼ ri pixaʼ ri nyaʼ chiwä: tiwajoʼ iwiʼ kan achiʼel yixinjowan pä rïn. 13 Majun ta jun ri más najowan chwäch ri nuyaʼ rkʼaslemal pa kiwiʼ ramigos. 14 Rïx yïx wachiʼil we nismajij ri nbʼij chiwä. 15 Ma nbʼij ta chik nsamajelaʼ chiwä, rma jun samajel ma rtaman ta achkë nuʼän ri rajaw. Rïn wamigos nbʼij chiwä, rma ntzjon pä chiwä jontir ri nkʼoxan rïn ri rbʼin ri Ntataʼ. 17 Nbʼij reʼ chiwä rchë tiwajowalaʼ iwiʼ chiwäch. 18 We ri winäq yixkitzelaj, ya itaman chik chë naʼäy xinkitzelaj rïn. 19 Xa ta rïx jnan rbʼanon iwäch kikʼë ri winäq, ryeʼ yixkajoʼ ta, rma yïx kichiʼil ta. Ye kʼa, rma ma jnan ta rbʼanon iwäch kikʼë, xa kan xixinchaʼ yän chkikojöl ri winäq, rma riʼ ri winäq yixkitzelaj. 20 Tnatäj chiwä ri xinbʼij chiwä: ri samajel ma qʼaxnäq ta rqʼij chwäch ri rajaw. We ryeʼ kiyaʼon kʼayewal pa nwiʼ rïn, xtkiyaʼ chqä kʼayewal pan iwiʼ rïx; we ryeʼ kinman ri xinbʼij chkë, xtkinmaj chqä ri xtiʼij rïx chkë.