Isaías

15 Ya reʼ nuʼij Jehová, ri Nimaläj Qʼatöy Tzij chqä ri Loqʼoläj pa rwiʼ Israel: «We yixtzolin pä wkʼë chqä ma nikʼo ta ikʼuʼx yixyoʼen, rïx xkixkolotäj qa; rïx xtjeʼ iwchqʼaʼ we ma xtixiʼij ta iwiʼ chqä xtikʼüt chë ikʼuqbʼan ikʼuʼx». Ye kʼa rïx majun xiwajoʼ ta. 18 Ye kʼa Jehová ma nikʼo ta rkʼuʼx nyoʼen rchë nuyaʼ utzil pan iwiʼ, y xtkatäj pä rchë xkixurtoʼ rma nupoqonaj iwäch. Rma Jehová ya riʼ jun Dios ri kan pa rbʼeyal nuʼän che rä jontir. Kiʼ kikʼuʼx ri winäq ri nkiyoʼej ryä. 19 Taq ri ntinamit xtjeʼ pa tinamït Sion —Jerusalén—, kantzij na wä chë rït ma xkatoqʼ ta chik. Taq xtaräq achï rchë xtakʼutuj atoʼik che rä, ryä kan xkaturtoʼ pä; ryä xtyaʼ pä atoʼik kan xa xuʼ xkaturkʼoxaj. 20 Tapeʼ Jehová xtyaʼ tijöj poqonal pan awiʼ kan achiʼel ta kaxlanwäy xtyaʼ chawä chqä xtyaʼ qʼij chë xtyaʼöx kʼayewal pan awiʼ kan achiʼel ta yaʼ ri xtyaʼ chawä, ryä, ri Nimaläj Atijonel, ma xtrewaj ta chik riʼ chawäch. Rït kan xtatzʼët ri Nimaläj Atijonel rkʼë ri rnaqʼ awäch. 21 Y taq rït xa xtajäl abʼey rma xkabʼä pa derecha o pan izquierda, xtakʼoxaj chë chawij kʼo jun xtbʼin pä reʼ chawä: «Ya reʼ ri bʼey. Kabʼiyïn chpan». 23 Y ryä xtyaʼ pä jöbʼ pa rwiʼ ri ijaʼtz ri xtatïk chpan ri ilew riʼ, y xtuʼän chë kan kʼïy rwäch xtyaʼ ri kan xtyaʼ awchqʼaʼ taq xtatäj. Ri qʼij riʼ ri awakx xkewaʼ chkiwäch mamaʼ taq liʼon jyuʼ. 24 Y ri achij taq wakx chqä ri bʼür ri nkismajij ri ilew xtkitäj kʼïn ri xolon rkʼë acedera ri chayun chik. 25 Y taq xtbʼeqä ri qʼij taq xtbʼan ri nüm kamïk, taq xketzaq ri mamaʼ taq jay, xkejeʼ raqän taq yaʼ pa kiwiʼ ri nmaʼq chqä koköj taq jyuʼ. 26 Y, ri qʼij taq Jehová xtpïs rsokotajik rtinamit y xtknaj (xtqʼomaj) ri sokotajïk ri xuʼän ryä che rä, ri rsaqil ri Ikʼ xtuʼän achiʼel rsaqil ri Qʼij y ri rsaqil ri Qʼij xtjeʼ 7 mul más rchqʼaʼ, achiʼel ri saqïl njeʼ chpan 7 qʼij.