Santiago

1 Rïn Santiago, ri rsamajel Dios chqä rsamajel ri Ajaw Jesucristo, ntzʼibʼaj äl reʼ chiwä rïx ri 12 ijatzul ri ikran iwiʼ chwäch le Rwachʼlew: ¡Ntäq äl jun rtzil iwäch! 2 Wachʼalal, taq xkixqʼax chkipan jalajöj kʼayewal, kan tinaʼ kiʼkʼuxlal rma ri najin niqʼaxaj, 3 rma itaman chë ri ikʼuqbʼäl kʼuʼx, ri kan nqʼalajin chë kuw, xtuʼän chë xtjeʼ más kochʼonïk iwkʼë. 4 Ye kʼa tiyaʼ qʼij chë ri kochʼonïk nuʼän rsamaj pan ikʼaslemal, rchë ke riʼ rïx kan tzʼaqät taq naʼoj xkejeʼ iwkʼë chqä majun ta itzelal xtilitäj chiwij, y kan xtjeʼ jontir iwkʼë ri nkʼatzin chiwä. 5 Rma riʼ, we kʼo jun chiwä rïx nkʼatzin rnaʼoj, ttjaʼ rqʼij chukʼutxik che rä Dios, y xtyaʼöx che rä, rma ryä ma nukʼekʼej ta nuyaʼ rnaʼoj xa bʼa achkë winäq chqä taq nuʼän riʼ, ma nukraj ta chë apaläj. 6 Ye kʼa kan rkʼë kʼuqbʼäl kʼuʼx tkʼutuj wä, y ma rkʼë ta kaʼiʼ rkʼuʼx, rma ri winäq ri xa rbʼanon kaʼiʼ rkʼuʼx xa kan achiʼel rwiʼ ri mar ri nslöx rma ri kaqʼiqʼ y xa bʼa akuchï nnum wä äl. 7 Ri winäq riʼ kan ma tquʼ ta chë kʼo xtyaʼ Jehová che rä. 12 Kan kiʼ rkʼuʼx ri winäq ri rukochʼon pä ri kʼayewal, rma taq ütz xttzʼet rma Dios, xtyaʼöx ri kʼaslemal che rä, ri achiʼel jun corona, ri rtzjun Jehová chkë jontir ri kijowan pä. 13 Taq jun winäq kʼo chuxeʼ jun kʼayewal, ma tuʼij ta: «Yë Dios ri najin nyaʼö pä kʼayewal pa nwiʼ». Rma Dios majun achkë xtbʼanö che rä chë xtuʼän jun itzelal y majun bʼëy xtyaʼ ta kʼayewal pa kiwiʼ ri winäq. 14 Pa rkʼexel riʼ, kan yë jun winäq nkanun qa kʼayewal chrij taq nuyaʼ qʼij chë ri nurayij nqʼolö rchë chqä nchʼakon chrij. 15 Chrij riʼ, taq ri nurayij nbʼä rkʼamal pa ran nqä pa mak, y rma nqä pa mak, npë kamïk chrij. 17 Jontir ri jaʼäl taq spanïk chkaj yepë wä, rkʼë ri Qatataʼ ri xbʼanö jontir ri kʼo chkaj. Ryä ma achiʼel ta ri mujal, rma majun bʼëy njalatäj ta rnaʼoj. 19 Nwajoʼ chë titamaj reʼ wachʼalal: naʼäy tiyaʼ ixkïn chkë ri nkʼaj chik chqä ma chanin ta kixtzjon apü y ma chanin ta tpë iyowal, 20 rma taq jun winäq katajnäq ryowal, ma nuʼän ta ri nqä chwäch Dios. 21 Rma riʼ, ma tiʼän ta chik xa bʼa achkë tzʼil o itzel bʼanobʼäl; pa rkʼexel riʼ, xa kan tiqasaj iwiʼ chqä tiyaʼ qʼij chë Rchʼaʼäl Dios, ri nkowin yixurköl, nbʼä rkʼamal pan iwan. 22 Ye kʼa, kan tismajij ri Rchʼaʼäl Dios y ma xa xuʼ ta tikʼoxaj, rma we xa ke riʼ xtiʼän xa iyonïl xtiqʼöl qa iwiʼ kikʼë tzʼukun taq naʼoj. 23 Rma, we kʼo jun ri nukʼoxaj rchʼaʼäl Dios ye kʼa ma nusmajij ta, xa jnan rkʼë jun winäq ri nutzuʼ rachbʼäl pa jun espejo: 24 nutzuʼ riʼ, ye kʼa taq nbʼä äl, kan chanin numestaj ri achkë xtzʼët. 25 Ye kʼa ri winäq ri nunukʼuj rwäch ri tzʼaqät pixaʼ ri nyaʼö kolotajïk chqä nutäj rqʼij chsamajxik, ma xa xuʼ ta nukʼoxaj ri pixaʼ riʼ y chrij riʼ numestaj, xa kan nuʼän chqä ri samaj; ri winäq riʼ kan xtnaʼ kiʼkʼuxlal rkʼë ronojel ri xtuʼän. 26 We jun winäq nuʼij chë nuyaʼ rqʼij Dios, ye kʼa ma nuqʼïl ta raqʼ, xa najin nuqʼöl qa riʼ ryä chqä majun nkʼatzin wä ri najin nuʼän rchë nuyaʼ rqʼij Dios. 27 Chwäch ri qaDios chqä ri Qatataʼ, ya reʼ rbʼanik kan pa rbʼeyal chqä ri kan chʼajchʼöj nqayaʼ rqʼij: yeqachajij ri mebʼaʼiʼ chqä ri malkaʼn taq ixoqiʼ taq najin nkiqʼaxaj kʼayewal y nqakʼwaj jun chʼajchʼöj kʼaslemal.