1 Timoteo

3 Ya reʼ kan ütz nakʼuqbʼaʼ akʼuʼx chrij: we kʼo jun achï najin nutäj rqʼij rchë ntok ukʼwäy bʼey, kan ütz ri nrajoʼ nuʼän. 2 Rma riʼ ri ukʼwäy bʼey kʼo chë nuʼän ri ütz pa rkʼaslemal rchë ri nkʼaj chik ma yetzjon ta itzel chrij, kʼo chë xa xuʼ rkʼë jun ixöq kʼlan wä chqä nuqʼät riʼ rkʼë jontir ri yeruʼän; kʼo chë nqʼalajin chrij chë nuquʼ na ri yeruʼän, chë jontir ri yeruʼän pa rkʼaslemal kan pa rbʼeyal nuʼän che rä, yerkʼül apü nkʼaj chik chrachoch y yertoʼ, chqä kan rtaman nukʼüt ri naʼoj ye kʼo chpan rchʼaʼäl Dios. 3 Ryä kʼo chë ma nqʼabʼär ta nixta nsokon rkʼë ri yeruʼij chqä ri yeruʼän, xa kan kʼo chë nqʼalajin chrij chë ma xa xuʼ ta ri nqä chwäch ryä ya riʼ nrajoʼ chë nbʼan. Kʼo chë ma nqä ta chwäch nuʼän chʼaʼoj nixta nbʼä ran chrij päq. 4 Chqä kʼo chë kan ütz nukʼwaj bʼey chwäch rfamilia chqä chë ralkʼwal nkinmaj rtzij rma ryä yertjon 5 (rma, we jun achï ma nkowin ta nukʼwaj bʼey chwäch rfamilia, ¿achkë kʼa rbʼanik xtchajij rcongregación Dios?). 6 Chqä kʼo chë ma kʼa riʼ ta ttok cristiano, rchë ke riʼ ma xtnaʼ ta riʼ chqä rchë ma xtqʼat ta pa rwiʼ ri xqʼat yän pa rwiʼ ri Diablo. 7 Y, ryä chqä kʼo chë kan ütz ntzʼet kimä ri winäq ri ma ye kʼo ta pa congregación, rchë ke riʼ ma xtilitäj ta jun ma ütz ta chrij chqä rchë ma xtqä ta pa rqʼaʼ ri Diablo. 8 Ke riʼ chqä ri toʼonelaʼ. Ryeʼ kʼo chë nqʼalajin chkij chë kan nkiʼän ri nkiʼij o ri nbʼix chkë; kʼo chë kantzij yetzjon, kʼo chë ma nqʼax ta rwiʼ vino nkitäj nixta yejakʼäkʼ chrij päq o chrij ri nkajoʼ njeʼ kikʼë, 9 xa kan kʼo chë ronojel mul yekinmaj ri loqʼoläj taq naʼoj ri ye ewatäl chqä nkiʼän chqë chë nqakʼuqbʼaʼ qakʼuʼx chrij Dios, y kʼo chë nkiʼän riʼ rkʼë jun chʼajchʼöj conciencia. 10 Chqä, naʼäy nkʼatzin ntzʼet na we xkekowin xtkiʼän ri samaj xtyaʼöx chkë; y we majun ta jun ma ütz ta ntzjöx chkij, keʼok toʼonelaʼ. 11 Ri ixoqiʼ chqä kʼo chë nkikʼüt chë ütz nakʼuqbʼaʼ akʼuʼx chkij chqä ma tkitzʼük ta tzij. Ryeʼ kʼo chë nkiquʼ na ri yekiʼän chqä kan nkiʼän ri nkiʼij. 12 Ri toʼonelaʼ kʼo chë xa xuʼ rkʼë jun ixöq ye kʼlan wä, kʼo chë kan ütz yekitjoj kalkʼwal chqä kan ütz nkikʼwaj bʼey chwäch kifamilia. 15 rchë ke riʼ, we rïn ma xkinapon ta yän, rït natamaj achkë anaʼoj nkʼatzin nakʼüt rma yït jun chkë rfamilia Dios, ri ya riʼ rcongregación ri kʼaslïk Dios, ri columna ri achiʼel ta kʼo chkixeʼ ri kantzij taq naʼoj.