Ri xuʼän Jehová rkʼë ri mar Rojo

Taq ri faraón xkʼoxaj chë ri israelitas xeʼel äl Egipto, xtzolij riʼ rma xyaʼ qʼij rchë xebʼä äl. Rma riʼ xuʼij chkë rsoldados: «Tikʼamaʼ pä jontir chʼichʼ ri yeqakʼwaj pa chʼaʼoj y joʼ chkij. Ma ta xqayaʼ qʼij rchë xebʼä äl». Chrij riʼ ri faraón chqä rsoldados xebʼä chkij ri israelitas.

Jehová xksaj jun sutzʼ paqʼij y jun qʼaqʼ chaqʼaʼ rchë xkʼwaj bʼey chwäch rtinamit. Ryä xerkʼwaj äl ri israelitas chuchiʼ ri mar Rojo, y xuʼij chkë chë chriʼ kejeʼ wä.

Chrij riʼ, ri israelitas xkitzʼët chë ri faraón chqä rsoldados ye petenäq chkij. Rma riʼ kowan xkixiʼij kiʼ, rma kʼo wä ri mar chkiwäch y ri soldados egipcios ye kʼo wä chkij. Ya riʼ taq xkiʼij reʼ che rä Moisés: «¡Ryeʼ xkojkikamsaj! ¿Achkë rma xojawesaj pä Egipto?». Pero Moisés xuʼij chkë: «Ma tixiʼij ta iwiʼ. Tikʼuqbʼaʼ ikʼuʼx y titzʼetaʼ achkë rbʼanik nqrköl Jehová». ¿Tapeʼ chë Moisés kan rkʼuqbʼan rkʼuʼx chrij Jehová?

Chrij riʼ, Jehová xuʼij chkë ri israelitas chë tkimoloʼ ri achkë kʼo kikʼë. Ri aqʼaʼ riʼ, Jehová xuʼän chë ri sutzʼ xjeʼ chkikojöl ri egipcios chqä ri israelitas. Kikʼë ri egipcios qʼequʼn wä rbʼanon, pero kikʼë ri israelitas säq wä rbʼanon.

Chrij riʼ, Jehová xuʼij che rä Moisés chë tyakaʼ rqʼaʼ chwäch ri mar. Ya riʼ taq Jehová xuʼän chë jun aqʼaʼ xuʼän jun mamaʼ kaqʼiqʼ pa rwiʼ ri mar. Ri mar xjäch riʼ pa kaʼiʼ, y xkanaj jun bʼey pa rnikʼajal. Kan pa millón israelitas xeqʼax apü jkʼan chik che rä ri mar chkikojöl kaʼiʼ mamaʼ taq muros chë yaʼ, y ri bʼey chaqiʼj wä rbʼanon.

Ri faraón chqä rsoldados xeʼok apü chpan ri mar rchë yebʼä chkij ri israelitas. Pero Jehová xuʼän chë ri egipcios xsäch chkiwäch. Ri kichʼichʼ xel killantas. Ya riʼ taq ri soldados xkiʼij: «¡Qtzolin äl! Rma kan yë Jehová najin ntoʼö pä rtinamit».

Jehová xuʼij reʼ che rä Moisés: «Tayakaʼ aqʼaʼ chwäch ri mar». Chaq kʼateʼ, ri yaʼ xpë chkij ri egipcios. Ri faraón chqä rsoldados xekäm. Majun ta jun xkʼaseʼ qa.

Jontir ri xeqʼax jkʼan chik che rä ri mar, xkiyaʼ rqʼij Dios rkʼë jun bʼix. Ryeʼ xkiʼij: «Xkibʼixan che rä Jehová, rma xchʼakon. Ri kej chqä ri ye chʼokäl chkij xerkʼäq pa mar». Loman ri winäq najin wä yebʼixan, ri ixoqiʼ najin yexajö chqä nkisloj kipanderetas. Jontir kan kiʼ wä kikʼuʼx, rma xekolotäj pa kiqʼaʼ ri egipcios.