Ester nuköl rtinamit

Ojer qa, ri rey Nabucodonosor xeresaj pä kʼïy familias chlaʼ Jerusalén. Ester petenäq chpan jun chkë ri familias riʼ. Ryä kʼo wä Susa, jun tinamït ri kʼo Persia, y xkʼïy pä rkʼë Mardoqueo, ri rprimo. Mardoqueo nsamäj wä rkʼë Asuero, ri rey rchë Persia.

Ri rey nrajoʼ wä nuchaʼ chik jun reina. Rma riʼ, ri rmos xekikanuj qʼopojiʼ ri más jaʼäl yetzuʼun y xekikʼwaj äl rkʼë, Ester jun chkë riʼ. Chkë jontir ri qʼopojiʼ, ri rey xchaʼ Ester rchë nbʼeʼok reina. Mardoqueo xuʼij che rä Ester chë ma tuʼij ta chë judía.

Hamán, jun achï ri kowan nunaʼ riʼ, yaʼon wä pa kiwiʼ ri yetoʼö ri rey. Ryä nrajoʼ wä chë jontir yexkeʼ chwäch, pero Mardoqueo ma nuʼän ta wä riʼ. Hamán kowan xmeqʼeʼ rkʼë, rma riʼ xrajoʼ xkamsaj Mardoqueo. Taq xtamaj chë Mardoqueo jun judío, ryä xrajoʼ xerkamsaj jontir ri judíos. Ryä xuʼij reʼ che rä ri rey: «Ri judíos itzel kinaʼoj. Nkʼatzin yeqakamsaj». Asuero xuʼij: «Tabʼanaʼ ri más ütz natzʼët rït». Rma riʼ, Hamán xyaʼ jun ley ri nuʼij chë ri qʼij 13 rchë ri ikʼ adar ri winäq ütz wä yekikamsaj ri judíos. Pero Jehová najin wä nutzʼët pä jontir.

Ester ma rkʼoxan ta wä ri ley riʼ. Rma riʼ Mardoqueo xtäq äl jun copia che rä, y xuʼij äl: «Nkʼatzin yatzjon rkʼë ri rey». Ester xuʼij: «Si jun winäq ntok apü rkʼë ri rey y ma skʼin ta, xtkamsäx. Y qʼaxnäq chik 30 qʼij ma yirskʼin ta ri rey. Pero xkibʼä. Si xkirkʼüt rkʼë rcheʼ, ma xkikamsäx ta; pero si manä, xkikamsäx».

Taq Ester xok apü, ri rey xkʼüt apü rkʼë rcheʼ. Ester xjelun apü y ri rey xkʼutuj reʼ che rä: «¿Achkë nawajoʼ, Ester?». Ryä xuʼij: «Nwajoʼ chë rït chqä Hamán nibʼebʼanaʼ jun waʼin wkʼë». Chpan ri waʼin, Ester xuʼij chkë chë keʼapon rkʼë chpan jun chik waʼin ri xtuʼän chkaʼn qʼij. Chpan ri waʼin riʼ, ri rey xkʼutuj chik jmul che rä: «¿Achkë nawajoʼ?». Ryä xuʼij: «Kʼo jun ri nrajoʼ yirkamsaj rïn chqä ri nwinaq. Tabʼanaʼ utzil, kojakoloʼ». Ri rey xuʼij: «¿Achkë nrajoʼ yakamsan?». Ryä xuʼij: «Le itzel achï laʼ, Hamán». Asuero xkatäj ryowal chqä xtäq rkamsaxik Hamán.

Tapeʼ ke riʼ, nixta ri rey nkowin wä nresaj ri ley xuʼän Hamán. Ri rey xuʼän chë ri rsamaj Hamán xkanaj qa pa rqʼaʼ Mardoqueo. Rma riʼ, Mardoqueo xuʼän jun chik ley ri nuʼij chë ri judíos ütz nkitoʼ kiʼ. Ri qʼij 13 rchë ri ikʼ adar ri judíos xechʼakon chkij kikʼulel. Kan chpan qa ri qʼij riʼ, ri judíos nkinataj ri qʼij riʼ ronojel jnaʼ.