Elisabet njeʼ jun rneʼy

Ri sacerdote Zacarías chqä Elisabet, ri rxjayil, naqaj chë Jerusalén ye kʼo wä. Qʼaxnäq wä chik más 400 jnaʼ taq xeyak rmuros Jerusalén. Zacarías y Elisabet kʼïy chik jnaʼ ye kʼlan, pero majun ta wä kalkʼwal. Kʼo jun qʼij, taq Zacarías najin wä nutzüj pon pa templo, xkʼüt pä riʼ ri ángel Gabriel chwäch. Zacarías kowan xxiʼij riʼ, pero Gabriel xuʼij reʼ che rä: «Ma taxiʼij ta awiʼ. Jehová xirtäq pä rchë nyaʼ ütz taq rtzjol chawä. Elisabet, ri awixjayil, xtjeʼ jun ral y kʼo chë Juan rbʼiʼ xtayaʼ. Jehová xchaʼ Juan rchë nuʼän jun samaj ri kowan rqʼij». Zacarías xuʼij: «¿Achkë rbʼanik ntamaj si kantzij yatzjon? Ri wixjayil chqä rïn ya yoj riʼj chik rchë njeʼ jun qalkʼwal». Gabriel xuʼij: «Dios xirtäq pä rchë nyaʼ re rtzjol reʼ chawä. Pero, rma ma xinanmaj ta, ma xkakowin ta chik xkatzjon. Xttel achʼaʼäl kʼa taq xtaläx ri akʼal».

Zacarías más xyalöj pa templo. Taq xel pä, ri winäq ri najin wä nkiyoʼej xkajoʼ xkitamaj achkë xbʼanatäj. Pero Zacarías ma ntel ta wä chik rchʼaʼäl, xa xuʼ wä nusloj rqʼaʼ chkiwäch. Ya riʼ taq ri winäq xkitzʼët chë Dios kʼo jun xkʼüt pä chwäch.

Jun tiempo chrij riʼ, Elisabet xkanaj qa pa yabʼil y xjeʼ jun ral, achiʼel xuʼij ri ángel. Ri kamigos chqä kifamiliares xkibʼetzʼetaʼ ri neʼy y kiʼ kikʼuʼx xkiʼän rkʼë Elisabet. Elisabet xuʼij: «Juan rbʼiʼ xtqayaʼ». Ryeʼ xkiʼij: «Majun ta jun pan afamilia ri ke riʼ rbʼiʼ, más ütz Zacarías rbʼiʼ tiyaʼ achiʼel rtataʼ». Pero Zacarías xtzʼibʼaj reʼ: «Juan rbʼiʼ tyaʼöx». Chaq kʼateʼ, Zacarías xel chik jmul rchʼaʼäl. Y chpan jontir ri tinamït Judea, xel rtzjol jontir ri xbʼanatäj. Y ri winäq nkiʼij wä reʼ: «¿Achkë kʼa laʼ xtuʼän le akʼal laʼ taq xtkʼïy?».

Dios xyaʼ pä ri loqʼoläj rchqʼaʼ pa rwiʼ Zacarías rchë xuʼij re profecía reʼ: «¡Tqayaʼ rqʼij Jehová! Ryä xuʼij che rä Abrahán chë xttäq pä ri Mesías, jun ri xtkolö qchë. Y Juan xtbʼeʼok jun profeta ri xtuʼän apü rbʼanik rbʼey ri Mesías».

María, jun rfamiliar Elisabet, kʼo chqä jun xbʼanatäj rkʼë ri kowan rqʼij. Tqatzʼetaʼ riʼ chpan ri jun chik historia.