Juan nutzjoj chë ya xtbʼeqä ri Mesías

Juan ya riʼ wä kalkʼwal Zacarías chqä Elisabet. Jehová xuʼän profeta che rä rchë nutzjoj chë ri Mesías ya xtbʼeqä. Juan xtzjoj ya riʼ pa desierto, y ma pa taq tinamït ta nixta pa taq sinagogas. Ye kʼïy winäq aj Jerusalén chqä aj Judea yeʼapon wä rkʼë rchë nkikʼoxaj. Ryä nuʼij wä chkë chë nkʼatzin nkiyaʼ qa rbʼanik ri ma ütz ta rchë Dios kiʼ rkʼuʼx nuʼän kikʼë. Rma riʼ, ye kʼïy xkitzolij kiʼ, y Juan xeruʼän bautizar chpan ri raqän yaʼ Jordán.

Juan ma kan ta achkë wä kʼo rkʼë. Ri rtzyaq bʼanon wä rkʼë rsmal camello, y ri xiʼl chqä ri ryiʼal kabʼ ya riʼ wä rway. Ri winäq nkajoʼ wä nkitamaj más chrij ryä. Yajün ri fariseos chqä ri saduceos, ri kowan wä nkinaʼ kiʼ, xebʼä chutzʼetik. Juan xuʼij reʼ chkë: «Nkʼatzin nitzolij iwiʼ chqä nijäl inaʼoj. Rïx kowan ninaʼ iwiʼ rma niʼij chë yïx ralkʼwal Abrahán, pero ya riʼ ma ntel ta chë tzij chë yïx ralkʼwal Dios».

Ye kʼïy winäq nkikʼutuj wä reʼ che rä Juan: «¿Achkë nkʼatzin nqaʼän rchë Dios kiʼ rkʼuʼx nuʼän qkʼë?». Ryä nuʼij wä reʼ: «Si kʼo kaʼiʼ itzyaq, tiyaʼ jun rchë ri nkʼatzin che rä». ¿Ataman rït achkë rma xuʼij ya riʼ chkë? Rma Juan nrajoʼ wä chë ryeʼ tkitamaj chë nkʼatzin yekajoʼ ri winäq rchë Dios kiʼ rkʼuʼx nuʼän kikʼë.

Ryä chqä xuʼij reʼ chkë ri yekʼutun impuestos: «Ma kixleqʼan ta chqä ma keʼiqʼöl ta ri nkʼaj chik». Y chkë ri soldados xuʼij: «Ma titzʼük ta tzij chqä ma timäj ta kirajil ri nkʼaj chik».

Ri sacerdotes chqä ri levitas xebʼä chqä chutzʼetik Juan y xkiʼij reʼ che rä: «Jontir winäq nkajoʼ nkitamaj yït achkë riʼ rït». Juan xuʼij reʼ chkë: «Yïn riʼ ri kuw najin yitzjon pa desierto rchë yenkʼwaj ri winäq rkʼë Jehová, achiʼel xuʼij ri profeta Isaías».

Ri winäq nqä wä chkiwäch ri nukʼüt Juan, y ye kʼïy xkajoʼ xkitamaj si yë ryä ri Mesías. Rma riʼ Juan xuʼij reʼ chkë: «Ya npë jun ri kʼo más uchqʼaʼ pa rqʼaʼ chi nwäch rïn. Y kan ma taqäl ta chwij nkïr rxajabʼ. Rïn yixinbʼän bautizar rkʼë yaʼ, pero ryä xkixur·än bautizar rkʼë ri loqʼoläj rchqʼaʼ Dios».