Jesús nbʼeʼok ri Mesías

Juan nuʼij wä reʼ chkë ri winäq: «Ya npë jun ri kʼo más uchqʼaʼ pa rqʼaʼ chi nwäch rïn». Taq Jesús kʼo wä jun 30 rjnaʼ, xel äl Galilea rchë xbʼä pa raqän yaʼ Jordán rchë nbʼan bautizar rma Juan, rma Juan najin wä yeruʼän bautizar ri winäq chriʼ. Pero Juan xuʼij reʼ che rä: «Yït rït ri nkʼatzin yinaʼän bautizar rïn, y ma yïn ta rïn ri yibʼanö riʼ awkʼë». Jesús xuʼij: «Jehová nrajoʼ chë yït yabʼanö bautizar wchë». Rma riʼ xeʼok chpan ri raqän yaʼ Jordán y Juan xjuʼ jontir rchʼakul Jesús pa yaʼ.

Taq Jesús xel pä pa yaʼ, xuʼän orar che rä Jehová. Chaq kʼateʼ, ri kaj xjaqatäj y ri loqʼoläj rchqʼaʼ Dios xqä pä pa rwiʼ Jesús achiʼel jun paloma. Ya riʼ taq Jehová xuʼij pä reʼ chlaʼ chkaj: «Rït yït nkʼajol ri kowan nwajoʼ. Rïn kan kiʼ nkʼuʼx awkʼë».

Ri qʼij riʼ, Jesús xyaʼöx pä ri loqʼoläj rchqʼaʼ Jehová pa rwiʼ y xbʼeʼok ri Cristo o Mesías. Komä ütz wä nuchäp rsamaj Jehová chwäch le Rwachʼlew.

Taq xuʼän yän bautizar riʼ, Jesús xbʼä pa desierto y 40 qʼij xjeʼ chriʼ. Taq xtzolin pä, xbʼertzʼetaʼ Juan. Taq ryä xtzʼët chë Jesús petenäq, xuʼij: «Yë ryä ri Rkarneʼl Dios ri nresaj ri mak chkij ri winäq». Ryä xuʼij riʼ rchë yertoʼ ri winäq rchë nkitzʼët chë yë Jesús ri Mesías. ¿Ataman rït achkë xbʼanatäj rkʼë Jesús taq kʼo wä pa desierto? Jnan tqatzʼetaʼ riʼ.