Kikʼutunik ri yeskʼin ruwäch qawuj

¿Achkë ntel chë tzij taq Jesús xuʼij «ma tiquʼ ta chë xipë rchë nbʼewesaj chʼaʼoj»?

Jesús xkʼüt chë nkʼatzin ma nqaʼän ta chʼaʼoj kikʼë ri nkʼaj chik. Ye kʼa kʼo jmul xuʼij reʼ chkë ru-apóstoles: «Ma tiquʼ ta chë xipë rchë nbʼewesaj chʼaʼoj chwäch le Ruwachʼulew; rïn ma xipë ta rchë nbʼebʼanaʼ riʼ, xa kan rchë nbʼeyaʼ chʼaʼoj chikojöl. Rïn xipë rchë yenjäch ri winäq. Ri kʼajol xtkatäj chrij rutataʼ, ri qʼopoj xtkatäj chrij ruteʼ y ri albʼätz xtkatäj chrij ralteʼ» (Mat. 10:34, 35). ¿Achkë xrajoʼ xuʼij Jesús kikʼë re tzij reʼ?

Jesús ma nrajoʼ ta wä yerujäch ri familias, ye kʼa retaman wä chë ri naʼoj xerukʼüt kʼo mul kan ke riʼ wä xtkibʼebʼanaʼ. Ri nkajoʼ yeqasäx pa yaʼ rchë yeʼok rutzeqelbʼëy kʼo chë ma nkimestaj ta chë rkʼë jbʼaʼ ki-familiares ma xtqä ta chkiwäch ri xtkiʼän. Kantzij na wä chë ri winäq ri kan yë rukʼlaj o jun ru-familiar nyaʼö kʼayewal pa ruwiʼ, rkʼë jbʼaʼ kan kʼayewal xtuʼän chwäch xkerusmajij ri naʼoj xerukʼüt qa Cristo.

Le Biblia nuʼij chkë ri cristianos chë ma tkiʼän ta chʼaʼoj kikʼë ri nkʼaj chik (Rom. 12:18). Ye kʼa ri naʼoj xerukʼüt qa Jesús rkʼë jbʼaʼ nbʼeruyaʼ chʼaʼoj chkikojöl jojun familias. Ya riʼ nbʼanatäj taq jun chkë ri kʼo chpan jun familia nrajoʼ nusmajij ri naʼoj xerukʼüt qa Jesús, ye kʼa ri nkʼaj chik kan ma nkajoʼ ta nkiʼän riʼ. Rma nrajoʼ nutamaj chrij Jehová, nbʼanatäj ri xuʼij qa Jesús: chë ri winäq ri itzel xtkinaʼ che rä xa kan pa rachoch xkeʼel wä (Mat. 10:36).

Ri rutzeqelbʼëy Cristo ri ye kʼo kikʼë familiares ri jun chik ki-religión kʼo mul nkʼatzin nkitzʼët we nkajoʼ chë yë Jehová chqä Jesús kiʼ kikʼuʼx nkiʼän o yë ki-familiares. Rkʼë jbʼaʼ yechaqtiʼïx rchë nkiʼän jojun nmaqʼij ri ma nqä ta chwäch Jehová. Taq nbʼanatäj riʼ, ryeʼ kʼo chë nkitzʼët achkë xtkinmaj rutzij. Jesús xuʼij: «Ri xa yë ruteʼ o rutataʼ nrajoʼ más chwäch ri yirajoʼ rïn ma taqäl ta chrij ntok nutzeqelbʼëy» (Mat. 10:37). Ri xuʼij Jesús ma ntel ta chë tzij chë ri nkajoʼ yeʼok rutzeqelbʼëy kʼo chë ma yekajoʼ ta ri kiteʼ kitataʼ. Ri naʼoj xrajoʼ xkʼüt qa ryä ya riʼ chë nkʼatzin nqatzʼët achkë riʼ ri kʼo más rejqalen chpan qakʼaslemal. We jun qa-familiar ma nrajoʼ ta chë nqayaʼ ruqʼij Jehová, ma itzel ta nqanaʼ che rä. Ye kʼa qayaʼon chwäch qan chë ri nqayaʼ ruqʼij Jehová ya riʼ ri kʼo más ruqʼij chpan qakʼaslemal.

Kantzij na wä chë taq ri qa-familiares ma nkajoʼ ta chë nqayaʼ ruqʼij Dios, röj kan nqbʼison. Ye kʼa röj, ri rutzeqelbʼëy Cristo, kan qayaʼon chwäch qan re tzij reʼ ri xuʼij qa ryä: «Ri ma nrejqaj ta rucheʼ rchë tijöj poqonal chqä yirutzeqelbʼej ma taqäl ta chrij ntok nutzeqelbʼëy» (Mat. 10:38). Rma riʼ röj, ri cristianos, qataman chë taq nqatzeqelbʼej Jesús, xkeqïl kʼayewal, achiʼel chë ri qa-familiares ma nkajoʼ ta chë nqayaʼ ruqʼij Dios. Tapeʼ ke riʼ, röj nqayoʼej chë, rma kan ütz qanaʼoj nqaʼän kikʼë, ryeʼ xtkijäl kinaʼoj chqä xtkajoʼ xtkitamaj chrij ri nukʼüt le Biblia (1 Ped. 3:1, 2).