¿Achkë riʼ le Biblia chawäch rït?

RI NUʼIJ LE BIBLIA

«Ronojel ri Tzʼibʼatäl [chpan le Biblia] petenäq rkʼë Dios» (2 Timoteo 3:16, Traducción del Nuevo Mundo, 2019).

¿ACHKË UTZIL NUKʼÄM PÄ PA QAWIʼ RI NQATAMAJ RIʼ?

Nqïl kiqʼalajsaxik ri kʼutunïk yeqaʼän pa qakʼaslemal (Proverbios 2:1-5).

Nukʼuqbʼaʼ qakʼuʼx rma qataman chë kʼo jun nukʼwan qabʼey ronojel qʼij (Salmo 119:105).

Nukʼuqbʼaʼ qakʼuʼx rma qataman chë kan xtbʼanatäj ri qayoʼen apü (Romanos 15:4).

¿ACHKË RMA ÜTZ NQANMAJ RI NUʼIJ LE BIBLIA?

Rma re oxiʼ naʼoj reʼ:

• Majun bʼëy nkisüqʼ ta kiʼ ri naʼoj ye kʼo chpan. Le Biblia xkʼwaj jun 1,600 junaʼ rchë xkʼis rutzʼibʼaxik, y jun 40 achiʼaʼ xetzʼibʼan rchë. Tapeʼ ye kʼïy chkë ri achiʼaʼ riʼ majun bʼëy xkitamaj ta kiwäch, le Biblia ma rusuqʼun ta riʼ ri naʼoj ye kʼo chpan chqä ronojel ri tzʼibʼatäl qa chpan xa xuʼ chrij jun naʼoj ntzjon wä.

• Ri xetzʼibʼan rchë ma xkewaj ta kimak. Ri winäq ri yetzʼibʼan chrij ri kitinamit, kan ronojel bʼaʼ mul nkewaj achkë rma xchʼak ri kitinamit. Ye kʼa ri xetzʼibʼan le Biblia majun bʼëy xkewaj ta kimak nixta kimak ri kiwinaq (2 Crónicas 36:15, 16; Salmo 51:1-4).

• Ronojel ri nuʼij kan nbʼanatäj. Taq nrajoʼ na wä jun 700 junaʼ rchë npë ri Mesías, le Biblia xuʼij chë xtaläx pa Belén, jun koʼöl tinamït ri kʼo Judá (Miqueas 5:2). ¿Y akuchï xaläx wä Jesús? Kan chpan wä ri tinamït riʼ (Mateo 2:1-6).

  Ye kʼo chik nkʼaj profecías kan xetzʼaqät yän, y kan achiʼel rubʼin pä le Biblia kan ke riʼ xebʼanatäj. ¿Tapeʼ chë ya riʼ najowatäj chrij jun wuj ri petenäq rkʼë Dios? (2 Pedro 1:21).