Ri xkixtoʼö rchë ütz nikʼwaj iwiʼ kikʼë ifamilia

Taq jun kʼlaj winäq yekʼleʼ, yeʼok jun familia. Rma riʼ, tapeʼ kʼa yeʼawajoʼ na ateʼ atataʼ, komä ri winäq ri más rqʼij chawäch rït ya riʼ ri akʼlaj. Rkʼë jbʼaʼ ri ateʼ atataʼ o jojun chkë awachʼalal kʼayewal nqʼax pa kijolon ya riʼ. Ye kʼa ri naʼoj ye kʼo chpan le Biblia yatkitoʼ rchë ma njeʼ ta chʼaʼoj chiwäch kikʼë ryeʼ chqä nuʼän chë más jnan nuʼän awäch rkʼë akʼlaj.

1 JNAN KITZʼETIK TIBʼANAʼ CHKË ITEʼ ITATAʼ

RI NUʼIJ LE BIBLIA: «Tayaʼ kiqʼij ri ateʼ atataʼ» (Efesios 6:2). Xa bʼa jaruʼ ajnaʼ kʼo, ronojel mul nkʼatzin njeʼ kiqʼij ateʼ atataʼ chawäch. Ye kʼa ma tamestaj ta chë ri akʼlaj chqä nkʼatzin yertzʼët rteʼ rtataʼ. «Ri winäq ri najowan [...] ma itzel ta nunaʼ chkë ri nkʼaj chik», rma riʼ ma itzel ta tanaʼ we ri akʼlaj njeʼ rkʼë rfamilia (1 Corintios 13:4; Gálatas 5:26).

RI ÜTZ NAʼÄN

• Ma keʼaksaj ta re tzij reʼ: «Ri afamilia ronojel mul itzel yetzjon chwij» o «Ri ateʼ majun ta ütz nutzʼët ri achkë yenbʼän»

• Tatjaʼ aqʼij rchë nanaʼ ri nunaʼ akʼlaj

2 KATZJON KIKʼË AWACHʼALAL WE NATZʼËT CHË NKʼATZIN

RI NUʼIJ LE BIBLIA: «Ri achï xtyaʼ qa rteʼ chqä rtataʼ, y rkʼë rxjayil xtjeʼ wä, y xkeʼok xa jun chʼakulaj» (Génesis 2:24). Tapeʼ xixkʼleʼ yän, rkʼë jbʼaʼ iteʼ itataʼ nkinaʼ chë kʼa nkʼatzin na yixkichajij, rma riʼ chaq taqïl nkiʼij chiwä achkë kʼo chë niʼän.

Chixkaʼiʼ nkʼatzin yixtzʼetö ajän niyaʼ qʼij chkë nkiʼij chiwä achkë nkʼatzin niʼän. Taq xtiʼän riʼ, kan pa rbʼeyal tiʼij chkë achkë xiquʼ niʼän (Proverbios 15:1). Ri ma nanaʼ ta awiʼ chqä ri ma chanin ta nmeqʼeʼ awkʼë xkaturtoʼ rchë ütz nakʼwaj awiʼ kikʼë ateʼ atataʼ chqä awachʼalal. Ya riʼ chqä xtuʼän chë xkeʼaköchʼ rma yeʼawajoʼ (Efesios 4:2).

RI ÜTZ NAʼÄN:

• We natzʼët chë ri iteʼ itataʼ kowan nkitïtzʼ kiʼ pan ikʼaslemal, katzjon rkʼë akʼlaj chrij riʼ taq ma iyowal ta

• Tichʼobʼoʼ apü achkë rbʼanik xtisöl ri kʼayewal riʼ