Dios nuʼän le kaj chqä le Rwachʼlew

Jehová Dios xuʼän jontir ri yeqatzʼët chqä ri ma yeqatzʼët ta. Taq ryä majanä tuʼän jontir ri nqatzʼët, xeruʼän kʼïy ángeles. ¿Ataman rït yë achkë riʼ ri ángeles? Ryeʼ ye rsamajelaʼ Jehová. Röj ma nqkowin ta nqatzʼët Jehová nixta nqkowin yeqatzʼët ri ángeles. Ri naʼäy ángel xbʼan xtoʼ Jehová chubʼanik ri nkʼaj chik ri kʼo, achiʼel ri chʼumilaʼ chqä ri planetas. Röj yoj kʼo chpan jun chkë ri planetas riʼ ri kan jaʼäl rbʼanon: le Rwachʼlew.

Jehová xuʼän chë chwäch le Rwachʼlew ütz yejeʼ chköp chqä winäq, y xuʼän chë ri Qʼij xbʼeqʼalajin pä chwäch le Rwachʼlew. Ryä chqä xeruʼän ri mamaʼ taq jyuʼ, ri mar chqä ri raqän taq yaʼ.

¿Achkë xbʼanatäj chrij riʼ? Jehová xuʼij: «Xtinbʼän qʼayis, kotzʼiʼj chqä cheʼ». Rma riʼ chwäch le Rwachʼlew xpë kʼïy rwäch frutas, verduras chqä kotzʼiʼj. Jehová chqä xuʼän jontir kiwäch chköp: ri ye kʼo chkaj, ri ye kʼo pa yaʼ chqä ri nkiqererej kiʼ. Ryä xuʼän koköj taq chköp, achiʼel conejos, y nmaʼq taq chköp, achiʼel elefantes. ¿Achkë chköp más nqä chawäch rït?

Chrij riʼ, Jehová xuʼij reʼ che rä ri naʼäy ángel: «Tqabʼanaʼ jun winäq». Ri winäq kan ma ye jnan ta wä kikʼë ri chköp, rma xkekowin xketzjon, xketzeʼen chqä xtkiʼän orar che rä Dios. Yë ryeʼ xkechajin le Rwachʼlew chqä ri chköp. ¿Ataman rït achkë riʼ ri naʼäy achï xbʼejeʼ? Jnan tqatzʼetaʼ riʼ.