Xa xuʼ ocho winäq xekʼaseʼ qa

Noé, rfamilia chqä ri chköp xeʼok chpan ri arca. Jehová xtzʼapij rchiʼ ri arca y xchapatäj ri jöbʼ. Rma kan kʼïy jöbʼ xuʼän, kʼïy yaʼ xjeʼ chwäch le Rwachʼlew, ya riʼ xuʼän chë ri arca xbʼä pa rwiʼ yaʼ. Le Rwachʼlew eqal xnuj chë yaʼ. Jontir ri itzel taq winäq xekäm rma ma xeʼok ta chpan ri arca. Pero Noé chqä rfamilia ma xekäm ta rma ye kʼo wä chpan ri arca. ¡Xa xuʼ taquʼ ri kiʼkʼuxlal xkinaʼ rma xkinmaj rtzij Jehová!

40 qʼij chqä 40 aqʼaʼ xyaʼ chë jöbʼ. Chrij riʼ, xtaneʼ. Taq xqʼax ri tiempo, ri yaʼ eqal xqä qa. Pa rkʼisbʼäl, ri arca xkanaj pa rwiʼ jun mamaʼ jyuʼ. Pero rma kʼïy na yaʼ kʼo chwäch le Rwachʼlew, Noé chqä rfamilia kʼa xejeʼ na jun tiempo chpan ri arca.

Taq xeqʼax ri qʼij, ri yaʼ más xqä qa. Noé chqä rfamilia más jun jnaʼ xejeʼ chpan ri arca. Chrij riʼ, Jehová xuʼij chkë chë ütz yeʼel äl. ¡Ri itzel taq winäq ma ye jun ta wä chik! Ryeʼ kan kowan xetyoxin rma Jehová xuʼän chë ma xekäm ta, rma riʼ xkiʼän sacrificar jun chköp chwäch.

Ya riʼ kan xqä chwäch Jehová. Rma riʼ xuʼij chë majun bʼëy chik xtuʼän chë jun mamaʼ jöbʼ xtchüp rwäch jontir. Rchë nqʼalajin chë xtbʼanatäj riʼ, xuʼän chë xqʼalajin jun arcoíris chkaj. Ya reʼ ri naʼäy mul ri xbʼeqʼalajin jun arcoíris. ¿Kʼo jmul atzʼeton jun?

Jehová chqä xuʼij che rä Noé chqä rfamilia chë kejeʼ kalkʼwal chqä tkinujsaj le Rwachʼlew.