David chqä Goliat

Jehová xuʼij reʼ che rä Samuel: «Jät chrachoch Jesé. Jun chkë rkʼajol ryä xttok rey pa rwiʼ Israel». Rma riʼ, Samuel xbʼä. Taq xtzʼët ri naʼäy rkʼajol Jesé, xquʼ: «Ya laʼ ri kʼajol xtchaʼöx». Pero Jehová xuʼij che rä Samuel chë ma ya riʼ ta, chqä xuʼij reʼ che rä: «Rïn yikowin ntzʼët achkë kʼo pa kan ri winäq, ma xa xuʼ ta kibʼanik».

Jesé xerkʼüt chik ye seis rkʼajol. Pero Samuel xuʼij: «Jehová majun ta jun chkë ryeʼ rchaʼon. ¿Kʼa ye kʼo na más akʼajol?». Jesé xuʼij: «Kʼa kʼo na David, ri más koʼöl. Komä najin yerchajij karneʼl». Taq David xok apü, Jehová xuʼij reʼ che rä Samuel: «¡Ya laʼ ri kʼajol xinchaʼ!». Rma riʼ, Samuel xqʼäj aceite pa rjolon David rchë yë chik ryä xttok rey pa rwiʼ Israel.

Xqʼax ri tiempo, ri filisteos xkichäp chʼaʼoj kikʼë ri israelitas. Goliat, jun soldado ri mamaʼ raqän, ronojel qʼij yeryöqʼ wä ri israelitas y nuʼij wä reʼ chkë: «Titaqaʼ pä jun achï rchë nchʼeyon wkʼë. Si xkirchʼäk, röj xtq·ok imos. Y si rïn xkichʼakon, rïx xkixok qamos».

Ri rnmal David ye soldados wä. Rma riʼ, taq ryä xbʼä chuyaʼik kiway, xkʼoxaj ri nuʼij Goliat, y xuʼij: «¡Rïn xkichʼeyon rkʼë!». Ri rey Saúl xuʼij: «Rït kʼa yït koʼöl na». David xuʼij: «Jehová xttoʼö wchë».

Rma riʼ, Saúl xyaʼ che rä David jontir ri nuksaj wä ryä pa chʼaʼoj. David xuʼij: «Ma yikowin ta yichʼeyon rkʼë ya reʼ». Rma riʼ, David xkʼwaj r·honda —jun tzʼüm ri xmïl kaʼiʼ koloʼ che rä—, xbʼermoloʼ pä cinco abʼäj chuchiʼ raqän yaʼ y xjuʼ äl chpan ryaʼl. Chrij riʼ, xbʼä akuchï kʼo wä Goliat. Goliat xuʼij: «¡Rït akʼal, kajelun pä y xtatzʼët achkë xtinbʼän chawä! Xtinbʼän chë xkatok kiway chköp chqä palomas». David ma xxiʼij ta riʼ chqä xuʼij: «Rït yït petenäq rkʼë jun espada chqä rkʼë jun lanza, pero rïn yichʼeyon pa rbʼiʼ Jehová. Ma qkʼë ta röj najin naʼän wä chʼaʼoj, xa kan rkʼë Dios. Jontir ri ye kʼo aweʼ xtkitzʼët chë Jehová kʼo más rchqʼaʼ chwäch jun espada o jun lanza, y yë ryä xtbʼanö chë xtqchʼakon chiwij».

Chrij riʼ, David rkʼë jontir rchqʼaʼ xkʼäq jun abʼäj rkʼë r·honda. Rkʼë rtoʼik Jehová, ri abʼäj xbʼä kʼa nkʼäj rwäch Goliat, rma riʼ xtzaq qa y xkäm. Taq xbʼanatäj riʼ, ri filisteos xeʼanmäj äl rchë ma yekamsäx ta. ¿Y rït? ¿Nakʼuqbʼaʼ akʼuʼx chrij Jehová achiʼel xuʼän David?