Ri rey David xqä pa mak

Taq Saúl xkäm, David xbʼeʼok rey taq 30 wä rjnaʼ. Kʼïy jnaʼ chrij riʼ, ryä kʼo jun mamaʼ mak xuʼän. Kʼo jun aqʼaʼ, taq kʼo wä pa rwiʼ rpalacio, xtzʼët jun jaʼäl ixöq. Re ixöq reʼ Bat-Seba rbʼiʼ chqä kʼlan wä rkʼë Urías, jun soldado. David xtäq rkʼamarik Bat-Seba chqä xwär rkʼë. Bat-Seba xkanaj qa pa yabʼil, rma riʼ David xrajoʼ xrewaj ri xuʼän. Ryä xuʼij che rä ri kʼo pa kiwiʼ ri soldados chë tyaʼ Urías pa naʼäy taq xkebʼä pa chʼaʼoj chqä chë tkiyaʼ qa ryonïl. Urías xkäm pa chʼaʼoj. Chrij riʼ, David xkʼleʼ rkʼë Bat-Seba.

Jehová xtzʼët jontir ri xbʼanatäj. Rma riʼ, ¿achkë xuʼän? Ryä xtäq ri profeta Natán rkʼë David. Natán xuʼij reʼ che rä: «Kʼo jun bʼeyon achï ri kʼïy rkarneʼl ye kʼo, y jun achï pobre ri xa jun rkarneʼl kʼo ri kowan nrajoʼ. Ri bʼeyon xmäj rkarneʼl ti pobre». David xkatäj ryowal, rma riʼ xuʼij: «¡Ri bʼeyon riʼ kʼo chë nkamsäx!». Natán xuʼij: «¡Rït yït jnan rkʼë ri achï riʼ!». David kowan xbʼison, rma riʼ xuʼij: «Ximakun chwäch Jehová». Ri xuʼän David kʼïy poqonal xkʼäm pä pa rwiʼ ryä chqä pa rwiʼ rfamilia. Tapeʼ Jehová xyaʼ qʼij chë David kʼo poqonal xqʼaxaj, xyaʼ na qʼij che rä rchë nkʼaseʼ rma xyaʼ qa rmak chrij chqä xqasaj riʼ.

David nrajoʼ wä nuʼän jun rtemplo Jehová. Pero Jehová xchaʼ Salomón, ri rkʼajol David, rchë nuyäk ri jay riʼ. Rma riʼ David xchäp rmolik jontir ri xtkʼatzin che rä Salomón chqä xuʼij: «Ri rtemplo Jehová kʼo chë kowan jaʼäl nuʼän. Salomón kʼa kʼajol na, pero rïn xtinbʼän jontir ri nkʼatzin rchë ntoʼ». David kʼïy päq xyaʼ rchë nyak ri jay riʼ. Xerkanuj winäq ri yekowin yesamäj, xmöl oro, plata chqä xuʼän chë xkʼam pä cheʼ cedro pa tinamït Tiro chqä Sidón. Taq David ya nkäm, xyaʼ jun wuj che rä Salomón chqä xuʼij reʼ che rä: «Jehová xuʼij chwä achkë rbʼanik kʼo chë nkanaj ri templo, chqä chë tintzʼibʼaj y chë tinyaʼ chawä. Ryä xkatoʼö pä. Ma taxiʼij ta awiʼ. Kuw kapaʼeʼ y tabʼanaʼ ri samaj».