«Tismajij ri Rchʼaʼäl Dios»

1, 2. ¿Achkë rma röj, ri nqayaʼ rqʼij Jehová, kan kiʼ qakʼuʼx? (Santiago 1:22-25).

JEHOVÁ chqä Rkʼajol nkajoʼ chë röj kiʼ qakʼuʼx nqaʼän pa qakʼaslemal. Ri xtzʼibʼan ri Salmo 119:2 xuʼij: «Kan kiʼ kikʼuʼx ri winäq ri nkismajij rpixaʼ ryä, ri kan rkʼë ronojel kan nkikanuj ryä». Y Jesús chqä xuʼij: «¡Kiʼ kikʼuʼx ri nkiyaʼ kixkïn che rä rchʼaʼäl Dios chqä nkismajij!» (Luc. 11:28).

² Jontir röj, ri nqayaʼ rqʼij Jehová, kan kiʼ qakʼuʼx. ¿Achkë rma? Kʼo kʼïy rma chë ke riʼ nqanaʼ. Jun rma ya riʼ chë nqaskʼij rwäch Rchʼaʼäl Dios ronojel qʼij chqä nqatäj qaqʼij rchë nqasmajij ri nqatamaj chpan (taskʼij rwäch Santiago 1:22-25).

3. ¿Achkë utzil yeqïl taq nqasmajij ri nuʼij chpan Rchʼaʼäl Dios?

³ ¿Achkë utzil yeqïl taq nqasmajij «ri Rchʼaʼäl Dios»? Jun utzil ya riʼ chë Jehová kiʼ rkʼuʼx nuʼän qkʼë, y taq nqatamaj riʼ, röj chqä kan kiʼ qakʼuʼx nqaʼän (Ecl. 12:13). Jun chik utzil ya riʼ chë, taq nqasmajij ri nuʼij chpan Rchʼaʼäl Dios, más ütz nqakʼwaj qiʼ rkʼë qafamilia chqä nq·ok más ütz kamigos qachʼalal pa congregación. Rkʼë jbʼaʼ rït atzʼeton chë kan ya riʼ bʼanatajnäq awkʼë. Chqä, ma nqïl ta ri kʼayewal yekïl ri winäq ri ma nkiʼän ta ri nuʼij Jehová. Ya reʼ rkʼwan riʼ rkʼë ri xuʼij ri qʼatöy tzij David taq xtzjon chrij rpixaʼ Jehová chqä chrij jontir ri nuʼij chqë chë tqabʼanaʼ. Ryä xuʼij: «Ri winäq ri xkersmajij kan kʼo jun nüm utzil xtrïl» (Sal. 19:7-11).

4. ¿Achkë rma kʼo mul kʼayewal nuʼän chqawäch nqasmajij ri nuʼij Rchʼaʼäl Dios?

⁴ Rchë nqasmajij ri nuʼij chpan Rchʼaʼäl Dios, naʼäy nkʼatzin nqʼax chqawäch achkë nrajoʼ Jehová rchë nqaʼän, y rchë nqʼax ya riʼ chqawäch nkʼatzin nqaskʼij rwäch le Biblia chqä nqatjoj qiʼ chrij. Ye kʼa, kʼo mul rma kan kʼïy achkë jun nqaʼän, ma jamäl ta qawäch rchë nqaʼän riʼ. Rma riʼ chpan re tjonïk reʼ xtqatzʼët jojun naʼoj ri xkojkitoʼ rchë xtqaskʼij rwäch le Biblia ronojel qʼij. Chqä xtqatzʼët achkë xtqtoʼö rchë xtqchʼobʼon chrij ri xtqaskʼij chqä rchë xtqakanuj rbʼanik rchë xtqasmajij ri xtqatamaj.

TAJAMAʼ AWÄCH RCHË NASKʼIJ RWÄCH RCHʼAʼÄL DIOS

5. ¿Achkë samaj yeqaʼän ronojel qʼij?

⁵ Kan jontir bʼaʼ chqë röj, ri nqayaʼ rqʼij Jehová, kan kʼïy qasamaj kʼo; kʼo kʼïy ri achkë nkʼatzin nqaʼän. Yoj kʼïy nkʼatzin nqsamäj rchë nqatzüq qiʼ röj o rchë yeqatzüq qafamilia (1 Tim. 5:8). Ye kʼïy qachʼalal yekichajij kichʼalal ri ye yawaʼ o ri ya kʼo chik kijnaʼ. Y jontir nkʼatzin nqakanuj achkë nqaʼän rchë ma kan ta nqyawäj. Chqä, nkʼatzin nqaʼän ri samaj yaʼon chqë pa congregación; jun chkë riʼ ya riʼ nqaʼän jontir ri nqkowin rchë nqatzjoj le Biblia. Rma kan kʼïy achkë nkʼatzin nqaʼän, rkʼë jbʼaʼ rït naquʼ ya reʼ: «¿Achkë ütz nbʼän rchë yikowin nskʼij rwäch le Biblia ronojel qʼij, yichʼobʼon chrij ri nskʼij chqä nsmajij pa nkʼaslemal?».

6. ¿Achkë ütz naʼän rchë ma nayaʼ ta qa naskʼij rwäch le Biblia? (Tatzʼetaʼ chqä ri achbʼäl).

⁶ Jun chkë ri kʼo más rqʼij chqawäch röj ri cristianos, ya riʼ nqaskʼij rwäch le Biblia, rma riʼ nkʼatzin nqatäj qaqʼij rchë nqaʼän riʼ (Filip. 1:10). Ri wuj Salmos nuʼij chë ri winäq ri «kan bʼenäq ran chrij rpixaʼ Jehová, y paqʼij chë chaqʼaʼ nuskʼij rwäch chqä nchʼobʼon chrij» kan kiʼ rkʼuʼx (Sal. 1:1, 2). Rkʼë ya reʼ nqatzʼët chë nkʼatzin nqajäm qawäch rchë nqaskʼij rwäch le Biblia. Ye kʼa ¿achkë hora más ütz nqaʼän riʼ? Chqajujnal röj nqtzʼetö achkë hora más ütz nuʼän chqawäch. Ye kʼa nkʼatzin nqachaʼ jun hora ri nqanaʼ röj chë xtqkowin xtqaʼän riʼ ronojel qʼij. Jun qachʼalal, ri Víctor rbʼiʼ, nuʼij: «Nqä chi nwäch nskʼij rwäch le Biblia nmaqʼaʼ. Ma najin ta nbʼij chë nqä chi nwäch yikatäj yän, ye kʼa ntzʼeton chë ri hora riʼ majun kan ta achkë yiqʼatö rchë nskʼij nBiblia. Chqä majun ta na achkë najin nquʼ y nyaʼ más wan chrij ri nskʼij». ¿Ke riʼ chqä nbʼanatäj awkʼë rït? Taquʼ rij ya reʼ: «¿Achkë hora más ütz nuʼän chi nwäch rïn nskʼij rwäch le Biblia?».

KACHʼOBʼON CHRIJ RI NASKʼIJ

7, 8. Tayaʼ jun tzʼetbʼäl rchë nakʼüt achkë ma ütz ta nqaʼän taq nqaskʼij rwäch le Biblia.

⁷ Taq qataman chik achkë hora ütz nuʼän chqawäch nqaskʼij rwäch qaBiblia, komä nkʼatzin nqachajij qiʼ rchë ma xa xuʼ ta nqaskʼij rwäch. Nqaʼij riʼ rma ronojel qʼij kʼo kʼïy achkë jun nqaskʼij. Rkʼë jbʼaʼ bʼanatajnäq qkʼë chë kʼo jun xqaskʼij rwäch y chrij riʼ ma nnatäj ta chik chqë achkë xqaskʼij. ¡Ma nqajoʼ ta chë nbʼanatäj ya riʼ qkʼë taq nqaskʼij rwäch qaBiblia! Rkʼë jbʼaʼ qayaʼon chqawäch nqaskʼij jun kayoxiʼ capítulos ronojel qʼij. Kan ütz chë nqayaʼ ya riʼ chqawäch y nqatäj qaqʼij rchë nqaʼän riʼ (1 Cor. 9:26). Tapeʼ ke riʼ, ma xa xuʼ ta nkʼatzin nqaskʼij rwäch le Biblia, we röj kʼo naʼoj nqajoʼ nqatamaj qa chpan, kʼo chik jun ri nkʼatzin nqaʼän.

⁸ Tqaquʼ rij ya reʼ. Ri jöbʼ kan kowan nkʼatzin rchë yekʼïy pä ri qʼayis, ri cheʼ, ri tkoʼn chqä ri kotzʼiʼj. Ye kʼa we kan kowan chik jöbʼ nuʼän y xa pa jbʼaʼ tiempo, ri ilew xa xtrmeʼ pa yaʼ, y ya riʼ majun ta utzil xtkʼäm pä. Más ütz chë ma kan ta kowan rchqʼaʼ jöbʼ nuʼän rchë ri ilew eqal eqal nubʼïqʼ ri yaʼ y yekʼïy pä xa bʼa achkë jun chwäch. Ya reʼ nukʼüt chqawäch achkë nkʼatzin nqaʼän röj taq nqaskʼij rwäch le Biblia. Nkʼatzin nqatäj qaqʼij rchë ma chanin ta nqaskʼij rwäch, rma we xtqaʼän riʼ, rkʼë jbʼaʼ xa xtqamestaj ri naʼoj xtqaskʼij y ma xtqkowin ta xtqasmajij pa qakʼaslemal (Sant. 1:24).

9. ¿Achkë ütz nqaʼän we rkʼulun chqë chanin nqaskʼij rwäch le Biblia?

⁹ Tqabʼanaʼ che rä chë najin naskʼij rwäch le Biblia y nanaʼ chë kan chanin najin naskʼij rwäch. ¿Achkë ütz naʼän? Tatjaʼ aqʼij rchë eqal naskʼij rwäch, rchë ke riʼ xkakowin xkachʼobʼon chrij ri najin naskʼij o chrij ri xaskʼij qa. Rchë naʼän riʼ, 1) ütz nayaʼ jbʼaʼ rwiʼ ri tiempo ri naksaj rchë natjoj awiʼ chrij le Biblia rchë naksaj jojun minutos rchë yachʼobʼon chrij ri naskʼij o 2) xa xuʼ naskʼij jojun versículos y naksaj jontir ri tiempo ri nkanaj na qa chawäch rchë yachʼobʼon chkij ri versículos riʼ. Víctor, ri xqatzjoj qa chpan ri peraj 6, nuʼij: «Rïn xa xuʼ jojun versículos yenskʼij, rkʼë jbʼaʼ jun capítulo. Rma kan nmaqʼaʼ yän nskʼij rwäch nBiblia, kʼo jun qʼij chi nwäch rchë yichʼobʼon chrij ri nskʼij». Ri kʼo más rqʼij ma ya riʼ ta jaruʼ naskʼij chpan le Biblia, xa yë ri nakanuj rbʼanik rchë kʼo naʼoj natamaj qa chpan taq naskʼij rwäch (Sal. 119:97; tatzʼetaʼ ri recuadro «Kʼutunïk ri xkatkitoʼ rchë xkachʼobʼon chrij ri xtaskʼij»).

10. Tayaʼ jun tzʼetbʼäl rchë nakʼüt achkë rbʼanik nasmajij pan akʼaslemal ri nuʼij le Biblia (1 Tesalonicenses 5:17, 18).

¹⁰ Xa bʼa achkë na hora naskʼij rwäch aBiblia o xa bʼa jaruʼ na tiempo naksaj rchë naʼän riʼ, takanuj rbʼanik rchë nasmajij ri naʼoj natamaj qa. Taq xtaskʼij jun peraj rchë Rchʼaʼäl Dios, taquʼ rij ya reʼ: «¿Achkë rbʼanik nsmajij ya reʼ komä o chi nwäch apü?». Tqabʼanaʼ che rä chë xaskʼij 1 Tesalonicenses 5:17, 18 (taskʼij rwäch). Komä kachʼobʼon chrij rbʼanik yachʼö rït rkʼë Jehová. ¿Naʼij jontir ri kʼo pan awan che rä? ¿Jaruʼ mul yachʼö rkʼë ryä? ¿Achkë nbʼanö chawä chë nawajoʼ yatyoxin che rä? Rkʼë jbʼaʼ npë pan ajolon oxiʼ achkë nawajoʼ natyoxij che rä Jehová. We najäm awäch rchë naquʼ rij ya reʼ, tapeʼ xa jojun minutos, ma xa xuʼ ta xtakʼüt chë najin nakʼoxaj ri nuʼij Rchʼaʼäl Dios chawä, xa xtakʼüt chqä chë najin chik nachäp rbʼanik ri nuʼij chpan. Y si rït ronojel qʼij ke riʼ naʼän taq naskʼij rwäch aBiblia, taq xtqʼax ri tiempo más xkakowin xtaʼän ri nuʼij Jehová chawä. Ye kʼa ¿achkë ütz naʼän we natzʼët chë kʼo kʼïy achkë nkʼatzin najäl pan akʼaslemal? Tqatzʼetaʼ.

EQAL EQAL TAJALAʼ RI NKʼATZIN

11. ¿Achkë rma kʼo mul rkʼë jbʼaʼ ma kan ta nawajoʼ chik naskʼij rwäch le Biblia? Tayaʼ jun tzʼetbʼäl.

¹¹ Kʼo mul, rkʼë jbʼaʼ ma kan ta nawajoʼ chik naskʼij rwäch aBiblia rma natzʼët chë kan kʼïy nkʼatzin najäl pan akʼaslemal. Tqaquʼ rij ya reʼ. Tqabʼanaʼ che rä chë ri qʼij lunes naskʼij jojun versículos ri nkikʼüt chawäch chë nkʼatzin ma yeʼachaʼ ta ri winäq (Sant. 2:1-8). Rma rït natzʼët chë nkʼatzin yasamäj más chrij reʼ, nayaʼ chawäch najäl ri nkʼatzin. ¡Ya riʼ kan janina ütz! Chrij riʼ ri qʼij martes, naskʼij jojun textos ri nkikʼüt chawäch chë nkʼatzin naqʼät awiʼ rkʼë ri yeʼaʼij chkë nkʼaj chik (Sant. 3:1-12). Taq naskʼij ri textos riʼ nqʼalajin chawäch chë kʼo mul kʼo ma ütz ta abʼin chkë nkʼaj chik, rma riʼ komä nayaʼ chawäch nakʼuqbʼaʼ kikʼuʼx rkʼë rbʼanik yatzjon kikʼë. Ri qʼij miércoles natamaj chë nkʼatzin ma yatok ta kamigos ri ma nkiyaʼ ta rqʼij Jehová (Sant. 4:4-12). Rkʼë ya reʼ nqʼalajin chawäch chë nkʼatzin nachajij más awiʼ rkʼë ri películas yeʼatzʼët chqä ri música ri nakʼoxaj. Y ri qʼij jueves rkʼë jbʼaʼ xa kaʼiʼ chik nuʼän akʼuʼx taq naquʼ rij jontir ri nkʼatzin najäl.

12. ¿Achkë rma ma ütz ta nuʼän kaʼiʼ akʼuʼx we natzʼët chë kʼo jojun nkʼatzin najäl pan akʼaslemal? (Tatzʼetaʼ chqä ri nota).

¹² Ma tuʼän ta kaʼiʼ akʼuʼx taq natzʼët chë kʼo jojun nkʼatzin yeʼajäl, rma rkʼë ya riʼ rït nakʼüt chë naqasaj awiʼ chqä chë naskʼij rwäch le Biblia rma nawajoʼ natamaj achkë nkʼatzin naʼän o achkë nkʼatzin nayaʼ qa rbʼanik.a Tnatäj chqä chawä chë ri naʼoj ri nkʼatzin yejeʼ qkʼë eqal eqal yeqʼalajin chqij (Col. 3:10). ¿Achkë xkatoʼö rchë ma xtayaʼ ta qa rbʼanik ri nuʼij Rchʼaʼäl Dios?

13. ¿Achkë ütz naʼän rchë nasmajij ri naskʼij chpan le Biblia? (Keʼatzʼetaʼ chqä ri achbʼäl).

¹³ Jun ri xkatoʼö ya riʼ nqʼax chawäch chë, tapeʼ nawajoʼ nasmajij jontir ri naskʼij, kʼo mul ma xkakowin ta xtaʼän riʼ (Prov. 11:2). Rma riʼ ütz naʼän ya reʼ: tatzʼibʼaj jontir ri nkʼatzin nasmajij. Chrij riʼ tachaʼ achkë nawajoʼ nasmajij naʼäy y ri nkʼaj chik tayaʼ chawäch nasmajij chawäch apü. ¿Achkë rbʼanik natamaj achkë nkʼatzin nasmajij naʼäy?

14. ¿Achkë ütz nasmajij naʼäy?

¹⁴ Naʼäy tatzʼetaʼ achkë ma kʼayewal ta xtuʼän chawäch xtasmajij o achkë nkʼatzin nasmajij yän. Taq ataman chik achkë nawajoʼ naʼän, takanuj más anaʼoj chpan qapublicaciones. Rkʼë jbʼaʼ ütz naksaj ri Índice de las publicaciones Watch Tower o ri Guía de estudio para los testigos de Jehová. Kachʼö rkʼë Jehová y taʼij che rä chë tbʼanaʼ chawä chë narayij naʼän ri ayaʼon chawäch chqä chë tyaʼ pä awchqʼaʼ rchë naʼän riʼ (Filip. 2:13). Chrij riʼ tasmajij ri naʼoj xatamaj qa. Taq xtatzʼët ri utzil nawïl taq nasmajij ri natamaj, kan xtawajoʼ chqä xtaʼän nkʼaj chik ri ayaʼon chawäch. Y rkʼë jbʼaʼ ya riʼ xkatoʼö rchë ma kʼayewal ta chik xtuʼän chawäch xtajäl nkʼaj chik ri nkʼatzin.

TAYAʼ QʼIJ CHË RCHʼAʼÄL DIOS NUSMAJIJ AKʼASLEMAL

15. ¿Achkë nbʼanö chë röj ma yoj jnan ta kikʼë nkʼaj chik winäq ri nkiskʼij chqä le Biblia? (1 Tesalonicenses 2:13).

¹⁵ Ye kʼo jojun winäq nkiʼij chë kan kʼïy chik mul kiskʼin rwäch kiBiblia. Ye kʼa ¿nkinmaj komä ri naʼoj ye kʼo chpan chqä nkismajij pa kikʼaslemal? Manä, kʼïy chkë ryeʼ ma ke riʼ ta nkiʼän. Ye kʼa röj, ri nqayaʼ rqʼij Jehová, nqakʼän qanaʼoj chkij ri cristianos ri xejeʼ pa naʼäy siglo, rma chqawäch röj le Biblia «kan rchʼaʼäl Dios». Rma riʼ nqatäj qaqʼij rchë nqasmajij ri naʼoj ye kʼo chpan (taskʼij rwäch 1 Tesalonicenses 2:13).

16. ¿Achkë xtqtoʼö rchë xtqasmajij ri nuʼij chpan Rchʼaʼäl Dios?

¹⁶ Kʼo mul, rkʼë jbʼaʼ kʼayewal nuʼän chqawäch nqaskʼij rwäch Rchʼaʼäl Dios chqä nqasmajij ri naʼoj ye kʼo chpan. Rkʼë jbʼaʼ nqanaʼ chë ma njameʼ ta qawäch rchë nqaskʼij rwäch. O rkʼë jbʼaʼ kan chanin nqaskʼij rwäch y majun ta nkanaj qa pa qajolon. O rkʼë jbʼaʼ ma nqajoʼ ta chik nqaskʼij rma nqatzʼët chë kan kʼïy achkë nkʼatzin nqajäl. Xa bʼa achkë na nbʼanö chawä rït chë kʼayewal nuʼän chawäch nasmajij ri nuʼij le Biblia, Jehová xkaturtoʼ pä rchë xkakowin xtaʼän riʼ. Takʼamaʼ ri toʼïk nuyaʼ ryä chawä y ma xa xuʼ ta takʼoxaj ri nuʼij le Biblia, xa kan tasmajij pan akʼaslemal. Taq más xtaskʼij rwäch Rchʼaʼäl Dios chqä xtasmajij ri naʼoj ye kʼo chpan, más kiʼ akʼuʼx xtaʼän (Sant. 1:25).