6 millones winäq ye kamnäq rma COVID | ¿Achkë nuʼij le Biblia chrij riʼ?

Ri Organización Mundial de la Salud (OMS), nuʼij chë pa 23 de mayo, 2022 ye kamnäq wä chik jun 6.27 millones winäq rma ri COVID-19. Ye kʼa pa 5 de Mayo, 2022 ri OMS xuʼij chë rkʼë jbʼaʼ kan más na chik winäq xkekäm. Chqä xuʼij chë chkipan ri junaʼ 2020 chqä 2021, «xekäm jun 14.9 millones winäq rma ri COVID-19 o rma xnmatäj kiyabʼil rma ri COVID». ¿Achkë nuʼij le Biblia chrij riʼ?

Le Biblia xuʼij chë xkejeʼ itzel taq yabʼil

•  Jesús xuʼij chë chkipan «ri rukʼisbʼäl taq qʼij» xkejeʼ «itzel taq yabʼil» (2 Timoteo 3:1; Lucas 21:11, Traducción en lenguaje actual).

Re profecía reʼ ri xuʼij qa Jesús kan najin nbʼanatäj komä. Rchë natamaj más chrij riʼ, taskʼij ri peraj «¿Achkë nkʼutü chë yoj kʼo chik chkipan ri rukʼisbʼäl taq qʼij?».

Le Biblia nukʼuqbʼaʼ qakʼuʼx

•  «Ri Dios ri nkʼuqbʼan qakʼuʼx [...] nukʼuqbʼaʼ qakʼuʼx taq nqqʼax chwäch xa bʼa achkë kʼayewal» (2 Corintios 1:3, 4).

Ye kʼïy winäq ri kamnäq äl jun kichʼalal kitzʼeton chë le Biblia kan nukʼuqbʼaʼ kikʼuʼx. Taskʼij ruwäch ri peraj «¿Achkë xkatoʼö rchë ma xtchʼakon ta ri bʼis chawij rma xkäm jun awachʼalal?» chqä ri peraj «Toʼïk chkë ri xkäm jun kichʼalal».

Le Biblia nuʼij achkë rubʼanik xkesol jontir ri kʼayewal

•  «Tpë kʼa ri Aqʼatbʼäl Tzij. Tbʼan kʼa ri araybʼal, achiʼel chlaʼ chkaj, ke riʼ chqä chwäch le Ruwachʼlew» (Mateo 6:10).

Xa jbʼaʼ chik apü, «ri Ruqʼatbʼäl Tzij Dios» xtuʼän chë xttzʼaqät re tzij reʼ: «Majun ta chik jun winäq xtbʼin: ‹Yïn yawaʼ›» (Marcos 1:14, 15; Isaías 33:24). Rchë natamaj más chrij re qʼatbʼäl tzij reʼ chqä chrij ri samaj xtuʼän, tatzʼetaʼ ri video ¿Kʼo jun komä ruqʼatbʼäl tzij Dios?

Röj nqajoʼ chë rït natamaj más chrij ri nuʼij le Biblia. Ke riʼ, rït chqä a-familia xtitamaj achkë utziläj taq naʼoj ye kʼo chpan chqä xtitamaj achkë rutzjun Dios chqë ri kan xtkʼuqbʼaʼ ikʼuʼx.