¿Achkë ntel chë tzij yatok cristiano? | ¿Achkë nuʼij le Biblia chrij riʼ?

Kan ye kʼïy winäq chwäch le Rwachʼlew nkiʼij chë ye cristianos. Ye kʼa kan ma ütz ta kinaʼoj nkiʼän kikʼë ri nkʼaj chik. Ye kʼo jojun xa xuʼ ryeʼ nkiquʼ qa kiʼ, yetzʼukü tzij chqä yeleqʼan, o itzel kinaʼoj nkiʼän. Ye kʼo chik jojun nkikanuj rkʼexel kikʼlaj. Jontir reʼ nuʼän chë ye kʼo winäq nkiquʼ achkë ntel chë tzij yatok jun cristiano.

¿Achkë qäs ntel chë tzij yatok jun cristiano?

Chaq bʼaʼ naʼij chë yït jun cristiano, ye kʼa kʼo más nkʼatzin naʼän rchë nakʼüt chë kan ke riʼ. Le Biblia nuʼij chë jun cristiano ya riʼ jun ri nutzeqelbʼej rij Jesucristo (Hechos 11:26). Kan yë Jesús xbʼin qa reʼ: «We kan xtiʼän ri xinkʼüt chiwäch, xtqʼalajin chiwij chë kantzij yïx ntzeqelbʼëy» (Juan 8:31). Qataman chë majun ta jun ri kan xtkowin xtuʼän jontir ri xuʼij qa Jesús. Tapeʼ ke riʼ, jun cristiano nutäj rqʼij rchë nunmaj chqä nusmajij ri xkʼüt qa Jesús. Tqatzʼetaʼ jojun ri xkʼüt qa ryä.

Ri cristianos kantzij yejowan

Jesús xuʼij qa reʼ: «Nyaʼ re jun kʼakʼakʼ pixaʼ reʼ chiwä: tiwajowalaʼ iwiʼ chiwäch; achiʼel wä yixinjowan pä rïn, ke riʼ chqä tibʼanaʼ rïx, tiwajowalaʼ iwiʼ chiwäch. Ke riʼ xtqʼalajin chkiwäch jontir chë rïx yïx ntzeqelbʼëy, we xtiwajowalaʼ iwiʼ chiwäch» (Juan 13:34, 35).

Ri xuʼän Jesús: Jesús kantzij xerajoʼ ri winäq, ye bʼeyomaʼ o manä chqä xa bʼa achkë kijatzul. Xerkʼachojsaj ri yawaʼiʼ, xertzüq ye kʼïy winäq chqä xyaʼ rkʼaslemal pa kamïk xa kimä ryeʼ (Mateo 14:14-21; 20:28).

Ri nkiʼän ri cristianos: Ryeʼ nkikʼüt chë kantzij yekajoʼ ri winäq. Rma riʼ yespan, ma yekichaʼ ta ri winäq chqä yekyun. Ryeʼ chqä ma nkikʼewaj ta yekitoʼ ri nkʼatzin kitoʼik tapeʼ kwest nuʼän chkiwäch (1 Juan 3:16).

Ri cristianos ma yeleqʼan ta chqä ma yetzʼukü ta tzij

Jesús xuʼij qa reʼ: «Rïn yïn [...] ri kantzij» (Juan 14:6).

Ri xuʼän Jesús: Jesús ma xtzʼük ta tzij rkʼë ri xuʼij chqä ri xuʼän. Majun bʼëy xerqʼöl ta ri nkʼaj chik xa xuʼ rchë nkiʼän ri nrajoʼ ryä o rchë nkinmaj jun ri ma tzij ta. Ryä xtamatäj rwäch rma ronojel mul tzij xtzjon, tapeʼ kʼo mul xrïl kʼayewal xa rma xuʼän riʼ (Mateo 22:16; 26:63-67).

Ri nkiʼän ri cristianos: Ryeʼ ma nkitzʼük ta tzij chqä ma yeleqʼan ta. Nkitöj impuestos chqä ma yeqʼoran ta pa kisamaj (Romanos 13:5-7; Efesios 4:28). Ma yekiqʼöl ta ri nkʼaj chik rchë kʼo ütz nkïl ryeʼ, ma nkiʼän ta trampa pan escuela rkʼë kiʼexámenes nixta nkitzʼük tzij taq najin nkikanuj kisamaj o chkipan nkʼaj chik wuj (Hebreos 13:18).

Ri cristianos ütz kinaʼoj nkiʼän kikʼë jontir

Jesús xuʼij qa reʼ: «Kixampä wkʼë jontir rïx ri niʼän kuw taq samaj chqä ri kʼo nmaʼq taq ejqaʼn chiwij, y rïn xkixintoʼ. Kixjeʼ chuxeʼ wejqaʼn y titamaj chwij rïn, rma rïn ma qʼaqʼ ta njolon chqä ma nnaʼ ta wiʼ. Wkʼë rïn xkixuxlan. Rma ri wejqaʼn rïn ma kʼayewal ta rkʼwaxik chqä ma al ta» (Mateo 11:28-30).

Ri xuʼän Jesús: Jesús kan ütz rnaʼoj xuʼän kikʼë ri nkʼaj chik, rma riʼ jaʼäl xkinaʼ xejeʼ rkʼë. Ryä chqä xqä chwäch xjeʼ kikʼë ri akʼalaʼ, xkʼuqbʼaʼ kikʼuʼx ri yebʼison chqä majun ta jun winäq xqasaj rqʼij (Marcos 10:13-15; Lucas 9:11).

Ri nkiʼän ri cristianos: Ryeʼ kan ütz kinaʼoj nkiʼän rkʼë xa bʼa achkë winäq (Efesios 4:29, 31, 32). Yechʼpü chkij ri nkʼaj chik y nkikanuj rbʼanik rchë yekitoʼ (Gálatas 6:10).

Ri cristianos ma nkikanuj ta rkʼexel kikʼlaj

Jesús xuʼij qa reʼ: «Ri rtnun qa Dios, majun ta jun achï tjachö rchë» (Marcos 10:9).

Ri xuʼän Jesús: Tapeʼ Jesús ma xkʼleʼ ta, xuʼij chkë ri kʼlan taq winäq chë ma tkikanuj ta kikʼexel (Mateo 19:9). Ryä chqä xuʼij chkë achkë rkʼë jbʼaʼ nbʼanö chë nkijäch kiʼ (Mateo 5:28).

Ri nkiʼän ri cristianos: Ryeʼ ma nkiʼän ta jun ri xa nuqasaj rqʼij kikʼlanen (Hebreos 13:4). Ri achï chqä ri ixöq nkikʼüt chkiwäch chë nkajoʼ kiʼ chqä ma nkiqasaj ta kiqʼij chkiwäch (Efesios 5:28, 33).