Ri qa-canal pa televisión napon kʼa akuchï ri Internet ma napon ta

Kan kiʼ qakʼuʼx nqayoʼej apü ronojel ikʼ rchë yeyaʼöx ri programas chqä ri videos pa JW Broadcasting. Ye kʼa, ye kʼïy chkë ri qachʼalal ri ye kʼo África ma yekowin ta nkitzʼët ri videos riʼ pa Internet. ¿Achkë rma?

Rma chlaʼ África ma kan ta nawïl Internet. Y taq nawïl, majun ruchqʼaʼ chqä kan jotäl rajäl. Kʼo jun qʼij, jun ukʼwäy bʼey rchë circuito ri kʼo Madagascar xbʼä pa jun Internet rchë xbʼeruqasaj ri programa JW Broadcasting. Ryä kʼo wä chë xtöj 16 dólaresa (jun 120 quetzales) rchë xqasaj ri programa riʼ. ¡Reʼ kan mamaʼ päq!, rma ye kʼïy winäq ma nkichʼäk ta reʼ pa jun semana.

Tapeʼ kʼo ri kʼayewal riʼ, pa millón chkë winäq ri ye kʼo África yekowin nkitzʼët ri JW Broadcasting y ma nkiksaj ta Internet. ¿Achkë rubʼanik nbʼanatäj reʼ?

Pa junaʼ 2017, ri winäq ri ye kʼo África subsahariana yekowin nkitzʼët ri JW Broadcasting pa televisión rma ri satélite. Re canal rchë televisión reʼ nqʼaxäx pa 16 chʼaʼäl ronojel qʼij, paqʼij chë chaqʼaʼ. Y reʼ ma tojon ta.

Rchë nbʼanatäj reʼ ri testigos de Jehová nkiqäj jun canal rchë televisión, y ke riʼ yekowin nkiqʼaxaj ri programas rma ri satélite. Ri señal rchë ri satélite napon pa jun 35 tinamït rchë África subsahariana. Y ronojel ikʼ ntok 12,000 dólares (jun 90,000 quetzales) chwäch reʼ. Jojun mul, taq kʼo chë nqʼaxäx ri programa kan chpan ri qʼij riʼ, kʼo chë ntoj chik jbʼaʼ rchë nqaj jun chik canal. Y rma riʼ kan pa mil chkë winäq yekowin nkitzʼët ri nimamoloj rchë oxiʼ qʼij, chqä nkitzʼët ri moloj ri nbʼan taq napon jun ukʼwäy bʼey ri taqon pä rma ri sucursal.

Ye kʼïy winäq, testigos o ma testigos ta, nkitzʼët re canal reʼ chqä. Ye kʼa ye kʼïy qachʼalal testigos de Jehová ma yekowin ta nkilöqʼ jontir ri chpobʼäl rchë nkitzʼët ri programas. Rma riʼ xeyaʼöx 3,670 aparatos pa salones del Reino rchë nkijïkʼ ri señal rchë ri satélite. Ke riʼ, ri qachʼalal yekowin nkitzʼët ri JW Broadcasting. We ri Salón del Reino ya kʼo chik jun televisor chpan o jun proyector, reʼ xa xuʼ nksäx jbʼaʼ ma 70 dólares (jun 525 quetzales) chwäch. Ye kʼa we majajün ta na, reʼ ntok 530 dólares (jun 3,975 quetzales) chwäch.

Ri qachʼalal janina yetyoxin rma re canal reʼ. Chlaʼ Camerún, jun qachʼalal ukʼwäy bʼey nuʼij reʼ: «Chwäch n-familia re canal reʼ kan achiʼel ta ri maná xyaʼöx chkë ri israelitas pa tzʼiran ulew». Odebode, jun qachʼalal aj Nigeria, nuʼij: «Oxiʼ mul pa jun semana nqamöl qiʼ rkʼë n-familia rchë nqatzʼët re canal reʼ. Ri walkʼwal kan nkiyoʼej ri qʼij riʼ. Y ma xa xuʼ ta riʼ, jojun mul kan yë ryeʼ yekʼutun rchë nqayaʼ ri canal riʼ chkiwäch». Rose, aj Nigeria, nuʼij reʼ: «Rïn kan xa xuʼ wä noticias yentzuʼ. Y taq nbʼän riʼ kan chanin npë nyowal chqä kan njoteʼ n-presión. Ye kʼa komä, ri más ntzuʼ y kan nqä chi nwäch, ya riʼ ri canal JW. Re canal reʼ kan nuyaʼ utziläj taq naʼoj chqä nuʼän chwä chë ma itzel ta nnaʼ wan. Kan janina kiʼ nkʼuʼx rkʼë re canal reʼ. ¡Kan ntyoxij chë rä Jehová rma ri utziläj spanïk ruyaʼon pä chwä!».

Jun ukʼwäy bʼey rchë circuito ri kʼo Mozambique nuʼij chqë chë chkipan ri congregaciones ri yerubʼechʼaʼej xeyaʼöx ri aparatos chkipan ri Salones del Reino. Ke riʼ ri qachʼalal yekowin nkitzʼët ri canal JW rma napon ri señal rchë ri satélite chriʼ. Ri qachʼalal riʼ, taq majanä nchapatäj ri kimoloj, ryeʼ ye kʼo chik apü jun hora o más jbʼaʼ rchë nkitzuʼ ri JW Broadcasting.

Pa junaʼ 2019, chlaʼ pa tinamït Johannesburgo (Sudáfrica), xksäx re canal reʼ chpan ri asamblea internacional rchë xekowin xkiqʼaxaj pa nueve lugares más ri tzijonem ri xyaʼ ri Molaj Ukʼwäy Bʼey. Sphumelele, jun qachʼalal ri ntoʼon chpan ri departamento rchë Broadcasting ri kʼo pa sucursal rchë Sudáfrica, nuʼij: «Rubʼanon qa nqajtobʼaʼ wä ri tzijonem pa Internet. Rchë nqaʼän riʼ, ma xa xuʼ ta nkʼatzin njeʼ kʼïy ruchqʼaʼ ri Internet, nkʼatzin chqä nqalöqʼ kʼïy Internet rchë nqrqʼiʼ apü. Rma komä ri canal nujïkʼ ri señal rchë ri satélite, más chanin napon y ma kʼïy ta päq nksäx che rä».

Rma ri ispanik chqä ri ikchaj niyaʼ pä, ri qachʼalal aj África yekowin nkitzʼët JW Broadcasting rkʼë ri señal rchë ri satélite. Kan janina nqatyoxij chiwä rma ri spanïk chqä ri kchaj nitäq pä chqë chkipan jalajöj rubʼanik ri nqïl chpan ri donate.jw.org.