Tatjaʼ aqʼij rchë naquʼ kij ri nkʼaj chik. Rchë naʼän riʼ, ütz nakʼutuj qa reʼ chawäch: «¿Nkitzʼët ri nkʼaj chik chë rïn nquʼ kij ryeʼ chqä chë ma xa xuʼ ta ri nwajoʼ rïn ya riʼ nwajoʼ chë nbʼan? ¿Tamatäl nwäch chë ri nwajoʼ rïn kan ya riʼ kʼo chë nbʼan chqä chë majun ta jun ntok wkʼë? ¿O nyaʼ qʼij chkë rchë nkiʼij ri nkiquʼ y nbʼän ri nkajoʼ ryeʼ?». We xtqaʼän riʼ, más jnan xtuʼän qanaʼoj rkʼë Jehová chqä Jesús. Taq kʼo yejalatäj pa qakʼaslemal, nkʼatzin kan pa rbʼeyal nqchʼobʼon. Rkʼë jbʼaʼ chaq kʼateʼ xtqïl jun qayabʼil, xtkʼis qarajil o kʼo kʼayewal xtqïl kimä ri qʼatbʼäl taq tzij. Taq nqïl jontir ya reʼ njalatäj qakʼaslemal chqä yeqïl nkʼaj chik kʼayewal (Ec 9:11). Yajün taq njal jun qasamaj chpan rtinamit Jehová nuʼän chë kʼayewal nqanaʼ. Röj xtqkowin xtqapabʼaʼ qiʼ chkiwäch we yeqasmajij reʼ kajiʼ naʼoj reʼ: 1) nqʼax chqawäch chë kʼo ma nqkowin ta yeqajäl, 2) nqaquʼ rij achkë nqkowin nqaʼän komä y chqawäch apü, 3) nqayaʼ qan chrij ri ütz yebʼanatäj pa qakʼaslemal y 4) yeqatoʼ ri nkʼaj chik. w23.07 22 peraj 7, 8

Taq Daniel kʼa kʼajol na, ri babilonios xkikʼwaj äl näj che rä rachoch chqä rtinamit. Ye kʼa tapeʼ kʼa kʼajol na, ryä kan ütz xtzʼet kimä ri winäq. Ri babilonios kan ütz xkitzʼët Daniel rma ryä kan jaʼäl wä ntzuʼun chqä petenäq wä chpan jun familia ri kan kʼo rqʼij chpan ri tinamït Israel (1Sa 16:7). Rma riʼ xkajoʼ xkitjoj rchë njeʼ rqʼij chpan ri tinamït Babilonia (Da 1:3, 4, 6). Jehová kowan xrajoʼ Daniel rma ri rnaʼoj xkʼüt. Nqaʼij riʼ rma taq Daniel kʼo wä jun 20 rjnaʼ, Jehová xnataj Daniel taq xertzjoj jojun utziläj taq rsamajelaʼ, achiʼel Noé chqä Job; achiʼaʼ ri kan kʼïy jnaʼ xkiyaʼ rqʼij Dios (Gé 5:32; 6:9, 10; Job 42:16, 17; Eze14:14). Daniel kʼïy jnaʼ xkʼaseʼ chqä kowan xajowäx rma Jehová (Dan. 10:11, 19). w23.08 2 peraj 1, 2

Taq rït nawajoʼ nalöqʼ jun awachoch, rkʼë jbʼaʼ xtawajoʼ xtatzʼët jontir chrij chqä rpan ri jay riʼ. Ke riʼ chqä nkʼatzin nqaʼän taq nqaskʼij chqä nqatjoj qiʼ chrij qaBiblia. We kan chaninäq xtqaskʼij rwäch, xa xuʼ xtqatamaj qa jojun naʼoj chpan, ntel che tzij, xa xuʼ «ri naʼoj ri xekʼut pa naʼäy» chqawäch chrij Dios (Heb 5:12). Más ütz nqaʼän achiʼel nqaʼän rkʼë jun jay ri nqajoʼ nqalöqʼ, nkʼatzin nqatzʼët «jontir ri kʼo chpan». Rchë kan ütz nqatjoj qiʼ chrij le Biblia, nkʼatzin nqatzʼët achkë rbʼanik kikʼwan kiʼ ri naʼoj ye kʼo chpan. Ma xa xuʼ ta nkʼatzin nqanmaj jun naʼoj, xa kan nkʼatzin chqä nqatzʼët achkë rma nqanmaj ri naʼoj riʼ. Rchë nqʼax chqawäch achkë qäs nukʼüt Rchʼaʼäl Dios, nkʼatzin nqanukʼuj kiwäch ri naʼoj ye kʼo chpan ri más kʼayewal yeqʼax. Ri apóstol Pablo xuʼij chkë ri cristianos chë tkitjoj kiʼ chrij Rchʼaʼäl Dios rchë nqʼax más chkiwäch jontir ri naʼoj ye kʼo chpan. We ryeʼ xtkiʼän riʼ, kan xtkʼuqeʼ kikʼuʼx pa rchʼaʼäl Dios (Ef 3:14-19). Röj chqä ke riʼ nkʼatzin nqaʼän. w23.10 18 peraj 1-3