Taq rït nawajoʼ nalöqʼ jun awachoch, rkʼë jbʼaʼ xtawajoʼ xtatzʼët jontir chrij chqä rpan ri jay riʼ. Ke riʼ chqä nkʼatzin nqaʼän taq nqaskʼij chqä nqatjoj qiʼ chrij qaBiblia. We kan chaninäq xtqaskʼij rwäch, xa xuʼ xtqatamaj qa jojun naʼoj chpan, ntel che tzij, xa xuʼ «ri naʼoj ri xekʼut pa naʼäy» chqawäch chrij Dios (Heb 5:12). Más ütz nqaʼän achiʼel nqaʼän rkʼë jun jay ri nqajoʼ nqalöqʼ, nkʼatzin nqatzʼët «jontir ri kʼo chpan». Rchë kan ütz nqatjoj qiʼ chrij le Biblia, nkʼatzin nqatzʼët achkë rbʼanik kikʼwan kiʼ ri naʼoj ye kʼo chpan. Ma xa xuʼ ta nkʼatzin nqanmaj jun naʼoj, xa kan nkʼatzin chqä nqatzʼët achkë rma nqanmaj ri naʼoj riʼ. Rchë nqʼax chqawäch achkë qäs nukʼüt Rchʼaʼäl Dios, nkʼatzin nqanukʼuj kiwäch ri naʼoj ye kʼo chpan ri más kʼayewal yeqʼax. Ri apóstol Pablo xuʼij chkë ri cristianos chë tkitjoj kiʼ chrij Rchʼaʼäl Dios rchë nqʼax más chkiwäch jontir ri naʼoj ye kʼo chpan. We ryeʼ xtkiʼän riʼ, kan xtkʼuqeʼ kikʼuʼx pa rchʼaʼäl Dios (Ef 3:14-19). Röj chqä ke riʼ nkʼatzin nqaʼän. w23.10 18 peraj 1-3

Le Biblia yertzjoj nkʼaj chik winäq ri ma xikʼo ta kikʼuʼx xeyoʼen. Rït ütz nayaʼ chawäch nanukʼuj rij kikʼaslemal ri winäq riʼ. Jun tzʼetbʼäl, David kʼa kʼajol na taq xchaʼöx rchë ntok qʼatöy tzij pa rwiʼ Israel, ye kʼa xyoʼej na kʼïy jnaʼ rchë xok qʼatöy tzij. Simeón chqä Ana xkiyaʼ rqʼij Jehová loman xkiyoʼej ri qʼij taq xtkitzʼët ri Mesías (Lu 2:25, 36-38). Taq xtanukʼuj rij kikʼaslemal ri winäq riʼ, takʼutuj qa reʼ chawäch: «¿Achkë xtoʼö rchë re winäq reʼ rchë ma xikʼo ta rkʼuʼx xyoʼen? ¿Achkë utzil xrïl rma xkʼüt ri naʼoj riʼ? ¿Achkë rbʼanik nkʼän nnaʼoj rïn chrij?». Chqä, kʼo kʼïy nqatamaj qa chkij ri winäq ri xa xikʼo kikʼuʼx xeyoʼen (1Sa 13:8-14). Ütz nakʼutuj qa reʼ chawäch: «¿Achkë rma xa xikʼo kikʼuʼx xeyoʼen? ¿Achkë kʼayewal xkïl rma xkiʼän riʼ?». w23.08 25 peraj 15

Ri apóstol Pedro ma xyaʼ ta qʼij chë kʼo ta jun xbʼanö che rä chë xyaʼ qa Jesús. Jun tzʼetbʼäl. Kʼo jun qʼij, Jesús kʼo jun xuʼij chkë rtzeqelbʼëy ri ma xqʼax ta chkiwäch (Jn 6:68). Ye kʼïy xkiyaʼ qa Jesús y ma xkiyoʼej ta na chë ryä nuqʼalajsaj ri naʼoj riʼ chkiwäch. Ye kʼa Pedro ma ke riʼ ta xuʼän. Ryä xuʼij reʼ chkiwäch jontir: «Xa xuʼ rït yatzjü ri kʼaslemal ri majun bʼëy xtkʼis ta». Jesús rtaman wä chik chë Pedro chqä ri nkʼaj chik rtzeqelbʼëy xa xtkiyaʼ qa. Tapeʼ ke riʼ, ryä xuʼij che rä Pedro chë rkʼuqbʼan rkʼuʼx chrij chqä chë jnan chik jmul xtuʼän rwäch rkʼë (Lu 22:31, 32). Jesús rtaman wä chë ryä nrajoʼ nuʼän ri ütz, ye kʼa ri rchʼakul «xa majun rchqʼaʼ ta» (Mr 14:38). Rma riʼ, yajün taq Pedro xuʼij chë ma rtaman ta rwäch, Jesús kʼa xkʼuqbʼaʼ na rkʼuʼx chrij. Taq xkʼasöx yän pä chkikojöl ri kamnaqiʼ, ryä xkʼüt riʼ chwäch Pedro, rkʼë jbʼaʼ taq ryonïl kʼo (Mr 16:7; Lu 24:34; 1Co 15:5). Kantzij na wä chë ya reʼ kan kowan xtoʼ re apóstol reʼ rchë ma xbʼison ta chik. w23.09 22 peraj 9, 10