Jontir röj, ri cristianos, qlon jun utziläj spanïk: ri nqkowin nqayaʼ rqʼij Jehová. ¿Achkë rbʼanik nqaʼän riʼ? Nqaʼän riʼ taq nqaksaj qatiempo, qachqʼaʼ chqä ri achkë kʼo qkʼë rchë nqatoʼ Rqʼatbʼäl Tzij. We röj nqayaʼ che rä Jehová ri más ütz kʼo qkʼë, xtqakʼüt chë kan kʼo rqʼij chqawäch ri nqayaʼ rqʼij ryä. Ri apóstol Pablo xtzjoj jojun naʼoj chrij ri rbʼanik nqayaʼ rqʼij Dios ri nkʼatzin ma nqayaʼ ta qa rbʼanik (Heb 10:22-25). Ryä xuʼij chë nkʼatzin nqchʼö rkʼë Jehová, nqatzjoj chrij ri qayoʼen apü chkë ri nkʼaj chik, nqbʼä pa qamoloj chqä nqakʼuqbʼalaʼ qakʼuʼx chqawäch, «rma ri qʼij [rqʼij Jehová] xa naqaj chik kʼo pä». Chkipan ri rkʼisbʼäl capítulos rchë ri wuj Apocalipsis, ri r·ángel Jehová nuʼij reʼ: «¡Yë Dios tayaʼ rqʼij!». Ryä kaʼiʼ mul xuʼij reʼ rchë xkʼüt chë kan nkʼatzin nqaʼän riʼ (Ap 19:10; 22:9). Majun bʼëy tqamestaj ta ri naʼoj ri xeqatzʼët chrij ri nimaläj rtemplo Jehová chqä chë qlon jun utziläj spanïk, ri nqkowin nqayaʼ rqʼij ri Qatat kʼo chkaj. w23.10 29 peraj 17, 18

Jontir röj nqajoʼ nqasmajij re naʼoj reʼ: «Tqajowalaʼ qiʼ achiʼel wä qabʼanon pä». Ye kʼa ma tqamestaj ta ri xuʼij qa Jesús. Ryä xuʼij: «Ye kʼïy ma xkejowan ta chik» (Mt 24:12). Kikʼë re tzij reʼ, Jesús ma xrajoʼ ta xuʼij chë rtzeqelbʼëy ma xtkajoʼ ta chik kiʼ. Tapeʼ ke riʼ, nkʼatzin nqachajij qiʼ rchë ma nqakʼän ta qanaʼoj chkij ri winäq, ri ma nkajoʼ ta kiʼ. Rkʼë ri xqatzʼët qa, tqaqʼalajsaj re kʼutunïk reʼ: ¿kʼo komä jun rbʼanik nqatamaj we röj yeqajoʼ qachʼalal? Jun rbʼanik nqatamaj we kantzij yeqajoʼ qachʼalal ya riʼ nqatzʼët achkë qanaʼoj nqakʼüt taq kʼo jun nbʼanatäj qkʼë (2Co 8:8). Jun chkë riʼ ya riʼ ri xuʼij qa ri apóstol Pedro. Ryä xuʼij: «Ye kʼa más nkʼatzin niʼän reʼ: kan tiwajowalaʼ iwiʼ chiwäch, rma ri winäq ri najowan kan nkyun» (1Pe 4:8). Rma riʼ, taq qachʼalal kʼo jun akuchï yesach wä o kʼo jun ma ütz ta nkiʼän chqë, ri qanaʼoj xtqaʼän kikʼë xtqrtoʼ rchë xtqatamaj we kantzij yeqajoʼ o manä. w23.11 10, 11 peraj 12, 13

We röj xa yeqachaʼ qachʼalal yeqajoʼ, ma najin ta nqasmajij ri xuʼij qa Jesús chrij ri rbʼanik nkʼatzin nqajoʼ qiʼ. Kantzij na wä chë ye kʼo jojun qachʼalal más jnan rbʼanon qawäch kikʼë, achiʼel xbʼanatäj rkʼë Jesús kikʼë jojun chkë rtzeqelbʼëy (Jn 13:23; 20:2). Ye kʼa ri apóstol Pedro nnataj chqë chë röj nkʼatzin yeqajoʼ jontir qachʼalal kan achiʼel nkajoʼ kiʼ kaʼiʼ ri kan kichʼalal kiʼ (1Pe 2:17). Pedro xyaʼ re naʼoj reʼ: «Kan rkʼë ronojel iwan tiwajowalaʼ iwiʼ chiwäch» (1Pe 1:22). Re tzij reʼ ntel chë tzij yeqajoʼ ri winäq ri rkʼë jbʼaʼ pa naʼäy kʼayewal nuʼän chqawäch yeqajoʼ. Jun tzʼetbʼäl. ¿Achkë nqanaʼ röj we jun qachʼalal kʼo jun ma ütz ta nuʼän o nuʼij chqë? Rkʼë jbʼaʼ pa naʼäy ma ütz ta qanaʼoj xtqaʼän rkʼë rma kan xtqajoʼ xtqatzolij rkʼexel che rä. Ye kʼa ri naʼoj riʼ ma nqä ta chwäch Jehová, achiʼel xuʼij Jesús che rä Pedro (Jn 18:10, 11). Ri apóstol Pedro xuʼij: «Ma titzolij ta rkʼexel ri nkiʼän o ri nkiʼij ri nkʼaj chik chiwä. Pa rkʼexel riʼ, xa kan tikʼutuj utzil pa kiwiʼ» (1Pe 3:9). We rït kan rkʼë ronojel awan yeʼawajoʼ ri nkʼaj chik, kan ütz anaʼoj xtaʼän kikʼë. w23.09 29 peraj 9-11