«Ryeʼ xkiyaʼ qʼij chwä rchë kan rïn yitzʼetö achkë riʼ ri kantzij»

RI NKʼASLEMAL RBʼANON QA:

Xinaläx pa República Dominicana, chpan ri tinamït Santo Domingo. Yïn ri rkʼisbʼäl chkë kajiʼ qachʼalal qiʼ. Ri nteʼ ntataʼ kan kʼïy jnaʼ xebʼä pan escuela, y nkajoʼ wä chë nqkʼïy chkikojöl winäq ri ütz kinaʼoj. Taq kajiʼ jnaʼ nrajoʼ rchë yinaläx, ryeʼ xkitamaj kiwäch jojun misioneros mormones, y kan jaʼäl xkitzʼët chë re winäq reʼ ütz kinaʼoj, chʼajchʼöj kij chqä kan ütz kiweqon äl kiʼ. Xa jbʼaʼ chrij riʼ, ri nfamilia xbʼeʼok jun chkë ri naʼäy taq familias ri ye kʼo República Dominicana ri xeʼok chpan ri Iglesia de Jesucristo de los Santos de los Últimos Días, o Iglesia Mormona.

Taq xikʼïy pä, rïn kan jaʼäl wä nnaʼ yijeʼ kikʼë ri nkʼaj chik winäq ri ye kʼo chpan ri Iglesia. Ye kʼa ri más xqä chi nwäch ya riʼ chë kan nyaʼöx rqʼij ri familia chqä ri nakʼwaj jun chʼajchʼöj kʼaslemal. Kan kiʼ wä nkʼuʼx rma yïn mormón, chqä xinyaʼ chi nwäch yinok misionero.

Taq xuʼän 18 njnaʼ, ri nfamilia chqä rïn xqajäl qachoch. Xqbʼä Estados Unidos rma nteʼ ntataʼ nkajoʼ wä chë rïn yinok chpan jun ütz universidad. Jun jnaʼ chrij riʼ, jun nchʼutiteʼ chqä rchjil, ri ye testigos de Jehová, xeʼapon chqatzʼetik chriʼ Florida, chqä xojkiʼän invitar rchë nqbʼä kikʼë chpan jun asamblea. Kan xqä chi nwäch taq xintzʼët chë jontir ri ye kʼo chriʼ najin wä yekikanuj ri textos chpan kiBiblia chqä najin wä yekitzʼibʼaj naʼoj ri nqä chkiwäch. Rma riʼ, xinkʼutuj jun lapicero chqä jun wuj rchë xinbʼän chqä ya riʼ.

Taq xkʼis ri asamblea, ri nchʼutiteʼ nchʼutataʼ xkiʼij chwä chë nkajoʼ yinkitjoj más chrij le Biblia rma nwajoʼ wä yinok misionero. Ya riʼ kan xqä chi nwäch, rma ma kan ta kʼïy wä ntaman chrij le Biblia. Pa rkʼexel riʼ, xa más wä ntjon wiʼ chrij ri Wuj rchë Mormón.

RI RBʼANIK XJÄL NKʼASLEMAL LE BIBLIA:

Taq nchʼutiteʼ nchʼutataʼ xebʼä äl, xetzjon na más wkʼë chrij le Biblia pa teléfono. Y ronojel mul xkiʼij chwä chë tinjnamaj ri nnmaj rkʼë ri nukʼüt le Biblia. Ryeʼ xkiyaʼ qʼij chwä rchë kan rïn yitzʼetö achkë riʼ ri kantzij.

Kʼo wä kʼïy chkë ri nukʼüt nreligión ri chaq tzij wä nnman qa, y ma nnukʼun ta we jnan rkʼë ri nukʼüt le Biblia. Kʼo jun qʼij, nchʼutiteʼ xtäq äl jun wuj chwä ri kesan ri testigos de Jehová. Ri wuj riʼ ya riʼ ri ¡Despertad! rchë 8 de noviembre rchë 1995, ri akuchï petenäq kaʼiʼ artículos ri ntzjon chrij ri nkinmaj ri mormones. Taq xinskʼij rwäch re wuj reʼ, xintzʼët chë kan kʼïy ma ntaman ta chrij ri nukʼüt nreligión. Rma riʼ xinok pa internet chkipan kipágina ri mormones rchë ntzʼët we kantzij ntzjon ri wuj ¡Despertad! Y xintzʼët chë kan ke riʼ wä. Y ya riʼ chqä xintzʼët taq xibʼä chkipan kʼïy museos kichë ri mormones ri kʼo pa tinamït Utah.

Rïn nnman wä chë ri Wuj rchë Mormón nuqʼatsaj le Biblia. Ye kʼa taq xinchäp rnukʼuxik le Biblia, xintzʼët chë ma jnan ta naʼoj nkikʼüt. Achiʼel chpan Ezequiel 18:4, le Biblia nuʼij chë ri alma nkäm. Ye kʼa ri Wuj rchë Mormón, chpan Alma 42:9, nuʼij chë ri alma majun bʼëy nkäm ta.

Ye kʼa kʼo wä chik jun ri xuʼän chë kowan xinchäp quʼuj. Rïn ma kan ta nqʼax wä chi nwäch achkë rma ri mormones kowan rqʼij kitinamit chkiwäch. Jun chkë ri nkinmaj ryeʼ ya riʼ chë ri jardín de Edén xjeʼ akuchï kʼo wä ri tinamït Jackson komä (Misuri, Estados Unidos). Chqä ri yekʼwayon bʼey chpan ri Iglesia nkikʼüt chë chqawäch apü, Dios xtksaj ri qʼatbʼäl tzij rchë Estados Unidos rchë xtqʼät tzij pa rwiʼ le Rwachʼlew.

Rïn xinquʼ rij achkë xtbʼanatäj rkʼë ntinamit —chqä kikʼë ri nkʼaj chik tinamït— taq xtbʼanatäj riʼ. Kʼo jun qʼij, jun ri ntaman rwäch ri najin wä nutjoj riʼ rchë nbʼeʼok misionero, xirskʼij pä y xinchäp tzij rkʼë chrij ya riʼ. Rïn xinkʼutuj ya reʼ che rä: «Xa ta ri atinamit nuʼän chʼaʼoj rkʼë jun chik tinamït, ¿xtaʼän chʼaʼoj rït kikʼë ri mormones ri ye kʼo chpan ri tinamït riʼ?». Rïn kan ma nnmaj ta wä chë ryä xuʼij chë kan ya riʼ xtuʼän. Taq xinnukʼuj kij jojun chik ri nukʼüt nreligión, xenkʼulbʼej jojun chkë ri kikʼwan bʼey chpan ri Iglesia. Ryeʼ xkiʼij chwä chë majun ta jun tamayon ri nwajoʼ ntamaj, ye kʼa xtapon na ri qʼij rchë xtintamaj ya riʼ.

Ri xkiʼij chwä xuʼän chë xibʼison, y xuʼän chë xinquʼ rij achkë rma nwajoʼ yinok misionero. Xintzʼët chë jun rma ya riʼ rma nwajoʼ yentoʼ ri winäq. Jun chik rma ri nwajoʼ wä yinok misionero ya riʼ chë kan xtjeʼ nqʼij chkiwäch ri winäq. Ye kʼa ma kan ta kʼïy wä ntaman chrij Dios. Tapeʼ kʼïy mul nskʼin wä jojun peraj rchë le Biblia, ma kan ta kʼo wä rqʼij ri wuj riʼ chi nwäch. Chqä ma ntaman ta wä chë Dios kʼo nrajoʼ nuʼän pa rwiʼ le Rwachʼlew chqä pa kiwiʼ ri winäq.

RI UTZIL WLON:

Taq xintjoj wiʼ chrij le Biblia kikʼë ri testigos de Jehová, kan kʼïy xintamaj, achiʼel achkë rbʼiʼ Dios, achkë nbʼanatäj qkʼë taq nqkäm y achkë rbʼanik Dios xtksaj Jesús rchë nuʼän ri nrajoʼ pa kiwiʼ ri winäq. Kan jaʼäl xinnaʼ rma najin wä ntamaj ri nukʼüt le Biblia. Y kan nqä wä chi nwäch ntzjoj chkë ri nkʼaj chik ri najin wä ntamaj. Rïn ntaman wä chë Dios kʼo, ye kʼa komä yikowin yichʼö rkʼë kan achiʼel yichʼö rkʼë jun wamigo ri jnan nwäch rkʼë. Ri 12 de julio rchë 2004, xiqasäx pa yaʼ rchë xinok testigo de Jehová. 6 ikʼ chrij riʼ, xinchäp xinksaj más ntiempo rchë ntzjoj le Biblia.

Cinco jnaʼ xisamäj pa central mundial kichë ri testigos de Jehová, ri kʼo Brooklyn (Nueva York). Kan jaʼäl nnaʼ rma xikowin xitoʼon rkʼë kilesaxik biblias chqä publicaciones ri yertoʼ kan pa millón winäq ri ye kʼo chwäch le Rwachʼlew. Rïn kan kiʼ nkʼuʼx nnaʼon pä chkipan ri jnaʼ ri ye qʼaxnäq pä rma yentoʼon ri winäq rchë nkitamaj rwäch Dios.