¿Nkowin komä le Biblia nqrtoʼ rchë nqaköchʼ jun nüm yabʼil?

Ri nuʼij le Biblia

Jaʼ. Dios kan nchpü chkij ri rusamajelaʼ ri najin yeqʼax chpan jun yabʼil. Chkij ryeʼ le Biblia nuʼij: «Jehová xttemej ri winäq riʼ taq qajnäq pa ruchʼat rma jun yabʼil» (Salmo 41:3). Tqatzʼetaʼ oxiʼ naʼoj ri ütz nqaʼän we najin nqqʼax chpan jun nüm yabʼil:

1. Tqakʼutuj qatoʼik che rä Dios chë tjeʼ qachqʼaʼ rchë nqaköchʼ chwäch ri yabʼil. «Ri uxlanen ri kʼo rkʼë Dios, ri majun ta jun winäq nkowin nqʼax pa rujolon», ya riʼ xtqtoʼö taq xtchʼpü kowan qakʼuʼx chqä xtuyaʼ qachqʼaʼ rchë xtqkowin xtqaköchʼ chwäch ri yabʼil riʼ (Filipenses 4:6, 7).

2. Ma kabʼison ta más. Le Biblia nuʼij: «Ri kiʼkʼuxlal achiʼel jun utziläj aqʼon che rä jun winäq, ye kʼa ri bʼis xa nukʼïs ruchqʼaʼ» (Proverbios 17:22). Taq kiʼ akʼuʼx ma xa xuʼ ta yaturtoʼ chwäch ri bʼis, chqä kan yaturtoʼ rchë ma npë ta ayabʼil.

3. Kan takʼuqbʼaʼ akʼuʼx chrij Dios. Ri kʼuqbʼäl kʼuʼx nqrtoʼ rchë nqanaʼ kiʼkʼuxlal tapeʼ nqatäj poqän rma jun yabʼil (Romanos 12:12). Le Biblia nuʼij chë nbʼeqä na jun qʼij taq «majun ta chik jun winäq xtbʼin: ‹Yïn yawaʼ›» (Isaías 33:24). Ri yabʼil ri ma kilon ta ruqʼomal, Dios kan xtkowin xkeruqʼomaj. Chqä eqal eqal Dios xtresaj äl ri yabʼil ri yeruyaʼ ri rijxïk. Le Biblia nuʼij reʼ: «Ri ruchʼakul tbʼanaʼ kan achiʼel rchë jun akʼal; kan ttzolin pä ruchqʼaʼ kan achiʼel taq kʼa kʼajol na» (Job 33:25).

Nota: Röj ri testigos de Jehová nqakʼuqbʼaʼ qakʼuʼx chë Dios xtyaʼ pä qatoʼik. Chqä nqakanuj rutoʼik jun Doctor taq yoj yawaʼ (Marcos 2:17). Rkʼë reʼ ma najin ta nqaʼij achkë kʼo chë nitäj chwäch jun yabʼil, chqajujnal kʼo chë nqachʼöbʼ achkë kʼo chë nqaʼän chwäch jun yabʼil.