¿Ataman chik achkë xtaʼän taq xtchpatäj ri nimaläj tijöj poqonal?

1. ¿Achkë rma nkʼatzin nqatamaj achkë kʼo chë nqaʼän taq nqïl jun kʼayewal?

WE RÖJ qataman chik achkë nkʼatzin nqaʼän loman majanä nqïl jun kʼayewal, rkʼë jbʼaʼ ya riʼ xtbʼanö chë majun ta xtqatqelbʼej. Taq nbʼanatäj jun nüm kʼayewal, ri winäq ri kitaman chik achkë nkʼatzin nkiʼän, rkʼë jbʼaʼ xkekowin xtkiköl kiʼ ryeʼ chqä xkekowin xkekitoʼ ri nkʼaj chik. Jun organización ri kʼo Europa, ri yerutoʼ ri winäq, xuʼij: «Taq ataman chik achkë nkʼatzin naʼän taq majanä tpë jun kʼayewal, rkʼë jbʼaʼ ya riʼ xtbʼanö chë xtaköl qa awiʼ rït chqä ri nkʼaj chik».

2. ¿Achkë rma nkʼatzin nqatamaj achkë xtqaʼän taq xtchapatäj ri nimaläj tijöj poqonal? (Mateo 24:44).

² Ri nimaläj tijöj poqonal chaq kʼateʼ xtbʼeqä (Mat. 24:21). Ye kʼa, ma jontir ta winäq xtkixiʼij kiʼ taq xtbʼeqä ri qʼij riʼ. Jun 2,000 junaʼ qa, Jesús xuʼij chkë rutzeqelbʼëy chë nkʼatzin nkitamaj achkë kʼo chë nkiʼän taq xtchapatäj ri nimaläj tijöj poqonal (taskʼij ruwäch Mateo 24:44). We röj nqaʼän ri xuʼij qa Jesús, ma más ta kʼayewal xtuʼän chqawäch xtqqʼax chwäch ri kʼayewal riʼ chqä xtqkowin xkeqatoʼ ri nkʼaj chik (Luc. 21:36).

3. Rchë xtqaköchʼ ri nimaläj tijöj poqonal, ¿achkë rma nkʼatzin nqkochʼon, nqapoqonaj kiwäch ri nkʼaj chik chqä nqjowan?

³ Rchë nqaköchʼ ri nimaläj tijöj poqonal nkʼatzin nqasmajij oxiʼ naʼoj. ¿Achkë xtqaʼän we xtbʼix chqë chë xtkʼatzin xtqayaʼ jun kuw rutzjol chkë ri winäq y ryeʼ xtpë kiyowal chqë? (Apoc. 16:21). Chriʼ taq xtkʼatzin xtqkochʼon, rchë ke riʼ xtqanmaj rutzij Jehová y xtqakʼuqbʼaʼ qakʼuʼx chë ryä xtqrchajij pä. ¿Achkë xtqaʼän we ri qachʼalal xtmaj qa jontir ri achkë kʼo kikʼë? (Hab. 3:17, 18). Chriʼ taq xtkʼatzin xtqapoqonaj kiwäch, rchë ke riʼ xkeqatoʼ y xtqayaʼ ri xtkʼatzin chkë. ¿Y achkë xtqaʼän taq jun molaj qʼatöy tzij xkekatäj pä chqij y rkʼë jbʼaʼ xtkʼatzin xtqjeʼ chpan jun ti koʼöl jay kikʼë nkʼaj chik qachʼalal? (Ezeq. 38:10-12). Chriʼ taq xtkʼatzin xkeqajoʼ jontir qachʼalal.

4. ¿Achkë nkʼutü chë nkʼatzin nqatäj qaqʼij rchë nqkochʼon, rchë nqapoqonaj kiwäch ri nkʼaj chik chqä rchë nqjowan?

⁴ Ri Ruchʼaʼäl Dios nuʼij chqë chë nkʼatzin nqkochʼon, nqapoqonaj kiwäch ri nkʼaj chik chqä nqjowan. Lucas 21:19 nuʼij: «We xtiköchʼ ronojel riʼ, rïx xkixkolotäj qa». Colosenses 3:12 nuʼij: «Tipoqonaj kiwäch ri nkʼaj chik». Y 1 Tesalonicenses 4:9, 10 nuʼij: «Kan yë Dios najin nkʼutü chiwäch achkë rubʼanik niwajowalaʼ iwiʼ chiwäch. […] Ye kʼa, qachʼalal, nqajoʼ nqaʼij chiwä chë tiwajowalaʼ más iwiʼ». Re tzij reʼ xbʼix chkë winäq ri najin chik nkikʼüt chë yekochʼon, nkipoqonaj kiwäch ri nkʼaj chik chqä yejowan. Ye kʼa nkʼatzin wä nkitäj kiqʼij rchë nkikʼüt más ri naʼoj riʼ. Ke riʼ chqä nkʼatzin nqaʼän röj. ¿Achkë xtqtoʼö rchë xtqaʼän riʼ? Chpan re tjonïk reʼ xtqatzʼët achkë rubʼanik xkikʼüt ri naʼoj riʼ ri naʼäy taq cristianos y achkë rubʼanik nqakʼän qanaʼoj chkij, rchë ke riʼ xtqatamaj achkë xtqaʼän taq xtchapatäj ri nimaläj tijöj poqonal.

TATAMAJ YAKOCHʼON

5. ¿Achkë xkiʼän ri naʼäy taq cristianos rchë xekochʼon?

⁵ Ri naʼäy taq cristianos xkʼatzin xekochʼon (Heb. 10:36). Ryeʼ ma xa xuʼ ta ri kʼayewal ri nqaqʼaxaj röj ronojel qʼij xkiqʼaxaj, xa kan xkïl chqä kʼayewal rma xkikʼuqbʼaʼ kikʼuʼx chrij Dios. Kʼïy chkë ryeʼ xeyaʼöx kʼayewal pa kiwiʼ kimä ri ukʼwäy taq bʼey judíos, kimä ri qʼatbʼäl taq tzij ri ye kʼo pa ruqʼaʼ Roma y kimä ri kichʼalal (Mat. 10:21). Chqä, kʼo mul xkʼatzin xkipabʼaʼ kiʼ chkiwäch ri apóstatas, ri xkajoʼ xekijäch ri cristianos rkʼë ri nkikʼüt (Hech. 20:29, 30). Tapeʼ ke riʼ, ryeʼ xkiköchʼ jontir ri kʼayewal riʼ (Apoc. 2:3). ¿Achkë rubʼanik xkiʼän riʼ? Taq xechʼobʼon chkij rusamajelaʼ Dios ri yetzjöx chpan ri Escrituras Hebreas, achiʼel Job (Sant. 5:10, 11). Chqä xkikʼutuj kichqʼaʼ che rä Jehová (Hech. 4:29-31). Y ma xkimestaj ta chë ryä xtyaʼ utzil pa kiwiʼ we xtkiköchʼ ri kʼayewal riʼ (Hech. 5:41).

6. ¿Achkë nqatamaj qa chrij ri xuʼän ya Merita rchë xköchʼ ri kʼayewal xyaʼöx pa ruwiʼ rma ru-familia?

⁶ Röj chqä nqkowin yeqaköchʼ ri kʼayewal we nqchʼobʼon chrij ri xkiqʼaxaj rusamajelaʼ Dios ri yetzjöx chpan le Biblia chqä chpan ri qa-publicaciones. Ya riʼ xtoʼö rchë ya Merita, jun qachʼalal aj Albania, rchë xköchʼ ri kʼayewal xyaʼöx pa ruwiʼ rma ru-familia. Ryä nuʼij: «Taq xinnukʼuj chpan le Biblia ri xqʼaxaj Job, ya riʼ kan xapon pa wan. Re achï reʼ kowan xtäj poqän y ma retaman ta wä achkë xyaʼö pä ri kʼayewal riʼ pa ruwiʼ. Tapeʼ ke riʼ, achiʼel nuʼij Job 27:5, ryä xuʼij ‹Tapeʼ xkinapon chwäch kamïk, ¡rïn majun bʼëy xtinyaʼ ta qa rukʼwaxik ri jïk kʼaslemal!›. Ya reʼ xuʼän chwä chë xinquʼ chë ri najin nqʼaxaj rïn ma más ta lawaloʼ chwäch ri xqʼaxaj ryä, chqä chë rïn sí ntaman achkë ajmak chkë ri kʼayewal wlon».

7. Tapeʼ rït ma najin ta naqʼaxaj jun nüm kʼayewal komä, ¿achkë nkʼatzin naʼän?

⁷ Jun chik ri xtqtoʼö rchë xtqkochʼon, ya riʼ chaq taqïl nqaʼij jontir ri achkë nqanaʼ che rä Jehová (Filip. 4:6; 1 Tes. 5:17). Rkʼë jbʼaʼ rït ma najin ta naqʼaxaj jun nüm kʼayewal komä. ¿Ye kʼa achkë naʼän taq ma kiʼ ta akʼuʼx o ma ataman ta achkë naʼän chwäch jun kʼayewal? ¿Nakʼutuj komä atoʼik che rä Jehová? We rukʼulun chawä nakʼutuj atoʼik che rä Jehová rchë yeʼaköchʼ ri kʼayewal ronojel qʼij, ya riʼ chqä xtaʼän chqawäch apü taq xkepë más kʼayewal chqij. Tayaʼ chwäch awan chë Jehová retaman ajän chqä achkë rubʼanik xkaturtoʼ pä (Sal. 27:1, 3).

8. ¿Achkë rubʼanik nukʼüt ri xbʼanatäj rkʼë ya Mira chë ri nqaköchʼ ri kʼayewal komä xtqrtoʼ rchë xkeqaköchʼ ri kʼayewal chqawäch apü? (Santiago 1:2-4; tatzʼetaʼ chqä ri achbʼäl).

⁸ We röj yeqaköchʼ ri kʼayewal ye kʼo komä, rkʼë jbʼaʼ xtqkowin xtqaköchʼ ri nimaläj tijöj poqonal (Rom. 5:3). ¿Achkë rma nqaʼij riʼ? Ye kʼïy qachʼalal nkiʼij chë taq nkiköchʼ jun kʼayewal, ryeʼ nkinaʼ chë xkekowin xtkipabʼaʼ kiʼ chwäch jun chik kʼayewal ri xtpë chkij. Taq ryeʼ nkiköchʼ jun kʼayewal, rkʼë rutoʼik Jehová, más nkikʼuqbʼaʼ kikʼuʼx chë ryä nrajoʼ yerutoʼ pä. Rma ri kʼuqbʼäl kʼuʼx riʼ, ryeʼ yekowin nkiköchʼ jun chik kʼayewal (taskʼij ruwäch Santiago 1:2-4). Ke riʼ chqä nuquʼ ya Mira, jun precursora aj Albania. Re qachʼalal reʼ nuʼij chë kʼo mul nunaʼ chë xa xuʼ ryä najin nutäj más poqän chkiwäch ri nkʼaj chik. Taq nbʼanatäj riʼ rkʼë, nchäp ruquʼik achkë rubʼanik rutoʼon pä Jehová chpan ri 20 junaʼ ri ye qʼaxnäq pä. Ryä nuʼij qa pa ran: «Takochʼoʼ. Ma tamestaj ta jontir ri junaʼ ayaʼon pä ruqʼij Jehová chqä jontir ri kʼayewal akochʼon pä rkʼë rutoʼik ryä». Rït chqä ütz naquʼ rij achkë rubʼanik yaturtoʼon Jehová rchë akochʼon pä ri kʼayewal. Tayaʼ chwäch awan chë ryä nutzʼët taq rït naköchʼ jun kʼayewal chqä chë xtyaʼ utzil pan awiʼ (Mat. 5:10-12). Taq xtchapatäj ri nimaläj tijöj poqonal, rma akochʼon pä chik ri kʼayewal, kan xtayaʼ chwäch awan xtaköchʼ ri kʼayewal xkepë chawij.

TAPOQONAJ KIWÄCH RI NKʼAJ CHIK

9. ¿Achkë rubʼanik xkikʼüt ri cristianos aj Antioquía chë xkipoqonaj kiwäch ri nkʼaj chik?

⁹ Tqaquʼ achkë xbʼanatäj taq ri cristianos aj Judea xkiqʼaxaj jun nüm wayjal. Taq ri qachʼalal aj Antioquía de Siria xkitamaj riʼ, kan xkipoqonaj kiwäch, y rma xkipoqonaj kiwäch kan xekitoʼ. Ryeʼ, «rkʼë ri jaruʼ yekowin nkiyaʼ, xkichʼöbʼ nkitäq äl kitoʼik» ri kichʼalal ri ye kʼo Judea (Hech. 11:27-30). Tapeʼ ri cristianos aj Judea kʼa näj ye kʼo wä, ri kichʼalal aj Antioquía ma xkikʼewaj ta xekitoʼ (1 Juan 3:17, 18).

10. ¿Achkë rubʼanik nqakʼüt chë nqapoqonaj kiwäch ri qachʼalal taq nkiqʼaxaj jun kʼayewal? (Tatzʼetaʼ chqä ri achbʼäl).

¹⁰ Röj chqä nqkowin nqakʼüt chë nqapoqonaj kiwäch ri qachʼalal taq nqatamaj chë ryeʼ najin nkiqʼaxaj jun kʼayewal. Rchë kan chanin nqayaʼ kitoʼik ütz nqaʼän ya reʼ: ütz nqaʼij chkë ri ukʼwäy taq bʼey chë nqajoʼ nqtoʼon, nqayaʼ qakchaj y nqchʼö rkʼë Jehová pa kiwiʼ ri najin nkiqʼaxaj ri kʼayewal riʼ (Prov. 17:17).b Pa 2020, xebʼan más 950 Comités de Socorro rchë xetoʼöx ri xkïl ri COVID-19. Kan janina nqatyoxij chkë ri qachʼalal ri nkitzüj kiʼ rchë yetoʼon. Rma ryeʼ nkipoqonaj kiwäch ri kichʼalal, kiyaʼon ri nkʼatzin chkë, kikʼuqbʼan kikʼuʼx rkʼë le Biblia y, kʼo mul, kichojmin o kiyakon kachoch ryeʼ chqä jojun jay akuchï nyaʼöx ruqʼij Dios (tajnamaj rkʼë 2 Corintios 8:1-4).

11. ¿Achkë rubʼanik nqayaʼ ruqʼij ri Qatat kʼo chkaj taq nqakʼüt chkiwäch ri nkʼaj chik chë nqapoqonaj kiwäch?

¹¹ Ri winäq nkitzʼët taq röj yeqatoʼ ri qachʼalal ri xkïl jun nüm kʼayewal. Tqatzʼetaʼ jun tzʼetbʼäl chrij riʼ. Pa 2019, ri qʼeqäl jöbʼ Dorian xtzʼlaʼ jun Salón del Reino chlaʼ las Bahamas. Taq najin nyak chik jmul ri Salón, ri qachʼalal xkikʼutuj che rä jun contratista jaruʼ päq xtkʼatzin chkij jojun samaj ri nkʼatzin yebʼan. Ri achï xuʼij chkë: «Rïn nwajoʼ yixintoʼ. Nwajoʼ nyaʼ ri máquinas xkekʼatzin chiwä chqä ntöj ri samaj xtbʼan. Rïn kan kowan nqä chi nwäch inaʼoj niʼän kikʼë ri nkʼaj chik iwachiʼil». Ye kʼïy winäq ma kitaman ta ruwäch Jehová, ye kʼa ye kʼïy nkitzʼët ri yeqaʼän röj, ri ru-Testigos. Kan kiʼ qakʼuʼx nqanaʼ chë jontir ri yeqaʼän rkʼë jbʼaʼ xtuʼän chë ri nkʼaj chik xtkajoʼ xtkitamaj ruwäch Jehová, ri kan kowan nupoqonaj qawäch (Efes. 2:4).

12. ¿Achkë rma ri nqapoqonaj kiwäch ri nkʼaj chik xtqrtoʼ taq xtchapatäj ri nimaläj tijöj poqonal? (Apocalipsis 13:16, 17).

¹² ¿Achkë rma xtkʼatzin xtqapoqonaj kiwäch ri nkʼaj chik taq xtchapatäj ri nimaläj tijöj poqonal? Rma le Biblia nuʼij chë ri ma xtkinmaj ta kitzij ri qʼatbʼäl taq tzij, xtkïl kʼayewal komä y chpan ri nimaläj tijöj poqonal (taskʼij ruwäch Apocalipsis 13:16, 17). Rkʼë jbʼaʼ ri qachʼalal xtkʼatzin kitoʼik rkʼë ri achkë nkʼatzin chkë. ¿Tapeʼ chë nqarayij chë taq Jesucristo xtqʼät tzij pa kiwiʼ ri winäq xttzʼët chë röj nqapoqonaj kiwäch ri nkʼaj chik y xtuʼij chqë: «Ttok iwchë ri Qʼatbʼäl Tzij»? (Mat. 25:34-40).

KEʼAWAJOʼ MÁS RI QACHʼALAL

13. ¿Achkë xkiʼän ri naʼäy taq cristianos rchë xkajowalaʼ más kiʼ? (Romanos 15:7).

¹³ Pa naʼäy siglo, kan xqʼalajin chë ri cristianos xkajoʼ kiʼ. ¿Ye kʼa kan chaq bʼaʼ komä xuʼän chkiwäch ryeʼ xkajoʼ kiʼ? Tqaquʼ rij ri congregación ri xjeʼ Roma, ri akuchï kan jalajöj kiwäch cristianos xejeʼ. Ye kʼo jojun ye judíos, ri xkʼut Rupixaʼ Moisés chkiwäch. Ye kʼa, ye kʼo wä cristianos ri ye petenäq jukʼan chik tinamït ri ma junan ta kiqʼaxan pa kikʼaslemal. Rkʼë jbʼaʼ jojun chkë ryeʼ ye xmïl pa samaj, y nkʼaj chik manä, y rkʼë jbʼaʼ ye kʼo jojun ye kʼo winäq ye xmïl pa samaj kikʼë. ¿Achkë xtoʼö kichë ryeʼ rchë ma xkiyaʼ ta kan chrij riʼ chqä rchë xkajoʼ más kiʼ? Ri apóstol Pablo xyaʼ re naʼoj reʼ chkë: «Kan ütz ikʼulik tibʼanaʼ» (taskʼij ruwäch Romanos 15:7). ¿Achkë xrajoʼ xuʼij ryä? Ri tzij «kan ütz ikʼulik tibʼanaʼ» ntel chë tzij kan ütz qanaʼoj nqaʼän kikʼë ri nkʼaj chik, achiʼel taq nqakʼül jun winäq pa qachoch o taq nqatoʼ rchë nutamaj kiwäch ri nkʼaj chik qachiʼil. Jun tzʼetbʼäl, Pablo xuʼij che rä Filemón achkë rubʼanik kʼo chë nukʼül Onésimo ri xanmäj pä pa rachoch. Pablo xuʼij che rä: «Kan ütz rukʼulik tabʼanaʼ» (Filem. 17). Áquila y Priscila kitaman wä más chrij Jesús chwäch Apolos, ye kʼa kan ütz rukʼulik xkiʼän chqä xkikʼwaj äl kikʼë (Hech. 18:26). Tapeʼ re cristianos reʼ jalajöj wä kinaʼoj, ma xkiyaʼ ta qʼij chë ya riʼ xjachö kichë. Pa rukʼexel riʼ, ryeʼ ma xkiyaʼ ta kan chrij riʼ, rma riʼ kan ütz kikʼulik xkiʼän.

14. ¿Achkë rubʼanik xkʼüt ya Anna chqä rachjil chë yekajoʼ ri nkʼaj chik?

¹⁴ Röj chqä nqkowin nqakʼüt chë yeqajoʼ ri qachʼalal taq kan ütz kikʼulik nqaʼän chqä taq yeqatoʼ rchë nkitamaj kiwäch ri nkʼaj chik qachiʼil. Ya riʼ xtuʼän chë ryeʼ chqä ütz kinaʼoj xtkiʼän qkʼë (2 Cor. 6:11-13). Tqatzʼetaʼ ri xbʼanatäj rkʼë ya Anna chqä rachjil. Ryeʼ ye misioneros wä chlaʼ África Occidental. Taq kʼa riʼ jbʼaʼ keʼapon chpan jun chkë ri tinamït ye kʼo chlaʼ, xchapatäj ri COVID-19 y ma xekowin ta chik xkimöl kiʼ kikʼë ri qachʼalal chpan ri congregación. ¿Achkë xkiʼän re kʼlaj qachʼalal reʼ rchë xkikʼüt chkiwäch ri nkʼaj chik chë yekajoʼ? Ryeʼ xekichʼaʼej äl pa videollamada y xkiʼij chkë chë nkajoʼ nkitamaj más kiwäch. Ya riʼ kan xapon pan kan ri qachʼalal, rma riʼ ryeʼ chik xeskʼin pä rchë ya Ana chqä rachjil chqä xkitäq pä ki-mensajes. ¿Achkë rma re jun kʼlaj qachʼalal reʼ xkitäj kiqʼij rchë xkitamaj kiwäch ri qachʼalal? Ya Anna nuʼij: «Nkʼolon pa wan jontir ri xkiʼän ri qachʼalal pa nwiʼ rïn chqä pa ruwiʼ n-familia taq ütz qawäch chqä taq xqaqʼaxaj kʼayewal. Taq nquʼ rij riʼ, ya riʼ nbʼanö chwä chë yenwajoʼ ri qachʼalal».

15. ¿Achkë nukʼüt qa ya Vanessa chqawäch chrij ri yeqajoʼ ri qachʼalal? (Tatzʼetaʼ chqä ri achbʼäl).

¹⁵ Chpan ye kʼïy congregaciones ye kʼo jalajöj kiwäch qachʼalal ri jalajöj kiqʼaxan pä pa kikʼaslemal. ¿Achkë xtqtoʼö rchë xkeqajoʼ más jontir? Ri xtqtoʼö ya riʼ nqayaʼ qan chkij ri ütz taq naʼoj kʼo kikʼë. Ya Vanessa, jun qachʼalal ixöq ri kʼo Nueva Zelanda, kʼayewal xuʼän chwäch xkʼwaj riʼ kikʼë jojun qachʼalal chpan ru-congregación rma ma kan ta nqä wä chwäch ri kinaʼoj. Pa rukʼexel ma ntzjon ta kikʼë, ryä xa más xkʼwaj riʼ kikʼë. Rma xuʼän riʼ, ryä xqʼalajin chwäch achkë nqä chwäch Jehová chkij ri winäq riʼ. Ryä nuʼij: «Rma wachjil xok superintendente rchë circuito, röj xqatamaj kiwäch más qachʼalal, y jojun, jojun wä kinaʼoj. Ye kʼa komä ma kʼayewal ta rubʼanon chi nwäch nkʼwaj wiʼ kikʼë ri nkʼaj chik. Kan kowan nqä chi nwäch chë ma junan ta qanaʼoj y ntaman chqä chë Jehová kan nqä chwäch ya riʼ, rma ryä yeruskʼij pä jalajöj kiwäch winäq chpan rutinamit». Rma riʼ, ¿achkë rubʼanik nqakʼüt chë yeqajoʼ ri qachʼalal? Taq nqatäj qaqʼij rchë yeqatzʼët kan achiʼel yerutzʼët Jehová (2 Cor. 8:24).

16. ¿Achkë rma xtkʼatzin xtqajoʼ qiʼ chpan ri nimaläj tijöj poqonal? (Tatzʼetaʼ chqä ri achbʼäl).

¹⁶ Chpan ri nimaläj tijöj poqonal kan xtkʼatzin xkeqajoʼ ri qachʼalal. ¿Achkë rubʼanik xtqrchajij Jehová taq xtchapatäj ri nimaläj tijöj poqonal? Tqaquʼ rij ri xuʼij Jehová che rä rutinamit rchë yekolotäj qa taq xtchup ruwäch Babilonia: «Rït ri yït ntinamit, katok chpan awachoch y tatzʼapij pä achiʼ. Chriʼ tawewaj wä jbʼaʼ awiʼ kʼa taq xtqʼax ri oyowal» (Is. 26:20). Rkʼë jbʼaʼ röj chqä xtkʼatzin xtqaʼän ya reʼ chpan ri nimaläj tijöj poqonal. Ri tzij «awachoch» rkʼë jbʼaʼ najin ntzjon chkij ri congregaciones. We röj junan xtuʼän qawäch kikʼë qachʼalal taq xtchapatäj ri mamaʼ kʼayewal riʼ, Jehová xtqrchajij, kan achiʼel rutzjun qa. Rma riʼ, ma xa xuʼ ta nkʼatzin nqaköchʼ ri nkiʼän ri qachʼalal, xa kan nkʼatzin yeqajoʼ rkʼë ronojel qan. We röj ma xtqaʼän ta riʼ, rkʼë jbʼaʼ ma xtqkolotäj ta qa.

TATAMAJ ACHKË NKʼATZIN NAʼÄN KOMÄ

17. We qataman chik achkë nkʼatzin nqaʼän taq xtchapatäj ri nimaläj tijöj poqonal, ¿achkë xtqaʼän taq xtbʼeqä ri qʼij riʼ?

¹⁷ «Ri ruqʼij Jehová» ya riʼ jun tiempo ri kan kʼayewal xtuʼän chkiwäch ri winäq (Sof. 1:14, 15). Röj, ri rusamajelaʼ Jehová, xtqaqʼaxaj chqä kʼayewal. Ye kʼa, we qataman chik achkë nkʼatzin nqaʼän taq xtbʼeqä ri qʼij riʼ, ma xtchʼpü ta qakʼuʼx chqä xtqkowin xkeqatoʼ ri nkʼaj chik. We nqkochʼon, xtkowin xtqaköchʼ xa bʼa achkë kʼayewal xtpë chkij. We nqapoqonaj kiwäch ri nkʼaj chik, kan xtqaʼän jontir ri kʼo pa qaqʼaʼ rchë xkeqatoʼ ri qachʼalal chqä xtqayaʼ ri nkʼatzin chkë. Y, we yeqajoʼ ri qachʼalal, kan junan xtuʼän qawäch kikʼë. Jehová xtyaʼ qakʼaslemal ri majun bʼëy xtkʼis ta chwäch jun Ruwachʼlew ri akuchï ma xkebʼanatäj ta chik qʼeqäl taq jöbʼ, mamaʼ taq slonel o xa bʼa achkë chik jun kʼayewal (Is. 65:17).