NA’OJ 6

Ütz ütz keʼaqʼalajsaj ri textos bíblicos

Juan 10:33-36

RI NTEL CHË TZIJ: Ma xa xuʼ ta naskʼij qa jun texto bíblico y yaqʼax chik rkʼë jun naʼoj, xa tatjaʼ aqʼij rchë chë ri yekʼoxan awchë nqʼalajin chkiwäch achkë rubʼanik rukʼwan riʼ ri texto rkʼë ri naʼoj ri nawajoʼ nakʼüt.

RI RUBʼANIK NASMAJIJ

Tayaʼ kejqalen ri tzij. Taq xaskʼij yän qa jun texto bíblico, tayaʼ kejqalen ri tzij ri kikʼwan kiʼ rkʼë ri naʼoj ri nawajoʼ nakʼüt. Rchë naʼän riʼ ütz yeʼakamluj ri tzij ri kan kʼo kejqalen o yeʼaʼän kʼutunïk ri yerutoʼ ri yekʼoxan awchë rchë nqʼalajin chkiwäch ri tzij riʼ.

We xa xuʼ jojun tzij nanataj pä ri ye kʼo chpan ri texto bíblico rchë nayaʼ rejqalen ri naʼoj ri najin nakʼüt, tatzʼetaʼ chë ri yekʼoxan awchë nqʼalajin chkiwäch chë ri nuʼij le Biblia rukʼwan riʼ rkʼë ri naʼoj ri kʼo más kejqalen chpan ri atzijonem.
Tayaʼ rejqalen ri naʼoj. Taq ya naskʼij apü ruwäch jun texto bíblico, taʼij apü achkë rma naskʼij. Chrij riʼ, taqʼalajsaj ri tzij ri kan kʼo kejqalen chpan ri texto y takʼutuʼ achkë rma kikʼwan kiʼ rkʼë ri naʼoj ri nawajoʼ nakʼüt.

Taq najin naqʼalajsaj ri texto bíblico, ma tatzʼapij ta ri a–Biblia. Ke riʼ, ri winäq xkekowin xtkitün ri naʼoj ri najin natzjoj chkë rkʼë ri nuʼij ri texto ri xaskʼij qa.
Ma kʼayewal ta tabʼanaʼ che rä ruqʼalajsaxik. Ma keʼatzjoj ta apü naʼoj we ma ya riʼ ta ri kʼo más kejqalen chpan ri atzijonem. Rchë natamaj achkë nkʼatzin natzjoj y achkë manä, naʼäy tatzʼetaʼ jaruʼ kitaman ri yekʼoxan awchë chrij ri nawajoʼ nakʼüt chkiwäch, ke riʼ kan xtqʼax qa pa kijolon ri natzjoj chkë.