TJONÏK 58
Majun bʼëy tayaʼ ta qa Jehová
Ri kantzij taq cristianos qayaʼon chwäch qan chë majun ta jun xtqqʼatö rchë nqayaʼ ruqʼij Jehová. Y röj qataman chë rït chqä ayaʼon ya riʼ chwäch awan; Jehová kan nuloqʼoqʼej riʼ (taskʼij ruwäch 1 Crónicas 28:9). ¿Achkë rkʼë jbʼaʼ xtbʼanö chawä chë xtayaʼ qa Jehová? ¿Y achkë rubʼanik xtapabʼaʼ awiʼ chkiwäch ri kʼayewal riʼ?
1. ¿Achkë rkʼë jbʼaʼ xtkiʼän ri nkʼaj chik rchë xtqayaʼ qa Jehová?
Ye kʼo jojun winäq kan xtkitäj kiqʼij chqij rchë ma xtqayaʼ ta chik ruqʼij Jehová. Jojun chkë ri winäq riʼ ya riʼ ri ye lenäq qa pa congregación chqä yekiʼij tzʼukün taq tzij chrij rutinamit Dios xa xuʼ rchë nchaʼ chiʼ ri qakʼuqbʼäl kʼuʼx. Ri winäq riʼ nbʼix apóstatas chkë. Chqä, ye kʼo jojun ukʼwäy taq bʼey pa taq religiones nkiʼij tzʼukün taq tzij chqij rchë chë ri ma kʼuqül ta más kikʼuʼx chpan ruchʼaʼäl Dios nkiyaʼ qa rutinamit Jehová. Rma riʼ kan kʼo kʼayewal xtqïl we nqtzjon kikʼë winäq ri itzel nkitzʼët rutinamit Dios, nqaskʼij ki-libros, nq-ok pa ki-sitios pa Internet o nqatzʼët ki-videos. Jesús xuʼij reʼ chkij ri winäq ri nkitäj kiqʼij chqij rchë nqayaʼ qa Jehová. Ryä xuʼij: «Rma riʼ, kejeʼ chlaʼ. Le ukʼwäy taq bʼey laʼ xa ye moyiʼ. Y, si jun moy nukʼwaj rubʼey jun chik moy, che kaʼiʼ xa xketzaq chpan jun jül» (Mateo 15:14).
2. ¿Achkë chkë ri yeqaʼän pa qakʼaslemal rkʼë jbʼaʼ xtkiʼän chqë chë xtqayaʼ qa Jehová?
Rma nqajoʼ Jehová, röj ma nqajoʼ ta nqaxöl qiʼ kikʼë ri religiones ri ma pa rubʼeyal ta nkiyaʼ ruqʼij. Rma riʼ ri qasamaj, ri organizaciones ri akuchï yoj kʼo wä o xa bʼa achkë chik jun ri nqaʼän, ma kʼo ta chë nuxöl riʼ kikʼë ri religiones riʼ. Jehová nuʼij reʼ che rä rutinamit: «Kixel pä chriʼ», ntel chë tzij, chpan Babilonia la Grande (Apocalipsis 18:2, 4).
TQATAMAJ MÁS CHRIJ RE NAʼOJ REʼ
Tatamaj achkë ütz naʼän rït rchë majun ta jun xtbʼanö chawä chë xtayaʼ qa Jehová. Chqä, tatzʼetaʼ achkë rma ri ma nqaxöl ta qiʼ rkʼë Babilonia la Grande nukʼüt chë ma nqajoʼ ta nqayaʼ qa Jehová.
3. Tachajij awiʼ chkiwäch ri xa tzʼukün taq naʼoj nkikʼüt
¿Achkë qanaʼoj kʼo chë nqaʼän taq nqakʼoxaj jun winäq ri itzel najin ntzjon chrij rutinamit Jehová? Tiskʼij ruwäch Proverbios 14:15 y kixtzjon chrij reʼ:
¿Achkë rma kʼo chë njeʼ qanaʼoj y ma nqanmaj ta jontir ri nbʼix chqë?
Tiskʼij ruwäch 2 Juan 9-11 y kixtzjon chrij reʼ:
¿Achkë qanaʼoj kʼo chë nqaʼän kikʼë ri apóstatas?
Rkʼë jbʼaʼ ma kan ta xtqtzjon kikʼë ri apóstatas, ye kʼa ¿achkë rubʼanik rkʼë jbʼaʼ xkojkitzʼlaʼ ri naʼoj nkikʼüt ryeʼ?
We röj nqayaʼ qaxkïn chkë winäq ri itzel yetzjon chrij Jehová o chrij rutinamit, ¿achkë komä xtnaʼ ryä naʼij rït?
4. Tanmaj rutzij Dios taq jun qachʼalal nqä chpan jun mamaʼ mak
We nqatamaj chë jun qachʼalal pa congregación xuʼän jun mamaʼ mak, ¿achkë kʼo chë nqaʼän? Tatzʼetaʼ achkë naʼoj nqatamaj qa chpan ri Pixaʼ ri xyaʼ Dios chkë ri israelitas ojer. Tiskʼij ruwäch Levítico 5:1.
Achiʼel nuʼij chpan re texto reʼ, we nqatamaj chë jun winäq xuʼän jun mamaʼ mak, röj kʼo chë nqabʼeʼij chkë ri ukʼwäy taq bʼey. Ye kʼa ri ütz nqaʼän naʼäy, ya riʼ nqaʼij che rä ri winäq riʼ chë tbʼeruʼij rumak chkë ri ukʼwäy taq bʼëy. We ryä ma xtuʼän ta riʼ, röj xtqbʼeʼin chkë. Nqaʼän riʼ rma nqajoʼ nqanmaj rutzij Jehová. ¿Achkë rma ri nqaʼän riʼ nukʼüt chë nqajoʼ...
... Jehová?
... ri winäq ri xmakun?
... ri qachʼalal ri ye kʼo pa congregación?
We kʼo jun qachʼalal kʼo jun najin nuʼän ri ma ütz ta, ¡tayaʼ rutoʼik!
5. Ma taxöl ta awiʼ rkʼë Babilonia la Grande
Tiskʼij ruwäch Lucas 4:8 chqä Apocalipsis 18:4, 5, y kixtzjon chkij re kʼutunïk reʼ:
¿Kʼa kʼo na nbʼiʼ chpan jun religión ri ma pa rubʼeyal ta nuyaʼ ruqʼij Dios?
¿Yïn oknäq chpan jun organización ri nutoʼ jun chik religión?
Rkʼë ri nsamaj kʼo, ¿najin yentoʼ ri religiones ri ma pa rubʼeyal ta nkiyaʼ ruqʼij Dios?
¿Kʼo komä jun chik chpan nkʼaslemal ri akuchï nkʼatzin ma nxöl ta wiʼ kikʼë ri religiones ri ma pa rubʼeyal ta nkiyaʼ ruqʼij Dios?
We xinbʼij «jaʼ» chkë jojun chkë re kʼutunïk reʼ, ¿achkë kʼo chë nbʼän?
Xa bʼa achkë na kʼa xtaʼän, tabʼanaʼ ri nanaʼ rït chë ma xttiʼon ta a-conciencia rma, chqä chë ma nawajoʼ ta nayaʼ qa Jehová.
¿Achkë xtaʼän rït we xtkiʼij chawä chë katoʼon chpan jun organización ri xa rukʼwan riʼ rkʼë jun religión ri ma pa rubʼeyal ta nuyaʼ ruqʼij Dios?
JOJUN WINÄQ NKIʼIJ REʼ: «We ma ntaman ta achkë nkiʼij ri apóstatas chkij ri testigos de Jehová, ¿achkë rubʼanik xtintoʼ rutinamit Dios?».
¿Naʼij rït chë ütz ke riʼ nqchʼobʼon? ¿Achkë rma?
RI XQATAMAJ QA
We majun bʼëy nqajoʼ ta nqayaʼ qa Jehová, kʼo chë ma nqakʼwaj ta qiʼ kikʼë ri winäq ri xa nkajoʼ yojkiqʼöl.
Tqakamluj ri xqatzʼët qa
¿Achkë rma ma ütz ta nqakʼoxaj ri nkiʼij ri apóstatas?
We nqatamaj chë jun qachʼalal xuʼän jun nüm mak, ¿achkë nkʼatzin nqaʼän
¿Achkë kʼo chë nqaʼän rchë ma nqaxöl ta qiʼ kikʼë ri religiones ri ma pa rubʼeyal ta nkiyaʼ ruqʼij Dios?
RCHË NATAMAJ MÁS
Tatamaj achkë ütz naʼän taq ri nkʼaj chik nkitzʼük tzij chkij ri testigos de Jehová.
¿Achkë rubʼanik natamaj we jun organización o xa bʼa achkë chik jun ri nkiʼän ri winäq rukʼwan riʼ rkʼë Babilonia la Grande?
¿Achkë kibʼanon jojun winäq ri itzel nkinaʼ che rä rutinamit Dios rchë nchaʼ chiʼ ri qakʼuqbʼäl kʼuʼx?
Tatzʼetaʼ chpan ri peraj «Kan xinwajoʼ xintamaj ruwäch Dios taq kʼa yïn koʼöl na» achkë rubʼanik jun achï xel pä chpan jun religión ri ma pa rubʼeyal ta nuyaʼ ruqʼij Dios.
«Le Biblia xjäl kikʼaslemal» (Ri Chajinel, 1 de julio, 2011)