Dios nuʼän ri naʼäy achï chqä ri naʼäy ixöq

Jehová xuʼän jun jardín chpan ri jyuʼ Edén. Chpan ri jardín riʼ kan kʼïy kotzʼiʼj, cheʼ chqä chköp kʼo. Chrij riʼ Dios xuʼän ri naʼäy achï, Adán. Ryä rkʼë ilew xuʼän wä chqä xxpuj pa rtzaʼn. ¿Ataman rït achkë xbʼanatäj taq ryä xuʼän riʼ? Ri achï xbʼejeʼ rkʼaslemal. Jehová xuʼij che rä Adán chë tchajij ri jardín chqä tyaʼ kibʼiʼ jontir ri chköp.

Jehová chqä kʼo jun xuʼij che rä Adán chë ma ütz ta nuʼän. Ryä xuʼij: «Rït yakowin natäj rfruta xa bʼa achkë cheʼ. Xa xuʼ rfruta jun cheʼ ma ütz ta natäj, rma ri cheʼ riʼ kowan rqʼij. Si rït xtatäj rfruta ri cheʼ riʼ, xkakäm».

Chrij riʼ Jehová xuʼij: «Nbʼän na jun ri xttoʼö Adán». Rma riʼ xuʼän chë Adán xqä chë waran, y xksaj jun rcostilla rchë xuʼän Eva, ri rxjayil. Adán y Eva xeʼok ri naʼäy familia. ¿Achkë xnaʼ Adán taq xtzʼët rxjayil? Ryä kan xel rkʼuʼx, rma riʼ xuʼij: «¡Tatzʼetaʼ ri xuʼän Jehová rkʼë jun chkë ri ncostillas! ¡Komä kʼo jun ri achiʼel rïn!».

Jehová xuʼij chkë Adán y Eva chë kejeʼ kʼïy kalkʼwal chqä chë tkinujsaj le Rwachʼlew. Ryä xrajoʼ ta chë ryeʼ kiʼ kikʼuʼx nkiʼän chqä jnan yesamäj rchë nkiʼän jun paraíso che rä le Rwachʼlew, kan achiʼel ri jardín de Edén. Pero ma ke riʼ ta xbʼanatäj. ¿Achkë rma manä? Xtqatzʼët riʼ chpan ri jun chik historia.