Ri torre ri xbʼan Babel

Taq xbʼanatäj yän ri mamaʼ jöbʼ, ri ralkʼwal Noé kan ye kʼïy kalkʼwal xejeʼ. Ri kifamilias xekʼiyär chqä xkikraj kiʼ chwäch le Rwachʼlew, achiʼel xuʼij Jehová chkë.

Pero jojun familias ma xkinmaj ta rtzij Jehová. Ryeʼ xkiʼij: «Qkanaj qa aweʼ y tqayakaʼ jun tinamït, chqä tqabʼanaʼ jun torre ri napon kʼa chkaj. Ke riʼ kan xttamatäj qawäch».

Jehová ma xqä ta chwäch ri xkiʼän ri winäq riʼ. Rma riʼ xqʼät kisamaj. ¿Ataman achkë rbʼanik xuʼän che rä? Xuʼän chë chaq kʼateʼ xjalatäj kichʼaʼäl ri winäq. Rma riʼ, che rä ri tinamït riʼ Babel xbʼix, rma ntel chë tzij «xsach chkiwäch». Rma ma nqʼax ta wä chik chkiwäch ri nkiʼij ri nkʼaj chik, xkiyaʼ qa rbʼanik ri torre chqä xkikraj äl kiʼ. Pero xa bʼa akuchï xebʼä wä, kan xkiʼän na ri ma ütz ta chwäch Dios. ¿Naʼij rït chë xejeʼ na winäq ri xkajoʼ Jehová? Xtqatzʼët chpan ri jun chik historia.