¿Kʼo komä jun Biblia ri xa xuʼ kichë ri testigos de Jehová?

Röj, ri testigos de Jehová, kan nqaksaj jalajöj kiwäch biblias taq nqatjoj qiʼ chrij. Ye kʼa, kan más nqä chqawäch nqaksaj ri Traducción del Nuevo Mundo de las Santas Escrituras, rma kan nuksaj rubʼiʼ Dios chqä kan tzʼaqät y ma kʼayewal ta nqʼax chawäch. Le Biblia reʼ kan kʼo pa jalajöj chʼaʼäl.

• Ri ruksaxik rubʼiʼ Dios. Ma jontir ta ri yeʼelesan pä le Biblia nkiyaʼ rejqalen ri rubʼiʼ Dios. Jun tzʼetbʼäl, kʼo jun Biblia ri xelitäj kibʼiʼ más ye 70 winäq chpan, ri winäq riʼ ya riʼ xetoʼon rchë xkesaj pä le Biblia, ye kʼa majun bʼëy xkiyaʼ ta qa rubʼiʼ ri rajaw re wuj reʼ, Jehová.

  Chpan ri Traducción del Nuevo Mundo ma nuʼij ta pä kibʼiʼ ri winäq ri xesamäj chrij. Ye kʼa kan kiyaʼon pä rubʼiʼ Dios kan akuchï xelitäj wä chkipan ri ojer taq manuscritos.

• Kan tzʼaqät bʼanon che rä. Kʼo jojun biblias ri ma chöj ta nkiʼij achiʼel tzʼibʼatäl qa ojer. Jun tzʼetbʼäl, jun chkë ri biblias riʼ ke reʼ xuʼän qa che rä Mateo 7:​13: «Kixok chpan ri puerta ri koʼöl ruwäch rma chë ri puerta chqä ri bʼey ri xa pa qʼaqʼ yixurkʼwaj wä kan nüm ruwäch». Ye kʼa, ojer taq manuscritos ma nuksaj ta ri tzij ‹qʼaqʼ›, xa nuksaj ri tzij ‹kamïk›. Reʼ nukʼüt chqawäch chë ri winäq ri xeqʼaxan ri Biblia riʼ pa jun chik chʼaʼäl, nkinmaj wä chë ri itzel taq winäq taq xkekäm, yetaq wä pa qʼaqʼ rchë nkibʼetjaʼ poqän. Ye kʼa le Biblia ma ke riʼ ta wä nukʼüt. Rma riʼ, ri Traducción del Nuevo Mundo nuksaj ri tzij kamïk, kan achiʼel tzʼibʼatäl qa chkipan ojer taq manuscritos.

• Kan nqʼax chawäch ri nuʼij. Kantzij na wä chë jun utziläj Biblia ma xa xuʼ ta nkʼatzin yejeʼ tzʼaqät taq naʼoj chpan, nkʼatzin chqä nqʼax chawäch ri nuʼij. Tqatzʼetaʼ jun tzʼetbʼäl, chpan Mateo 5:3, ye kʼïy kan nkiksaj ojer taq tzij chpan re texto reʼ, pa kaxlän ke reʼ nuʼij: «Bienaventurados los pobres de espíritu». Ye kʼa komä, re tzij reʼ kan kʼayewal nqʼax chkiwäch ri winäq. We nqaqʼaxaj pa qachʼaʼäl ri nuʼij ri Traducción del Nuevo Mundo, re texto reʼ ke reʼ nkanaj qa: «Kiʼ kikʼuʼx ri winäq ri nkinaʼ chë nkʼatzin Dios pa kikʼaslemal».

Nqatzʼët kʼa chë ri Traducción del Nuevo Mundo ma xa xuʼ ta ruyaʼon rejqalen ri rubʼiʼ Dios chqä kan tzʼaqät rubʼanon y ma kʼayewal ta yeqʼax pa ajolon ri naʼoj ye kʼo chkipan. Kʼo chik jun rma nqaʼij chë kan ma junan ta kikʼë ri nkʼaj chik biblias, ya riʼ chë ma nkʼayïx ta taq nyaʼöx chkë ri winäq. Reʼ nuʼän chë pa millón chkë winäq yekowin nkiskʼij ruwäch le Biblia pa kichʼaʼäl, tapeʼ majun ta kirajil rchë nkilöqʼ jun.