• ¿Kʼo komä jun ruqʼatbʼäl tzij Dios?
    ¿Nawajoʼ rït yakʼaseʼ y majun bʼëy yakäm ta? Tjonïk chrij le Biblia
    • Tjonïk 31. Jesucristo, ri xok yän Qʼatöy Tzij chlaʼ chkaj, paʼäl chwäch Jehová.

      TJONÏK 31

      ¿Kʼo komä jun ruqʼatbʼäl tzij Dios?

      Le Biblia ntzjon chrij ri Ruqʼatbʼäl Tzij Dios. Jehová xtksaj re Qʼatbʼäl Tzij reʼ rchë xtuʼän ri xrajoʼ pa naʼäy pa ruwiʼ le Ruwachʼulew. ¿Achkë xyaʼö re Qʼatbʼäl Tzij reʼ? ¿Achkë rma qataman chë ya najin chik nuqʼät tzij? ¿Achkë samaj rubʼanon pä y achkë xtuʼän chqawäch apü? Re kʼutunïk reʼ xkeqʼalajsäx chpan re tjonïk reʼ chqä chkipan ri kaʼiʼ chik tjonïk.

      1. ¿Kʼo komä jun ruqʼatbʼäl tzij Dios? We ke riʼ, ¿achkë nqʼatö tzij chpan?

      Jehová kʼo jun ruqʼatbʼäl tzij ri kan yë ryä xyaʼö. Ri nqʼatö tzij chpan ya riʼ Jesús, y ryä kan chlaʼ chkaj nuʼän wä ri samaj riʼ (Mateo 4:17; Juan 18:36). Le Biblia nuʼij chë Jesús majun bʼëy xtkʼis ta ruqʼatbʼäl tzij (Lucas 1:32, 33). Rma Jesús ya riʼ ri Qʼatöy Tzij chpan Ruqʼatbʼäl Tzij Dios, ryä xtqʼät tzij pa kiwiʼ jontir winäq.

      2. ¿Achkë xkeqʼatö tzij rkʼë Jesús?

      Jesús ma ruyonïl ta xtqʼät tzij chlaʼ chkaj, rma ye kʼo winäq ri jalajöj kitinamit, kijatzul chqä kichʼaʼäl ri xtkiqʼät tzij pa ruwiʼ le Ruwachʼulew (Apocalipsis 5:9, 10). ¿Jaruʼ winäq xkeqʼatö tzij rkʼë Jesús? Chpan jontir ri tiempo qʼaxnäq pä taq Jesús xjeʼ chwäch le Ruwachʼulew, kan ye kʼïy winäq ye oknäq pä rutzeqelbʼëy, ntel chë tzij, ye oknäq cristianos. Ye kʼa xa xuʼ 144,000 chkë ri winäq riʼ xkebʼä chkaj rchë xtkiqʼät tzij rkʼë Jesús (taskʼij ruwäch Apocalipsis 14:1-4). Ri nkʼaj chik cristianos xkeʼok ruwinaq ri Ruqʼatbʼäl Tzij Dios aweʼ chwäch le Ruwachʼulew (Salmo 37:29).

      3. ¿Achkë rma ri Ruqʼatbʼäl Tzij Dios más ütz chwäch ri kiqʼatbʼäl tzij ri winäq?

      Tapeʼ ye kʼo qʼatöy taq tzij nkajoʼ nkiʼän ri ütz, ryeʼ ma yekowin ta nkiʼän jontir ri nkajoʼ. Y taq yeqʼax ri junaʼ, ye kʼo chik nkʼaj yekanaj qa pa kikʼexel ri rkʼë jbʼaʼ ma junan ta kichʼobʼoj kikʼë. Ye kʼa Jesús, ri Qʼatöy Tzij chpan Ruqʼatbʼäl Tzij Dios, majun ta jun xtesan äl rchë, rma Dios xyaʼ «jun ruqʼatbʼäl tzij ri majun bʼëy xtchup ta ruwäch» (Daniel 2:44). Taq Jesús xtqʼät tzij pa ruwiʼ le Ruwachʼulew, ryä ma xkeruchaʼ ta ri winäq. Jesús kan jaʼäl runaʼoj, kowan najowan chqä kan pa rubʼeyal nuʼän che rä jontir. Y ryä kan xtkʼüt chkiwäch ri winäq achkë rubʼanik xtkikʼüt ri naʼoj riʼ chqä (taskʼij ruwäch Isaías 11:9).

      TQATAMAJ MÁS CHRIJ RE NAʼOJ REʼ

      Tqatzʼetaʼ achkë rma ri Ruqʼatbʼäl Tzij Dios más ütz chwäch ri kiqʼatbʼäl tzij ri winäq.

      Jesucristo tzʼyül chpan rutzʼibʼäl chqä najin nuqʼät tzij pa ruwiʼ le Ruwachʼulew. Chrij ryä ye kʼo ri najin yeqʼatö tzij rkʼë. Y chkij jontir ryeʼ kʼo Jehová, ri Nimaläj Ruqʼij.

      4. Ri Qʼatbʼäl Tzij ri xtqʼät tzij pa ruwiʼ jontir le Ruwachʼulew

      Jesucristo más nkowin nuqʼät tzij pa kiwiʼ ri winäq chqä kʼo más uchqʼaʼ pa ruqʼaʼ chwäch xa bʼa achkë chik jun qʼatöy tzij. Tiskʼij ruwäch Mateo 28:18 y kixtzjon chrij reʼ:

      • ¿Achkë rma nqaʼij chë Jesús kʼo más uchqʼaʼ pa ruqʼaʼ chwäch xa bʼa achkë chik jun qʼatöy tzij?

      Ri qʼatöy taq tzij xa xuʼ pa kiwiʼ jojun tinamït yekowin wä nkiqʼät tzij. Chqä, xa nkʼis ri kiqʼatbʼäl tzij. ¿Ke riʼ komä chqä xtbʼanatäj rkʼë Ruqʼatbʼäl Tzij Dios? Tiskʼij ruwäch Daniel 7:14 y kixtzjon chrij reʼ:

      • ¿Achkë rma nqaʼij chë kan ütz chë ri Ruqʼatbʼäl Tzij Dios ma xtchup ta ruwäch?

      • ¿Achkë rma kan ütz chë xtqʼät tzij pa ruwiʼ jontir le Ruwachʼulew?

      5. Ri qʼatbʼäl taq tzij ma yekowin ta nkisöl ri kʼayewal najin yeqaqʼaxaj

      ¿Achkë rma nkʼatzin chë yë ri Ruqʼatbʼäl Tzij Dios nqʼatö tzij pa qawiʼ komä? Titzʼetaʼ ri VIDEO y kixtzjon chrij reʼ:

      VIDEO: ¿Kʼo komä jun ruqʼatbʼäl tzij Dios? (koʼöl peraj) (1:41)

      • ¿Achkë kʼayewal kiyaʼon ri qʼatbʼäl taq tzij pa kiwiʼ ri winäq?

      Tiskʼij ruwäch Eclesiastés 8:9 y kixtzjon chrij reʼ:

      • ¿Naʼij rït chë ri Ruqʼatbʼäl Tzij Dios ya riʼ kʼo ta chë nqʼatö tzij komä? ¿Achkë rma?

      6. Ri ye kʼo chpan ri Ruqʼatbʼäl Tzij Dios kan nqʼax chkiwäch ri nqanaʼ röj

      Rma Jesús, ri Qaqʼatöy Tzij, xpë chwäch le Ruwachʼulew, ryä «kan nunaʼ ri nqanaʼ röj» (Hebreos 4:15). Jehová yeruchaʼon ye 144,000 achiʼaʼ chqä ixoqiʼ rchë nkiqʼät tzij rkʼë Jesús chlaʼ chkaj. Ri winäq riʼ «jalajöj kitinamit, kijatzul chqä kichʼaʼäl» (Apocalipsis 5:9).

      • ¿Achkë komä nanaʼ rït taq natamaj chë Jesús chqä ri xkeqʼatö tzij rkʼë kitaman achkë nqaqʼaxaj pa qakʼaslemal? ¿Achkë rma?

      Jun molaj achiʼaʼ chqä ixoqiʼ ri jalajöj kijatzul. Ryeʼ yechaʼon rchë yebʼä chkaj.

      Jehová yeruchaʼon jojun achiʼaʼ chqä ixoqiʼ ri jalajöj kijatzul rchë nkiqʼät tzij rkʼë Jesús chlaʼ chkaj.

      7. Ri pixaʼ yeruyaʼ ri Ruqʼatbʼäl Tzij Dios ya riʼ ri más ütz

      Ri qʼatbʼäl taq tzij yekiyaʼ pixaʼ rchë yekitoʼ chqä yekichajij ri kiwinaq. Ke riʼ chqä Ruqʼatbʼäl Tzij Dios, yeruyaʼ pixaʼ y ruwinaq kʼo chë yekismajij. Tiskʼij ruwäch 1 Corintios 6:9-11 y kixtzjon chrij reʼ:

      • ¿Achkë komä rubʼanik xtuʼän qakʼaslemal naʼij rït taq jontir winäq xtkismajij rupixaʼ Dios?a

      • ¿Naʼij rït chë kan kʼo rma Jehová nuyoʼej chë ri xkejeʼ chuxeʼ Ruqʼatbʼäl Tzij nkismajij rupixaʼ? ¿Achkë rma naʼij riʼ?

      • ¿Achkë rma nqaʼij chë ri winäq ri ma nkismajij ta ri pixaʼ riʼ yekowin nkijäl kinaʼoj? (Titzʼetaʼ ri versículo 11).

      Jun policía najin nuqʼät jun chʼichʼ rchë chë ri winäq yekowin yeqʼax jukʼan chik che rä ri bʼey.

      Ri qʼatbʼäl taq tzij yekiyaʼ pixaʼ rchë yekitoʼ chqä yekichajij ri kiwinaq. Ri Ruqʼatbʼäl Tzij Dios yeruyaʼ pixaʼ más ütz chwäch ri nkiyaʼ ri qʼatbʼäl taq tzij. Ri pixaʼ riʼ yekitoʼ chqä yekichajij ri winäq.

      JOJUN WINÄQ NKIʼIJ REʼ: «Ri Ruqʼatbʼäl Tzij Dios ya riʼ ntel chë tzij naʼän ri ütz chwäch Dios».

      • ¿Achkë xtaʼij rït chkë?

      RI XQATAMAJ QA

      Ri Ruqʼatbʼäl Tzij Dios chkaj kʼo wä chqä xtqʼät tzij pa ruwiʼ jontir le Ruwachʼulew.

      Tqakamluj ri xqatzʼët qa

      • ¿Achkë yeqʼatö tzij chpan Ruqʼatbʼäl Tzij Dios?

      • ¿Achkë rma ri Ruqʼatbʼäl Tzij Dios más ütz chwäch ri kiqʼatbʼäl tzij ri winäq?

      • ¿Achkë nrajoʼ Jehová chë nkiʼän ri winäq ri xkejeʼ chuxeʼ Ruqʼatbʼäl Tzij?

      Ütz naʼän reʼ

      RCHË NATAMAJ MÁS

      Tatzʼetaʼ akuchï xuʼij wä Jesús chë xtjeʼ wä ri Ruqʼatbʼäl Tzij Dios.

      «¿Pa qan komä kʼo wä ri Ruqʼatbʼäl Tzij Dios?» (Reʼ xtawïl pa jw.org)

      Chkiwäch ri testigos de Jehová kʼo más ruqʼij nkinmaj rutzij ri Ruqʼatbʼäl Tzij Dios chwäch ri kiqʼatbʼäl tzij ri winäq. ¿Achkë rma?

      Nkinmaj rutzij ri Ruqʼatbʼäl Tzij Dios (1:43)

      Tatzʼetaʼ achkë nuʼij le Biblia chkij ri 144,000 winäq ri yeruchaʼ Jehová rchë xtkiqʼät tzij rkʼë Jesús.

      «¿Achkë winäq xkebʼä chkaj?» (Reʼ xtawïl pa jw.org)

      Tatamaj achkë xbʼanö che rä jun ixöq ri xjeʼ pacheʼ rchë xyaʼ chwäch ran chë xa xuʼ Dios nkowin nsolö ri kʼayewal chwäch le Ruwachʼulew.

      «Xintamaj achkë rubʼanik xkeslotäj ri kʼayewal» (¡Despertad!, noviembre 2011)

      a Chpan ri peraj 3 xketzʼet jojun chkë re naʼoj reʼ.

  • ¡Ri Ruqʼatbʼäl Tzij Dios ya najin chik nuqʼät tzij!
    ¿Nawajoʼ rït yakʼaseʼ y majun bʼëy yakäm ta? Tjonïk chrij le Biblia
    • Tjonïk 32. Jesucristo, ri Qʼatöy Tzij, rukʼwan jun cetro pa ruqʼaʼ chqä najin nuqʼät tzij pa ruwiʼ le Ruwachʼulew.

      TJONÏK 32

      ¡Ri Ruqʼatbʼäl Tzij Dios ya najin chik nuqʼät tzij!

      Ri Ruqʼatbʼäl Tzij Dios xchäp samaj chlaʼ chkaj pa junaʼ 1914. Y kan chpan ri junaʼ riʼ xchapatäj pä ri rukʼisbʼäl taq qʼij che rä ri kiqʼatbʼäl tzij ri winäq. ¿Achkë rma qataman riʼ? Chpan re tjonïk reʼ xtatzʼët achkë rubʼin pä chik le Biblia, achkë najin yebʼanatäj komä y achkë kinaʼoj kibʼanon pä ri winäq kan pa junaʼ 1914.

      1. ¿Achkë rubʼin pä chik le Biblia?

      Ri wuj Daniel kan rubʼin wä chik chë Ruqʼatbʼäl Tzij Dios xtchäp samaj taq xtkʼis jun tiempo ri nbʼix «7 junaʼ» che rä (Daniel 4:16, 17). Kʼïy junaʼ chrij riʼ, Jesús xuʼij chë ri tiempo riʼ ya riʼ «ri tiempo ri yaʼon chkë ri winäq» ri ma ye judíos ta, chqä xkʼüt chë ri junaʼ riʼ majanä wä kekʼis (Lucas 21:24). Achiʼel xtqatzʼët qa, ri 7 junaʼ xekʼis pa junaʼ 1914.

      2. Kan pa 1914, ¿achkë bʼanatajnäq pä y achkë kinaʼoj kibʼanon pä ri winäq?

      Ri rutzeqelbʼëy Jesús xkikʼutuj reʼ che rä: «¿Achkë retal xtkʼutü chë rït ya najin chik naqʼät tzij chqä chë ya xtchup ruwäch ronojel?» (Mateo 24:3). Jesús xuʼij chkë chë taq ryä xttok Qʼatöy Tzij chlaʼ chkaj chpan Ruqʼatbʼäl Tzij Dios, xkejeʼ chʼaʼoj, wayjal chqä xkebʼanatäj nmaʼq taq slonel (taskʼij ruwäch Mateo 24:7). Le Biblia chqä nuʼij chë ri kinaʼoj ri winäq chkipan ri «rukʼisbʼäl taq qʼij» xtuʼän chë xkejeʼ kʼïy kʼayewal ri «kan kʼayewal xtuʼän kikʼwaxik» (2 Timoteo 3:1-5). Y kan pa 1914 qatzʼeton pä chë kan ya riʼ najin nbʼanatäj.

      3. ¿Achkë rma kan más na chik kʼayewal ye bʼanatajnäq pä kan xa xuʼ xchäp samaj ri Ruqʼatbʼäl Tzij Dios?

      Taq Jesús xok Qʼatöy Tzij chpan Ruqʼatbʼäl Tzij Dios, jbʼaʼ chrij riʼ, kʼo jun chʼaʼoj xbʼanatäj chlaʼ chkaj. Ryä xuʼän chʼaʼoj rkʼë Satanás chqä ri ru-demonios. Satanás xchʼak y achiʼel nuʼij le Biblia, «xkʼaq pä chwäch le Ruwachʼulew, y ri ru-ángeles chqä xekʼaq pä rkʼë ryä» (Apocalipsis 12:10, 12). Satanás kan katajnäq ruyowal rma retaman chë xa jbʼaʼ chik nrajoʼ rchë xtchup ruwäch. Rma riʼ najin yerutzʼlaʼ ri winäq chwäch le Ruwachʼulew. ¡Komä nqʼax chqawäch achkë rma kowan kʼayewal kʼo! Ye kʼa ri Ruqʼatbʼäl Tzij Dios xtchüp kiwäch jontir ri kʼayewal riʼ.

      TQATAMAJ MÁS CHRIJ RE NAʼOJ REʼ

      Tqatzʼetaʼ achkë nkʼutü chë ri Ruqʼatbʼäl Tzij Dios xchäp samaj pa 1914 y achkë kʼo ta chë nqaʼän röj taq nqatamaj riʼ.

      4. Ri profecías nkikʼüt chë ri Ruqʼatbʼäl Tzij Dios xchäp samaj pa 1914

      Titzʼetaʼ ri VIDEO.

      VIDEO: Ri Ruqʼatbʼäl Tzij Dios xchäp samaj pa junaʼ 1914 (5:02)

      Dios xuʼän chë Nabucodonosor, jun qʼatöy tzij rchë Babilonia, xuʼän jun achïkʼ ri kʼo ntel chë tzij. Ri achïkʼ chqä ri xuʼij Daniel chrij ri achïkʼ riʼ rukʼwan riʼ rkʼë ri ruqʼatbʼäl tzij Nabucodonosor chqä rkʼë ri Ruqʼatbʼäl Tzij Dios (tiskʼij ruwäch Daniel 4:17).a

      Tiskʼij ruwäch Daniel 4:20-26. Chrij riʼ tiksaj ri achbʼäl rchë niqʼalajsaj re kʼutunïk reʼ:

      Ri cheʼ ri xtzʼët Nabucodonosor chqä ri Ruqʼatbʼäl Tzij Dios

      RI PROFECÍA (Daniel 4:20-36)

      Ri qʼatbʼäl tzij

      A) Jun mamaʼ cheʼ

      Jun mamaʼ cheʼ.

      Xqʼat ri qʼatbʼäl tzij

      B) «Tichoyoʼ ri cheʼ» y tiyaʼ qʼij chë keqʼax «7 junaʼ»

      Jun cheʼ choyon qa chqä xmïl qa rupan kikʼë kaʼiʼ chʼichʼ.

      Ri qʼatbʼäl tzij nuchäp chik jmul samaj

      C) «Rït xkatzolin chik jmul pan aqʼatbʼäl tzij»

      Jun mamaʼ cheʼ.

      Ri achoq chrij xtzʼaqät wä naʼäy:

      • D) ¿Achoq chrij xkʼambʼej wä tzij ri cheʼ? (Titzʼetaʼ ri versículo 22).

      • E) ¿Ajän xyaʼ qa ruqʼatbʼäl tzij? (Tiskʼij ruwäch Daniel 4:29-33).

      • F) ¿Achkë xbʼanatäj rkʼë Nabucodonosor taq xeqʼax yän ri «7 junaʼ»? (Tiskʼij ruwäch Daniel 4:34-36).

      RI ACHOQ CHRIJ XTZʼAQÄT WÄ NAʼÄY

      Ri qʼatbʼäl tzij

      D) Nabucodonosor, ri qʼatöy tzij rchë Babilonia

      Nabucodonosor, ri qʼatöy tzij, paʼäl chqä kan najin nunaʼ riʼ.

      Xqʼat ri qʼatbʼäl tzij

      E) Chrij qa ri junaʼ 606 m.t.J.b Nabucodonosor xuʼän itzel rujolon y 7 junaʼ ma xkowin ta chik xqʼät tzij

      Nabucodonosor najin nutäj qʼayis kan achiʼel nkiʼän ri chköp.

      Ri qʼatbʼäl tzij nuchäp chik jmul samaj

      F) Nabucodonosor xkʼachöj rujolon y xtzolin chik jmul chpan ruqʼatbʼäl tzij

      Nabucodonosor najin ntzuʼun chkaj chqä ruyakon ruqʼaʼ.

      Ri rukaʼn ri achoq chrij xtzʼaqät wä:

      • G) ¿Achoq chkij xkʼambʼej wä tzij ri cheʼ? (Tiskʼij ruwäch 1 Crónicas 29:23).

      • H) ¿Ajän ma xkiqʼät ta chik tzij? ¿Achkë rma qataman chë ma najin ta wä nkiqʼät tzij taq Jesús xjeʼ chwäch le Ruwachʼulew? (Tiskʼij ruwäch Lucas 21:24).

      • I)  ¿Akuchï y ajän xchäp chik jmul samaj ri qʼatbʼäl tzij riʼ?

      RI RUKAʼN RI ACHOQ CHRIJ XTZʼAQÄT WÄ

      Ri qʼatbʼäl tzij

      G) Ri israelitas ri xeʼok qʼatöy taq tzij xkikʼambʼej tzij chrij ruqʼatbʼäl tzij Dios

      Jun molaj israelitas ri ye tzʼyül chpan ki-trono. Kʼo jun saqïl pa kiwiʼ.

      Xqʼat ri qʼatbʼäl tzij

      H) Jerusalén xchup ruwäch pa junaʼ 607 m.t.J.; 2,520 junaʼ majun ta chik jun israelita xok ta qʼatöy tzij

      Chpan ri junaʼ 607 taq majanä tpë Jesús, Jerusalén najin nbʼrö pa qʼaqʼ. Chrij riʼ xqʼax 2,520 junaʼ.

      Ri qʼatbʼäl tzij nuchäp chik jmul samaj

      I) Jesús xok Qʼatöy Tzij chlaʼ chkaj chpan Ruqʼatbʼäl Tzij Dios pa junaʼ 1914

      Chpan ri junaʼ 1914, Jesucristo tzʼyül chpan ru-trono chqä najin nuqʼät tzij pa ruwiʼ le Ruwachʼulew. Kʼo kowan saqïl chrij.

      ¿Jaruʼ riʼ ri 7 junaʼ?

      Jojun peraj che rä le Biblia yojkitoʼ rchë nqatamaj nkʼaj chik peraj ri ye kʼo chpan. Jun tzʼetbʼäl, Apocalipsis nuʼij chë oxiʼ junaʼ rkʼë nkʼaj ntel chë tzij 1,260 qʼij (Apocalipsis 12:6, 14). Reʼ ntel chë tzij chë chkipan ri profecías ri ye kʼo chpan le Biblia, jun junaʼ kʼo 360 qʼij chpan. Rma riʼ taq nqaʼij 7 junaʼ najin nqtzjon chrij 2,520 qʼij. Kʼo mul, chpan le Biblia nuʼij chë jun qʼij nukʼambʼej tzij jun junaʼ (Ezequiel 4:6). Y ya riʼ nbʼanatäj rkʼë ri profecía ri kʼo chpan ri wuj Daniel ri ntzjon chkij ri 7 junaʼ: nkikʼambʼej tzij 2,520 junaʼ.

      5. Pa 1914 xjalatäj jontir chwäch le Ruwachʼulew

      Titzʼetaʼ ri VIDEO.

      VIDEO: Pa 1914 xjalatäj jontir chwäch le Ruwachʼulew (1:10)

      Jesús xuʼij achkë xkebʼanatäj chwäch le Ruwachʼulew taq ryä xtbʼeʼok Qʼatöy Tzij. Tiskʼij ruwäch Lucas 21:9-11 y kixtzjon chrij reʼ:

      • Rkʼë ri xqaskʼij qa chpan ri texto, ¿achkë chkë riʼ atzʼeton o akʼoxan chë najin yebʼanatäj komä?

      Ri apóstol Pablo xuʼij achkë kinaʼoj xtkiʼän ri winäq chpan ri rukʼisbʼäl taq qʼij che rä ri kiqʼatbʼäl tzij ri winäq. Tiskʼij ruwäch 2 Timoteo 3:1-5 y kixtzjon chrij reʼ:

      • Rkʼë ri xqaskʼij qa chpan ri texto, ¿achkë kinaʼoj ri winäq atzʼeton rït?

      Jalajöj achbʼäl: Ri najin yebʼanatäj chkipan ri rukʼisbʼäl taq qʼij. 1. Jun achï ri ukʼwayon bʼey chkiwäch soldados najin nuräq ruchiʼ pa ruwiʼ jun plataforma. 2. Jojun jay najin yetzaq rma jun mamaʼ slonel. 3. Aviones kichë ri soldados. 4. Jojun winäq kiksan mascarillas taq ye bʼenäq pa bʼey. 5. Ri Torres Gemelas najin yekʼat. Jojun winäq ri kan itzel kinaʼoj xebʼanö riʼ. 6. Jun achï najin nuyaʼ drogas chpan ruchʼakul. 7. Jun achï najin nuräq ruchiʼ chqä nrajoʼ nuchʼäy rixjayil. 8. Jalajöj kiwäch drogas. 9. Kaʼiʼ ixoqiʼ najin nkesaj jun ki-foto. 10. Jun achï najin nxajö chkiwäch ye kʼïy winäq chpan jun nmaqʼij. 11. Jun achï najin nukʼäq jun botella ri kʼo qʼaqʼ chpan.

      6. Takʼutuʼ chë nanmaj chë ri Ruqʼatbʼäl Tzij Dios ya najin chik nuqʼät tzij

      Tiskʼij ruwäch Mateo 24:3, 14 y kixtzjon chrij reʼ:

      • ¿Achkë samaj nkʼutü chë ri Ruqʼatbʼäl Tzij Dios ya najin chik nuqʼät tzij?

      • ¿Achkë ütz naʼän rït rchë yatoʼon chpan re samaj reʼ?

      Ri Ruqʼatbʼäl Tzij Dios ya najin chik nuqʼät tzij, y xa jbʼaʼ chik apü xtqʼät tzij pa ruwiʼ jontir le Ruwachʼulew. Tiskʼij ruwäch Hebreos 10:24, 25 y kixtzjon chrij reʼ:

      • ¿Achkë kʼo ta chë nqaʼän jontir röj rma qataman chë «ri qʼij xa naqaj chik kʼo pä»?

      Jalajöj achbʼäl: 1. Jun ixöq ri najin nutjoj riʼ chrij le Biblia kʼo chpan kimoloj ri testigos de Jehová. 2. Ri ixöq riʼ najin nutzjoj le Biblia che rä jun ixöq ri retaman ruwäch.

      We kʼo jun natamaj ri xkerutoʼ ri nkʼaj chik chqä xkeruköl, ¿achkë komä xtaʼän?

      JOJUN WINÄQ RKʼË JBʼAʼ XTKIKʼUTUJ REʼ CHAWÄ: «¿Achkë rma ri testigos de Jehová kan kowan yetzjon chrij ri junaʼ 1914?».

      • ¿Achkë xtaʼij rït chkë?

      RI XQATAMAJ QA

      Ri profecías ri ye kʼo chpan le Biblia chqä ri najin yebʼanatäj komä nkikʼüt chë ri Ruqʼatbʼäl Tzij Dios ya najin chik nuqʼät tzij. Y röj nqakʼüt chë nqanmaj riʼ taq nqatzjoj ri Qʼatbʼäl Tzij riʼ chqä nqbʼä pa qamoloj.

      Tqakamluj ri xqatzʼët qa

      • ¿Achkë xbʼanatäj taq xeqʼax yän ri 7 junaʼ ri nuʼij chpan ri wuj Daniel?

      • ¿Achkë nbʼanö chawä rït chë nanmaj chë ri Ruqʼatbʼäl Tzij Dios xchäp samaj pa 1914?

      • ¿Achkë rubʼanik nakʼüt rït chë nanmaj chë ri Ruqʼatbʼäl Tzij Dios ya najin chik nuqʼät tzij?

      Ütz naʼän reʼ

      RCHË NATAMAJ MÁS

      Kan pa 1914 jalatajnäq pä kinaʼoj ri winäq. Tatzʼetaʼ achkë nkiʼij jojun etamanelaʼ chrij riʼ.

      «Ri rubʼanik xjalatäj kinaʼoj ri winäq» (¡Despertad!, abril 2007)

      Tatzʼetaʼ achkë rubʼanik xjalatäj rukʼaslemal jun achï taq xtamaj chrij ri profecía ri kʼo chpan Mateo 24:14.

      «Kan nqä wä chi nwäch yinetzʼan béisbol» (Ri Chajinel, núm. 3 2017)

      ¿Achkë rma qataman chë ri profecía ri kʼo chpan ri capítulo 4 rchë ri wuj Daniel rukʼwan riʼ rkʼë ri Ruqʼatbʼäl Tzij Dios?

      «¿Ajän xchäp samaj ri Ruqʼatbʼäl Tzij Dios? (Naʼäy peraj)» (Ri Chajinel, 1 de octubre, 2014)

      ¿Achkë nkʼutü chë ri «7 junaʼ» ri ntzjöx chpan ri capítulo 4 rchë ri wuj Daniel xetzʼaqät pa 1914?

      «¿Ajän xchäp samaj ri Ruqʼatbʼäl Tzij Dios? (Rukaʼn peraj)» (Ri Chajinel, 1 de noviembre, 2014)

      a Taskʼij ri kaʼiʼ rukʼisbʼäl taq naʼoj ri ye kʼo chpan ri peraj «Rchë natamaj más» ri kʼo chpan re tjonïk reʼ.

      b Röj nqaksaj ri tzij m.t.J. rchë nqaʼij taq majanä tpë Jesús, y ri tzij x.y.J. rchë nqaʼij taq xpë yän Jesús.

  • ¿Achkë samaj xtuʼän ri Ruqʼatbʼäl Tzij Dios?
    ¿Nawajoʼ rït yakʼaseʼ y majun bʼëy yakäm ta? Tjonïk chrij le Biblia
    • Tjonïk 33. Winäq ri ye kʼo chwäch jun kotzʼijaläj ulew.

      TJONÏK 33

      ¿Achkë samaj xtuʼän ri Ruqʼatbʼäl Tzij Dios?

      Ri Ruqʼatbʼäl Tzij Dios ya najin chik nuqʼät tzij. Xa jbʼaʼ chik apü, kʼo kʼïy ri xtjäl chwäch le Ruwachʼulew. Tqatzʼetaʼ jojun chkë ri utzil ri xtyaʼ ri qʼatbʼäl tzij riʼ pa qawiʼ ri kan xttel akʼuʼx che rä.

      1. ¿Achkë xtuʼän ri Ruqʼatbʼäl Tzij Dios rchë ma xtjeʼ ta chik chʼaʼoj chqä itzelal chwäch le Ruwachʼulew?

      Chpan Armagedón, Jesús —ri Qʼatöy Tzij chpan Ruqʼatbʼäl Tzij Dios— xtchüp kiwäch ri itzel taq winäq chqä ri qʼatbʼäl taq tzij (Apocalipsis 16:14, 16). Chkipan ri qʼij riʼ kan xttzʼaqät re tzij reʼ: «Xa jbʼaʼ chik apü, ri itzel taq winäq ma xkejeʼ ta chik» (Salmo 37:10). Rkʼë ri qʼatbʼäl tzij riʼ, Jesús xtresaj ri chʼaʼoj chqä ri itzelal chwäch le Ruwachʼulew (taskʼij ruwäch Isaías 11:4).

      2. ¿Achkë rubʼanik xtuʼän qakʼaslemal taq xtbʼanatäj ri nrajoʼ Dios pa ruwiʼ le Ruwachʼulew?

      Taq ri Ruqʼatbʼäl Tzij Dios xtqʼät tzij pa ruwiʼ le Ruwachʼulew, «ri chöj kikʼaslemal xtyaʼöx qa le Ruwachʼulew chkë chqä majun bʼëy xkesäx ta äl chwäch» (Salmo 37:29). ¡Tachʼobʼoʼ na peʼ achkë rubʼanik xtuʼän qakʼaslemal taq jontir winäq kan ütz kinaʼoj xtkiʼän, xtkajoʼ Jehová chqä kan xtkajowalaʼ kiʼ chkiwäch! ¿Tapeʼ chë kan jaʼäl xtuʼän riʼ? Majun ta chik jun winäq xtyawäj chqä xtkäm.

      3. ¿Achkë xtuʼän ri Ruqʼatbʼäl Tzij Dios taq ruchpun chik kiwäch ri itzel taq winäq?

      Taq ruchpun chik kiwäch ri itzel taq winäq, Jesús xttok Qʼatöy Tzij 1,000 junaʼ. Chkipan ri junaʼ riʼ, Jesús chqä ri 144,000 winäq ri xkeqʼatö tzij rkʼë xkekitoʼ ri winäq rchë xttel qa ri mak chkij. Taq xkekʼis ri junaʼ riʼ le Ruwachʼulew xtbʼeʼok jun kotzʼijaläj ulew y ri winäq kan kiʼ kikʼuʼx xtkiʼän rma xtkismajij rupixaʼ Jehová. Chrij riʼ Jesús xttzolij ri qʼatbʼäl tzij che rä Jehová, ri Rutataʼ. Chqä, kan xtchʼajchʼobʼëx rubʼiʼ Dios (Mateo 6:9, 10). Chkipan ri qʼij riʼ kan xtqʼalajin chë Jehová jun utziläj qʼatöy tzij chqä chë kan nuchajij rutinamit. Chrij riʼ, Jehová xtchüp ruwäch Satanás, ri ru-demonios chqä xa bʼa achkë winäq ri ma xtrajoʼ ta ri ruqʼatbʼäl tzij (Apocalipsis 20:7-10). Jontir ri utzil xtqïl rma ri Ruqʼatbʼäl Tzij Dios majun bʼëy xkekʼis ta.

      TQATAMAJ MÁS CHRIJ RE NAʼOJ REʼ

      Tqatzʼetaʼ achkë rma ütz nqakʼuqbʼaʼ qakʼuʼx chë Dios xtksaj ri Ruqʼatbʼäl Tzij rchë xtuʼän jontir ri rutzjun chqë chpan le Biblia.

      4. Ri Ruqʼatbʼäl Tzij Dios xtchüp kiwäch jontir ri qʼatbʼäl taq tzij

      Ri winäq «kiqʼaton tzij [...] pa kiwiʼ ri nkʼaj chik xa xuʼ rchë yekitzʼlaʼ» (Eclesiastés 8:9). Jehová xtksaj ri Ruqʼatbʼäl Tzij rchë xtchüp ruwäch jontir ri kʼayewal ri kiyaʼon ri winäq pa kiwiʼ ri nkʼaj chik.

      Tiskʼij ruwäch Daniel 2:44 chqä 2 Tesalonicenses 1:6-8, y kixtzjon chrij reʼ:

      • ¿Achkë xtkiʼän Jehová chqä Jesús chkë ri qʼatbʼäl taq tzij chqä chkë ri yetoʼö kichë?

      • Rkʼë ri ataman pä chik chrij Jehová chqä Jesús, ¿achkë nbʼanö chawä chë nanmaj chë ryeʼ kan pa rubʼeyal xkeqʼatö tzij?

      Jesús, ri Qʼatöy Tzij, najin nuqʼät tzij pa ruwiʼ le Ruwachʼulew ri rubʼanon chik jun kotzʼijaläj ulew.

      5. Jesús ya riʼ ri Qʼatöy Tzij más ütz kʼo

      Taq Jesús xtqʼät tzij pa ruwiʼ le Ruwachʼulew, ryä kan kʼïy utzil xtyaʼ pa kiwiʼ ri winäq. Titzʼetaʼ ri VIDEO rchë nitzʼët achkë rubʼanik xkʼüt Jesús chë nrajoʼ yerutoʼ ri winäq chqä chë Dios ruyaʼon ruchqʼaʼ rchë xtuʼän riʼ.

      VIDEO: Jesús xkʼüt achkë xtuʼän ri Ruqʼatbʼäl Tzij Dios (1:13)

      Jontir ri xuʼän Jesús taq xjeʼ chwäch le Ruwachʼulew, xkʼüt achkë samaj xtuʼän ri Ruqʼatbʼäl Tzij Dios. Chkë ri utzil ri rutzjun qa Dios chqë ri nqatzʼët chpan ri recuadro, ¿achkë chkë riʼ nawajoʼ rït chë nbʼanatäj yän? Tiskʼij ruwäch jontir ri textos ri akuchï nutzjoj wä ri utzil riʼ.

      TAQ JESÚS XJEʼ CHWÄCH LE RUWACHʼULEW...

      TAQ JESÚS XTQʼÄT TZIJ PA RUWIʼ LE RUWACHʼULEW...

      • ... xqʼät ruchqʼaʼ ri kaqʼiqʼ chqä ri jöbʼ (Marcos 4:36-41)

      • ... xtresaj jontir ri kʼayewal ri najin nkitzʼlaʼ le Ruwachʼulew komä (Isaías 35:1, 2)

      • ... xtuʼän chë ri winäq ma xkeyawäj ta chik (Isaías 33:24)

      6. Ri Ruqʼatbʼäl Tzij Dios xtyaʼ jun utziläj qakʼaslemal

      Ri Ruqʼatbʼäl Tzij Dios xtuʼän chë xtbʼanatäj ri xrajoʼ Jehová pa kiwiʼ ri winäq pa naʼäy. Ryeʼ xkejeʼ chwäch jun kotzʼijaläj ulew chqä majun bʼëy chik xkekäm ta. Titzʼetaʼ ri VIDEO rchë nitamaj achkë rubʼanik Jehová najin nuksaj Jesús, ri Rukʼajol, rchë nuʼän ri nrajoʼ.

      VIDEO: Ri utziläj kʼaslemal xtqïl chqawäch apü (4:38)

      Tiskʼij ruwäch Salmo 37:4 y kixtzjon chrij reʼ:

      • ¿Achkë nanaʼ rït taq natamaj chë Jehová kan «xtyaʼ chawä ri nurayij ri awan»?

      JOJUN WINÄQ NKIʼIJ REʼ: «Xa ta jontir nqtoʼon xtqkowin ta xtqasöl ri kʼayewal ye kʼo komä».

      • ¿Achkë kʼayewal ri ma yekowin ta nkisöl ri qʼatbʼäl taq tzij komä xtsöl ri Ruqʼatbʼäl Tzij Dios?

      RI XQATAMAJ QA

      Ri Ruqʼatbʼäl Tzij Dios xtuʼän ri nrajoʼ Jehová. Xtuʼän chë le Ruwachʼulew xtbʼeʼok jun kotzʼijaläj ulew chqä xkejeʼ winäq chwäch ri majun bʼëy xtkiyaʼ ta qa ruyaʼik ruqʼij Jehová.

      Tqakamluj ri xqatzʼët qa

      • ¿Achkë xtuʼän ri Ruqʼatbʼäl Tzij Dios rchë xtchʼajchʼobʼej rubʼiʼ Jehová?

      • ¿Achkë rma qataman chë ri Ruqʼatbʼäl Tzij Dios kan xtuʼän ri rutzjun Jehová chqë chpan le Biblia?

      • Chkë jontir ri xtuʼän ri Ruqʼatbʼäl Tzij Dios, ¿achkë nawajoʼ rït chë nbʼanatäj yän?

      Ütz naʼän reʼ

      RCHË NATAMAJ MÁS

      Tatamaj achkë riʼ ri Armagedón.

      «¿Achkë riʼ ri Armagedón?» (Reʼ xtawïl pa jw.org)

      Tatzʼetaʼ achkë xtbʼanatäj chqawäch apü taq xtpë «jun nüm kʼayewal» chqij, achiʼel xuʼij Jesús (Mateo 24:21).

      «¿Achkë riʼ ri nimaläj tijöj poqonal?» (Reʼ xtawïl pa jw.org)

      ¿Achkë ütz nkiʼän ri familias rchë yechʼobʼon chkij ri utzil ri xtyaʼ ri Ruqʼatbʼäl Tzij Dios pa qawiʼ?

      Taquʼ chë yït kʼo chik chwäch ri Paraíso (1:50)

      Taskʼij ruwäch ri peraj «Kan kʼïy wä nkʼutunik kʼo» rchë natzʼët achkë rubʼanik jun achï xrïl ri najin wä nukanuj.

      «Le Biblia xjäl kikʼaslemal» (Ri Chajinel, 1 de enero, 2012)