TJONÏK 25
¿Achkë rma xqr-än Dios?
Le Biblia nuʼij chë ri winäq kan chaq bʼaʼ nkʼis kikʼaslemal chqä chë xa ruyon kʼayewal nkiqʼaxaj (Job 14:1). Ye kʼa, ¿ya riʼ komä xrajoʼ Dios pa qawiʼ? We ma ke riʼ ta, ¿achkë kʼa rma xqr-än? ¿Kʼo komä jun qʼij xtbʼanatäj riʼ? Tatzʼetaʼ achkë nuʼij le Biblia chrij riʼ ri kan xtkʼuqbʼaʼ akʼuʼx.
1. ¿Achkë rubʼanik kʼaslemal nrajoʼ Dios pa qawiʼ?
Jehová nrajoʼ chë njeʼ jun utziläj qakʼaslemal. Rma riʼ taq xeruʼän Adán y Eva, ri naʼäy taq winäq, xeruyaʼ chwäch jun jaʼäl ulew: ri jardín de Edén. Chpan ri ulew riʼ, «Dios xyaʼ utzil pa kiwiʼ y xuʼij chkë: ‹Kejeʼ iwalkʼwal, kixkʼiyär, tinujsaj le Ruwachʼulew, tismajij chqä tichajij›» (Génesis 1:28). Jehová xrajoʼ chë Adán y Eva xejeʼ ta kalkʼwal, xkiʼän ta jun kotzʼijaläj ulew che rä le Ruwachʼulew chqä xekichajij ta ri chköp. Ryä xrajoʼ chë jontir ta winäq ma ta jun bʼëy yeyawäj chqä yekäm.
Tapeʼ ma ke riʼ ta xbʼanatäj,a Dios ma rujalon ta ri ruchʼobʼon pa qawiʼ (Isaías 46:10, 11). Ryä nrajoʼ chë ri winäq ri nkinmaj rutzij yekʼaseʼ y majun bʼëy yekäm ta, chqä chë ma yeyawäj ta nixta nkitäj poqän (taskʼij ruwäch Apocalipsis 21:3, 4).
2. ¿Achkë ütz nqaʼän rchë kan kiʼ qakʼuʼx nqaʼän pa qakʼaslemal?
Jehová xqr-än rchë nqarayij nqatamaj ruwäch chqä nqayaʼ ruqʼij (taskʼij ruwäch Mateo 5:3-6). Dios nrajoʼ chë röj nq-ok rachiʼil, chë nqasmajij jontir rupixaʼ, chë nqajoʼ chqä chë nqayaʼ ruqʼij rkʼë ronojel qan (Deuteronomio 10:12; Salmo 25:14). We nqaʼän jontir riʼ, kan kiʼ qakʼuʼx xtqaʼän tapeʼ kʼo kʼayewal najin nqaqʼaxaj. Taq nqayaʼ ruqʼij Jehová nqanaʼ chë kʼo rma yojkʼäs.
TQATAMAJ MÁS CHRIJ RE NAʼOJ REʼ
Tqatzʼetaʼ jaruʼ nqrajoʼ Jehová rkʼë ri rubʼanik xuʼän qa che rä le Ruwachʼulew y achkë nukʼüt Ruchʼaʼäl chrij ri achkë rma yojkʼäs.
3. Jehová nrajoʼ chë röj njeʼ jun jaʼäl qakʼaslemal
Titzʼetaʼ ri VIDEO y kixtzjon chrij reʼ:
¿Achkë rma Dios xuʼän le Ruwachʼulew?
Tiskʼij ruwäch Eclesiastés 3:11 y kixtzjon chrij reʼ:
¿Achkë nukʼüt reʼ chqawäch chrij Jehová?
4. Jehová ma rujalon ta ri ruchʼobʼon pa qawiʼ
Tiskʼij ruwäch Salmo 37:11, 29 chqä Isaías 55:11, y kixtzjon chrij reʼ:
¿Achkë rma qataman chë Jehová ma rujalon ta ri ruchʼobʼon pa qawiʼ?
Jun jay ri rubʼanon chik itzel kʼa ütz na nchojmïx. Ke riʼ chqä nbʼanatäj rkʼë le Ruwachʼulew: ri winäq kowan kitzʼil-on, ye kʼa Dios xtuʼän na rubʼanik rchë ke riʼ ri winäq ri nkajoʼ ryä xkejeʼ chwäch.
5. Taq nqayaʼ ruqʼij Jehová nqanaʼ chë kʼo rma yojkʼäs
Kan kiʼ qakʼuʼx nqaʼän taq nqatamaj achkë rma yojkʼäs. Titzʼetaʼ ri VIDEO y kixtzjon chrij reʼ:
¿Achkë rubʼanik xtoʼ ya Terumi ri xtamaj achkë rma yojkʼäs?
Tiskʼij ruwäch Eclesiastés 12:13 y kixtzjon chrij reʼ:
Rkʼë jontir ri rubʼanon Jehová pa qawiʼ, ¿achkë ütz nqaʼän rchë nqakʼüt chwäch chë nqtyoxin?
JOJUN WINÄQ RKʼË JBʼAʼ XTKIKʼUTUJ REʼ CHAWÄ: «¿Achkë rma yojkʼäs?»
¿Achkë xtaʼij rït chkë?
RI XQATAMAJ QA
Jehová nrajoʼ chë nqjeʼ chwäch le Ruwachʼulew, chë ma nqyawäj ta, chë ma nqatäj ta poqän chqä chë majun bʼëy nqkäm ta. Yajün komä, kan kiʼ qakʼuʼx nqkowin nqaʼän taq nqayaʼ ruqʼij Jehová rkʼë ronojel qan.
Tqakamluj ri xqatzʼët qa
Taq Jehová xeruʼän Adán y Eva, ¿achkë xrajoʼ ryä pa kiwiʼ?
¿Achkë rma qataman chë Dios ma rujalon ta ri ruchʼobʼon pa kiwiʼ ri winäq?
¿Achkë ütz naʼän rït rchë kiʼ akʼuʼx naʼän komä?
RCHË NATAMAJ MÁS
Tatzʼetaʼ achkë rma ütz nqanmaj chë kantzij xjeʼ ri jardín de Edén.
«Ri jardín de Edén, ¿kantzij komä xjeʼ?» (Ri Chajinel, 1 de enero, 2011)
Tatamaj achkë rma nqanmaj chë le Ruwachʼulew majun bʼëy xtchup ta ruwäch.
«¿Xtchup komä ruwäch le Ruwachʼulew?» (Reʼ xtawïl pa jw.org)
Tatzʼetaʼ achkë nuʼij le Biblia chrij ri achkë rma yojkʼäs.
Jun achï xuʼij chë kʼo wä rkʼë jontir ri nkʼatzin che rä. Ye kʼa tatzʼetaʼ achkë rubʼanik xqʼalajin chwäch chë ma kiʼ ta wä rukʼuʼx rubʼanon.
a Chpan ri jun chik tjonïk xtqatzʼët achkë rma ma xbʼanatäj ta ri xrajoʼ Dios pa qawiʼ.