TJONÏK 28
Takʼutuʼ chë naloqʼoqʼej ri xkiʼän Jehová chqä Jesús pan awiʼ rït
¿Achkë nanaʼ rït taq jun awachiʼil nuyaʼ jun jaʼäl spanïk chawä? Rkʼë jbʼaʼ kan ntel akʼuʼx che rä chqä nawajoʼ nakʼüt chwäch awachiʼil chë naloqʼoqʼej ri spanïk riʼ. Jehová chqä Jesús xkiyaʼ jun spanïk chqë ri kʼo más ruqʼij chwäch xa bʼa achkë chik jun spanïk: ri rukʼaslemal xyaʼ Jesús pa kamïk. Tqatzʼetaʼ achkë rubʼanik nqakʼüt chë nqatyoxij ri xkiʼän ryeʼ pa qawiʼ.
1. ¿Achkë jun rubʼanik nqakʼüt chë nqaloqʼoqʼej ri xuʼän Dios chqä Jesús pa qawiʼ?
Le Biblia nuʼij chë xa bʼa achkë ri «nukʼüt chë rukʼuqbʼan rukʼuʼx chrij», ntel chë tzij chrij Jesús, kan xtrïl ri kʼaslemal ri majun bʼëy xtkʼis ta (Juan 3:16). ¿Achkë rubʼanik nqakʼüt chë qakʼuqbʼan qakʼuʼx chrij Jesús? Ma xa xuʼ ta nqakʼüt riʼ taq nqanmaj chrij Jesús, xa kan nqakʼüt chqä rkʼë ri nqachaʼ nqaʼän pa qakʼaslemal (Santiago 2:17). Taq nqakʼüt rkʼë ri nqaʼij chqä ri nqaʼän chë kʼo qakʼuqbʼäl kʼuʼx, más junan xtuʼän qawäch rkʼë Jesús chqä rkʼë Jehová, ri Rutataʼ (taskʼij ruwäch Juan 14:21).
2. ¿Achkë moloj nuyaʼ qʼij chqë rchë nqakʼüt chë nqtyoxin che rä Jehová chqä Jesús?
Ri rukʼisbʼäl aqʼaʼ xjeʼ Jesús kikʼë rutzeqelbʼëy, ryä xuʼij chkë achkë jun chik rubʼanik nkikʼüt chë nkityoxij ri xuʼän ryä pa kiwiʼ. Ryä xuʼij chë kʼo chë nbʼan jun nmaqʼij ri nbʼix «ri Loqʼoläj Waʼin» che rä, chqä rubʼiniʼan: Ri Runataxik Rukamik Cristo (1 Corintios 11:20). Jesús xuʼän riʼ rchë chë ru-apóstoles, y chrij riʼ jontir ri kantzij taq cristianos, xtkinataj rukʼaslemal xyaʼ pa kiwiʼ ri winäq. Ryä xuʼij reʼ chrij ri nmaqʼij riʼ: «Tibʼanaʼ kʼa reʼ rchë natabʼäl wchë rïn» (Lucas 22:19). Taq yajeʼ chpan ri moloj ri nbʼan rchë nqanataj rukamik Jesús, rït nakʼüt chë naloqʼoqʼej chë Jehová chqä Jesús kowan yojkajoʼ.
TQATAMAJ MÁS CHRIJ RE NAʼOJ REʼ
Tqatamaj achkë nkʼaj chik rubʼanik nqakʼüt chë nqatyoxij chë Jehová chqä Jesús kowan yojkajoʼ. Chqä tqatzʼetaʼ achkë rma kan kowan ruqʼij nqanataj rukamik Jesús.
3. Ri ütz nqaʼän rchë nqakʼüt chë nqtyoxin
Taquʼ na peʼ chë najin yajiqʼ y kʼo jun winäq ntoʼö awchë. ¿Xtamestaj komä ri xuʼän ri winäq riʼ pan awiʼ? ¿O xtakanuj rubʼanik rchë xtakʼüt chwäch chë yatyoxin che rä?
Jehová chqä kʼo jun xuʼän pa qawiʼ ri kʼo chë nqatyoxij che rä. Tiskʼij ruwäch 1 Juan 4:8-10 y kixtzjon chrij reʼ:
¿Achkë rma kan jun nimaläj spanïk ri rukʼaslemal xyaʼ Jesús pa kamïk?
¿Achkë nanaʼ rït taq yachʼobʼon chrij ri xuʼän Jehová chqä Rukʼajol pan awiʼ?
¿Achkë rubʼanik nqakʼüt chë kan nqaloqʼoqʼej ri xkiʼän Jehová chqä Jesús pa qawiʼ? Tiskʼij ruwäch 2 Corintios 5:15 chqä 1 Juan 4:11 y 5:3. Taq nikʼïs ruskʼixik jun texto kixtzjon chrij reʼ:
Rkʼë ri xqaskʼij qa, ¿achkë rubʼanik nqakʼüt chë nqtyoxin?
4. Nqakʼän qanaʼoj chrij Jesús
Jun chik rubʼanik nqakʼüt chë nqtyoxin ya riʼ taq nqakʼän qanaʼoj chrij Jesús. Tiskʼij ruwäch 1 Pedro 2:21 y kixtzjon chrij reʼ:
¿Achkë rubʼanik xtakʼän anaʼoj rït chrij Jesús?
Jesús kan xloqʼoqʼej Ruchʼaʼäl Dios, xtzjoj ri utziläj taq rutzjol chqä xerutoʼ ri nkʼaj chik winäq.
5. Nqanataj rukamik Jesús
Rchë nitamaj achkë rubʼanik xbʼan che rä ri naʼäy Loqʼoläj Waʼin, tiskʼij ruwäch Lucas 22:14, 19, 20. Chrij riʼ kixtzjon chrij reʼ:
¿Achkë xbʼan chpan ri Loqʼoläj Waʼin?
¿Achkë nkikʼambʼej tzij ri kaxlanwäy chqä ri vino? (Titzʼetaʼ ri versículos 19 chqä 20).
Jesús xrajoʼ chë rutzeqelbʼëy nkiʼän ri Loqʼoläj Waʼin jun mul pa jun junaʼ taq nbʼeqä ri fecha ri xkäm ryä. Rma riʼ ri testigos de Jehová ronojel junaʼ nqamöl qiʼ rchë nqanataj rukamik Jesús, y kan achiʼel xuʼän ryä kan ke riʼ rubʼanik nqaʼän röj che rä. Rchë nitamaj achkë nbʼan chpan ri moloj riʼ ri kan kowan ruqʼij, titzʼetaʼ ri VIDEO. Chrij riʼ kixtzjon chrij reʼ:
¿Achkë nbʼan chpan ri moloj ri nbʼan rchë nqanataj rukamik Jesús?
Ri nkikʼambʼej tzij ri kaxlanwäy chqä ri vino: ri kaxlanwäy nukʼambʼej tzij chrij ruchʼakul Jesús ri majun ta wä mak chrij, ri xyaʼ ryä pa kamïk. Y ri vino nukʼambʼej tzij chrij rukikʼel.
JOJUN WINÄQ NKIʼIJ REʼ: «Rchë yakolotäj xa xuʼ nkʼatzin nanmaj chrij Jesús».
¿Achkë rubʼanik xtaksaj rït Juan 3:16 chqä Santiago 2:17 rchë xtakʼüt chë ma xa xuʼ ta ya riʼ nkʼatzin nqaʼän?
RI XQATAMAJ QA
Nqakʼüt chë nqatyoxij ri xuʼän Jesús pa qawiʼ taq nqakʼüt chë qakʼuqbʼan qakʼuʼx chrij chqä taq nqjeʼ chpan ri moloj ri nbʼan rchë nqanataj rukamik.
Tqakamluj ri xqatzʼët qa
¿Achkë rubʼanik nukʼüt jun winäq chë rukʼuqbʼan rukʼuʼx chrij Jesús?
¿Nawajoʼ nakʼüt rït chwäch Jehová chqä Jesús chë kan naloqʼoqʼej ri xkiʼän ryeʼ pan awiʼ? ¿Achkë rubʼanik nawajoʼ naʼän riʼ?
¿Achkë rma kan kowan ruqʼij nqjeʼ chpan ri moloj ri nbʼan rchë nqanataj rukamik Jesús?
RCHË NATAMAJ MÁS
Taq nqanataj ri xuʼän Jesús pa qawiʼ, kʼo jun nqarayij nqaʼän. Tatzʼetaʼ achkë riʼ.
Tatamaj más chrij ri kʼuqbʼäl kʼuʼx chqä chrij ri achkë rubʼanik nqakʼüt.
«Tqakʼutuʼ chë qakʼuqbʼan qakʼuʼx chrij ri rutzjun Jehová chqë» (Ri Chajinel, octubre 2016)
Jun ixöq xjäl rukʼaslemal taq xtamaj achkë utzil nqïl rma Jesús xkäm pa qawiʼ. Tatzʼetaʼ ri xbʼanatäj rkʼë ri ixöq riʼ chpan ri peraj «Komä kan chʼajchʼöj nnaʼ wiʼ chqä kʼo uxlanen pa wan».
«Le Biblia xjäl kikʼaslemal» (Ri Chajinel, 1 de agosto, 2011)
Tatzʼetaʼ achkë rma xa ye jbʼaʼ ok yetjö ri kaxlanwäy chqä ri vino chpan ri moloj ri nbʼan rchë nqanataj rukamik Jesús.