TJONÏK 30
¡Ri awachʼalal ri ye kamnäq äl xkekʼastäj na pä!
Taq nkäm jun qachʼalal röj kan kowan nqbʼison. Rma riʼ le Biblia nuʼij chë ri kamïk kan achiʼel ta jun qakʼulel (1 Corintios 15:26). Chpan ri tjonïk 27 rït xatamaj chë Jehová xtchüp ruwäch ri kamïk. Ye kʼa, ¿achkë xtbʼanatäj kikʼë ri winäq ri ye kamnäq chik? Chpan re tjonïk reʼ xtatamaj chë Jehová xkerukʼasoj na pä ri kan pa millón winäq ri ye kamnäq äl rchë xtkïl kikʼaslemal ri majun bʼëy xtkʼis ta. ¿Kantzij komä xtbʼanatäj riʼ? ¿Y akuchï xkekʼasöx wä, chlaʼ chkaj o chwäch le Ruwachʼulew?
1. ¿Achkë nurayij nuʼän Jehová kikʼë ri qachʼalal ri ye kamnäq äl?
Jehová kan nurayij nuyaʼ chik jmul kikʼaslemal ri winäq ri ye kamnäq äl. Job, jun achï ri kan kʼo wä rukʼuqbʼäl kʼuʼx, kan xyaʼ chwäch ran chë Dios ma xtmestaj ta taq xtkäm chqä taq xtjeʼ «chpan ri Jül». Ryä xuʼij che rä Dios: «Rït xkinaskʼij, y rïn xkichʼö pä awkʼë» (taskʼij ruwäch Job 14:13-15).
2. ¿Achkë rma qataman chë xkekʼastäj na pä ri kamnaqiʼ?
Taq Jesús xjeʼ chwäch le Ruwachʼulew, Dios xyaʼ ruchqʼaʼ rchë xkowin xerukʼasoj ri kamnaqiʼ. Rma riʼ Jesús xkʼasoj jun qʼopoj ri 12 wä rujunaʼ chqä xkʼasoj ral jun malkaʼn ixöq (Marcos 5:41, 42; Lucas 7:12-15). Chrij riʼ xkäm Lázaro, ri rachiʼil. Y tapeʼ kajiʼ qʼij kamnäq chik, Jesús xkʼasoj pä. Rchë xuʼän riʼ, ryä xchʼö rkʼë Dios y xuʼij: «¡Lázaro, katel pä!». Y «ri achï ri kamnäq wä chik xel pä» (Juan 11:43, 44). Kantzij na wä chë ru-familia chqä rachiʼil Lázaro kan kiʼ kikʼuʼx xkiʼän taq xkitzʼët riʼ.
3. ¿Xkekʼastäj na pä ri awachʼalal ri ye kamnäq äl?
Le Biblia nuʼij chë «xkekʼastäj na pä ri kamnaqiʼ» (Hechos 24:15). Ri winäq ri xerukʼasoj Jesús ma chkaj ta ye kʼo wä qa (Juan 3:13). Jontir ryeʼ kan kiʼ kikʼuʼx rma xekʼasöx pä chwäch le Ruwachʼulew. Achiʼel xbʼanatäj ojer, Jesús ya xkerukʼasoj pä ri kan pa millón winäq ri ye kamnäq äl rchë xtkïl kikʼaslemal chwäch jun kotzʼijaläj ulew. Ryä xuʼij chë jontir ri ma yerumestan ta Dios xkekʼastäj pä, yajün ri winäq ri ma xqatamaj ta kiwäch (Juan 5:28, 29).
TQATAMAJ MÁS CHRIJ RE NAʼOJ REʼ
Tqatamaj chpan le Biblia achkë rma ütz nqayaʼ chwäch qan chë Jesús kʼo ruchqʼaʼ rchë yerukʼasoj pä ri kamnaqiʼ y achkë rma ütz nqanmaj chë kan xtbʼanatäj riʼ chqawäch apü. Chqä tqatzʼetaʼ achkë rubʼanik nukʼuqbʼaʼ akʼuʼx ri natamaj chë xkekʼastäj na pä ri kamnaqiʼ.
4. Jesús xkʼüt chë nkowin yerukʼasoj pä ri kamnaqiʼ
Tatamaj más chrij ri achkë xuʼän Jesús rma Lázaro, ri rachiʼil. Tiskʼij ruwäch Juan 11:14 chqä 38-44, y kixtzjon chrij reʼ:
¿Achkë rma nqaʼij chë Lázaro kantzij wä xkäm? (Titzʼetaʼ ri versículo 39).
Xa ta Lázaro chkaj kʼo wä, ¿naʼij rït chë Jesús xa ütz xuʼän chë xqasaj pä chwäch le Ruwachʼulew?
5. ¡Kan ye kʼïy xkekʼastäj pä!
Tiskʼij ruwäch Salmo 37:29 y kixtzjon chrij reʼ:
¿Akuchï xkeyaʼöx wä ri kan pa millón winäq ri xkekʼastäj pä?
Jesús ma xa xuʼ ta xkerukʼasoj pä ri xkiyaʼ ruqʼij Jehová, xa kan xtyaʼ chqä kikʼaslemal nkʼaj chik winäq. Tiskʼij ruwäch Hechos 24:15 y kixtzjon chrij reʼ:
Y rït, ¿achkë winäq nawajoʼ natzʼët chik jmul ruwäch?
Kachʼobʼon chrij reʼ: jun tataʼaj kan chaq bʼaʼ nukʼasoj jun rukʼajol ri warnäq. Ke riʼ chqä Jesús, ryä kan chaq bʼaʼ nuʼän chwäch nukʼasoj jun winäq ri kamnäq chik.
6. Ri natamaj chë xkekʼastäj na pä ri kamnaqiʼ kan nukʼuqbʼaʼ akʼuʼx
Ri xbʼanatäj rkʼë rumiʼal Jairo rukʼuqbʼan kowan kikʼuʼx ye kʼïy winäq ri kamnäq jun kichʼalal. Tiskʼij chrij riʼ chpan Lucas 8:40-42 chqä 49-56.
Taq ya nukʼasoj rumiʼal Jairo, Jesús xuʼij reʼ che rä: «Majun taquʼ ta, xa xuʼ takʼuqbʼaʼ akʼuʼx» (titzʼetaʼ ri versículo 50). ¿Achkë rubʼanik nukʼuqbʼaʼ akʼuʼx rït ri natamaj chë xkekʼastäj na pä ri kamnaqiʼ...
... taq xtkäm jun awachʼalal?
... taq xtxiʼin rij akʼaslemal?
Titzʼetaʼ ri VIDEO y kixtzjon chrij reʼ:
¿Achkë rubʼanik rukʼuqbʼan kikʼuʼx ruteʼ rutataʼ ya Phelicity ri kitaman chë xkekʼastäj na pä ri kamnaqiʼ?
JOJUN WINÄQ NKIʼIJ REʼ: «Ri kamnaqiʼ chlaʼ chkaj xkekʼastäj wä, ma aweʼ ta chwäch le Ruwachʼulew».
¿Achkë naʼij rït?
¿Achkë ta texto xtaksaj rït rchë xtakʼüt chë kʼïy chkë ri kamnaqiʼ xkekʼasöx pä aweʼ chwäch le Ruwachʼulew?
RI XQATAMAJ QA
Le Biblia nuʼij chë kan pa millón winäq ri ye kamnäq äl xkekʼastäj pä. Jehová nrajoʼ nuyaʼ chik jmul kikʼaslemal, rma riʼ ruyaʼon ruchqʼaʼ Jesús rchë xkerukʼasoj pä.
Tqakamluj ri xqatzʼët qa
¿Achkë rma qataman chë Jehová chqä Jesús kan kiyoʼen chik ri qʼij rchë xkekikʼasoj pä ri kamnaqiʼ?
¿Akuchï xkeyaʼöx wä ri kan pa millón winäq ri xkekʼasöx pä: chlaʼ chkaj o chwäch le Ruwachʼulew? ¿Achkë rma naʼij riʼ?
¿Achkë rma rït kan ayaʼon chwäch awan chë xkekʼastäj na pä ri awachʼalal ri ye kamnäq äl?
RCHË NATAMAJ MÁS
Tatzʼetaʼ achkë naʼoj nqrtoʼ chwäch ri bʼis nqanaʼ taq nkäm jun qachʼalal.
«Toʼïk chkë ri xkäm jun kichʼalal» (¡Despertad!, núm. 3 2018)
¿Nkowin komä le Biblia nutoʼ jun winäq ri xkäm jun ruchʼalal o jun rachiʼil?
Tatzʼetaʼ achkë rubʼanik natoʼ jun ti akʼal ri xkäm jun ruchʼalal.
¿Kʼo komä jun winäq xtkʼasöx chlaʼ chkaj? ¿Kʼo komä jun winäq ri ma xtkʼasöx ta chik?