¿Achkë xkatoʼö rchë xtatjoj awiʼ chrij le Biblia ronojel semanas?

¿KWEST nuʼän chawäch rït natjoj awiʼ chrij le Biblia ronojel semanas? ¿Xa nikʼo akʼuʼx natjoj awiʼ chrij? Kʼïy chqë röj, jantäq nbʼanatäj ya riʼ qkʼë. Kʼo kʼïy achkë jun yeqaʼän ri nkʼatzin tiempo chqä nkʼatzin nqatäj qaqʼij rchë yeqaʼän, achiʼel taq nqatin. Ye kʼa, ¿tapeʼ chë kan jaʼäl nanaʼ yatatin? Ke riʼ chqä nqanaʼ taq nqatjoj qiʼ chrij le Biblia, kan jaʼäl nqanaʼ nqatjoj qiʼ chrij. Taq nqaʼän riʼ, röj achiʼel ta nqachʼajchʼobʼej qiʼ «rkʼë yaʼ, ntel chë tzij, rkʼë rchʼaʼäl Dios» (Efes. 5:26). Ri naʼoj ye kʼo chpan re peraj reʼ rkʼë jbʼaʼ xkatkitoʼ rchë xtatjoj awiʼ chrij le Biblia ronojel semanas.

• Tabʼanaʼ jun aprograma. Jun chkë ri «achkë kʼo más kiqʼij» ri kʼo chë nuʼän jun cristiano, ya riʼ nutjoj riʼ chrij le Biblia pa ryonïl (Filip. 1:10). Rchë ma namestaj ta naʼän ri kʼo chwäch aprograma, tatzʼibʼaj chwäch jun wuj y tayaʼ akuchï kan chanin xtatzʼët. O rkʼë jbʼaʼ ütz nayaʼ jun alarma chpan ateléfono rchë nunataj chawä achkë hora ayaʼon chawäch natjoj awiʼ chrij le Biblia.

• Tatzʼetaʼ jaruʼ tiempo ütz nuʼän chawäch natjoj awiʼ. Ye kʼo jojun kan ütz nkinaʼ kan kʼïy tiempo nkiksaj rchë nkitjoj kiʼ chrij le Biblia, ye kʼa jojun chik más ütz nkinaʼ ma kan ta kʼïy tiempo nkiksaj rchë nkiʼän riʼ. Y rït, ¿achkë más ütz nuʼän chawäch? Ma tamestaj ta ya riʼ taq xtaʼän aprograma. Y si rït ma kan ta narayij natjoj awiʼ chrij le Biblia taq nbʼeqä ri hora, tatjaʼ aqʼij rchë naʼän riʼ tapeʼ xa jun 10 minutos. Rkʼë jbʼaʼ rït nanaʼ chë ya riʼ xa jbʼaʼ tiempo, ye kʼa kan kʼo xtkʼatzin wä. Rkʼë jbʼaʼ taq achapon chik atjonik xtawajoʼ xtatjoj más awiʼ (Filip. 2:13).

• Tatzʼetaʼ achoq chrij nawajoʼ natjoj awiʼ. We ya xbʼeqä ri hora rchë natjoj awiʼ y rït ma ataman ta na achoq chrij nawajoʼ natjoj wä awiʼ, rkʼë jbʼaʼ ma ütz ta rksaxik atiempo najin naʼän (Efes. 5:16). Rma riʼ tabʼanaʼ jun alista kichë ri artículos o temas ri nawajoʼ natjoj awiʼ chrij. We rït kʼo jun npë pan ajolon ri nawajoʼ natamaj, tatzʼibʼaj qa. Y si rït kʼo chik jun npë pan ajolon taq najin chik natjoj awiʼ chrij jun tema, tatzʼibʼaj qa chpan alista.

• Tajalaʼ ri achkë nkʼatzin. Ri nawajoʼ rït ya riʼ natjoj awiʼ chrij le Biblia ronojel semanas. Rma riʼ we nkʼatzin, tajalaʼ ri qʼij, ri hora, ri tiempo ri nawajoʼ natjoj awiʼ chqä ri tema ri nawajoʼ natamaj.

We rït natäj aqʼij rchë natjoj awiʼ chrij le Biblia ronojel semanas, más jnan xtuʼän awäch rkʼë Jehová, yë ri ütz xtachaʼ xtaʼän pan akʼaslemal y kan jaʼäl xtanaʼ xtaʼän riʼ (Jos. 1:8).