INMEUKHÖMAT YÔHAN

1 Anū-ö nun në ṙô tö hameuknyu* tö Yēsū Kristū, ṙën anū-ö nö kētu tö ngam Tēv nö in ò, hòṅ ò nö hameukhömat yip mahalanṙen ò tö nup tö hòṅ veutta yanīhi. Ngaich tīntö ök ma-ahānga re ang Yēsū nö vamënyen në ṙô nö ip mahalanṙen ò Yôhan nö löktö in minë minkahngö. 2 Vënyö ṙô ngam Tēv ang Yôhan hēk tö ngam inhānga kahëtö Yēsū Kristū, minë ṙô nö ṙòkhöre minë tö meūkö tö ò. 3 Töṙamölōn öp anga-aṅ, öp tö pōitô nö vë-ekūö ngih tö-eūka, acha-a inrē yip hamāngö u hēk kamëkö kaha në tökūichi ṙô, pò ngam tö halēniṙen ṙētak nö ngaich nö röhta.

4 Chū-ö Yôhan kamūichten u öich el minë tö sat māṅ i Ēsiā tisrik:

Ngih ön havëkö chu tö yīö öi teūngen tö ngam tökiröng miṙēḵlōn hēk lanāmö öi löktö in “ngam tö misī, ngam töngamuh hēk ngam yamih min inrē,” hēk löktö in minë tö sat töhet kumlēḵ inrē, minë mi-ikūö ngam kantēra ò. 5 Teūngen yin yēḵ tö ngam tökiröng miṙēḵlōn hēk lanāmö öi löktö in Yēsū Kristū, ngam “Tökô-en Vamë-eny,” “lanòh nö tö hachohlöng nö ṙā-ang in yip tökapah,” hēk “Rāchakūö yip rācha ing panam.”

Yēsū ngam tö hangenlōn tö hī hēk ṙamānyen hī öi ṙā-ang in minë tökööl nö löktö im mahām re 6 hēk vīlen hī öi rācha hēk kūönṙô ngam Tēv re, ngam Yöng hī, heūṅ, nööinyö, minhôiṅyö ò yēḵ nöng örheūheu. Āmen.

7 Yěh meuk! Löktö el minë taṙul an nö yih ngaich ṙòkhöre min minë mat nö ngëichken ò, cha-a inrē min ngamëichken ò yik samāpö ò nö aṅhtī tö vöi ngaich ṙòkhöre min në miyööngö ing panam nö kōk elngòhre tökūö miṙivlōnre töpòkūö ò. Heūṅ, Āmen.

8 Ngö ṙô an ngam Tēv Yāvē,* “ngam tö misī, ngam töngamuh hēk ngam yamih min inrē,” hēk ngam Tökalēḵkūö Tökalēḵ, “Chū-ö chin raneh hēk Chū-ö inrē manā-aṅ.”*

9 Chū-ö Yôhan holmaneuk yīö, öich hamòlṙen yīö in nup kanihngen, kūöre chin mahaköp öich in Yēsū, lökten öich hol ò kihngen, hayöng hēk hol ò inrē im manööyö. Kūö chu vënyö inlahen ngam Tēv hēk vë-eny inlahen Yēsū, ngam lāinyngen chu misī söömi im kun panam Petmòs. 10 Kūö hinòlṙenre Chū-ö tö ngam töhet kumlēḵ, lökten öich teungta im sakāmö ngam Mā ngaich hangṙô ök tö sā ṙô fanöö Chū-ö tö pōitô nö lā-uk chu, 11 ök tö ngö ṙô nö in chu: “Nup maheuk meh, kūichngen u më-eṅ imat ngam tölöömö līpöre ngaich söömten u nö in minë tö sat māṅ: i Efisös, Ismörnā, Pörkamön, Tuatirā, Sārtis, Filitalfiā hēk Lòtisiā inrē.”

12 Havöölökūöre ngaich Chū-ö öich ngëichken ök vamë-ekūöre ngaich meuk nuk tö sat chū-ö sunna chūök rööntö ëāṅvö, 13 meuk ök tö sā Kūön tarik Chū-ö inrē nö elhôi minë chūök rööntö ëāṅvö, ök tö inyūtu tö ök tö aṙū nö söl kalröön hēk inmöpu ṙat tö sunna samöl elngòh nö nyëktu. 14 Ök kui ò hēk tök keūyö ò nö sā insōho ūn hēk tö-isoh takô* hēk sā hanūṙökūö tameūiyö nuk mat ò, 15 sā pinyāngö mās nuk kalröön ò, nup töhaṙööchö nö ikūö tameūiyö hēk sā ṙôktô tökalēḵ hanëmö mak ök ṙô ò. 16 Sat nuk taneūsömat lāhāmö kël ò ngaich löknyö elvāng ò ök tö hěng tö marôtòng hēk tö-aṅngöre lā-a keūtö sanët nö meutnyi ngaich ök arëkūö ò nö yang nö sā yanāngö mat ngam tökalēḵ tavūöi. 17 Hē Chu öich meūkö ò ngaich fukngö chū-ö öich sā kupah öich iröön ò.

Ṙāḵtö ök lāhāmö këlre anga-aṅ nö in chu nö ngö ṙô: “Uh man pa-ekūö. Chū-ö chin Raneh hēk Manā-aṅ, 18 hēk Chū-ö inrē tö aṅ. Kapah sin Chū-ö, ngaich yěh meuk! Örheūheu chin ngaich öich aṅ töngamuh, ngaich aṅhavin Chū-ö tö ngam chāpi kinpaha hēk Anūlö.* 19 Lökten nup töng maheuk meh hēk nup tö ṙònghöichṙen hēk nup yamih min mū-unôich, kūichhöt u nö ṙòkhöre. 20 Ngaich minë maheuk meh tö sat taneūsömat nö lāhāmö ngam kël chu hēk minë maheuk meh tö sat sunna chūök rööntö ëāṅvö, ngih ön töhet inlahen u nö töt mikahkūö hī sin: Ngam manah minë tö sat taneūsömat nö ṙô tö më tö sat tak ma-ahānga minë māṅ hēk ngam manah minë tö sat chūök rööntö ëāṅvö nö ṙô tö minë tö sat māṅ.”

2 “Ngötī kūichhöti in öp ma-ahānga ngam māṅ i Efisös: Anga-aṅ ngam kumṙapken minë tö sat taneūsömat tö ngam lāhāmö këlre hēk kumröön nö lök elhôi nup tö sat sunna chūök rööntö ëaṅvö, ngö ṙô anga-aṅ: 2 ‘Akahakūö Chin tö nup la-en meh, tö ngam ranëtnyi elmat meh hēk tö ngam manööyö meh, ngih inrē mikahkūö chu tö meh öm ötkô ṙāpöre höng hökngen yip tötlöök tarik. Yip vamë-enyre nö tanīnöṙô, nöng hö-ö pöri, kalaha cha më-eṅ ngaich kôtikūö tö cha nö tö minyôiny. 3 Hamööyöre inrē më-eṅ hēk pōyen kanihngen tökūö ngam minë-eny chu ngaich öt larāḵ öm keun minë kanihngen. 4 Sön pöri Chū-ö hòṅ ṙò-òvö in meh öich la-al ngam inlahen meh, pön öt ōt nö ngaich ngam hanangenlōn meh töngamuh nö sā re ik lā urěh.

5 Lökten man öm fē-ělre töm lökngenre öm fukngö ngaich havöötö ellōnre ngaich la-evṙen öm sā inlahenre ik lā urěh. Yēḵ meh min öt havöötö ellōnre ngaich chuh in meh min chū-ö öich kēngen ngam chūök rööntö ëaṅvö meh nö ṙā-ang ip chūök e. 6 Hěng pöri ngam maheuk chu tölöng inlahen meh öm kunyaha elmat tö nuk la-en yik krup Nikòlāi, yik kumnyah elmat chu chū-ö inrē. 7 Hangihtöre yin tö ṙô ngam töhet kumlēḵ nö in minë māṅ: Ngòh tö minhôiṅyu, kē-ěkūö ò min chū-ö nö nyā ṙòng ngam chōn nômö, ngam më-el peretāis ngam Tēv.’

8 Ngötī kūichhöti in öp ma-ahānga ngam māṅ i Ismörnā: Anga-aṅ ngam Raneh hēk Manā-aṅ, ngam tökapah sin ngaich hachohlöng nö hēk, ngö ṙô anga-aṅ: 9 ‘Akahakūö chin tö kanihngen meh hēk tö yanāchö meh. (Sön pöri më-eṅ kòlô.) Akahakūö chin inrē tö yip ameūköre nö Yahūti, hö-ö pöri cha-a nö tökô-en, pön höng lamöktö i krup* ngam Satān nö ṙôtö nup ṙô minṙēḵngö nö ṙôtö inlahen meh. 10 Uh man pa-ekūö tö nup kanihngen min yamīhen meh. Yěh meuk! Rīkre yip min tarik in yīö töng chaphötvö tö ngam Satān* nö el chēl, hòṅ yīö öi keuheūtlöre kinlaha ngaich söm sumkam min yī-ö öi höng la-al minë kanihngen. Söl kinpahare pöri yī-ö öi köp im chaniplö ngaich möl min yī-ö öi teūngen tö ngam sapīöv nômö. 11 Hangihtöre yin tö ṙô ngam töhet kumlēḵ nö in minë māṅ: Ngòh tö minhôiyu, öt teunghu min anga-aṅ tö ngam innëtö kinpaha.’

12 Ngötī kūichhöti in öp ma-ahānga ngam māṅ i Pörkamön: Anga-aṅ ngam tö aṅhavin tö ngam tö marôtòng hēk tö-āṅngöre lā-a keūtö sanët, ngö ṙô anga-aṅ: 13 ‘Akahakūö chin tö öp chūök meh iyöng, tö e nö chūök öp kantēra ngam Satān, sön pöri më-eṅ öm köptī tö ngam minë-eny chu hēk öt mahangre më-eṅ öm ṙatö-ellōnre in chu hē u anū-ö sakāmö, hē ök tökô-en ameūken chu ang Antipas nö fëli nö ihih, im kamngö chūök ngam Satān nö iyöng.

14 Sön pöri nö ōt nup ṙô kumnyahlōn chu öich in meh, pön rīkre yip tarik më-elhôi yīö, ṙamatö-ellōnre tö nup inköphöti aṅ in Pēlām ök mahaköpten Pēlak sin nö hōten ò nö ṙāḵtö ihong nuk lökngen fanukngö nö el talöökö yik kūön Israel, hòṅ cha nö nyā-aṅvkūö tö minë tökētu nö ikūö insātēv hēk chinô-òṅkānö* inrē. 15 Rīkre yip inrē tarik më-elhôi yīö ṙamatö-ellōnre nö inuk inköphöti aṅ in yik krup Nikòlāi. 16 Lökten yin havöötö ellōnre, yēḵ yīö min öt ngatī inlahen ngaich veutta yanīhi min chū-ö öich chuh in yīö ngaich aṅhtī tö ngam lamöknyö elvāng chu tö marôtòng sanët min öich kiyūngö cha.

17 Hangihtöre yin tö ṙô ngam töhet kumlēḵ nö in minë māṅ: Ngòh tö minhôiṅ min, ngaich kē-ěkūö ò Chū-ö min öich in nup tö hayūni manna hēk kē-ěkūö ò min chū-ö inrē tö tö-isoh ihong, kūichi min öp töhěng tufömngöre minë-eny in ngam ihong ngaich öt hěngtak min tö akahakūö, höng anga-aṅ öp tö teūngen tö e.’

18 Ngötī kūichhöti in öp ma-ahānga ngam māṅ i Tuatirā: Anga-aṅ ngam kūön ngam Tēv, ngam tö sā mat hanūṙökūö tameūiyö hēk minë kalröön ò nö sā öp tö payānga mās, ngö ṙô anga-aṅ: 19 ‘Akahakūö chin tö inlahen ngam la-en meh, ngam hanangenlōn meh, ṙinatö-ellōn meh, la-en meh meukṙen hēk manööyö meh inrē, akahakūö chin inrē tö nup töfömngöre la-en meh nö mööḵlö anū-ö tö nuk la-en meh ik urěh.

20 Sön pöri nö ōt nup ṙô kumnyahlōn chu öich in meh, tö meh öm halöngten ngam yöngnyīö Yēsipel nö inuk inlahare, ngam vamë-enyre nö pròfět kikānö hēk mahalō-ongkūö yik mahalanṙen chu inrē ngaich haköpten cha nö im chinô-òṅkānö* hēk nyā-aṅvkūö inrē tö minë tökētu nö ikūö insā. 21 Kētö ṙētak ò chū-ö nö ṙāngenre tö ngam chinô-òṅkānö* ngaich havöötö ellōnre, hö-ö pöri anga-aṅ nö lōnu töre nö ngatī inlahen. 22 Yěh meuk! Vīten ò chin min nöng tanten nö vahāvö nö el pölöngre ngaich yip ma-asěha min nö in ò, kēten cha min chū-ö nö el tökiröng kanihngen, yēḵ cha min nö öt havöötö ellōnre nö ṙāngen minë la-en ò. 23 Fëlngen yip kūön ò min chū-ö öich aṅhtī tö ngam tölëlngökūö tī invah ngaich möl nö ṙòkhöre minë māṅ nö akahalōn tö chu öich anga-aṅ chamöh nup tö hayunngöre hēk tö aṙū-uti mufē elkuilōn* ngòh tarik hēk ellōn ò inrē, ngaich asā ṙôken la-en ngòh tö hěngtak ngaich ngatī tī min chū-ö havahalvah.

24 In yīö pöri tarik tö ōttit aṅ Tuatirā, öi töt hamô-en ngih inköphöti hēk töt akahakūö takô tö inlahen në ṙô nö tö kaheūkö nö tö aṙū-uti ṙô ngam Satān, ngö ṙô chin tö cha, öt hēk chin hakeunlen yīö tö nup tahëng lumngan. 25 Hōten yīö pöri köptī tö nup aṅ in re söl ip yanīhi chu. 26 Ngaich ngòh tö minhôiṅ hēk tö söl manā-aṅ nö sā la-en chu ngaich kē-ěkūö ò min chū-ö tö chööngö nö ikui minë panam. 27 Ngaich anga-aṅ min nö hayōmken yip tarik nö sā inlahen yōm sīṅp nö aṅhtī tö vët tinkung ngaich pinyëinyö cha nö sā inlahen nup tilin tanīöyö, teūngen chin tö ngih chööngö öich löktö im Yöngre. 28 Ngaich kē-ěkūö yip tö minhôiṅ min chū-ö tö ngam taneūsömat peuheū. 29 Hangihtöre yin tö ṙô ngam töhet kumlēḵ nö in minë māṅ.’

3 Ngötī kūichhötī in öp ma-ahānga ngam māṅ i Sartīs: Anga-aṅ ngam tö aṅhavin tö minë tö sat töhet kumlēḵ ngam Tēv hēk tö sat taneūsömat, ngö ṙô anga-aṅ, ‘Akahakūö chin tö ngam la-en meh, ngö lōn yip tahëng tö meh öm aṅ, höng kapah pöri më-eṅ. 2 Lökten man hööngöre ngaich ngëichkö nup tö ōttit chehen aṅ in meh, nup tö hòṅ kapah haköpken u, pò chu öich meuk inlahen meh öt keuheūtngen minë la-enre öm ikūö ngam Tēv. 3 Lökten nup töng sitih taneūngen meh hēk ahang meh, ngaich hòṅ örheūheu öm chumkūöṙen tö u* ngaich iṙūöhen öm lök in u hēk havöötö ellōnre. Yēḵ meh min öt hīnöre ngaich höng rötten yanīhi min chū-ö öich sā yanīhi öp mū-ulāiya, ötrēhěn min më-eṅ öm akahalōn tö öp ṙētak yanīhi chu.

4 Sön pöri nö ōtren yip tö haroh tumtak tarik elhôi yīö* i Sartīs, nö töt mahalöngen nup hilāre nö hachōichiyö hēk inyut tö tö-ishōhomat min cha-a nö holröön chu, pò cha nö töhō-ovö nö ngatī minlēḵken. 5 Ngòh tö minhôiṅ tö u ngatī inlahen min anga-aṅ nö hayutlöng tö ngam tö-isōhomat chehen hēk öt sichiyö min öp minë-eny ò tö chu nö imat ngam līpöre nômö, hō-en ò pöri min chū-ö öich ikūö ngam Yöngre hēk ikūö yip ma-ahānga ò inrē. 6 Hangihtöre tö ṙô ngam töhet kumlēḵ nö in minë māṅ.’

7 Ngötī kūichhötī in öp ma-ahānga ngam māṅ i Filitalfīa: Anga-aṅ ngam töhet hēk tökô-en ngam tö aṅhavin tö ngam chāpi Tāvit ngam lamöpnyökūö inkūp, hòn öt hěngtak lamöpngökūö e hēk öpngökūö e, hòn öt hěngtak lamöpnyökūö e, ngö ṙô anga-aṅ, 8 ‘Akahakūö Chin tö la-en meh (yěh meuk! löpnyökūö ngam töhěng chin inkūp nö lākūö meh öt hěngtak tökô nö öptökūö e.) Akahakūö Chin inrē tö meh öm rahëichyen aṅ in tö kumlēḵ hēk hang minë chööngö chu më-eṅ hēk öt sō-en ngam minë-eny chu inrē. 9 Yěh meuk! Yip aṅ el krup* ngam Satān hēk yip vamë-enyre nö Yahūti nöng hö-ö pöri, pön töng minyôiny-aṅ, kēten cha chin min in meh ngaich afukngöre min cha-a nö iröön meh, mikahtulōn min cha-a tö chu öich hangenlōn tö meh. 10 Ngam ahang meh inlahen ngam manööyö chu ngatī inlahen më-eṅ öm lök in e,* lökten chin min öich ṙapken meh ip ṙētak öp kinlaha, öp yamih min nö ikūö ngih panam nö ṙòkhöre nö kamlah yip tarik mi-i kūö ngih panam. 11 Veutta yanīhi chin min. Köptī man tö nup aṅ in re, hòn öt hěngtak kamëngen ngam sapīöv nö in meh.

12 Ngòh tö minhôiṅ tö u ngaich vīlö kampa ò chū-ö min nö el patī ngam Tēv re ngaich öt hěng heuh min anga-aṅ nö kunyī-inyre nö ṙā-ang el ngih patī ngam Tēv ngaich kūichtö minë-eny ngam Tēv re hēk panam ngam Tēv re ngam tufömngöre Yērūsalem öich in ò ngam lamöktö in ngam Tēv chu nö yônti nö löktö el halīöngö ngaich in e inrē min chū-ö öich kūichtö ngam tö tufömngöre minë-enyre. 13 Hangihtöre tö ṙô ngam töhet kumlēḵ nö in minë māṅ.’

14 Ngötī kūichöti in öp ma-ahānga ngam māṅ i Lòtisiā, anga-aṅ ngam tö Āmen, tökanô-envö hēk tökô-en ameū-a hēk ranehlö në taṙòkhöre tövīlöng tö ngam Tēv ngö ṙô anga-aṅ, 15 ‘Akahakūö chin tö ngam la-en meh tö meh ötrēhěn ufov, ötrēhěn ṙāich, söö öre yēḵ meh ufov hēk ṙāich. 16 Höng feuk më-eṅ, ötrēhěn öm ufov, ötrēhěn ṙāich, lökten Chin hòṅ kuvòvlen meh öm löknyö elvāng chu. 17 Ngö ṙô më-eṅ, “Tökôlò chin chū-ö hēk pōyen hamūl tö kanôlò hēk öt hěngö hanakten chū-ö tö chehen,” öt akahakūö pöri më-eṅ töre öm töng öt ṙamlōn, töt kamsuṙen, yāich, tötmeuk hēk lichôi, 18 Lökten chin öich halēnö meh öm havah ngam sunna in chu ngam tö kēnyu nö ṙā-ang kūö ngam tameūiyö, hòṅ meh öm kôlò hēk havah inyutre tö tö-isōhomat öm in chu, hòṅ meh öt meūkö linchôiyö tö yip tarik ngaich öthō min më-eṅ öm sirōngkūö hēk havah lanë-en sanòh matre, hòṅ meh öm meuk.

19 Yip hanangenlōn Chu vëken cha hēk halēnnö cha Chū-ö nö ṙòkhöre lökten yin ngön hēk havöötö ellōnre. 20 Yěh meuk! Sökhak chin öich ikūö ngam inkūp öich kurönga. Yěn ōt hamang ṙô chu ngaich löpnyökūö ngam inkūp, kuhēthötre Chū-ö min el patī ò hēk holkūö ò inrē nö nyā tö harap ngaich holkūö chu inrē min anga-aṅ nö nyā. 21 Ngòh tö minhôiṅ tö u, halöngten ò min Chū-ö nö hol chu nö ūichhak nö el ngam kantēra chu, sā inlahen chu ngaich öich teūngen tö ngam minhôiṅyö ngaich hol ngam Yöngre chū-ö öich ūichhak öich el ngam kantēra ò. 22 Hangihtöre tö ṙô ngam töhet kumlēḵ nö in minë māṅ.’

4 Yěh meuk! Unôichrit e ngaich chū-ö meuk ök tö hěng inkūp ök töluvë-akkūö nö el halīöngö ngaich ök ṙô tö urěh nö hāngö tö chu nö sā ṙô öp töpōitô fanöö ngaich ngö ṙô angū-ö nö in chu: “Ihih man yônlö chuh lātulöng, töich hameukhömat meh tö në ṙô në tö hòṅ yih min nö unôich.” 2 Unôichrit e ngaich nöng ilööṙen ngam töhet kumlēḵ nö teungtöre nö ikui chu ngaich meuk ök tö hěng chū-ö kantēra nö el halīöngö ngaich ōt ök amūichhak nö el e. 3 Ngaich ngam amūichhak nö sā mineūkö tö ayānga yaspis ihong hēk sartīös* inrē ngaich havīlöng ngam kantēra ò tö ngam tasēkö ngam tö sā mineūkö emeröl.

4 Havīlöng nuk kantēra tö nuk tö 24 kantēra ngaich meuk yik tö 24 tak chū-ö minṙöinylen nö ūichhak nö el nuk kantēra, yik tö inyūtu tö tö-isōhomat hilā hēk aṅhav kui inrē tö nuk sapīöv sunna. 5 Löknyö el nuk kantēra nuk hanyālö hēk ṙënṙô kunṙôkö inrē ngaich sat nuk tökiröng ëānvö tameūiyö nö hū nö ikūö ngam kantēra, tö ngö manah anū-ö, tö minë tö sat töhet kumlēḵ ngam Tēv. 6 Ngaich ikūö ngam kantēra ngam mai ök tö sā tinmël nö tö sā mineūkö tö sehngöre ihong.

Elhôi ök kantēra* inrē yik tö fën tak kërup mahavīlen e nuk töng matnyöre nö lākūö hēk lā-uk inrē. 7 Ök raneh kërup tö sā mineūkö layön, ök innëtö kërup tö sā mineūkö nuā, ök linūöyö kërup nö sā mineūkö kūö tarik ngaich ök finënö kërup nö sā mineūkö öp kumteū matēṙö. 8 In vē tö fën tak kërup ṙòkhöre acha-a nö kö tafūölö sanëòk kël, vinngö chūök anū-ö hēk lātuhēt inrē nöng matnyöre ngaich öt ṙaḵköṙôre cha-a tö sakāmö hatööm nö ngö ṙô: “Töhet, töhet, töhet an Yāvē* ngam Tēv Tökalēḵkūö Tökalēḵ! Anga-aṅ an Tēv ngam tö misī, ngam töngamuh hēk ngam yamih min inrē.”

9 Yěn ūichlöre vē tö fën tak kërup nö el ngam kantēra ngam Tēv ngam tö örheūheu nö aṅ, nö ha-ööinyö ò, milēḵṙen tö ò hēk kētö nööinyö ò, 10 ngaich yik tö 24 tak minṙöinylen amūichhak nö el nuk kantēra nö afukngöre nö ikūö ngam Tēv nö vë-ekūö ò ngam töng örheūheu nö aṅ ngaich kēnyen nuk sapīövre nö ikūö ngam kantēra ò nö ṙāḵten u, ngaich ngö ṙô: 11 “Ō Yāvē,* Tēv ih, tökô man më-eṅ öm kēḵ ngam kanôlò, minlēḵṙen hēk minhôiṅyö, pò meh öm höng më-eṅ vamīlen në taṙòkhöre chehen ngaich kuilōn meh anū-ö nö yih hēk vīlöng.”

5 Ngaich meuk ngam Tēv Chū-ö nö ūichhak nö el öp kantēra ngaich lāhāmö kël ò ök tölöömö līpöre ök tö nët lā-a* kinūichö mat ngaich ööpikūö angū-ö nö hapanikūö tö nuk tö sat inpan. 2 Ngaich meuk ök tö hěngtak Chū-ö tökalēḵ ma-ahānga ök töpōitô nö ahānga nö ngö ṙô: “Achīö öp tökô nö löpnyökūö ngam līpöre hēk ṙòngnyökūö minë inpan u inrē?” 3 Öt hěngtak pöri tökô nö löpnyökūö ök tölöömö līpöre hēk haköpmat e, ötrēhěn el halīöngö, ötrēhěn ing panam hēk ötrēhěn nöng lātaṙeū töng panam. 4 Pōitô ngaich chū-ö öich peuiny, pöich öt taneūnguṙen tö öp tökô nö löpnyökūö e hēk haköpmat e. 5 Ngaich hěngtak ök aṅ in yik minṙöinylen tö ngö ṙô: “Uh man peuiny. Ngëichken ngam layön man ngam aṅ in ngam miyööngö Yūta ngam ṙěh Tāvit, teūngen an ngaich tö minhôiṅyöre, hòṅ ò nö ṙòngnyökūö ngih tölöömö līpöre hēk minë tö sat inpan e.”

6 Ngaich meuk ök tö röhta chū-ö in* ngam kantēra hēk elhôi yik tö fën tak kërup hēk meuk ök tö hěng nòng Kun Sīṅp nö elhôi yik minṙöinylen nö sā inlahen öp tökētu ngaich nö fëli, sat nuk sinrōl ò hēk sat nuk mat ò. Ngam manah në mat, minë tö sat töhet kumlēḵ ngam Tēv, në tö tīntu nö ikūö në taṙòkhöre panam. 7 Ilööṙen ngaich ngam Kun Sīṅp nö kū-ö urěh ngaich kēḵ ngam tö hapanikūö tölöömö līpöre nö lāhāmö kël ngam Tēv ngam amūichhak nö el kantēra. 8 Ngaich hē ò nö kēḵ ök tölöömö līpöre ngaich afukngöre yik tö fën tak kërup hēk yik tö 24 tak minṙöinylen nö ikūö ngam Kun Sīṅp. Kö aṅhavin yik minṙöinylen tö ranöng hēk sunna töchilū nuk tö tööḵlö aṅ tö lōpan, ngam manah nuk lōpan nö vinë-ekūötēv tö yip töhet tarik. 9 Ngaich tikökṙôre cha-a tö ngam tufömngöre tinköökö nö ngö ṙô: “Më-eṅ man tökò-òre öm kēḵ ngih tölöömö līpöre hēk ṙòngnyökūö minë inpan e, pò meh më-eṅ tökētu öm fëli ngaich löktö im mahāmre më-eṅ öm havah minë taṙòkhöre miyööngö, tum mi-ëlô,* mihëṅṙö hēk pumnāmö öm chö-öinyten tö ngam Tēv, 10 ngaich vīten cha më-eṅ nö rācha hēk kūönṙô ngam Tēv hī ngaich sā inlahen rācha cha-a inrē min nö hayöng nö ikūö ngih panam.”

11 Ngaich meuk yik töt kanṙeūken chū-ö ma-ahānga nö havīlen ök kantēra hēk tö yik kërup, tö yik minṙöinylen inrē hēk hangṙô cha inrē. Lāku ṙôken cha-a. 12 Ngaich pōitô cha-a nö ngö ṙô: “Anga-aṅ an ngòh Kun Sīṅp ngam tökētu nö fëli, tökò-òre an nö teūngen tö kumlēḵ, kanôlò, mikah, minhôiṅyö, minlēḵken, nööinyö hēk inkôlò inrē.”

13 Ngaich ṙòkhöre nup tövīlöng el halīöngö, el tumlat, lātaṙeū töng tumlat hēk lamātulöng töm mai hēk nup taṙòkhöre tö aṅ mi-in u nö ōt nö hāngö ṙô tö chu nö ngö ṙô: “Ngam Tēv ngam amūichhak nö el kantēra, nööinyö ò hēk nööinyö ngam Kun Sīṅp yēḵ hēk minlēḵṙen, inpōilö hēk kumlēḵ ò yēḵ nöng örheūheu.” 14 Ngaich ngö ṙô yik tö fën tak kërup: “Āmen!” ngaich afukngöre yik minṙöinylen nö ha-öiny ngam Tēv.

6 Ngaich Chū-ö meuk ngam Kun Sīṅp nö hēngö ṙahòngnyökūö tö inpan nö in minë tö sat ngaich in yik tö fëntak kërup nö hěngtak ök ahang ṙô chu tö sā ṙôktô kunṙôkö nö ngö ṙô: “Ta-ih!” 2 Ngaich yěh meuk! meuk ök tö hěng nòng Chū-ö kōra tö-isoh, aṅhav uk anga-aṅ tö ök tö aṅhavin tö linreny ngaich kē-ěvkūö anga-aṅ tö ök tö hěng sapīöv hēk teūngen anga-aṅ tö minhôiṅyöre ngaich höng mihôiṅhökūöre nö kiyung.

3 Hē ò nö ṙòngnyökūö ök innëtö inpan ngaich hangṙô ök innëtö Chū-ö kërup nö ngö ṙô: “Ta-ih!” 4 Yihtöre hēk ök tahëng nòng kōra ök tö sā nganāṅvö elmat tameūiyö ngaich kētu chööngö ök aṅ uk ò nö keunngen ngam lanāmö ngih panam, hòṅ yip tarik nö öt miṙē-ěvlōn nö kö fëlngen höö. Kē-ěvkūö anga-aṅ tö ök tökiröng sanët.

5 Hē ò nö ṙòngnyökūö ök linūöyö inpan ngaich hangṙô ök linūöyö Chū-ö kërup nö ngö ṙô: “Ta-ih!” 6 Ngaich yěh meuk! meuk ök tö hěng nòng tösah kōra Chū-ö ngaich aṅhav eltī ök aṅ uk ò tö ök tö hěng kinchang ngaich hangṙô ök tö sā ṙënṙô Chū-ö nö elhôi yik tö fëntak kërup: “Hěng kilō* sāiny im tö hěng tinār* ngaich lūöi kilō* vīt im tö hěng tinār ngaich un hayë-eiṙen minë òliv tavī-i hēk vāin inrē.”

7 Hē ò nö ṙòngnyökūö ök finënö inpan ngaich hangṙô ök finënö Chū-ö kërup nö ngö ṙô: “Ta-ih!” 8 Ngaich yěh meuk! meuk ök tö hěng nòng tölunyī kōra Chū-ö ngaich Kinpaha ök minë-eny ök mi-i uk ò ngaich höng unôichrit ò ök Anūlö* nö tömkörit ò ngaich kē-ěvkūö cha-a tö chööngö nö im finën lā alaha ngih panam nö aṅhtī tö ök tö marôtòng sanët hēk inyāichö hēk tölëlngngökūö invah hēk fëlngen më tarik nö aṅhtī tö minë töṙeūla aṅ elinchōn ing panam.

9 Hē ò nö ṙòngngyökūö ök tinneūiyö inpan ngaich meuk minë mahām* yik tarik Chū-ö nö elkatòh ök tahāklö, yik tö fëli tökūöre nö lök im ṙô ngam Tēv hēk ahānga inrē. 10 Ngaich pōitô cha-a nö ayôṙa, nö ngö ṙô: “Ō më-eṅ Mā, lamātulöng tö në taṙòkhöre, më-eṅ öm töhet hēk tökô-en, irò-òten öm min höng ngëicha ngaich öt kahòkken u hēk öt kēḵ invahalvah ngam mahām ih öm in yip mi-iyöngkūö ngih panam?” 11 Ngaich kö hěngtak yik in cha tö kē-ěvkūö tö nuk tö aṙū-uti tö-isoh inyut ngaich hōtu cha-a nö rahëichtöreṙen nö hööka, hanöng sāha më hol cha mahalanṙen hēk më hol cha prötör nö öl nö keuheūtlöre kinṙeūkö, yip tö veūten min nö sā inlahen finëlngö cha.

12 Ngaich meuk Chū-ö hē ò nö ṙòngnyökūö ök tinfūölö inpan ngaich kalēḵ ngam tökiröng kumyeūnö ngaich ngam tavūöi nö sā sanaha ök tösah sākö* hēk keuheūtngöre mat ngam chingëṅt nö sā nganāṅvö mahām, 13 hēk suktöre minë taneūsömat ngam halīöngö nö ing panam nö sā sanuktöre öp tö ayal ṙòng chōn anychīr yěn fööka tö ngam tökalēḵ kuföt. 14 Ngaich ngatī inlahen ngam halīöngö nö chatngen nö sā linömngö ök tölöömö līpöre ngaich kē-ěyö minë rôngö hēk minë kun panam nö ṙā-ang in nup chūökre. 15 Ngaich ṙòkhöre yip rācha ngih panam, tökiröng tö chöönguvö, yöngkūö kumyung, tökôlò hēk tökalēḵ tarik, yip taṙòkhöre mahalanṙen hēk tarik töt haköövö, nö ṙòkhöre nö hayunngöre nö el minë kinlūhu hēk rôngö ihong. 16 Ngaich ngö ṙô cha-a nö in minë rôngö hēk ihong: “Suktöre man ikui ih ngaich hayunngen ih hēk laklen ih töm tanāinyö ngam Tēv amūichhak nö el kantēra hēk töm Kun Sīṅp, 17 pön yih ngam sakāmö öp tökiröng tanāinyö cha ngaich achīö min tökô nö sökhak nö ikūö cha?”

7 Unôichrit e Chū-ö öich meuk yik tö fën tak ma-ahānga samökhaka nö in minë tö fën lā-a sinkeukngö ngih panam, köptī cha-a nö ṙāpkö minë tö fën kuföt ing panam, hòṅ e nö öt föötöre nö ing panam, el mai hēk in minë chōn inrē. 2 Hēk Chū-ö öich meuk ök tahëng ma-ahānga yamôklö nö löklö chūhöt ngam tö īnu tö ngam minkahngö ngam tö aṅ Tēv ngaich pōitô anga-aṅ nö hū-a nö in yik tö fën tak ma-ahānga yik tö kētu chööngö nö filal ngih panam hēk ngam mai. 3 Hanöng sā ih öl öi mikahngö māl yip mahalanṙen ngam Tēv re ngaich un hachöökö sin ngam panam hēk tö ngam mai tö minë chōn inrē.

4 Ngaich chū-ö hang ṙôken kinṙeūkö yip tö mikahayö nö 1,44,000, ngaich tökē-ě cha nö ṙā-ang i tūmö miyööngö yik kūön Israel:

9 Yěh meuk! unôichrit e chū-ö öich meuk ök tökiröng kiteūm nö lamöknyö in nuk taṙòkhöre pumnāmö hēk miyööngö, mihëṅṙö hēk tum mi-ëlô* inrē yik tötrēhěn nö kanṙeūken ṙôken tö tarik, sökhak cha-a nö lākūö ngam kantēra nö ikūö ngam Kun Sīṅp nö inyūtu tö tö-isōhomat hēk aṅhav eltī inrē tö rōi kachūr. 10 Ngaich ngih kiteūm nö ṙōlheuh ṙô nö pōitô nö hū-a nö ngö ṙô: “Ha-öiny ngam Tēv re in ngam amūichhak nö el kantēra hēk ngam Kun Sīṅp öi chö-öinytö ngam inyöökenre.”

11 Ṙòkhöre yik ma-ahānga, minṙöinylen hēk tö yik tö fën tak kërup nö havīlen ngam kantēra ngaich afukngöre cha-a nö ha-öiny ngam Tēv nö ikūö ngam kantēra ò, 12 ngaich ngö ṙô: “Āmen! Örheūheu an yēḵ ngam ineū-eu, nööinyö, inrōilö hēk mikah, minlēḵṙen, kumlēḵ hēk minhôiṅyö ngam Tēv hī. Āmen.”

13 Hē ök tö hěngtak minṙöinylen nö meuk, ngö ṙô ngaich anga-aṅ nö in chu: “Achīö aich vē tö-isōho inyut hēk lamöktö yih aich?” 14 Ilööṙen Chū-ö ngö ṙô in ò: “Mā chu, höng më-eṅ man tö akahakūö tö cha.” Ngö ṙô ngaich anga-aṅ nö in chu: “Cha-a yin vē kumnyī-inyre nö ṙā-ang el ngam tökiröng kanihngen hēk samöichlen minë chehenre cha-a nö löktö im mahām ngam Kun Sīṅp nö mi-isohnyömat u. 15 Angū-ö chö-öiny cha nö ikūö ngam kantēra ngam Tēv ngaich sakāmö hatööm cha-a nö la-evṙen tö minë töhet la-en nö i patī ngam Tēv ngaich hanyāknyö ngam inrūkuire ngam Tēv nö ikui cha ngam amūichhak nö el ngam kantēra. 16 Öt hēk min cha-a nö ha-euk hēk haṙëhe nômö, ötrēhěn nö ṙāich kui tö kumlēḵ ṙanāichö mat ngam tavūöi, ötrēhěn nö ngam tökalēḵ ṙanāichö, 17 pò ngam Kun Sīṅp ngam tö röhta nö in* ngam kantēra nö kumten cha nö söl in ngam mak löklö nômö nö sā inlahen öp yōm sīṅp ngaich ngam Tēv min nö chūtngö makmat cha nö ṙā-ang i mat cha.”

8 Hē ngam Kun sīṅp nö ṙòngnyökūö ngam sinātö inpan, chanëvö ngaich ök umuh nö el ngam halīöngö nö keuheūtngöre chūök, lohten nö ròngti kanta rò-òten. 2 Ngaich meuk yik tö sat tak chū-ö ma-ahānga, yik töng samökhak nö lākūö ngam Tēv, kö kē-ěvkūö cha-a tö nuk tö sat fanöö.

3 Yih hēk ngam tahëng ngaich sökhak nö haröhtöre nö in ngam tahāklö, aṅhav eltī anga-aṅ tök sunna tinhus lōpan, pōyen kinë-ekūö anga-aṅ tö ök tinhus lōpan, hòṅ ò min nö kēten e nö ikūö ngam kantēra tahāklö sunna, hē ṙētak yip taṙòkhöre töhet tarik min nö vë-ekūötēv. 4 Ngaich nup lul tötahūsa lōpan eltī yip ma-ahānga nö holre tö nup ṙô yip töhet tarik nö vë-ekūötēv nö söllö nö ikūö ngam Tēv. 5 Hē e ngaich ök ma-ahānga nö kēḵ ök tinhus lōpan ngaich hatööḵlen e tö ök tameūiyö aṅ el ök tahāklö ngaich kavalten e nö ing panam. Yih ngaich ngam tökalēḵ kunṙôkö hēk ṙënṙô, kalēḵ ngam hanyālö hēk kumyeūnö inrē. 6 Ngaich yik tö sat tak ma-ahānga tö aṅhav eltī tö nuk tö sat fanöö, hīnöre cha-a nö fööṙö u.

7 Föö ök fanööre ök raneh, ngaich vī-ilre ök tö hōlu tökënngöre kumṙah tö mahām hēk ök tameūiyö tö holtö mahām ngaich suktuvö nö ing panam ngaich ngam linūöi lā-a ngih panam hēk minë linūöi lā-a nuk chōn nö öktikūö hēk ṙòkngöre nuk tö-ayal kiyôp inrē nö ṙāpngö.

8 Föö ök fanööre hēk ök innëtö. Ngaich sā öp tökiröng rôngö tö öktikūö tö tameūiyö nö kavaltu nö el ngam mai, vī-ingre ngaich ngam linūöi lā-a ngam mai nö mahām. 9 Ngaich kapah nuk tö aṅ töṙeūla nö el ngam linūöi lā-a ngam mai, ngaich im linūöi lā-a nö panyëiny minë chōng.

10 Föö ök fanööre hēk ök linūöi tak ma-ahānga. Ngaich ök tökiröng taneūsömat nö sā inlahen öp töhūkūö ëānvö nö suktöre nö löktö el halīöngö ngaich suktöre nö im linūöi lā-a ngam tahël hēk löklö mak. 11 Tö-angū-övö chōn öp minë-eny ngam taneūsömat. Ngaich ök linūöi lā-a ngam mak nö angū-övö nö sā e, ngaich pōihāngen yik tarik tö kapah tökūö ök mak nö angū-övö.

12 Föö ök fanööre hēk ök finëntak ma-ahānga. Ngaich ngam linūöi lā-a ngam tavūöi hēk ngam linūöi lā-a ngam chingëṅt, hēk ngam linūöi lā-a minë taneūsömat nö fohtöre nö in u, hòṅ ngam linūöi lā-a u nö sangūla ngaich öt yang ngam linūöi lā-a u el sakāmö, ngatī inlahen inrē ngam hatööm.

13 Ngaich meuk ök töhěng nòng matēṙö chū-ö kumteūtöre nö elhôi ngam halīöngö nö pōitô nö ngö ṙô: “Yih an min ngam tökiröng ötinkôlò nö ikui yip tarik ing panam, pò yip tö lūöitit tak hēk ma-ahānga nö öl nö föö nup fanööre ngaich pöri min cha-a nö hòṅ föö nup fanööre.”

9 Föö ök fanööre ngaich ök tinneui tak ma-ahānga. Ngaich meuk ök töhěng taneūsömat Chū-ö lamöktö el halīöngö nö suktöre nö ing panam ngaich kē-ěvkūö anga-aṅ töp chāpi ök tö aṙū-uti ṙeūvö töt lātaṙeū-euvö. 2 Ngaich löpnyökūö ök tö aṙū-uti ṙeūvö töt lātaṙeū-euvö anga-aṅ ngaich meutnyi ngaich ök lul nö löknyö el ök ṙeūvö nö sā lul tökiröng tameūiyö ngaich löktö im lul e nö sangūli mat ngam tavūöi hēk ngam kuföt inrē. 3 Meutnyi ngaich nuk mufākö nö löknyö el ök lul nö yih nö ing panam, kē-ěvkūö anū-ö tö ngam kumlēḵ ngam tö sā kumlēḵ minë kanaptöritre ing panam. 4 Vë-evkūö cha-a nö sōḵtu nö hakihten minë tö ayal kiyôp ing panam, un rēhěn nö minë chōn, höng hakihten yip tarik pöri yip töt mikahai māl tö ngam Tēv.

5 Ngaich kētu chööngö nuk mufākö nö taneui chumngëṅtö nö hachök yip tarik, uh pöri cha-a nö kumpahaivah ngaich nuk chanökö yik tarik nö sā chanököre yěn kāpö tö kanaptöritre. 6 Lōn tö kinpahare min yip tarik hē u anū-ö sakāmö, öt yih pöri min ngam kinpaha nö in cha, hòṅ lōnu min cha-a töre nö hòṅ kapah, ṙūöhöngre pöri min ngam kinpaha tö cha.

7 Ngaich minë mufākö nö sā mineūkö nuk kōra töhalēnlöng nö kiyung ngaich sā tö sapīövu kui anū-ö tö sunna hēk sā arëkūö tarik nuk arëkūö cha, 8 ngaich nuk keūyö cha pöri, nö sā rôtòng keūyö yöngnyīö hēk nuk kanap cha nö sā kanap nuk layön, 9 ngaich nuk lanak elngòh u nö sā nup vët lanak elngòh ngaich nuk ṙënṙô rōi kël u nö sā ṙô nuk inröl hēk famal kōra nö chuh im kinyūngö. 10 Ngaich nuk lamrit u nö sā chanökhukūö lamrit kanaptöritre ngaich aṅhavin nuk lamrit u tö kumlēḵre nö hachök yik tarik nö taneui chumngëṅtö. 11 Rācha cha ngam ma-ahānga ngam tö aṙū-uti ṙeūvö Apatön* ngam minë-eny ò nö i ṙô Hiprū, Apōlön* pöri ngam minë-eny ò nö i ṙô Krīk.

12 Ngaichngen ön ngam raneh ötinkôlò. Yěh meuk! unôichrit e hēk min nup tö Nët ötinkôlò yamih.

13 Föö ök fanööre ök tinfūölö ma-ahānga ngaich ngam tahāklö sunna ngam mi-ikūö ngam Tēv ngaich hang ök ṙënṙô chū-ö nö löknyö in nuk sinrōl ò. 14 Löknyö in ök tinfūölö ma-ahānga ök ṙënṙô ök tö aṅhavin tö ngam fanöö nö ngö ṙô: “Luhnyö nyanëk më tö fëntak ma-ahānga më tö nyëkhakṙen nö in ngam tökiröng tahël Yufratīs.” 15 Ngaich halēnlöng më tö fën tak ma-ahānga nö chö-öinytö ngih ṙētak, sakāmö, chumngëṅtö hēk samyeūheu inrē, luhlöng cha-a hòṅ cha nö fëlngen yip linūöi lā-a vē tarik.

16 Nët anai körōr ṙôken më kumyung tö kōravö hang ṙôken kinṙeūka cha Chū-ö. 17 Ngö mineūkö nuk kōra hēk yik yamôklö nö i uk u nö el heūvö chu, sā nganāṅvö hanūkūö tameūiyö nuk lanak elngòh u ngaich sā ök tölingū takô tö sā hayasin tö sā töhūkūö ihong inrē, sā nuk kui layön nuk kui kōra ngaich meutnyi ngam tameūiyö lul hēk anökti nö löknyö elvāng u. 18 Löktö in në tölūöi ötinkôlò ngam tö ngö, löknyö elvāng u ngam tameūiyö, lul hēk anökti nö fëlngen yik tarik tölūöi lā-a. 19 Pò nuk kumlēḵ nuk kōra nö elvāng u hēk in ngam lamrit u inrē, pò nuk rit u nö sā pēch nö kuyūvö ngaich aṅhtīten u anū-ö nö hachök.

20 Yip tö ōttit pöri tarik yip töt kapah tökūö në tölūöi ötinkôlò, öt havöötö ellōnre cha-a nö ṙā-ang in nup la-enre hēk öt ṙāngenre nö vë-ekūö yip tötlöök ma-ahānga hēk nup insā sunna chāntī, mās, ihong hēk chōn nup tötrēhěn nö kô nö meuk, ötrēhěn nö hang hēk ötrēhěn nö kiröön. 21 Hēk öt halööktitre cha-a yip famëlhanga, töla-evṙen tö la-en minlūönö, unlāya hēk chamô-òṅkānö* inrē.

10 Meuk ök tö hěngtak hēk Chū-ö tökalēḵ ma-ahānga, kamṙumöre tö taṙul nö yônti nö löktö el halīöngö, aṅhav kui anga-aṅ tök tasēkö hēk sā yanāngö mat tavūöi ök arëkūö ò ngaich nuk kalröön ò nö sā machööḵlö tö tameūiyu. 2 Aṅhav eltī anga-aṅ tök tö kun tölöömö līpöre nö luvë-akkūö ngaich ṙāḵtö ngam lāhāmö kalröönre anga-aṅ nö el mai, ṙāḵtö ngam lātavē kalröönre pöri anga-aṅ nö ing panam. 3 Ngaich pōitô anga-aṅ nö hū-a nö sā ṙòktô layön, ngaich hē ò nö ayôṙa ngaich hāngö ṙô nuk tö sat kunṙôkö nö ṙò-òvö.

4 Hē nuk tö sat kunṙôkö nö keuheūtṙô nö ṙò-òvö ngaich lang Chū-ö öich hòṅ kūichtö tīre, hang ök ṙënṙô pöri chū-ö lamöktö el halīöngö tö ngö ṙô: “Nuk ṙô minë tö sat kunṙôkö, hapanngökūö u më-eṅ, un kūichö.” 5 Ngam ma-ahānga maheuk chu samökhak nö el mai hēk ing panam, hachônglö ngam lāhāmö këlre anga-aṅ nö kū-ö tö el halīöngö. 6 Ngaich chūöku ṙô anga-aṅ nö kilēḵngôre nö in ngam Tēv tö örheūheu nö aṅ ngam vamīlö ngam halīöngö tö nup taṙòkhöre chehen aṅkūö e, ngam panam tö nup taṙòkhöre chehen aṅkūö e hēk ngam mai tö nup taṙòkhöre chehen aṅkūö e, ngaich ngö ṙô: “Öt ha-aṅkenre an min. 7 Hē nup sakāmö ngam sinat tak ma-ahānga pöri min nö hòṅ hööngöre nö hòṅ föö ngam fanööre ngaich möl min nö hateūngiyö ngam töhet töt mikahkūö sin ṙô ngam Tēv. Heūṅ, angū-ö ön ngih töt mikahkūö sin ngam tö ahangnyu tö ngam Tēv nö in yik mahalanṙen ò, acha-a yik pròfět ò nö löktö im tölöök inhānga.”

8 Hēk chū-ö hang ök ṙënṙô lamöktö el halīöngö ök tö ngö ṙô nö in chu: “Kuṙòh, kiröönngöre man öm kēḵ ngam töluvë-akkūö tölöömö līpöre eltī ngam ma-ahānga ngam tö sökhak nö el ngam mai hēk ing panam.” 9 Chuh in ngam ma-ahānga ngaich chū-ö ngaich havëkökūö ò tök tö kun tölöömö līpöre, ngö ṙô ngaich anga-aṅ nö in chu: “Kēḵ e man ngaich nyā e, angū-övö tī an min tö ngam ellōn meh, sā pinchākö hönī pöri min angū-ö nö elvāng meh.” 10 Kēḵ ök tö kun kun tölöömö līpöre ngaich Chū-ö öich eltī ök ma-ahānga ngaich nyā-aṅ e, sā pinchāka öp hönī angū-ö nö elvāng chu, hē chu pöri keuheūtkūö öich nyā e ngaich angū-övö ellōn Chū-ö. 11 Ngaich ngö vinë-ekūö chū-ö: “Hòṅ hēk man min öm eūkö inlahen yip tarik, pumnāmö, töṙōlkangen ëlô* hēk yip rācha inrē.”

11 Kē-ěvkūö ngaich chū-ö tök tö marôtòng chōn* tö sā tafūyu ngaich ngö vinë-ekūö chū-ö: “Choholre man ngaich kalah ṙôkö ngam töhet chūök patī ngam Tēv hēk ngam tahāklö ò hēk yip maha-öiny ngam Tēv nö el ngam patī ò. 2 Ngam lamātunyī pöri varanta ngam töhet chūök patī ngam Tēv, ṙāngen e, un kalaha ṙôkö angū-ö, pò e angū-ö varanta nö tö kētu nö in yip tahëng pumnāmö ngaich 42 chumngëṅtö rò-òten cha-a nö aṅhtī tö kalröönre nö rööntökui ngam töhet elpanam. 3 Tīntö nap tö nëttak min chū-ö ameūken chu, hòṅ cha nö 1,260 sumkam nö eū-a nö inyut tö sākö.” 4 Minë tö nët chōn òliv hēk tö nët chūök rööntö ëāṅvö nö minkahngö minā tö nëttak ameū-a ngaich sökhak cha-a nö ikūö ngam Mā ngih panam.

5 Yěn ōt tö hòṅ hakihten nā ameū-a ngaich löknyö elvāng cha ngam tameūiyö ngaich mihôiṅ nö ṙāpngö tī tö yip tö kunyaha elmat tö cha. Yip tö ngatī inlahen min nö hakihten cha, ngatī inlahen finëlngö min cha-a. 6 Aṅhavin cha-a tö chööngöre nö öpngökūö ngam halīöngö, hòn öt suktöre ngam kumṙah hē ngam sakāmö cha nö eū-a ngaich haṙīngen ngam mak nö mahām ngaich öptöng ṙētak lōn cha nö suktökui ngih panam tö nup taṙòkhöre ötinkôlò.

7 Ngaich yěn keuheūt ṙô min cha-a nö eū-a ngaich ngam töṙeūla aṅ elinchōn ngam kumnyī-inyre nö löknyö el ngam tö aṙū-uti ṙeūvö, la-al cha min anga-aṅ ngaich mihôiṅ tö cha hēk fëlngen cha inrē. 8 Ngaich nup tökapah alaha cha min nö ṙā-akṙen nö ikūö pak talöökö ngam tökiröng el panam, ngam inmeuknyö ngam Sôtöm hēk tö Aikup invëka, ngam chūök ngam Mā cha inrē nö fëli nö kilöllöng nö irōi ngam chōn. 9 Ngaich yip tarik, miyööngö, tum mi-ëlô* hēk pumnāmö tarik nö lūöi ròngti sumkam nöng ngëichken minë tökapah alaha cha ngaich öt halöngten cha nö ūli nö el anūlö. 10 Ngaich yip mi-iyöngkūö ngih panam min nö kirööngen ṙanamölōn tö kinpaha cha hēk haṙamlōnre min cha-a nö söömhökūö höö tö nup inlōnti, pò minā tö nëttak pròfět nö hachök yip mi-iyöngkūö ngih panam tö ngam ahangköre inhānga.

11 Unôichrit tö lūöi ròngti sumkam ngaich ngam kumlēḵ ngam nômö nö yih nö in cha ngam lamöktö in ngam Tēv, choholre ngaich cha-a nö söklöre, kirööngen pinhë-eṅkūö ngaich yik mameūkö cha sin. 12 Ngaich hang ök töpōitô cha-a ṙënṙô lamöktö el halīöngö ök tö ngö ṙô nö in cha: “Yônlö ihih chuh lātulöng.” Lātulöng ngaich cha-a tö ngam taṙul el halīöngö ngaich meūkö cha yip tö kunyaha elmat tö cha.* 13 Im ṙētak ngaich ngam tökiröng kumyeūnö ngaich ngam sinömö lā-a ngam elpanam nö taṙöliyö 7,000 ṙôken yik tarik tökapah tökūö ngam kumyeūnö ngaich kirööngen pinhë-eṅkūö yik tö ōttit tarik ngaich ha-öiny ngam Tēv cha-a aṅ el halīöngö.

14 Ngaichngen ngam innëtö ötinkôlò. Yěh meuk! veutten yanīhi an min ngam linūöyö ötinkôlò.

15 Föö ök fanööre ngaich ök sinātö ma-ahānga. Ngaich hāngö ök ṙënṙô töpōitô nö el halīöngö, ök tö ngö ṙô: “Ngaich an ngam pūlngö ngih panam nö eltī ngam Mā hī hēk Pūlngö ngam Kristū ò inrē ngaich höng örheūheu min anga-aṅ nö hayöng nö sā inlahen rācha.”

16 Ngaich yik tö 24 tak minṙöinylen, yik amūichhak nö el nuk kantēra re nö ikūö ngam Tēv, afukngöre cha-a ngaich sōntökūöre nö ha-öiny ngam Tēv, 17 nö ngö ṙô: “Tēv Yāvē,* Tökalēḵkūö Tökalēḵ, më-eṅ öm tö misī hēk töngamuh, kētö nööinyö meh in, pò meh öm löktö in ngam tökiröng kumlēḵre öm sā inlahen rācha öm rultenre öm hayöng. 18 Hūlökūö tanāinyö pöri minë pumnāmö ngaich ngam tanāinyö meh min nö yih nö ikui cha hēk ngam tö halēniṙen ṙētak nö teung hē yip tökapah min nö kahòkkaṙen ngaich yip mahalanṙen meh, cha-a yik pròfět hēk yik töhet tarik hēk yik tö pa-ekūö tö ngam minë-eny meh, tökūöṅnö hēk tökiröng, ṙòkhöre min cha-a nö teūngen tö ngam raneushöre ngaich ahetiyö min yip pumyāingö ngih panam.”*

19 Ngaich löpnyukūö ngam töhet chūök patī ngam Tēv nö el halīöngö, ngaich meūkö nuk kasòng chööngö ò nö el ngam töhet chūök patī ngam Tēv. Ngaich yih ngam tökiröng pinnyalökūö ngam hanyālö hēk töpōitô ṙënṙô, kunṙôkö hēk kumyeūnö hēk tökiröng tökënngö kumṙah.

12 Ngaich hěng ök yöng minkahngö tö meūkö nö el halīöngö: Hěngtak ök yöngnyīö kamṙumöre tö ngam tavūöi ngaich iröön ò ngam chingëṅt, ngaich aṅhav kui anga-aṅ tö nuk tö 12 taneūsömat sapīöv, 2 ngaich puyōsö anga-aṅ. Ayôṙa anga-aṅ tökūö chanököre hēk halöinyöre tökūöre nö hòṅ kayôḵ.

3 Hěng hēk öp minkahngö tö meūkö nö el halīöngö. Ngaich yěh meuk! meūkö ngam tökiröng tulan nö sā ngaṅnavökūö tameūiyö, ngam tösātö kui hēk sömö sinrōl hēk sat nup sapīöv nö ikui ò. 4 aṅhtī tö ngam lamritre anga-aṅ nö tūök nuk linūöi lā-a ngam taneūsömat ngam halīöngö ngaich sukten u nö ing panam ngaich höng söktöhëichṙen ngam tulan nö ikūö ngam yöngnyīö ngam tö hòṅ kayôḵ, hòṅ ò min nö ngeūkngen öp kūön ò yěn kayônyu.

5 Fötnyu ök nyīö kikōnyö ngaich ngam yöngnyīö ngam tö sā inlahen yōm sīṅp nö hayōmken më taṙòkhöre tarik nö aṅhtī tö vët tinkung. Ngaich kēngö ngam kūön ngam yöngnyīö nö kēten ò nö chuh in ngam Tēv nö im kantēra ò. 6 Falngöre ngam yöngnyīö nö kū-ötö el tönyalnyi nö ip chūök ò tö halēniṙen tö ngam Tēv, hòṅ ò nö hanëkakūö nö in e nö 1,260 sumkam rò-òten.

7 Kinyūngö ngaich ök umuh el halīöngö: La-al ngam tulan ngaich ang Maiköl* nö holtö yip ma-ahāngare ngaich ngam tulan nö holtö yip tötlöök ma-ahāngare nö la-al cha. 8 Ötkô pöri ngam tulan hēk tö yip tötlöök ma-ahānga nö la-al cha.* Öt ōtre chūök ngaich cha-a nö el halīöngö. 9 Lökten anga-aṅ ngam tökiröng tulan, anga-aṅ ngam hötṙeh pēch ngam tö Iplīs hēk Satān invëka hēk ngam mahachīl në taṙòkhöre panam,* suktu anga-aṅ nö lātaṙeū ing panam hēk hol ò inrē yip tötlöök ma-ahānga nö suktu. 10 Ngaich hang ök töpōitô chū-ö ṙënṙô nö löktö el halīöngö nö ngö ṙô:

“Ngaich an nö hameuktu töngamuh ngam inyööken lamöktö in ngam Tēv hī hēk ngam minhôiṅyö ò hēk tö ngam Pūlngö ò, hēk ngam chööngö ngam Kristū ò inrē. Pò ngam samūöichkö fālen më holmaneuk hī ngaich nö suktu nö lātaṙeū ngam tö sakāmö hatööm nö sūöichkö fālen cha nö ikūö ngam Tēv hī. 11 Ngaich chö-öiny tö ngam mahām ngam Kun Sīṅp cha-a hēk ngam inhānga ngam tö-eūka tö cha nö mihôiṅ tö cha, ngaich hē cha inrē nö la-al ngam kinpaha ngaich öt fēkö ngam nômöre cha-a. 12 Lökten ō yī-ö el halīöngö hēk mi-iyöng el e, ṙamölōn yin! Ō yī-ö panam hēk mai, yih an ngam tökiröng kanihngen nö ikui yīö, pò ngam Satān ngaich nö yônti nö chuh in yīö nö holtö ngam yöng tanāinyöre, pò ò nö akahalōn tö ngam ṙētakre nöng rahëichtitṙen.”

13 Hē ngam tulan nö meūköre nö suktu nö ing panam ngaich hakihten ngam yöngnyīö anga-aṅ ngam famötnyö ngam nyīö kikōnyö. 14 Kē-ěvkūö pöri ngam yöngnyīö tö minë tö nët rōikël ngam tökiröng matēṙö, hòṅ ò nö kiteūngöre nö chuh el ngam tönyalnyi ngam tö halēniṙen nö chūök ò ngaich ṙūöhöngre anga-aṅ tö ngam pēch ngaich im tö hěng ṙētak, nët ṙētak hēk ròngti ṙētak* anga-aṅ nö kētu nyā-aṅ, òk inrē nö harūkö.

15 Ngaich ngam pēch nö kēnyö ök mak tö sā tahël nö löknyö elvāngre tī nö lā-uk ngam yöngnyīö, hòṅ ngam yöngnyīö nö pökngö nö el ngam tahël. 16 Hayööken ngam yöngnyīö pöri ngih panam ngaich luvë-enykūö elvāngre ngih panam nö ngeūktö ngam tahël ngam lamöknyö elvāng ngam tulan. 17 Hūlökūö tanāinyö ngaich ngam tulan nö in ngam yöngnyīö ngaich kiyung yip tö ōttit kūön* ngam yöngnyīö, yip hamang chööngö ngam Tēv hēk yip tö teūngen tö ngam la-en inhangkö inlahen Yēsū.

13 Sökhak ngaich anga-aṅ* nö in öp kuyāyö ngam mai.

Ngaich meuk yanīhi ök töṙeūla aṅ elinchōn Chū-ö nö meutlö nö löklö el ngam mai, ngam tösömö sinrōl hēk tösatö kui, söm nuk sapīöv nö ikui nuk sinrōl ò ngaich in nuk kui ò nö kūichi ngam minë-eny minṙēḵngö ngam Tēv. 2 Ngaich ök maheuk Chu töṙeūla aṅ elinchōn nö sā mineūkö liōpāt, nuk kalröön ò pöri nö sā kalröön për ngaich ök kūö ò nö sā arëkūö layön. Ngaich kē-ěvkūö ngam töṙeūla tö ngam tulan tö ngam minhôiṅyö ò, kantēra ò hēk tökiröng chööngö ò inrē.

3 Hē Chu öich meuk ngaich sā tö pōihangen ök tö hěng lā kui ò nö pala-aiṙen, lööken pöri ngaich ngam tökapavkūötī vah ò ngaich ṙòkhöre ngih panam nöng tömrit ngam töṙeūla aṅ elinchōn nöng eū-eu ò. 4 Ngaich ha-öiny ngam tulan cha-a, pò ò nö kētö chööngö ngam töṙeūla aṅ elinchōn. Ngaich ngö ṙô cha-a nö ha-öiny ngam töṙeūla aṅ elinchōn: “Achīö öp tö sā ngòh töṙeūla aṅ elinchōn hēk achīö öp tökô nö la-al ò nö kiyung?” 5 Ngaich kē-ěvkūö anga-aṅ tö ngam elvāng töpōi ṙënṙô, hòṅ ò nö miṙēḵngen ngam Tēv ngaich 42 chumngëṅtö anga-aṅ nöng kētu chööngö nö in nup töng kuilōnre. 6 Luvënyökūö elvāngre ngaich anga-aṅ nö miṙēḵngen ngam Tēv, hòṅ ò nö miṙēḵngö ngam minë-eny ò hēk ngam patī ò, söl in yip mi-iyöng el halīöngö inrē nö miṙēḵngen cha. 7 Hēk halöngtuṙen anga-aṅ nö kiyung nö la-al yip töhet tarik hēk mihôiṅ tö cha ngaich kētu chööngö anga-aṅ nö in yip tökeuheūttöre miyööngö, mihëṅṙö, tum mi-ëlô* hēk pumnāmö tarik inrē. 8 Ngaich ṙòkhöre min yip mi-iyöngkūö ngih panam nö ha-öinyö ò. Ngaich öt hěngtak in cha tökūichi minë-eny nö imat ngam līpöre nômö* ngam tökētu Kun Sīṅp, ngam lamöktökūö ranehlö ngih panam nö kūichiyö.

9 Hangihtöre yin tö ngam ṙô tö ṙònghöichṙen vinënyi. 10 Yěn ōt mahaköv holre, haköövö min anga-aṅ. Yěn ōt famëlhang nö aṅhtī tö sanët* ngaich fëli min anga-aṅ tö sanët. Hòṅ aṅhavin takô min yip töhet tarik tö ngam manööyö hēk ṙinatö-ellōn.

11 Meuk ök tahëng hēk Chū-ö töṙeūla aṅ elinchōn mameutlö nö löklö ing panam, sā sinrōl Kun sīṅp nuk tö nët sinrōl ò, sā ṙô tulan pöri anga-aṅ nö ṙò-òvö. 12 Ngaich ngam töṙeūla nö kēkö kaha minë chööngö ngam raneh töṙeūla aṅ elinchōn nöng ikūö ò. Ngaich anga-aṅ nö vīten ngih panam hēk tö yip mi-iyöngkūö e nö ha-öiny ngam raneh töṙeūla aṅ elinchōn, ngam tö lööken tö ngam tökapahavkūö vah re. 13 Ngaich hameuktö minë tökiröng pinngangkūö ngam töṙeūla, uroh anga-aṅ nö suktö tameūiyö nö löktö el halīöngö nö ikui ngih panam nö ikūö yip tarik.

14 Halöngtuṙen anga-aṅ nö hameuktö pinngangkūö nö ikūö ngam töṙeūla aṅ elinchōn hēk hameuktö pinngangkūö anga-aṅ nö halō-ongkūö yip mi-iyöngkūö ngih panam ngaich tölöṙô yip aṅkūö ngih panam nö vī insā ngam töṙeūla aṅ elinchōn, ngam töt kò-òngvah tökūö ngam sanët pòrô nö pala-aiṙen. 15 Hēk halöngtuṙen ngam töṙeūla nö fööhöt unhômö ngam insā ngam töṙeūla aṅ elinchōn, hòṅ ngam insā nö ṙò-òvö ngaich fëlngen yip taṙòkhöre tarik, yip tö sōḵ nö ha-öiny ngam insā ngam töṙeūla aṅ elinchōn.

16 Ngaich ngam töṙeūla nö kalēḵ alaha nö in yip taṙòkhöre tarik, in yip tökūöṅnö hēk tökiröng, tökòlô hēk yāich, töhaköövö hēk töt haköövö, hōtu ngam lāhāmö kël cha hēk tö ngam māl cha nö mikahayö, 17 ngaich yěn ōt töt minkahngu tö ngam minë-eny ngam töṙeūla aṅ elinchōn hēk tö ngam nömpör ngam minë-eny ò ngaich ötkô min anga-aṅ nö havah hēk ötrēhěn nö kô nö inyīha. 18 Hòṅ urööṙen ön ngam mikah nö in hī yěi hòṅ akaha elmat tö ngih ṙô: Ngòh tö īnu tö ngam tö aṙū-utī mikah elmat ngaich kaheuk ṙôken ngam nömpör ngam töṙeūla anga-aṅ aṅ elinchōn, nömpör ngòh tö hěngtak angū-ö tarik ngaich ngih nömpör nö 666.

14 Meuk hēk Chū-ö, ngaich asuh ök maheuk chu! meuk ök Kun Sīṅp chū-ö nö sökhak nö ikui ök Rôngö Siyôn, hol ò inrē nö sökhak yik tö 1,44,000 minënyu anga-aṅ hēk tö ngam Yöng ò inrē nö kūichi nö i māl cha. 2 Ngaich hang ök ṙënṙô chū-ö lamöktö el halīöngö ök tö sā ṙôktô töpōyen hanëmö mak hēk sā ṙô töpōitô kunṙôkö ngaich ngam ahang chu ṙënṙô nö sā inlahen öp tumkökṙôre nö röng öp ranöng re. 3 Ngaich sā tumkökṙôre cha-a tö ngam tö tufömngöre tinköökö nö lākūö ngam kantēra hēk ikūö yip tö fën tak kërup hēk më minṙöinylen inrē ngaich öt hěngtak tö sā heuneū-euṙô cha nö tikök ngam tinköökö, höng më tö 1,44,000 më tö havaha nö ṙā-ang ing panam. 4 Cha-a yin vē töt mahachōichngöre nö i kikānö, hö-ö yin nö töpīhövö, cha-a yin vē famchūkörit ngam Kun Sīṅp öp töng kū-ö ò nö kiröönngöre ngaich ngatī kū-ö cha-a nö kiröönngöre, tö havaha cha-a nö ṙā-ang in yip tarik nö raneh ṙòng nö chö-öinyten ngam Tēv hēk tö ngam Kun Sīṅp, 5 ngaich öt hěng heuh cha-a nö ṙônyö nup ṙô mahachīl nö löknyö elvāngre, töt pitōtuvö yin.

6 Hěngtak hēk ök ma-ahānga maheuk chu ök kumteūköre nö elhôi ngam halīöngö,* aṅhavin anga-aṅ tö ngam töt chanuhuvṙen tölöök inhānga, hòṅ ò nö ahang tö elnang yip tarik yip mi-iyöng kūö ngih panam, yip taṙòkhöre pumnāmö, miyööngö, tum mi-ëlô* hēk mihëṅṙö. 7 Ngaich ngö ṙô ngam ma-ahānga nö pōitô: “Pa-ekūö yin tö ngam Tēv hēk ha-öinyö ò tön röhta yanīhi an ngaich ngam ṙētak ò nö kahôka, lökten yin ha-öiny ngam Tēv ngam vamīlö ngam halīöngö töng panam hēk mai hēk löklö mak inrē!”

8 Unôichrit e hēk ök innëtö ma-ahānga nö ngö ṙô nö yih: “Fukngö an nö ngaich, fukngö an nö ngaich ngam Tökiröng elpanam Pēpilön, anga-aṅ an maha-òk minë taṙòkhöre pumnāmö tö ngam vāin chinô-òṅre,* heūṅ ngam intööḵ-önglōnre.”*

9 Unôichrit e hēk ngam linūöi tak ma-ahānga nö pōitô nö ngö ṙô nö yih: “Yěn ōt maha-öiny ngam töṙeūla aṅ elinchōn hēk ngam insā ò ngaich vītö minkahngö nö i māl re hēk i këlre, 10 ngaich ngatī min anga-aṅ nö òk ngam vāin ngam taināinyö ò nö in ngam töt kintēhěv vāin ngam tö ṙöstu nö el ngam kulah ngam tanāinyö ngam Tēv ngaich hachöökö anga-aṅ nö ikūö ngam tameūiyö hēk hanūṙökūö e nö lākūö yip töhet ma-ahānga hēk tö ngam Kun Sīṅp. 11 Ngaich ngam tameūiyö chūök cha* nö hachöökö, örheūheu min ngam lul kūö e nö chuh lātulöng, sakāmö hatööm min cha-a nöng öt kumchikuṙen, heūṅ, acha-a yip maha-öiny ngam töṙeūla aṅ elinchōn hēk ngam insā ò hēk vamī tö inpan kūö ngam minë-eny ò. 12 Ngaich hòṅ aṅhavin min yip töhet tarik tö ngam manööyö yip hamang minë chööngö ngam Tēv hēk yip töt ṙamāngenre nö ṙatö-ellōnre* nö in Yēsū.”

13 Ngaich hang ök ṙô Chū-ö lamöktö el halīöngö tö ngö, “Kūichngen ngih: Töṙamölōn yip cha-a yip lamöktökūö töngamuh nö kapah nö im hinëngö nö hol ngam Mā. Heūṅ, ngô ṙô ön ngam töhet kumlēḵ teūngen yin nö ngaich tö haneūheure nö ṙā-ang in nup la-enre, pò nup la-en cha nö töthō nö vāichiyö.”*

14 Ngaich yěh meuk! meuk ök töhěng tö-isoh taṙul Chū-ö hěngtak ök amūichhak nö in e tö sā kūön tarik aṅhav kui anga-aṅ tö ngam sunna sapīöv hēk aṅhav eltī tö ök tökeūtökūö kanöt.

15 Ngaich hěngtak hēk ök ma-ahānga kumnyī-inyre nö löknyö el ngam töhet chūök patī ngam Tēv hēk ngam amūichhak nö ikui ngam taṙul pōitô anga-aṅ nö ngö ṙô nö in ò: “Rultenre man ngaich öm köttökūö ngam kanötre ngaich uvòh, tön ngaich ön nö yih ngam ṙētak unvòhò hēk ngaich inrē nö köiny minë ṙòng taneūich ing panam.” 16 Ngaich ngam amūichhak nö in ngam taṙul, köttökūö ngam kanötre ngaich anga-aṅ nö ing panam ngaich köt minë ṙòng taneūich ing panam.

17 Ngaich hěngtak hēk ök ma-ahānga kumnyī-inyre nö löknyö el ngam töhet chūök patī ngam Tēv ngam më-el halīöngö, aṅhavin inrē anga-aṅ tök töhěng tökeut kanötre.

18 Ngaich hěngtak hēk ök ma-ahānga kumnyī-inyre nö löknyö el ngam tahāklö ngam tö kētu chööngö nö im tameūinyö, pōitô anga-aṅ nö havëken ngam ma-ahānga ngam tö aṅhavin tö ngam tökeut kanötre ngaich ngö ṙô nö in ò: “Rultenre man ngaich öm köttökūö ngam kanötre ngaich hamūl minë tūmö ṙòng vāin angkūr ing panam, tön ngaich nun minë ṙòng angkūr nö köiny.” 19 Köttökūö ök kanötre ngaich ök ma-ahānga nö ing panam ngaich hamūl nuk ṙòng vāin angkūr ing panam, kavalhöt nuk vāin angkūr pöri anga-aṅ nö el ök tökiröng kinrān vāin ök minkahngö ngam tanāinyö ngam Tēv. 20 Lā-uk ngam elpanam ngam kinrān vāin nö röönö ngaich ngam mahām tö meutnyi nö löknyö in e ngaich söllö ngam rò-òlkūö e nö im inkālkūö minë kōra hēk lohten nö 300 kilōmitör* rôvat kinheūtngöre chūök.

15 Meuk ök töhěng minkahngö hēk Chū-ö el halīöngö, tökiröng hēk pinngangkūö, meuk yik tö sat tak chū-ö ma-ahānga, yik kumṙapken nuk tö sat ötinkôlò. Manā-aṅ anū-ö nö ötinkôlò, pön löktö in e min ngam manāngen ngam tanāinyö ngam Tēv.

2 Ngaich Chū-ö meuk ök tö sā ṙēngen mineūkö tinmël mai, tö katēhě tö ngam tameūiyö. Ngaich meuk yik tarik chū-ö nö sökhak nö ikūö ngam mai, yik tö mihôiṅ tö ngam töṙeūla aṅ elinchōn hēk tö ngam insā ò hēk yik töt aṅhavin tö ngam nömpör ngam minë-eny ò. Höng kiṙapken nuk ranöng ngam Tēv cha-a. 3 Ngaich höng tikökṙôre tö ngih tinköökö Môsös ök mahalanṙen ngam Tēv hēk tö ngam Kun Sīṅp, nö ngö ṙô:

“Ō Tēv Yāvē,* Tökalēḵkūö Tökalēḵ, iṙôkö kinrööngö ön minë la-en meh hēk töt insā-av inrē. Ō më-eṅ tö örheūheu-aṅ Rācha, iṙôkö lanöökö hēk kanô-en ön minë talöökö meh. 4 Yāvē,* höng më-eṅ man tö chiplö, achīö öp min töt pa-ekūö tö meh hēk töt mahapōilö ngam minë-eny meh? Ṙòkhöre nun min në pumnāmö nö yihtöre nö in meh hēk ha-öinyö meh, pön hameuknyu minë tölöök inlēnö tö meh nö in cha.”

5 Unôichrit e ngaich Chū-ö öich meuk ök töhet chūök inrūkui vamë-eny, nö löpnyukūö nö el halīöngö, 6 ngaich höng keunken minë tö sat ötinkôlò më tö sat tak ma-ahānga nö kunyī-inyre nö löknyö el ngam töhet chūök, inyūtu cha-a tö nuk töhet hēk töyāngö mat hilā hēk nyëklö elngòhre tö minë sunna lanak elngòh. 7 Ngaich in më tö fën tak kërup nö hěngtak ök in cha kamëten nuk tö sat sunna töchilū nö in më tö sat tak ma-ahānga, minë tö tööḵlö aṅ tö ngam tanāinyö ngam Tēv, ngam tö örheūheu nö aṅ. 8 Ngaich tööḵlö ngam patī tö ngam lul tökūö minhôiṅyö hēk kumlēḵ ngam Tēv, hanöng sā minë tö sat ötinkôlò nö ölngen, minë aṅ in më tö sat tak ma-ahānga ngaich öt hěngtak tökô nö kuhēthötre nö lātuhēt ngam töhet chūök.

16 Hang ök töpōitô hēk Chū-ö ṙënṙô nö löknyö el ngam töhet chūök, ök tö ngö ṙô nö in yik tö sat tak ma-ahānga: “Kuṙòh, ngaich ṙösnyö aṅ minë tö sat töchilū tö ngam tanāinyö ngam Tēv nö ikui ngih panam.”

2 Kiröönngöre ngaich ök raneh ma-ahānga ngaich ṙösngö aṅ ngam töchilūre nö ikui ngih panam. Ngaich yik tarik tö īnu tö ngam minkahngö ngam töṙeūla aṅ elinchōn hēk yik vamë-ekūö ngam insā ò inrē, vāhavö ngaich cha-a tö nuk töchökhukūö hēk tökônyikūö vah.

3 Ṙösngö aṅ ök töchilūre ök innëtö ma-ahānga nö el ngam mai. Ngaich ngam mai nö sā mahām yip tökapah tarik ngaich nuk taṙòkhöre chehen aṅ el ngam mai, heūṅ, minë tö unhômuvö aṅ el ngam mai, ṙòkhöre anū-ö nö kapah.

4 Ṙösngö aṅ ök töchilūre hēk ök linūöi tak ma-ahānga nö el minë tahël hēk löklö minë mak inrē. Ngaich vī-ingre anū-ö nö mahām. 5 Ngam ma-ahānga tö chööngu nö im mak, hangṙô ò Chū-ö nö ngö ṙô: “Ō më-eṅ tö chiplö Tēv, më-eṅ öm tö misī hēk töngamuh, tölöök man, pò meh öm vënyö ngih fëslare öm kahôka, 6 pò cha nö havônyö mahām yip töhet tarik hēk pròfět inrē, kētö òk cha më-eṅ tö ngam mahām. Pò cha nö tö hòṅ ngatī inlanken.” 7 Hangṙô ngam tahāklö hēk Chū-ö nö ngö ṙô: “Ō Tēv Yāvē,* Tökalēḵkūö Tökalēḵ, kô-en nun minë fësla* meh nö tölöök hēk tökanô-envö.”

8 Ṙösngö aṅ ök töchilūre hēk ök finëntak ma-ahānga nö imat ngam tavūöi ngaich kētu chööngö ngam tavūöi nö haṙāpngen yip tarik tö ngam tameūiyö. 9 Ṙāpngö yik tarik tökūö ök yöng ṙanāchö, sön pöri cha-a nö ötlēḵkôre tö minë-eny ngam Tēv, ngam tö chööngu nö ikui minë taṙòkhöre ötinkôlò, ötrēhěn cha-a nö havöötö ellōnre hēk ötrēhěn nö ha-öinyö ò.

10 Ṙösngö aṅ ök töchilūre hēk ök tinneūi tak ma-ahānga nö el kantēra ngam töṙeūla aṅ elinchōn. Keuheūtngöre ngaich ngam inyööngö tö ò nö sangūliyö, kap litāk re ngaich yik tarik tökūö chanököre, 11 ötlēḵköṙôre cha-a tö ngam Tēv aṅ el halīöngö tökūö chanököre hēk tökūö minë tökônyikūö vah re hēk ötrēhěn cha-a nö havöötö ellōnre nö ṙā-ang in minë la-enre.

12 Ṙösngö aṅ ök töchilūre hēk ök tinfūöl tak ma-ahānga nö el ngam tökiröng tahël Yufratīs, nyôngö ngaich ngam mak e, hòn halēnlöng ngam talöökö yip rācha yamih nö löktö chūhöt.

13 Ngaich Chū-ö meuk nup tö lūöi töthet ṙô tö sā inlahen mineūkö tarôṅt mameutnyi nö ṙā-ang elvāng ngam tulan, töṙeūla aṅ elinchōn hēk tö minyôiny pròfět. 14 Rö-ö pön tö uhômhötvö në ṙô tö më tötlöök ma-ahānga hēk hameuktö pinngangkūö cha-a inrē ngaich chuh in yip rācha ngih panam, hòṅ cha nö hamūli ip tökiröng sakāmö kinyūngö ngam Tökalēḵkūö Tökalēḵ Tēv.

15 “Yěh meuk! yih Chin öich sā yanīhi mū-ulāya. Töṙamölōn öp anga-aṅ öp hamööngöre hēk tö inyūtu alaha tö chehenre, hòṅ ò nöng öt lichôi nö kiröönköre ngaich öthō min yip tarik nö meuk ngam miṙē-ěv ò.”

16 Ngaich cha-a nö hamūlngen yik rācha nö in öp chūökö tö Armakētòn* invëka nö i ëlô Hiprū.

17 Ṙösngö aṅ ök töchilūre hēk ök sinat tak ma-ahānga nö el ngam kuföt ngaich löknyö el ngam töhet chūök in ök kantēra ök töpōitô ṙënṙô, ök tö ngö ṙô: “Ngaich an nö keuheūten!” 18 Panyāla ngaich ök hanyālö, pōitô nuk ṙënṙô, kunṙôkö hēk yöng kumyeūnö ök umuh, öt töngatī-ivö hēten tö më tarik nö ikūö ngih panam. 19 Lūöi tit nö kāichö ngam tökiröng elpanam ngaich payāyi nuk elpanam yik pumnāmö tarik ngaich fēkö ngam Tökiröng elpanam Pēpilön ngam Tēv, hòṅ ò nö kē-ěvkūö tö ngam kulah tö tööḵlö tö ngam vāin tanāinyö ò hēk lanīnö ò. 20 Hěnghöre kö falngöre inrē nup kun panam hēk öt meūki kū-ö nuk rôngö. 21 Ngaich löktö el halīöngö nuk tökiröng tökënngöre kumṙah nö suktöre nö löö kui yik tarik ngaich lohten nö kö 20 kilō* lumngan minë tökënngöre kumṙah. Angū-ö lāinyngen yik tarik nö ötlēḵkôre tö ngam Tēv tökūö ngih ötinkôlò, pò ngih ötinkôlò nö pōihangen tī tö pinlāngen.

17 Yik tö sat tak ma-ahānga tö aṅhavin tö minë tö sat töchilū, hěngtak ök aṅ in cha yamihtöre nö ngö ṙô nö in chu: “Ta-ih, töich hameukhömat meh tö ngam sācha taneūngen ngam tökiröng mi-inyihköre kikānö, ngam amūichhak nö ikui minë töpōyen hanëmö mak. 2 Ngam tö chò-òv* tö vē rācha ngih panam ngaich ha-ôkö vē tarik ngih panam tö ngam vāin chinò-òṅ* ò nö mihiyōyi.”

3 Ngaich ngam ma-ahānga nö löktö im minhôiṅyö ngam töhet kumlēḵ nö keunngen chu nö chuh el tönyalnyi, ngaich meuk ök tö hěngtak chū-ö kikānö mi-in e ök amūichhak nö i uk ök töturëṙö nganāṅvö töṙeūla aṅ elinchōn. Tööḵlö ngam töṙeūla tö minë minë-eny ötlinëkôre tö ngam Tēv, sat nuk kui hēk söm nuk sinrōl ò. 4 Inyūtu ök kikānö tö tö pörpölömat hēk töturëṙö nganāṅvömat hilā, hanyöötöre anga-aṅ tö sunna, töpōiṙāi ihong hēk töpōiṙāi tasëhe inrē, aṅhav eltī anga-aṅ tö ök sunna kulah, ök tö tööḵlö aṅ tö nup sin-òkkūö chehen hēk tö nup chehen töthet chinò-òṅ ò.* 5 Kūichi ngam töt mikahkūö minë-eny nö i māl ngam mi-inyihköre kikānö: “Tökiröng elpanam Pēpilön, yöng yip mi-inyihköre kikānö hēk kamyôḵnyö minë chehen sin-òkkūö ing panam.” 6 Ngaich meuk ök kikānö chū-ö nö hiyōy tökūö inôkö mahām yip töhet tarik hēk tökūö inôkö mahām vē vamënyö inlahen Yēsū.

Kô-en chū-ö öich pingangkūö öich meuk inlahen ngòh kikānö. 7 Ngö ṙô ngaich ök ma-ahānga nö in chu: “Kūö yòh öm ngatī ṙôkö pinngangkūö? Vë-eny nang meh chin tö ngam töt mikahkūö inlahen ngam kikānö hēk inlahen ngam töṙeūla aṅ elinchōn ngam tösātö kui hēk tösömö sinrōl, ngam tö ūichöökui tö ngam kikānö. 8 Ngam maheuk meh töṙeūla aṅ elinchōn, ōt an sin hö-öv pöri nö ngaich, sön pöri anga-aṅ nö veūten nö kunyī-inyre nö löknyö el ngam tö aṙū-uti ṙeūvö ngaich ha-eti min anga-aṅ, yip tarik ing panam yip töt kūichi minë-eny nö imat ngam līpöre nômö* hēten tö ranehlö ngih panam, pingangkūö min cha-a nö meuk inlahen ngam töṙeūla aṅ elinchōn nö ōt sin, hö-öv pöri töngamuh ngaich hēk min nö yih.

9 Hòṅ holtö mikah elmatre hēk mikahre in yěi hòṅ akaha elmat tö ngih ṙô: Ngam manah minë tö sat kui nö minë tö sat rôngö tö ūichö kui tö ngam kikānö. 10 Ngaich ngam manah u, tö sat tak rācha: Taneui ngaich nuk tö fukngö, ngaich hěng öp tö ōttit, hěng öp tö öl nö yih ngaich yěn yih min anga-aṅ ngaich hòṅ rahëichtaṙen min anga-aṅ nö hòṅ ōt. 11 Ngaich ngam töṙeūla aṅ elinchōn ngam tö ōt sin ik urěh, hö-övö pöri nö ngaich. Hinëvöre an anga-aṅ nö rācha, lamöknyö in më tö sat tak pöri anga-aṅ nö kunyī-inyre ngaich ha-etiyö min anga-aṅ.

12 Ngam maheuk meh tösöm sinrōl, nö më tösöm rācha më tö öl nö teūngen tö ngam pūlngöre. Teūngen pöri min cha-a tö chööngöre nö sā inlahen rācha nöng rahëichtakūö* nö hol ngam töṙeūla aṅ elinchōn. 13 Ṙòkhöre cha-a nöng hēngö mufē ngaich kēten ngam minhôiṅyöre hēk chööngöre nö in ngam töṙeūla aṅ elinchōn. 14 La-al ngam Kun sīṅp min cha-a, mihôiṅ pöri min ngam Kun sīṅp tö cha, pò ò nö anga-aṅ Mākūö mā hēk Rāchakūö rācha ngaich yip hol ò tö havëtu, tökatöllöng hēk tökanô-envö, cha-a min inrē tö minhôiṅyu.”

15 Ngö ṙô ök ma-ahānga nö in chu: “Ngam maheuk meh mi-inyihköre kikānö ngam amūichhak nö ikui minë hanëmö mak, në nun manah u, tarik, tömaṙôngö, pumnāmö hēk tum mi-ëlô.* 16 Ngaich minë maheuk meh tösöm sinrōl hēk tö ngam töṙeūla aṅ elinchōn, kunyaha elmat min cha-a tö ngam mi-inyihköre kikānö, hanāchiṙen min anga-aṅ hēk lichôyi inrē hēk kā-a inrē min nup alaha ò ngaich keuheūthötvö min anga-aṅ nö fönghötvö nö ikūö öp tameūiyö. 17 Pò ngam Tēv nö chaphöt ngih ṙô nö ellōn cha, hòṅ cha nö hateungngö nup lōn ò, hòṅ nup ṙô ellōn cha nöng hěng. Kētö ngam pūlngöre inrē cha-a nö in ngam töṙeūla aṅ elinchōn nö hateungngö nup lōn cha, hanöng sā ngam ṙô ngam Tēv nö öl nö teungtökūö. 18 Ngaich ngam maheuk meh kikānö, ngam manah e nö ngam tökiröng elpanam ngam mahayöng nö ikui më rācha ngih panam.”

18 Unôichrit e hēk Chū-ö öich meuk ök tahëng ma-ahānga yamônti nö ṙā-ang el halīöngö ök tö aṅhavin tö tökiröng chööngö. Kalēḵ-ě yanāngö ngaich ngih panam tökūö ngam ineū-eu ò. 2 Ngaich pōitô anga-aṅ nö ayôṙa nö ngö ṙô: “Fukngö an nö ngaich! Fukngö an nö ngaich, ngam Tökiröng elpanam Pēpilön, ngaich angū-ö nö elyöngö yip tötlöök ma-ahānga hēk vī-ingre nö chūök yip tötlöök ma-ahānga,* töthet hēk sin-òkkūö chehechōn nö hayunngöre! 3 Pön ha-òk në taṙòkhöre pumnāmö anga-aṅ tö ngam vāin chinò-òṅre,* heūṅ kò-òngvah ngaich vē rāchakūö ngih panam nö haṙööyi tö ngam chinò-òṅ ò.* Chò-òṅkānö më rāchakūö ngih panam nö in ò, ngaich kòlô më mi-inyīha ing panam* tökūö ngam töt miṙē-ěv intööḵ-önglōn ò.”

4 Hang ök ṙënṙô hēk Chū-ö lamöktö el halīöngö ök tö ngö ṙô: “Yī-ö tarik chu, kunyī-inyre yin öi ṙā-ang in ò. Yēḵ yīö öt lōnu töre öi nôlhöt öi in minë tökööl ò hēk yěi öt lōnu tö ngam ötinkôlò ò nö fukkui yīö ngaich kunyī-inyre yī-ö öi ṙā-ang in ò. 5 Pò minë tökööl ò nö söllö nö el halīöngö ngaich minë tökööl kahëken ò,* fēka anū-ö tö ngam Tēv. 6 Nup inlahen tī ò nö in yip tahëng, ngatī inlahen tī yī-ö öi in ò hēk nup la-en ò ngaich mötlö ṙôken kahëti yī-ö tö sācha ò, ngam kalūöchtö ò nö el ngam kulah, mötlö ṙôken kalūöchti yī-ö öi in ò. 7 Ngaich nup töng ṙôken hamūl ò kanôlò hēk töt miṙē-ěv ò in nup töng inlahen ò, ngatī ṙôken tī öi hachökö ò, hòṅ ò nö meuk miṙivlōnre. Pön ngö ṙô anga-aṅ nö ellōnre, ‘Rāni chin Chū-ö öich amūichhak öich el ngam kantēra, hö-ö Chin öich tafīösi. Öthō Chin min haṙivölōn.’ 8 Lökten nöng im töng hěng sumkam nup taṙòkhöre ötinkôlò nö fukkui ò, ngam kinpaha, miṙivlōn, inyāichö ngaich keuheūthötvö min anga-aṅ nö föngtukūö nö ikūö ngam tameūiyö, pò ngam Tēv Yāvē,* ngam ma-ahangnyö ngam sācha ò nö tökalēḵ.

9 Ngaich yip rācha ngih panam, yip chamô-òṅ* nö in ò hēk yip töt miṙē-ěvö nö hatööḵ-önglōnre nö in ò, hē cha min nö meuk ngam lul anöktikūö ò ngaich peūinyö ò min cha-a hēk kōk elngòh re tökūö miṙivlōnre. 10 Höng marôvat cha-a nöng sökhak tö kūö pinhë-ekūöre, yěn fēkö öp inlahen re min nö ngatī inlahen kinëti ötinkòlô. Ngaich ngö ṙô: ‘Ötkôlò, ötkôlò, ngam tökiröng elpanam Pēpilön! yöng ötlinēken meh. Më-eṅ öm tö ngön elpanam, höng im töng hěng kanta man min öm teūngen töm sācha re!’

11 Ngaich yip mi-inyīha min aṅ ngih panam nö peūinyö ò hēk harāmöre, pön öt hěngtak ngaich min mahavah nup taṙòkhöre chehen nö in cha, 12 nup chehen tö sunnavö, chāntī, töpōiṙāi ihong, tasëhe, tövai hilā, tö pörpölömat hilā, rēsöm hēk töturëṙö nganāṅvö mat hilā. Nup taṙòkhöre tövī-i nö löktö in minë tötahūsa chōn hēk kanap hötti, töpōiṙāi chōn, mās, vët hēk ṙòkhöre nup chehen nup tövī-i nö löktö in nup tö ayānga ihong, 13 hēk talchīni, masāla,* töfööngö, tötahūsa tavī-i, lōpān, vāin, tavī-i òliv, maita, ṙòng sāiny, kun nuā, sīṅp, kōra, inröl, mahalanṙen hēk tarik inrē. 14 Heūṅ, ngaich nup yanālö meh tövai ṙòng chōn ngaich nun nö marôvat tö meh hēk nup taṙòkhöre tö kuchik nyā-aṅkūö hēk nup töt insā-av vanāyö takô chehen nö marôvat tö meh, öt hēk min më-eṅ kôtökūö tö u.

15 Yip mi-inyīha mahavahken në chehen hēk tökôlò nö löktö in ngih elpanam, höng marôvat cha-a nöng sökhaka, pön pa-ekūö töre nö sā inchöökö ò. Peuiny min cha-a hēk haṙivlōn. 16 Ngaich ngö ṙô: ‘Ötkôlò, yöng ötlinëken ön ngih tökiröng elpanam. Chumhënöre ön tö tövai hilā, tö pörpölömat hēk töturëṙö nganāṅvö mat hēk hanyöötöre tö aṅh likeun sunna, töpōiṙāi ihong hēk tasëhe, 17 ngaich pöri min minë taṙòkhöre kanôlò ò nöng im töng hěng kanta nö payāyi!’

Hēk yip taṙòkhöre keptin chōng, yip lamök el chōng, yöngkūö chōng hēk ṙòkhöre cha-a yip maha-aṅ nômöre nö löktö el ngam mai nö marôvat nö sökhak 18 ngaich ayôṙa cha-a nö meuk ök lul finöngngökūö ò, nö ngö ṙô: ‘Ōt hòng elpanam tö sā inlahen ngih tökiröng elpanam?’ 19 Tūi elkuire cha-a tö tumlat, peuiny cha-a hēk haṙivlōn nö ngö ṙô: ‘Ötkôlò, yöng ötlinëken ön ngih tökiröng elpanam. Löktö in minë töpōyen hēk töpōṙāi chehen ò cha-a sin nö kôlò më tö chōngu nö el mai. Höng im töng hěng kanta anū-ö nö payāyi!’

20 Ō yī-ö halīöngö, yī-ö töhet tarik, tanīnöṙô hēk pròfět, ha-öinyngövah ò yin. Pò ngam Tēv nö ahangnyö sācha ngih elpanam nö chö-öinyten tö yīö!”

21 Hěngtak ök tökalēḵ ma-ahānga kamëḵ ök tökiröng ihong tö sā tinlön ngaich kavalten e nö el mai nö ngö ṙô: “Veūten ön min ngam tökiröng elpanam Pēpilön nö ngatī inlahen sinukti nö lātaṙeū ngaich öt hēk min anga-aṅ nö kôti. 22 Ngaich öt hāngö hēk min yip ramöng ṙô tumkökṙôre tö yīö, tumkökṙôre, ramöng fanöö hēk famöö fanöö. Ngaich öt kôtökūö min yī-ö tö vamī kraft nö ihih hēk öt hāngö ṙô min nup ṙô tinlön. 23 Öt ōtngöre min yanāngökūö ëāṅvö nö ihih, ötrēhěn nö hāngö ṙô töhapīhö kikōnyö hēk kikānö, pò yip mi-inyīha aṅ in meh nö tökirööngö chūök nö ing panam ngaich lō-ongkūö në taṙòkhöre pumnāmö tarik nö löktö im minlūönö meh. 24 Heūṅ, kôti nö in ngih elpanam nuk mahām yik pròfět hēk yip töhet tarik, yik tö fëli nö ikūö ngih panam.”

19 Unôichrit e chū-ö hang ök ṙô lamöktö el halīöngö tö sā ṙôktô ṙënṙô tökiröng kiteūm. Ngö ṙô cha-a: “Ha-öinyö Yāh yin!* Aṅ in ngam Tēv hī an ngam inyööken hī, kanôlò hēk minhôiṅyö ò inrē, 2 pò nup fësla ò nö tölöök hēk tökô-en, kētö sācha ngam tökiröng mi-inyihköre an ngam machōichngen ngih panam nö aṅhtī tö ngam chinô-òṅre* ngaich an ngam Tēv nö havahalvah mahām yip mahalanṙenre nö in ò.” 3 Ilöö unôichrit ṙô e hēk cha-a nö nët heuh ṙô nö ngô ṙô: “Ha-öinyö Yāh yin!* örheūheu an yēḵ ngam lul anöktikūö ngam elpanam Pēpilön nö kū-ötö lātulöng.”

4 Afukngöre ngaich yik tö 24 tak minṙöinylen hēk yik tö fën tak kërup nö ha-öiny ngam Tēv ngam amūichhak nö el ngam kantēra ngaich ngö ṙô: “Āmen, ha-öinyö Yāh yin!”*

5 Löknyö el ngam kantēra hēk ök töhěng ṙënrô ök tö ngö ṙô: “Ṙòkhöre yī-ö mahalanṙen ngam Tēv hī hēk ṙòkhöre yip tö pa-ekūö tö ò mahalanṙen, tökūöṅnö hēk tökiröng, ha-öinyö ò yin!”

6 Hēk chū-ö hang ök ṙënrô tö sā ṙënṙô yip tökiröng kiteūm hēk sā ṙënṙô töpōyen hanëmö mak hēk töpōitô kunṙôkö inrē, ngö ṙô cha-a: “Ha-öinyö Yāh yin,* pò ngam Tēv hī Yāvē* ngam Tökalēḵkūö Tökalēḵ nö rācha ngaich nö rultenre nö hayöng! 7 Ta-a töi ṙamlōn öi pōyen ṙanamölōn hēk hapōilen ngam Tēv tön yih an nö ngaich ngam ṙētak ngam inpīhö ngam Kun Sīṅp hēk lēnhakṙen inrē ngaich ngam pīhö ò. 8 Heūṅ, halöngtuṙen an nö chumhënöre tö ngam tö payāngamat, töhet hēk tövai hilā, pò ngam tövai hilā nö minkahngö minë tölöök la-en yip töhet tarik.”

9 Ngaich ngö ṙô anga-aṅ nö in chu, “Kūich ngih: Töṙamölōn yip cha-a yip tö havëtu nö yihtökūö nö im nyinā-aṅ inpīhö ngam Kun Sīṅp tö lā harap.” Ngö ṙô inrē anga-aṅ nö in chu: “Tökô-en nun në nö ṙô ngam Tēv.” 10 Hē chu öich hāngö e, afukngöre ngaich Chū-ö öich iröön ò öich ha-öinyö ò. Ngö ṙô pöri anga-aṅ nö in chu: “Hö-ö, hö-ö, uh man ngatī inlahen! Höng töng sā meh hēk töng sā yip holmaneuk meh chin chū-ö öich mahalanṙen, yip tö teūngen tö la-enre nö eūkö inlahen Yēsū. Ha-öiny ngam Tēv man! Pön angū-ö chö-öiny minë tö-eūka nö ameūkö inlahen Yēsū.”

11 Meuk ngam halīöngö chū-ö nö löpnyukūö ngaich yěh meuk! hěng nòng ök tö-isoh kōra ngaich ök mi-i uk ò nö ūichhak, kaheūkö anga-aṅ nö tökanô-envö hēk tökô-en inrē hēk höng iṙūöhen anga-aṅ nö asā minë tölöök inchöngten nö kahôka hēk kiyung inrē. 12 Sā hanūṙökūö tameūiyö nuk mat ò ngaich pōyen nuk sapīöv nö ikui ò ngaich hěng öp minë-eny tökūichö nö in e, höng anga-aṅ tö akahakūö tö manah e öt tahëngu, 13 inyūtu anga-aṅ tök inyut tö mahāmu mat* ngaich ök invëkö minë-eny ò nö: Ṙô ngam Tēv. 14 Ngaich tömrit ò yik kumyung aṅ el halīöngö nö yih nö i uk kōra ngaich inyūtu cha-a tö nuk tö-isoh, töhet hēk tövai hilā. 15 Ngaich löknyö elvāng ök mi-i uk kōra ök tö keut hēk tö marôtòng sanët nö meutnyi, hòṅ ò nö aṅhtī tö e nö fang minë pumnāmö ngaich sā inlahen yōm sīṅp min anga-aṅ nö aṅhtī tö vët tinkung nö hayōmken cha, rö-ö nöng angū-ö pön röön öp kinrān vāin tanāinyö hēk lanīnö ngam Tökalēḵkūö Tökalēḵ Tēv inrē anga-aṅ. 16 In öp inyut ò, heūṅ, in öp takeun ò nö kūichi öp minë-eny, Rāchakūö rācha hēk Mākūö mā.

17 Hēk chū-ö meuk ök ma-ahānga ök samökhak nö elhôi ngam tavūöi nö havëken minë chehechōn kumteūköre nö elhôi ngam halīöngö* nö ngö ṙô: “Ta-ih yin, hamūlöre öi in ngam tökiröng nyinā-aṅ tö lā harap aṅ im Tēv, 18 hòṅ yīö öi kāḵ alaha më rācha, yöngkūö kumyung, tökalēḵ tarik, kōra hēk aṅ uk kōra inrē, hěnghöre kāḵ alaha cha inrē nö ṙòkhöre yip tarik töt haköövö, mahalanṙen, tökūöṅnö hēk tökiröng inrē.”

19 Ngaich meuk ngam töṙeūla aṅ elinchōn chū-ö, tö yik rācha aṅkūö ngih panam hēk tö më kumyunglen ò, nö hamūlöre nö kiyung nö la-al ngam mi-i uk kōra hēk tö më kumyunglen ò. 20 Ngaich ngam töṙeūla aṅ elinchōn nö kē-ě, nö holre tö më tö minyôiny pròfět më mahameuktö pinngangkūö nö lākūö ò, yip mahalō-ongkūö yip tarik nö hameuktö pinngangkūö yip tökôten nö vītö ngam minkahngö ngam töṙeūla aṅ elinchōn hēk vamë-ekūö ngam insā ò inrē. Nëtre tak cha-a nöng aṅ nöng kavalhötvö nö ikūö öp tötöh tameūiyö öp töng örheūheu nö hūkūö ihong. 21 Ngaich fëli yik rīkre tarik tö ngam tö marôtòng sanët lamöknyö elvāng ngam mi-i uk kōra ngaich ṙòkhöre nuk chehechōn nö tööḵngen nö kāḵ alaha cha.

20 Ngaich hěngtak hēk ök maheuk chu ma-ahānga, yamônti nö ṙā-ang el halīöngö, ök tö aṅhavin tö öp chāpi öp tö aṙū-uti ṙeūvö hēk tö aṅhav eltī inrē tök tökiröng sayôk. 2 Kēḵ ngam tulan anga-aṅ ngam töhötṙeh pēch ngam Iplīs hēk Satān ngaich nyëkngen ò nö 1,000 samyeūheu. 3 Ngaich kavalhötvö anga-aṅ nö el ngam tö aṙū-uti ṙeūvö hēk öpikūö inrē min ngam tö aṙū-uti ṙeūvö nö hapānikūö, hòṅ ò min nö öt halō-ongkūö yip pumnāmö tarik, hanöng saha kinheūtö ngam tö 1,000 samyeūheu. Ngaich unôichrit e min anga-aṅ nö hòṅ rahëichtaṙen nö hòṅ luhlöng nö ṙānyu.

4 Ngaich meuk nup kantēra Chū-ö hēk yip amūichhak nö el u, tö kē-ěvkūö cha-a tö chööngöre nö kahôka. Heūṅ, meūkö cha Chū-ö yik tö fëli tökūöre nö eūken Yēsū hēk vënyö inlahen ngam Tēv* hēk yik töt maha-öiny ngam töṙeūla aṅ elinchōn hēk tö ngam insā ò hēk töt mumkahngö māl re hēk këlre tö ngam minkahngö ò. Aṅhlö cha-a ngaich rācha nö hol Kristū nö 1,000 samyeūheu. 5 Hanöng sā ngam tö 1,000 samyeūheu nö öl nö keuheūt ngaich ōtre min yip tökapah nö öl nö aṅhlö, cha-a yin vē tö urěhlö inchohlöng min nö ṙā-ang in yip tökapah. 6 Töṙamölōn hēk töhet yin cha-a më tö urěhlö inchohlö nö ṙā-ang in yip tökapah, öt chööngu ngam innëtö kinpaha nö ikui cha. Kūönṙô ngam Tēv hēk kūönṙô Kristū pöri min cha-a ngaich rācha min cha-a nö hol ò nö 1,000 samyeūheu nö hayöng.

7 Ngaich yěn höng keuheūt min ngam tö 1,000 samyeūheu, ṙānyu min ngam Satān nö ṙā-ang el inköövö. 8 Ngaich kunyī-inyre min anga-aṅ nö halō-ongkūö më pumnāmö tarik nö in minë tö fën lā-a ngih panam ngam Kōk hēk Makōk, hòṅ ò nö hamūlö cha nö im kinyūngö, sā ṙôken kuyāyö ngam mai cha-a tö ṙôkenre. 9 Keuheūtngöre chūök cha-a nö ing panam ngaich havīlen ngam inrūkui yip töhet tarik hēk ngam tö hanghuṙen elpanam cha. Löktö el halīöngö pöri ngam tameūiyö ngaich ṙāpngö cha-a. 10 Ngaich kavalhötvö ngam Satān ngam mahalō-ongkūö cha nö ikūö ngam tötöh tameūiyö ngam chūök ök töṙeūla aṅ elinchōn hēk tö minyôiny pròfět nö urěhhöt nö chaphötvö, örheūheu cha-a min tö hatööm sakāmö nö hachöökö.*

11 Ngaich meuk ök tö-isoh tökiröng kantēra Chū-ö ngaich ūichhak ngam Tēv nö el e, falngöre ngam panam hēk tö ngam halīöngö nö lākūö ò, ngaich öt kôtikūö hēk anū-ö tö chūökre. 12 Ngaich meuk yik tökapah chū-ö, yik tökūöṅnö hēk tökiröng nö ṙòkhöre nö sökhak nö lākūö ngam kantēra ngaich fehnyukūö ök līpöre.* Fehnyukūö hēk ök tahëng līpöre,* ngam līpöre nômö, asā minë tökūichi imat ngam līpöre, ngatī inlahen kinṙòkken min yip tökapah nö asā nup la-enre. 13 Ngaich ngam mai nö havanlö aṅ re tö yip kupah hēk ngam kinpaha tö ngam Anūlö* nö havanlö yip aṅ re kupah. Ngaich kahòkkaṙen min cha-a nö asā la-en ngòh tö hěngtak. 14 Kavalhötvö ngaich ngam kinpaha hēk tö ngam Anūlö* nö ikūö öp tötöh tameūiyö, ngam manah ngih tötöh tameūiyö nö ngam innëtö kinpaha. 15 Ngaich ngòh töt kūichi minë-eny nö imat ngam līpöre nômö ngaich kavalhötvö min anga-aṅ nö ikūö ngam tötöh tameūiyö.

21 Ngaich hēk Chū-ö meuk ök tufömngöre halīöngö hēk tufömngöre panam pön ngaich nö chuhngöre ök hötṙeh halīöngö hēk hötṙeh panam hēk chuhngöre inrē ngam mai. 2 Meuk ngam töhet elpanam Tufömngöre Yērūsalem Chū-ö inrē, ngam lamöktö el halīöngö nö ṙā-ang in ngam Tēv nö yônti nö lātaṙeū sā inlahen öp töhapīhö anga-aṅ kikānö nö hanyöötöre nö chö-öinyten ngam pīhöre kikōnyö. 3 Ngaich hēk Chū-ö hang ök töpōitô ṙënṙô lamöknyö el ngam kantēra nö ngö ṙô: “Yěh meuk! elhôi më tarik an ngam inrūkui ngam Tēv, iyöng in cha min anga-aṅ hēk tarik ò min cha-a. Hakôtenre min ngam Tēv nö in cha. 4 Ngaich chūtngö mak mat min anga-aṅ nö ṙā-ang i mat cha, öt ōtngöre min inrē ngam kinpaha, ötrēhěn mirivlōn, ötrēhěn pineūnyu hēk öt chanööku, ngaich nuk raneh inlahen nö chuhngöre.”

5 Ngaich ngam Tēv ngam amūichhak nö el kantēra nö ngö ṙô: “Yěh meuk! vī në taṙòkhöre chin nö tufömngöre.” Ngö ṙô inrē anga-aṅ: “Kūichngen në ṙô pò u nö tökanô-envö* hēk tökô-en inrē.” 6 Ngaich ngö ṙô hēk anga-aṅ nö in chu: “Ngaich nun në ṙô nö teungtökūö! Chū-ö chin Alfa hēk Omeka,* ngam tö ngö manah, chū-ö chin ranehlö hēk manā-aṅ inrē. Yěn ōt min tö haṙëhe nômö ngaich ha-òkö ò min Chū-ö tö aṅ ngam tö hëmlö mak nômö nöng öt ṙāiyu.* 7 Yěn ōt min tö minhôiṅ, amīnu min anga-aṅ tö në taṙòkhöre chehen, Tēv ò min chū-ö hēk kūön chu min anga-aṅ. 8 Ngòh tö vöö pöri, töt ṙamatö-ellōnre, töthet hēk töla-evṙen tö minë sin-òkkūö la-en, famëlhang, chamô-òṅkānö,* tö milūönö, töng iṙūöhen nö vë-ekūö insātēv, tö minyôiny-aṅ, ṙòkhöre min cha-a nö kavalhötvö nö ikūö öp töhūkūö tötöh* tameūiyö. Ngam manah e nö innëtö kinpaha.”

9 Ngaich yik tö sat tak ma-ahānga yik tö aṅhavin tö nuk tö sat töchilū tö tööḵlö aṅ tö minë tö sat manā-aṅ ötinkôlò, in cha ök tö hěngtak ma-ahānga yamihtöre nö in chu nö ngö ṙô: “Ih man, töich hameukhömat meh tö ngam töhapīhö kikānö ngam pīhö ngam Kun Sīṅp.” 10 Ngaich löktö i minhôiṅyö ngam töhet kumlēḵ anga-aṅ nö kēngen chu nö in öp tökiröng hēk tömarô-òlkui rôngö ngaich hameukhömat chu anga-aṅ tö ngam töhet elpanam Yērūsalem ngam lömöktö el halīöngö nö ṙā-ang in ngam Tēv nö yônti nö chuh lātaṙeū, 11 hēk tö tööḵlö tö ngam kanôlò ngam Tēv. Sā pinngāyö töpōṙāi ihong angū-ö sā pinngāyö öp yaspör ihong nö sehngöre nö sā tinmël. 12 Kiröng hēk marô-òlkui takô nuk tananglö e hēk 12 ṙôken nuk kūö inkūp e, 12 tak yik ma-ahānga nö ikūö nuk inkūp ngaich kūichi minë-eny minë tö 12 miyööngö Israel nö ikūö nuk inkūp. 13 Lūöi nuk inkūp lā chūhöt, lūöi nuk inkūp lā kapā, lūöi nuk inkūp lā lòhngö hēk lūöi inrē nuk inkūp lā sūng. 14 Ngaich ngam kinlonglö ngam elpanam nö sökhak angū-ö nö in nuk tö 12 ihong rööntö machööḵlö ngaich kūichi nuk minë-eny yik tö 12 tak tanīnöṙô ngam Kun Sīṅp nö in nuk ihong.

15 Ngam ma-ahānga vamë-ekūö chu, aṅhav eltī anga-aṅ tö ök sunna tafūyu nö kinlah ṙôkö ngam elpanam tö minë inkūp e hēk töm tanang e. 16 Fën mirëṙö ngam elpanam ngaich ök rôta e nö sā ṙôktāk e, ngaich aṅhtī tö ngam tafūyu anga-aṅ nö kalah ṙôkö ngam elpanam, lohten angū-ö nö meūkö nö 2,220 kilōmitör,* hěngren ṙôken nuk ṙôkö e, ṙôktāk e hēk rô-òlkui e inrē. 17 Kalah ngam tananglö anga-aṅ nö asā ṙôkö kinlaha tarik, hěnghöre sā ṙôkö kinlah ma-ahānga nö 144 sumkôngö kël.* 18 Tö vī-i nuk tananglö e nö löktö i yaspör ihong ngaich ngam elpanam nö sā öp sunna töt kintēhěvö hēk sā sanehngöre tinmël. 19 Hanyöötö ngam rööntö machööḵlö ngam tananglö ngam elpanam tö minë töṙōlkangen töpōiṙāi ihong, yaspör ök raneh ihong rööntö machööḵlö, safir ök innëtö; kālsitōni ök linūöiyö, emeröl ök finënö, 20 satônik ök tinneūiyö, satīös ök tinfūölö,* krisolit ök sinātö, pēril ök hinëvhöre, tôpa ök minchūötöre, krisòprasi ök sinömö, yāsin ök kinhuksīönö, ametis ök innët sīönö. 21 Ngaich nuk tö 12 inkūp e nö 12 nuk töpōiṙāi ihong e,* kö hěng minë inkūp nö vī-i tö tasëhe ngaich ngam talöökö ngam elpanam nö sunna töt kintēhěvö hēk sā mineūkö tö sehngöre tinmël.

22 Öt maheūku chū-ö tö chūök vinë-ekūötēv nö in ngam elpanam, pön höng ngam Tēv Yāvē* Tökalēḵkūö Tökalēḵ nöng anga-aṅ chūök vinë-ekūötēv hēk Kun Sīṅp ò inrē. 23 Öt lōnu ngam elpanam tö tavūöi hēk yanāngö mat ngam chingëṅt, pön höng löktö in ngam kanôlò ngam Tēv ngam yanāngö e ngaich ëāṅvö e ngam Kun Sīṅp. 24 Ngaich më taṙòkhöre pumnāmö nö lök el ngam yanāngö e ngaich më rācha ngih panam nö kētö nup kanôlòre nö el e. 25 Öt öpikūö min ngam inkūp ngam elpanam tö sakāmö, ötrēhěn min nö hatöömu nö umuh. 26 Ngaich cha-a min nö kēten nup kanôlò yip pumnāmö tarik hēk ineū-eu nö el ngam elpanam. 27 Öt halönghötvö pöri min nö kuhēthötre nö el ngam elpanam, nup töthet chehen hēk yip töla-evṙen tö nup sin-òkkūö la-en hēk yip tö michīl, höng cha-a pöri min kumhēthötre yip tökūichi minë-eny nö imat ngam līpöre nômö* ngam Kun Sīṅp.

22 Ngaich hameukhömat chu anga-aṅ tö öp tahël mak nômö, öp tö sā sanehngöre tinmël nö angāya hēk tö hëmnyi nö löknyö el ngam kantēra ngam Tēv hēk tö ngam Kun Sīṅp. 2 Hëmnyi ngih tahël nö ellōn öp talöökö ngam elpanam. Nët lā ngam chōn nômö nö i taseū ngam tahël ngam tö 12 heuh nö kētö ṙòngre el tö hěng samyeūheu, tö ngö manah, kaheuk chumngëṅtö nö ṙôngu. Lööken tī minë rōi u tö nup invah yip pumnāmö tarik.

3 Ngaich öt ōtngöre hēk min ngam rinūtngövah nö umuh. Ngam kantēra ngam Tēv hēk kantēra ngam Kun Sīṅp pöri min më-el ngam elpanam ngaich yip mahalanṙen ngam Tēv min nö la-evṙen tö nup töhet la-en ò, 4 meuk arëkūö ò min cha-a hēk i māl cha inrē min ngam minë-eny ò nö kūichi. 5 Ngaich öt ōtngöre min ngam hatööm hēk öt lōnu min cha-a tö ëāṅvö hēk yanāngö mat ngam tavūöi, pò ngam Tēv Yāvē* min nö kētö yanāngöre nö ikui cha ngaich örheūheu min cha-a nö rācha nö hayöng.

6 Ngö ṙô ngam ma-ahānga nö in chu: “Tökanô-envö* hēk tökô-en ön ngih ṙô, heūṅ, ngam Tēv Yāvē* ngam tamölṙô yik pròfět, tīntö ma-ahāngare anga-aṅ, hòṅ ò nö hameukhömat yip mahalanṙenre tö në ṙô tö hòṅ veutta yanīhi. 7 Yěh meuk! veutti yanīhi Chin min. Töṙamölōn öp anga-aṅ hamang në tö-eūka ṙô nö imat ngih tölöömö līpöre.”

8 Chū-ö Yôhan öich mameuk hēk hamang në ṙô. Hē chu ngaich öich meuk hēk hang në ṙô ngaich ngam ma-ahānga ngam mahameukhömat chu tö në taṙòkhöre ṙô ngaich afukngöre chū-ö iröön ò öich hòṅ ha-öinyö ò. 9 Ngö ṙô pöri anga-aṅ nö in chu: “Hö-ö, hö-ö, uh man ngatī inlahen! Höng töng sā meh chin chū-ö hēk töng sā yik holmaneuk meh yik pròfět öich tö hěngtak öich mahalanṙen, yik lamök in në ṙô tökūichi nö imat ngih tölöömö līpöre. Ha-öiny ngam Tēv man.”

10 Ngö ṙô inrē anga-aṅ nö in chu: “Un hapānikūö minë ṙô tö-eūka nö imat ngih tölöömö līpöre, tön röhta yanīhi an ngaich ngam tö halēniṙen ṙētak. 11 Ngòh tötlöökö la-en hökngen ò nöng iṙūöhen nö im ötlanöökö, ngòh tarik töchōichö tinrīken hökngen ò nöng iṙūöhen nö la-evṙen tö töchōich, ngòh tölöök pöri, iṙūöhen anga-aṅ nö la-evṙen tö minë tölöök la-en hēk ngòh töhet iṙūöhen anga-aṅ nö im hanëtö.

12 ‘Yěh meuk! veutta yanīhi chin, ngaich aṅhavin chū-ö tö ngam raneushö, ngam kinë-ekūö ngòh tö hěngtak min nö asā nup la-en ò. 13 Chū-ö chin Alfa hēk Omeka,* chū-ö Chin raneh hēk manā-aṅ, ranehlö hēk manāngen inrē. 14 Töṙamölōn yip cha-a, yip samöichlö inyutre, hòṅ cha nö teūngen tö chööngöre nö nyā ṙòng minë chōn nômö ngaich kuhēthötre cha-a nö ikūö inkūp ngam elpanam. 15 Lā-uk ngam elpanam pöri min nup am,* yip tö milūönö, yip chamô-òṅkānö,* famëlhang, vamë-ekūö insātēv, tö minyôiny-aṅ hēk tö hāngen inrē tö minyôiny.’

16 ‘Chū-ö Yēsū tamīntö ma-ahāngare öich vë-eny nang meh tö në ṙô, hòṅ minë māṅ nö yöölen. Chū-ö chin ṙěh hēk kūön Tāvit hēk töyang öich taneūsömat ngam peuheū.’”

17 Hēk höng iṙūöhö ṙô ngam töhet kumlēḵ hēk tö ngam töhapīhö kikānö nö ngö ṙô, “Ta-ih!” hēk hökngen yip hamang inrē nö ngö ṙô, “Ta-ih!” ngaich ngòh tö haṙëhe nômö yihtöre anga-aṅ, yěn ōt tö lōnu hökngen ò nö kēḵ ngam mak nômö nöng ötṙāyu tī.

18 “Kö vë-eny nang yip tarik chū-ö yip hamang në ṙô tö-eūka nö imat në tölöömö līpöre, yěn tarīku ṙamūöhtö hol në ṙô ngaich kētö ngam ötinkôlò min ngam Tēv nö ikui ò, ngam tö kūichi nö imat ngih tölöömö līpöre. 19 Ngaich yěn ōt kamënyen minë ṙô tö-eūka nö imat ngih tölöömö līpöre ngaich öt kē-ěkūö ò min ngam Tēv tö minë tölöök ṙô tö kūichi nö imat ngih tölöömö līpöre tö ngö manah, öt teūngen min anga-aṅ nö nyā minë ṙòng ngam chōn nômö hēk öt kuhēthötre nö el ngam töhet elpanam.

20 Ngam vamënyen në ṙô, ngö ṙô anga-aṅ: ‘Heūṅ, veutta yanīhi chin min.’”

“Āmen! Ta-ih, Mā Yēsū.”

21 Örheūheu an yēḵ ngam tökiröng miṙēḵlōn ngam Mā Yēsū nö ikui yip töhet tarik.