Kūöyòh öi hòṅ hakūötökūö re ngëichkö ṙô ngam Töhet līpöre?
Ngach öm me-eṅ akahakūö töm Töhet līpöre? Töt insā-av ön nö līpöre, töt insā-av ṙôken kintānö hēk kintölngö inrē. Teūngen tarik tö hanöhlöre nö inup kanihngenre yĕn vë-ekūö e, teūngen inrē tö maheūṅkköre nö lökten im tölöök inhānga aṅ mat e. Yanöölen hī nun inrē minë tölöök inlēnö aṅ mat e. Öt ṙòkhöre in akahakūö tö ṙô ngam Töhet līpöre, tö pòrô öm ṙamātö ellōn re im Tēv hēk töt ṙamātö ellōn re, söönen öm hòṅ mikahtökūöre tö nup aṅ mat e. Angū-ö lökten vinī-i ön ngih kun līpöre nö mahayööken meh öm mikahtökūö re tö ṙô ngam Töhet līpöre.
URĒHĔKŪÖ meh pöri rultenre vë-ekūö ngam Töhet līpöre, sööḵ man yĕm urĕh mikahtökūö re töm inlahen vinī-i e, töm ṙôken e inrē. Tafūöl anāi tafūöl ṙôken nun nö ṙòkhöre, yĕm kaheūkö u öm löktökūö im Ranehlö söl im Inmeukhömat.
Achiö öp minë-eny öp kamūich ngam Töhet līpöre? Tövai ön ngih nö intöönö. Kô-en yik tarik nö 40 ṙôken tumtak misī kamūich ngam töhet līpöre nö kö i mihëṙöre nö pōyen tö tö 1,600 samyeūheu rò-òtötī. Öt hĕng tak pöri in cha vamë-eny re nö chā-a kamūichö e. Kò-òren in hang ṙô ök ihih tö hĕngtak aṅ in cha yik kamūichö e tö ngö ṙô: “Ṙòkhöre nun në töhet līpöre nö tö uhômhötvö nö ellōn tö ngam Tēv.” (2 Timòtī 3:16) Ngatī ṙô inrē ök ihih tahëng hol cha kamūich nö ngö ṙô: “In chu ṙô ngam Fanöinylö ngam Mā Tēv, i rōi litāk chu inrē ngam ṙô ò.” (2 Samuĕl 23:2) Kūö ṙô minā tö nët tak in kamūich öi akahalōn tö ngam Tēv Yāvē, tö ò nö anga-aṅ kamūichö e. Lōnu an inrē tö taṙòkhöre tarik nö ṙūöhtöre nö in ò.
Ngih ön inrē töt ṙanāngen tö hòṅ mikahkūö meh, ngam chöö-öny kinūichö ngam Töhet līpöre. Asuh öp angū-ö chöö-öny kinūichö ngam Töhet līpöre? Höng hĕng ön ngam chöö-öny kinūichö e: Ngam kuilōn ngam Tēv Yāvē min nö ahetlö ngam minë-eny re nö löktö im pūlngö re tī, hĕnghöre hameuktöre inrē anga-aṅ tö Ò nöng anga-aṅ töng hĕng tak tökô nö hayöng. I mat ngih kun līpöre in min öi meuk inlahen ngam chöö-öny kuilōn ngam Tēv ngam tö hameuknyu tö ò nö imat ngam līpöre Ranehlö söl im Inmeukhömat.
Tā-a chĕi töi hol mat re öi ngëichkö ngam tölöök inhānga, ngam lumnöörö hī i mat ngam Töhet līpöre.
a Hameuktu kinūichö nun minë ṙētak nö imat ngih kun līpöre. Sā ngam S.M. nö vamënyen ngam “Sakāmö ngam Mā” ngach ngam U.S.M. nö vamënyen ngam “Urēhĕkūö Sakāmö ngam Mā.” Hameuknyu nun nö i mat minë lataṙeū mufëhë ngih kun līpöre.