MIRŪLÖ 11
Tö Uhômhötvö Tinköökö Kamëtö Inṙamkölōn hēk Inköphöti
Kūich tinköökö ang Tāvit tö yik tahëng inrē hol ò nö chöö-öny tö nöönyö ngam Tēv. In u anu-ö minë tö 150 tö kūichi nö imat ngam līpöre Salmai
NGAM līpöre Salmai an tökiröngkūö minë līpöre i mat ngam Töhet līpöre nö ṙòkhöre. Chuh i tö 1,000 samyeūheu ṙô-òtö tī më kamūich minë tinköökö. Tö-aṙū-uti manah nun hēk mahameuktö ṙinātö ellōn më kamūich, nö tö lökngöre tī tö ellōn hī yĕi vë-ekūö u, öt tö ōtngörevö tö ngatī kinūichö. Kūichö anū-ö nö mahameuknyö nup töpōiti mufē el kuilōn tarik, tö sā në ṙanāmölōn, inrōyö, nöönyö ngam kamë-eti söl im vinënyö minë linkukngö kūö miṙivlōn, anū-unglōn hēk inlööktit re inrē. In u mikahlōn ayī-ö tö më kamūich ngam Salmai nö tö pōyen ṙinātö ellōn, hēk töröhta inrē nö im Tēv. Tā-a chĕi töi chumkūöṙen ngëichkö minë tö kūichö tinköökö aṅ mat ngam līpöre Salmai.
Höng Yāve an tökô-en nö Mā, nö tö hòṅ vë-evkūö hēk ha-ööinyö inrē. Ngö ṙô an ngam tö vë-evkūö im Salmai 83:18 nö vënyö kanô-en ngam Tēv “höng Me-eṅ, öm tö minënyu tö Yāvē: lamātulöng tö në panam nö ṙòkhöre.” Pōyen nup Salmai maharōyö Yāvē tö kūö nup vahīlö ò, tö sā ngam halīöngö nö tööḵlö tö minë taneūsömat, minë pinngangkūö tö unhômuvö i kui ngih panam, tö ngam pinngangkūö inrē vinīlö ngòh tarik. (Salmai 8, 19, 139, 148) Ōt nup tahëng kamëtö nöönyö ngam Tēv Yāvē nö vinënyö ò nö ṙama-any hēk lamaklö yip töchiplen nö i kūö ò. (Salmai 18, 97, 138) Sön hēk nö ōt inrōilö ò nö Tēv kamhôka, kamëtö hanöhlö yip tarik tö hakihtuṙen inrē ngach kētö sācha yip tötlöök.—Salmai 11, 68, 146.
Haṙamkölōn hēk hayööken yip tö hāngenlōn an ngam Tēv Yāvē tö re. Vāklö kanöpölōn in tö ngam Salmai tö 23 mirūlö, pön in e ang Tāvit nö vënyen ngam Tēv Yāvē nö tö hāngenlōn nö yōm sīṅp, nö mahachōkūö, lamakhöl hēk tö miṙūötṙen tö minë sīṅp re. Im Salmai tö 65:2 më vamë-eṅkūö ò nö fēḵlöngö tö ngam Tēv Yāvē nö “hamang vinë-eṅkūö re.” Teūngen in tö hanöhlöre i mat ngam 39 mirūlö töm 51 mirūlö Salmai, yēḵ hī fukngö i nup tökiröng fālen, pön in u anū-ö mirūlö ang Tāvit nö vë-eny ngam tö lakukikūö miṙivlōn re tö nuk tökööl kahëken ò, hameukten ngam Tēv Yāvē anga-aṅ nö ma-aṙēlö tökööl yip tökô-en nö haṙivlōn tö tökööl re. Haköpten hī ngam Salmai tö 55:22 öi hayönglen re in Yāvē hĕnghöre pehtö nup taṙòkhöre lumngan re öi in ò.
Halööktit ngih panam an min ngam Tēv Yāvē nö lökten im pūlngö Kristū. Pōyen nun minë i kaha ngam Salmai tö ngāṅlnyi ṙô nö eūken Kristū, ngam yamih rācha. Vë-nyu anga-aṅ im Salmai tö 2 mirūlö min nö pumyāigö yip tötlöök pumnāmö tarik, yip chamôhòlre nö la-al ò. Im Salmai tö 72 mirūlö vinënyö ngam rācha min nö keuheutngen në inyāichö, inkihten hēk innāchngen inrē. Vë-nyu në kinyūngö min nö ṙāngöre nö lökten im pūlngö Kristū sā ṙô ngam Salmai 46:9. Im Salmai 37, vënyu nang ayī-ö tö yip tötlöök tarik min nö röökiṙen, ngach yip tölöök tarik pöri min nö amīnu tö ngih panam nö chūök cha nö örheūheu nö iyöng, ngach kumchikngenre min cha-a ip lanāmö töpōyen.
—Lökngörit im līpöre Salmai.