Tö Akāha Rācha hēk Töt Akāha Rācha

UNÔICHRIT inlahen Sòlòmön nö havööngökūöre töm tökô-en vinë-eṅkūö ngam Tēv, michö-ö ngach ngam panam Israel sā ṙô ngam Tēv Yāvē. Ngach ök kūön ò Rēhōpoām ök amūich ök anūichö ò nö rācha nö tö kësen. Angū-ö lökten yik tösöm miyööngö Israel nö choholre nö lā-al ò, ngach vīlö ök lā kapā pūlngö Israel. Nët pöri nuk miyööngö lā lòhngö, mahaköpngöre nö elkatòh ök inyööngö tök rācha amūichhak nö el ök kantēra Tāvit i Yērusalem, ngam pūlngö ‘Yūta’ tö ṙô.

Nët re minë pūlngö nöng ötlanāmu, pò u nöng pōi tinṙōlen, kūö töt ṙinātö ellōn hēk öt hinang chööngö ngam Tēv tö yik rācha. Huhöichngen kanihngen ngam pūlngö Israel lā kapā tö ngam pūlngö Yūta ngam aṅ lā lòhngö, kūö më rācha nö ve-ekūö insātēv nö löktö kūö ik raneh. Pòrò nuk pinngangkūö la-en yik pròfĕt tö sā nā Elaicha nā Ĕlaisa nö uroh chā-a nö ha-aṅlö tökapah söönen më Israel nö öt havööngö kūö re nö i minë tötlēn la-en re. Lökten ngach ngam Tēv Yāvē nö kētö ngam lā kapā pūlngö, nö piyāyi tö yik aṅ Asīriā.

Ĕhten rô-òten ök inyööngö tö Yūta tök inyööngö tö Israel, sön pöri Yūta nö unôichngöre nö kētu sācha tö ngam Tēv. Höng haroh tum tak yik rācha aṅ Yūta hamang nuk finëḵlöre tö yik pròfĕt ngam Tēv Yāvē, ngach ṙūölö alaha yik tarik inrē nö im tökô-en vinë-eṅkūö ngam Tēv. Yôsiā ök rācha inchō elmat hī ök ramulten re nö lāplö ngam elpanam Yūtā tö nup insātēv, ngach havanlö minānlö nuk töhet chūök vinë-eṅkūötēv. Hē e nö kôti ök līpöre chööngö ngam Tēv kahūich Môsös, lökngöre ellōn ngach Yôsiā nö hang ṙô e, lökten ò nö rūöhöl alaha re nö im inlööktit ngam pūlngö re.

Miṙivlōn ön, tö kūö inlahen yik rācha mu-unôichrit Yôsiā nö öt asīnkö nuk tölöök la-en ò. Lökten ngam Tēv nö halēnlen Pēpilön nö pumyāingö ngam elpanam Yērusalem, tö nup töhet chūök vinë-eṅkūötēv inrē nö ṙòkhöre. Yik töt kô-òngvah pöri, ngach kē-ĕ chā-a nö chuh Pēpilön nö haköövö. Tö urĕhngöre ineūka an ngam inlahen yik tö kē-ĕ nö haköövö, nö 70 samyeūheu rô-òten min nö i Pēpilön. Öt aṅhavkūö ngam panam Yūta in u anū-ö ṙētak, hanöng saha invānö cha nö im panam.

Ngach pöri nö öt tö hēkuvö rācha amūich el kantēra Tāvit hanöng sāha yanīhi ngam tö kilē-ĕyö Ṙama-any, ngam Mesayā. Löktö i nuk tötlēn lā-en re yik rācha amūich el kantēra Tāvit i Yērusalem nö inmeuktö ngòh tarik nö ötkô nö hayöng. Höng Mesayā min tökô nö hayöng. Lökten ngam Tēv Yāvē nö ngö rô tök manā-aṅ rācha: “Kēngö ngam vanön kuire man, kēngö ngam sapīövre inrē. . . Hanöng saha yanīhih ò ngam tö rònglen nö aminten tö e kētö e chū-ö min inrē in ò.”—Isikīĕl 21:26, 27.

—Lökngörit im 1 Rācha; 2 Rācha; 2 Kinrötngö 10 mirūlö söl im 36; Yarimiā 25:8-11.