Tövai Nö Intöönö

In ngam panam chūök nā Mëri hēk töm pīhö ò Chôn,a nö iyöng, pōyen më tarik aṅ Filippāins chamöh la-enre hēk iyöng in e inrē. Ramölōn cha-a nö vë-eny nang më mi-iyöng in e töm tölöök inhānga. Im ṙētak ngam COVID-19 tölëlngökūö invah nö pōyen yik tökē-ě Paipöl istötī tö Mëri. Rö-ö pöri cha-a nöng mi-iyöng chūök cha yip tö istötīrö, pön keuheūtngöre pumnamö. Kūö yòh ang nö ngatī ṙôken taneūngen tö istötīre?

Pön hatön kūö më istötīre ṙung anga-aṅ nö ngöṙô, “Ōt hòng hēk mikahkūö meh tö hòṅ istötī ngam Paipöl?” Yěn heūṅ ngöṙô cha-a, ngaich ngöṙô anga-aṅ tölṙô ò öm chěi nö meuk kūö chu. Kô-en nö ṙòngu ngam tövai intöönö. Nö sitih inlahen? Pön yěn hěng tak min ngam istuten mahaköp ngam kanô-en, ngaich lōnu inrē min anga-aṅ nö vë-eny nang yip aṅpatī re hēk tö yip holre inrē. Töi ngëichken öp ṙòng ngih tövai intöönö hatön Mëri?

Ngam tö kē-ě istötī tö Mëri ang Chasmin nö hameuktö me tö fën tak anga-aṅ holre nö in ò. In cha ngam töhěng tak ang Kristīn töṙamölōn yěn haköp mat ngam Paipöl, lökten anga-aṅ nö tölṙô Mëri nö nët van i töhěng afta nö kēḵ istötī ò. Ik sā Mëri nö hatöönö ò nö ngöṙô ōt hòng hēk tö hòṅ haköp mat ngam Paipöl, ngöṙô ang Kristīn, “Heūṅ, hol chu yip muh, kumten cha chin min nö meukkūö meh.” In e ngaich angū-ö afta ang Kristīn nö kumtö më tö fën tak holre nö chu in Mëri. Unôichngöre hēk ang Kristīn nö mikahtökūö Mëri tö më tahëng holre. Ngaich më tahëng hēk hol ò nö mikahtökūö Mëri tö yip tahëng holre.

Aṅ im panam Filippāins ngam mikūönö Kristīn, ngaich lōnu anga-aṅ tö cha inrē nö haköpmat ngam Paipöl. Lökten ngaich anga-aṅ nö vë-ekūö ngam kūönre kikānö ang Antriā. Ngamuh pöri mufē Antriā, ‘Tö më Vamënyen Yāvē nöng tö harikngöre tinrīken, ötrēhěn cha-a nö ṙamatö-ellōnre nö in Yēsū hēk töng mahaköp mat ngam Hötreh Kinlēḵngô inrē.’ Ik sā ò pöri ngaich nö haköpmat ngam Paipöl, in e ngaich anga-aṅ nö akahaiṙen tö ngam mufē re nö vaich. Nup tufömngöre ṙung haköp ò, ngaich ngöṙô anga-aṅ, “Lööknyī ṙô pöri ngam Paipöl, ngaich hòṅ hangö u ayī-ö!”

In e angū-ö ṙētak ang Antriā nö vë-eny inlahen nak tö nët tak holre hēk tök yöngnyīö mi-im chūök ò nö la-evṙen, lūöi tak ngaich cha-a nö istötī ngam Paipöl. Ngaich ngam puā Antriā inrē, ang Enychělā tötmeūk anga-aṅ lökten anga-aṅ nöng in ò yěn istötī nö hangihtöṙe. Öt akahalōn pöri ang Mëri tö inlahen ò. Hěngheuh pöri ngaich anga-aṅ nö ṙò-ôvö nö in Antriā tö ò nö vë-ekūö Mëri nö kē istötī ò. Ṙamlōn ang Enychělā nö istötī. Im töng hěng chumgëṅtö ngaich anga-aṅ nö köplōn tö nup iskripchör aṅ mat Paipöl ngaich fën heuh anga-aṅ nö istötī i töhěng afta! Hayööken ò inrē ang Antriā nö mīting nö el vitiōkònfrēns.

Yěn kēḵ istötī Kristīn ṙung ang Mëri ngaich meuk inlahen ngam pīhö ò Chosuā anga-aṅ nöng havötngöre nö lā taseū cha, lökten ang Mëri nö hatönö ò, “Mihôiṅ man kò-òren ūichngöre hangihtöṙô ai yěm lōnu.” Ngöṙô ngaich ang Chosua, “mihôiṅ Chin uichngöre öich hang ṙô nā, uh pöri min an hatön kūö chu tö nup intöönö; yěn hatön min ngaich höng kirööngöre min Chū-ö.” Ik sā cha ngaich nö rultenre öl rēhěn angū-ö nö taneui minit, ngaich ang Chosuā nö hatön minë intöönö mööḵlö ṙô anga-aṅ nö hatön nup intöönö tö ngam pīhöre Kristīn lōnu inrē ngaich anga-aṅ töre nö hòṅ istötī.

Lökten im töng hěng intöönö ang Mëri nö pōyen taneūngen tö istötī re. Uròh inrē nö halēnlö më tahëng prötör sistör nö kē istötī më tahëng. Ngam ṙôken më tö istötīrö nö 28 nö in minë tö fën panam tö kö harīkngöre chūök.

In ngih ekspirīöns nö vënyu ngam raneh istötī Mëri ang Chasmin, nö kētöre nö vôkö ik Ĕprěl 2021. Ang Kristīn nö vôkö ik Mē 2022 ngaich havan nö chuh im mikūönö re nö im panam Filippāins. Minā tö nët tak inrē hameuktö Kristīn nö in Mëri, acha-a inrē ngaich kamë ngam vinôkö. Unôichngöre hēk ang Enychělā nö kē ngam vinôkö, ngaich an inrē töngamuh nö keuheūttö ṙētakre nö im la-en painīör. Ōtre pöri më tahëng istötī Mëri tö ṙönghöichṙen nö istötī hēk ṙūöhlö ngam hanangenlōre inrē tö Yāvē.

Yěn hang ngam tölöök inhānga misī yik tarik ik raneh senchūri, ngaich öthöng in re tī cha-a pön vë-eny nang yip aṅpāti re hēk tö yip holre inrē. (Yôh. 1:41, 42a; Inl. 10:24, 27, 48; 16:25-33) Mihôiṅ man inrē më-eṅ öm hatön kūö öp Paipöl istuten re tö yip tö hòṅ lōnu inrē nö haköp mat ngam Paipöl, öm ngöṙô “Ōt hòng hēk mikahkūö meh tö hòṅ lōnu nö haköp mat ngam Paipöl?” Öt löktu min öm öt pōyen taneūngen tö istötī re öm lökten in ngih töng hěng intöönö?