TÖHAKÖÖPÖ ĀTIKÖL 11
TINKÖÖKÖ 129 Höng Hòṅ Köp In
Iṙūöhen Öm Löklōn Yāvē Pòrô Öm Haṙivlōn
“Kūö ngam mine-eny chu öm ṙāpa, ngaich öm höng öt ṙeingö.”—INM. 2:3.
ASUH ÖP MIN HAKÖPLÖ HĪ
Mihôiṅ in iṙūöhen löklōn Yāvē pòrô öi hēṙu haṙivlōn tö kūö nup vanaichöre hēk tökūö nup vanaichö yip tahëng inrē.
1. Asuh nup inkòlô hī el ngam söngkötön Yāvē?
NGAICH töngamuh në ötlanöökö nö ṙūöhlöre ròken ing manā-aṅ sakāmö. Ṙamölōn pöri ayī-ö kūö hī alaha ngam söngkötön Yāvē. Kē-ěkūö hī ang Yāvē tö më prötör sistör el ngam māṅ nö mikūönö hī nö tö īnu tö ngam tökô-en hanangenlōn hēk tö ngam hinëngö. (Sal. 133:1) Haköptu inrē ayī-ö tö inlahen ngam inpīhö kikōnyö, inpīhö kikānö hēk tö më nyīö nö sitih inlahen nö ṙamölōn. (Efi. 5:33–6:1) Rö-ö nöng angū-ö pön kē-ěkūö hī inrē anga-aṅ tö ngam mikah hēk mikah elmat öi sitih inlahen lā-al minë pinrūtö lōnre hēk īnu inrē tö ngam ṙanamlōn.
2. Hòṅ asuh nup inlahen hī yěi hòṅ iṙūöhen i linökö lōn Yāvē hēk kūö yòh?
2 Pōyen nun minë inkòlô hī el ngam söngkötön Yāvē, sön pöri ayī-ö hòṅ ma-ainyre i linökö lōn Yāvē. Kūö yòh? Kūö hī mihôiṅ haṙivlōn tö kūö ṙô yip tahëng hēk nup inlahen cha inrē nö in hī. Lohten öi kūö ngam ötkumlēḵ-enre öi ṙolheuh vaichköreṙen hēk haṙivlōn inrē. Mikahtökūöre in min in ngih ātiköl tö inlahen meh (1) Yěm haṙivlōn tö tī yip prötör sistör, (2) Yěm haṙivlōn tö tī öp pīhöre hēk (3) Yěm haṙivlōn tö kūö nup vanaichöre ngaich sön më-eṅ öm sitih inlahen iṙūöhen i linökö lōn Yāvē hēk chiplö inrē. Haköp inlahen yip tö lūöi tak in min tarik ngam Tēv tö chiplö hēk mikahtökūöre inrē min ayī-ö tö nup inlahen cha nö lā-al nup kanihngenre.
YĔM HAṘIVLŌN TÖ TĪ YIP PRÖTÖR SISTÖR
3. Asuh nup mihôiṅ yamih kanihngen lākūö më tarik Yāvē?
3 Kanihngen. Kö harīkngöre tinrīken yin më prötör sistör el ngam māṅ. Mihôiṅ pöri öi öt ööire hēk haṙivlōn tö kūö nup tinrīken yip prötör sistör. Lohten inrē öi meuk öp töhěng tak minṙöinylen el ngam māṅ nö vaichköreṙen, ngaich mihôiṅ öi haṙivlōn meuk inlahen ò. Ngö mufē lohten yip rīkre nö meukö u, ‘tötkô nun në öreh nö ngatī inlahen nö el ngam söngkötön Yāvē.’ Mihôiṅ inrē min cha-a nö ṙūöhngöre tö më prötör sistör nöng öt holṙen cha nö la-evṙen i linökö lōn ngam Yāvē hēk ṙāngenre inrē min nö yihtökūö nö el mīting. (Sef. 3:9) Tö löng hòng angū-ö nö inlahen hī? Ngatī inlahen kanihngen ök i misī tarik ngam Tēv. Ta-a töi ngëichkö öp haköplöre in ò.
4. Asuh nuk kanihngen Pôl?
4 Inchōḵelmat. Haṙivlōn ök inrē misī Pôl tö tī yik holmaneukre. Ik sā ò nö vītöre nö Kristīön sönngenre më holmaneuk ò nö öt ṙātö-ellōnre tö ò nö ngaich nö mahaköp nö in Yēsū. (Inl. 9:26) Unôichrit e inrē yik rīkre holmaneuk ò nöng vë-eng nang ò hēk ma-ainyre nö ötlēkôre tö elnang ò. (2 Kòr. 10:10) Ngaich kôtökūö hēk ang Pôl tö fālen ngam tö hěngtak minṙöinylen, ngam lökngen më töpōyen öreh Kristīön nö kavē-ěre nö i linökö lōn Yāvē. (Kal. 2:11, 12) Rö-ö nöng angū-ö pön haṙivlōn inrē ang Pôl tö tī ngam holre Mākös. (Inl. 15:37, 38) Mihôiṅ öreh ang Pôl nö ṙūöhngöre tö më holmaneukre, hö-ö pöri anga-aṅ nö ngatī inlahen, pön akahakūö tö cha nö töthet. Havai ngam mufē re pöri anga-aṅ nö in më holmaneukre, ngaich iṙūöhen nö i linökö lōn Yāvē. Sitih inlahen pöri anga-aṅ nö teungten nö ngatī inlahen?
5. Kūö yòh ök Pôl nö teungten nö aṙēlen yik holmaneukre? (Kòlòsi 3:13, 14) (Ngëichkö ngam nyat.)
5 Kirööngen hanangenlōn ang Pôl tö yik holmaneukre. Lökten anga-aṅ nö öt ngëichkö minë ötkumlēḵ-en cha, chumkūöṙen pöri nö ngëichkö minë tövai tinrīken cha. Kūö ngam tökiröng hanangenlōnre inrē anga-aṅ nö teungten nö aṙēlen cha, sā inlahen ò nö kētö inlēnö yik Kristīön in ngam (Vë-evkūö) Kòlòsi 3:13, 14. Töi chumkūöṙen tö ngam inlahen ò nö in Mākös. In ök raneh misnöri re ang Pôl nö hōlu tö Mākös, höng ṙā-ai pöri anga-aṅ tö ngam holre. Angū-ö ngaich lāinyngen Pôl nö haṙivlōn. Unôichrit e pöri ik sā ò ngaich nö kūich chitrī ök māṅ i Kòlòsi, ngaich eū-eu Mākös anga-aṅ nö in e nö ngö ṙô hamòlṙen chu an nö ‘kamëtö inreuskö alaha’ chu. (Kòl. 4:10, 11) Unôich ngöre hēk ang Pôl nö haköövö nö i Rōm, ngaich havëken Mākös anga-aṅ nö hayööken ò. (2 Tim. 4:11) In e mikahkūö ayī-ö tö Pôl nö aṙēlen më holmaneukre më tö haṙivlōn tī tö ò. Asuh öp haköplö hī mihôiṅ in Pôl?
Līn ang Pôl nö in nā Parnapas nā Makös, hö-ö pöri nöng köp ngam lanīnö ò, lökten anga-aṅ nö holtö ṙanamlōnre hek nö holṙen makös nö la-evṙen (Ngëichköm perekrāf 5)
6-7. Sitih inlahen öi mihôiṅ hameuktö ngam hanangenlōnre in më prötör sistör re pòrô nö ōt minë vanaichö cha? (1 Yôhan 4:7)
6 Haköplö hī. Lōnu ang Yāvē tö hī hangenlōn tö më prötör sistör re, pòrô öi kihngen ngatī inlahen. (Vë-evkūö 1 Yôhan 4:7.) Yēḵ öp prötör hēk sistör nö öt vāyö inlahen nö in hī, ngaich ötkô ayī-ö ngö mufē tö cha nöng tölngenre. Pöi hòṅ köpölōn tö cha inrē nö ma-ainyre nö hang minë chööngö kahëtö Yāvē hēk öt tölngenre nö miṙivngö lōn hī. (Inch. 12:18) Akahakūö an Yāvē tö minë ötkumlēḵ-en më tarik re, sön pöri anga-aṅ nö hangenlōn tö cha. Yěn ōt nup vanaichköreṙen hī ngaich öthō min anga-aṅ nö līn nö in hī, ötṙēhěn inrē anga-aṅ nö ṙāngenre nö hanôlö hī. (Sal. 103:9) Ta-a chěi töi asīnkö inlahen ngam yöngre Yāvē öi aṙēḵlö yip tahëng.—Efi. 4:32–5:1.
7 Köpölōn tö inlahen ngam manā-aṅ sakāmö nö röhta yanīhi, ngaich ngatī inlahen ayī-ö hòṅ haröhtöre in më prötör sistör re. Pōyen nun min minë kanihngen hī in minë yamih ṙētak. Kūö ngam ṙinātö-ellōnre lohten min öi chaphötvö el chēl. Ngaich hē-e min më prötör sistör nö hayööken hī. (Inch. 17:17) Töi ngëichkö inlahen prötör Chūsěp,a minṙöinylen an nö mī-iyöng Ispēn. Sō anga-aṅ hēk tö yik rīkre prötör nö kētöre nö im kinyūngö, lökten cha-a nö chaphötvö nö el chēl. Ngö ṙô anga-aṅ, “Öt heuveū inlahen ihö kūö ngam chūök ih el ngam chēl nöng kūönti. Ṙolheuh ihö līplö in höö hēk ötlēḵkô re inrē tö höö. Unôichngöre pöri ngaich ihö aṙēlen höö. Lökten nö köp ngam hanangenlōn nö ihôi ih hēk töm hinëngö inrē. Laklen më prötör re inrē ihö tö më tahëng aṅ el ngam chēl. Hěngheuh chūö öich öt heuveū inlahen kūö ngam kël chu nö laköl. Hayööken chu hē-e ök tö hěngtak prötör. Söich chëhen chu anga-aṅ hēk hayööken chu inrē in nup tahëng la-en. Öt vaichngö chin tö minë tī ò nö hayööken chu.” Angū-ö ön ngih ṙētak hī töngamuh öi halāmtöre in höö hēk kö aṙēlen höö inrē.
YĔM HAṘIVLŌN TÖ TĪ ÖP PĪHÖRE
8. Asuh nup mihôiṅ kanihngen minā pamīhöre?
8 Kanihngen hī. Ōt nun mihôiṅ minë kanihngen yamih nö in mina pamīhöre. Ngö ṙô an ngam Paipöl tö cha min nö ‘kihngen nö im alaha.’ (1 Kòr. 7:28) Pô cha nö nëtre tak nö töthet hēk öthěngren minë ööi lōn cha, kö harikngöre inrē minë mufē cha. Kūö cha inrē lohten nö kö tahëngö löktö inruklö. Lohten inrē cha-a nö unôichngöre nö meuk nup vanaichö höö im rò-òten cha nö pīhöre. Angū-ö mihôiṅ lāinyngen cha nö kihngen. Yēḵ u nö ngatī, ngaich hòṅ ngëichkö minë vanaichöre cha-a nö hěngtak hēk holṙenre nö lā-al minë kanihngenre. Ōtre pöri yip pamīhöre töng ngamëichkö fālen höö hēk sūöchken höö inrē. Mihôiṅ cha-a nö ngö lōn töre nöng ěhten nö ṙāngen höö. Angū-ö hòng ngih inlahen tī cha nö kēngen minë kanihngenre?b Ta-a töi chumkūöṙen min öi ngëichkö inlahen öp i tö chiplö yöngnyīö lamöklōn ngam Tēv. Haköplu in min öi in ò tö inlahen më pamīhöre nö mihôiṅ nö köp nö löklōn Yāvē pòrô nö ōt minë kanihngen cha.
9. Asuh nup kanihngen Apīkēl?
9 Inchōḵelmat. Nēpòl ök minë-eny ök pīhö Apīkēl, vënyu nang in töm Paipöl tö ò nö tötakaha nö tarik hēk töt vayö inlahen inrē nö in yip tahëng. (1 Sa. 25:3) Lohten nö kihngen ang Apīkēl nö pīhövö tö ngam tö ngatī inlahen tarik. Fēkö ngam inlahenre hòng pökeh anga-aṅ nö hòṅ ṙāngen ò? Hěngheuh ang Nēpòl nö ötlēḵken Tāvit hēk tö yik tarik alaha ò, lökten ang Tāvit nö yīhi lanīplö ngaich hòṅ fëlngen ò. (1 Sa. 25:9-13) Hē-e öreh ang Apīkēl nö falngöre töm pīhöre hēk hökngen ò inrē nöng kapah tö tī Tāvit, hö-ö pöri anga-aṅ nö hökngen e nö ngatī. Pön chuh in Tāvit anga-aṅ nö havëkö inṙē-ěl ngam pīhöre. (1 Sa. 25:23-27) Kūö yòh ang Apīkēl nö ngatī inlahen?
10. Asuh öp inlahen Apīkēl nö hangön ngam inpīhö töre?
10 Hangenlōn ök Apīkēl tö Yāvē hēk töhet inrē ngam pinīhö nö imat ò. Pön lohten anga-aṅ nö akahakūö tö ngam kuilōn ngam Tēv ik sā ò nö hapīhö nā Atöm nā Ēva, ngaich lōnu anga-aṅ tö cha nö örheūheu nö köp nö in höö. (Ran. 2:24) Hòṅ haṙamlōn ngam Tēv ang Apīkēl. Lökten anga-aṅ nö laklö ngam mikūönöre hēk tö ngam pīhöre asā öp tölngö kanô-òṅ ò. Ilööṙen anga-aṅ nö chuh in Tāvit nö sōḵngen ò nö fëlngen Nēpòl hēk havëkö inṙē-ělre inrē pòrô nöng öt vanaichu. Kò-en ök Apīkēl nö töt pa-ekūö hēk öt höng ngëichkö nup yanöölenre inrē anga-aṅ. Lökten ang Yāvē nö hangenlōn tö ò. Asūp mihôiṅ haköplö ngam inpīhö kikōnyö hēk inpīhö kikānö nö in Apīkēl?
11. (a) Asūp lōn Yēvē nö in më pamīhöre? (Efisös 5:33) (b) Asuh öp inlahen sistör Karmen nö haköpken ngam pinīhö töre hēk asuh inrē öp haköplö hī mihôiṅ in ò? (Ngëichkö ngam nyat.)
11 Hököplö hī. Lōnu ang Yāvē tö minā pamīhöre nö milēḵṙen tö ngam pinīhö möthë yěn ötlööṙen cha-a nö ngatī inlahen. Yēḵ cha pöri nö holṙenre nö lā-al minë kanihngenre, hangenlōn inrē tö höö hēk milēḵṙen inrē, ngaich kirööngen ṙanamlōn ang Yāvē nö in cha yēḵ cha nö ngatī inlahen. (Vë-evkūö Efisös 5:33.) Töi ngëichkö ngih inchōḵelmat inlahen sistör Karmen. 6 samyeūheu rò-òten ngaich ngam pinīhö tö ò, ngaich unôichrit e anga-aṅ nö kētöre nö in më Vamënyen Yāvē nö haköp hēk kētöre inrē nö vōkö. Ngö ṙô anga-aṅ nö vë-eny, “Öt ööire ngam pīhö chu tö chu öich haköp. Līplö inrē anga-aṅ yěn meukö chu öich pōyen kahëti tö ṙētakre i linökö lōn Yāvē. Ötlēḵken chu anga-aṅ hēk havööken chu inrē töre nö hòṅ ṙāngen chu.” Sön pöri ang sistör Karmen nö haköpkö ngam pinīhö töre nö söl im tö 50 samyeūheu. Iṙūöhen anga-aṅ nö hangenlōn tö ngam pīhöre hēk milēḵṙen inrē tö ò. Ngö ṙô anga-aṅ, “Asā chanūhu ngam samyeūheu ngatī inlahen ngam mikah elmat chu nö ṙūöhölre. Ma-ainyre chū-ö hameuktö ngam hanangenlōnre tö ngam pīhöre. Köplōn inrē chū-ö tö ngam pinīhö nö töhet nö imat Yāvē hēk ma-ainyre chū-ö öich hangönken e. Hangenlōn chin tö Yāvē,c lökten öich öthěngheuh öich afēkö ngam inlahenre öich hòṅ ṙāngen ngam pīhöre.” Yěn ōt minë kanihngen meh nö in ngam pinīhö tö meh, ngaich ṙātö-ellōnre më-eṅ tö Yāvē min nö hayööken meh öm köptī tö ngam pinīhö.
Öp töng tölngö inlahen Apīkēl nö lāklö ngam mikūönöre ngaich ngatī inlahen anga-aṅ. Asūp haköplö hī mihôiṅ in ò? (Ngëichköm perekrāf 11)
YĔM HAṘIVLŌN TÖ KŪÖ NUP VANAICHÖRE
12. Asuh nup mihôiṅ kanihngen hī yěi kēken minë tökiröng fālen?
12 Kanihngen hī. Yēḵ hī kēken nup tö kiröng fālen, ngaich mihôiṅ ayī-ö haṙivlōn. Vënyu nang in tö ngam Paipöl tö ngòh tarik yěn kēken ngam tökööl ngaich mihôiṅ anga-aṅ nö ‘lakūki’ tö kūö ngam miṙivlōnre. (Sal. 51:17) Töi chumkūöṙen öi ngëichkö ngih inlahen prötör Ròpöt. Samyeūheuv rò-òten anga-aṅ nö mā-ainyre nö la-evṙen pön hòṅ kētöre nö im mahayööken töla-evṙen. Kēken ngam tökiröng fālen pöri ngaich anga-aṅ töp lökten ò nö ngölōn ngaich töre nöng hachīlö Yāvē. Ngö ṙô anga-aṅ, “Kihngen tī chū-ö tö ngam ellōnre kūö chu öich kēken ngam tökööl. Kalē-ě ṙô chū-ö öich peūnyhö kūö Yāvē öich vë-ekūötēv. Ngö lōn chū-ö tö Yāvē ngaich nö sōḵ nö hangṙô chu öich vë-ekūötēv kūö chu öich miṙivngö lōn ò.” Yēḵ hī min inrē ayī-ö kēken tökööl, ngaich mihôiṅ min ayī-ö ngö lōn töre öi höng öt yanööluṙen tī tö yip tahëng. Ngö ṙô lōn lohten inrē min ayī-ö tö hī ngaich ṙā-ai tö Yāvē hēk öt manahav inrē ngam inlahen hī öi löklōn ò. (Sal. 38:4) Yēḵ meh öm ngatī mufē, ngaich mihôiṅ min më-eṅ öm teūngen tö yanöölenre yěm chumkūöṙen tö inlahen öp i töhěngtak tarik ngam Tēv. Tö ngatī inlahen ök inrē anga-aṅ nö kēken ök tökiröng fālen, sön pöri anga-aṅ nö iṙūöhen nö löklōn Yāvē.
13. Asuh öp vanaichköre ṙen Pītör hēk asuh inrē nuk tökiröng fālen ò?
13 Inchōḵelmat. Pōyen nuk vanaichköreṙen Pītör ik hatööm urěhkūö kinpaha Yēsū. Ngam raneh vanaichö ò, tö ò nö yahlö ṙinātö-ellōn nö in re. Lökten anga-aṅ nö holtö minhôiyö ṙô re nö ngö ṙô nö in Yēsū, pòrô më tahëng mahaköp nö ṙāngen meh ötlöktu pöri chū-ö öich ṙāngen meh. (Māk. 14:27-29) Unôichrit e hēk ang Yēsū nö ngö ṙô nö in ò nö el ök panô-òṅ Kĕtsemenī nö hōten ò nö aṅhatī nö un haṙòh, ṙōlheuh anga-aṅ nöng haṙohlö. (Māk. 14:32, 37-41) Ngamuh hēk vanaichö ò pön falngöre anga-aṅ ik sā Yēsū nö kē-ě tö yik tömaṙôngö. (Māk. 14:50) Ngamuh pöri hēk tökiröng vanaichö ò pön lūöi heuh ṙô anga-aṅ nö mahngen Yēsū. Söl in ngam inlahen ò nö minyôinyaṅ töre nö öt akahakūö tö ò. (Māk. 14:66-71) Sitih inlahen pöri ngaich ang Pītör ik sā ò nö akahaiṙen tö ngam tökiröng vanaichöre? Peūiny anga-aṅ hēk lakūki takô ngam ellōn ò. (Māk. 14:72) Vai rò-angen kanta finēlngö ngaich ngam hol ò ang Yēsū, ngaich hē-e anga-aṅ nö fē-ělre tö minë tökiröng vanaichöre.
14. Kūö yòh ök Pītör nö öt ṙāngenre nö löklōn Yāvē pòrô nö vaichköre ṙen? (Ngëichkö ngam lamā-uk nyat.)
14 Pōyen nuk tökiröng vanaichköreṙen Pītör sön pöri anga-aṅ nö öt ṙāngenre nö i linökö lōn Yāvē. Kūö yòh? Pōyen nun minë lāinyngen ò. Tö sā ò nö ilööṙen nö chuh in më holre mahaköp unôichrit minë vanaichöre hēk vë-enynang cha anga-aṅ tö minë inlahenre. Ngaich lohten anga-aṅ nö kētu inreuskö alaha tö cha. (Lūk. 24:33) Unôichrit inlahen Yēsū nö ha-aṅlöng, ngaich chuh in Pītör anga-aṅ nö hareuskö alaha ò. (Lūk. 24:34; 1 Kòr. 15:5) Ik sā Yēsū inrē nö in yik haköptöre, öt hatāinyö Pītör anga-aṅ nö ikūö cha, pön kē-ěkūö ò hēk tö minë tökiröng la-en. (Yôh. 21:15-17) Löktö in u ngaich ang Pītör nö kiröngen ṙinātö-ellōn tö Yēsū nö ṙömöng hangenlōn tö ò hēk holṙen Pītör inrē më tahëng tanīnöṙô. Lökten ök Pītör nö öt heūlngöre pòrô nö vaichköreṙen, iṙūöhen pöri anga-aṅ nö löklōn Yāvē. Asuh öp mihôiṅ haköplö hī im inlahen Pītör?
Löktö in ngam Yôhan 21:15-17 öi akahakūö tö Yēsū nö aṙēlö minë vanāichö Pītör. Rūöhlö alaha Pītör anga-aṅ nö iṙūöhen im linöklōn Yāvē (Ngëichköm perekrāf 14)
15. Asūp ṙô Yāvē nö kētö ṙinātö-ellōn hī? (Salmai 86:5; Rōma 8:38, 39) (Ngëichkö ngam nyat.)
15 Haköp hī. Kētö ṙinātö-ellōn hī an Yāvē tö ò nö hangenlōn tö hī hēk hīnööre inrē nö aṙēḵlen hī. (Vë-evkūö Salmai 86:5; Rōma 8:38, 39.) Yēḵ hī öi fāluṙen ngaich höng afuk kuire ayī-ö tö minë vanaichöre. Ṙòkhöre in ṙung ngatī mufē hēk kô-en inrē öi hòṅ ngatī lōn. Ngaich öt kô pöri ayī-ö öi höng yahlö mufē hēk tö minë vanaichöre, pöi mihôiṅ min ngö lōn tö Yāvē nö öt hangenlōn tö hī hēk öt aṙēlen hī inrē. Hòṅ ilööṙen pöri ayī-ö havëkö inyöökenre in më prötör el ngam māṅ. Ngatī inlahen ök inrē prötör Ròpöt ngam kahakkö hī taheui, ngö ṙô anga-aṅ, “töng yahlö ṙinātö-ellōn chin öich in re hēk öt ṙēhěn chū-ö öich hō kē inyöökenre in yip tahëng lökten ngaich öich fāluṙen.” Vë-ekūö yik minṙöinylen pöri ngaich anga-aṅ. Ngö ṙô anga-aṅ, “Akahaiṙen chū-ö tö ngam hanangenlōn Yāvē öich höng löktö in minë ṙô më minṙöinylen. Pōyen tī inrē cha-a nö hayööken chu. Kētö ṙinātö-ellōn chu inrē tö Yāvē nö ötlöktu nö ṙāngen chu.” Asuh öp pöri min inlahen hī yěi kēken minë tökiröng fālen? Hòṅ halöktitre ayī-ö. Kē inyöökenre in më minṙöinylen hēk pītnyöre inrē öi uh öi havantenre in minë tövaich la-enre. Yēḵ hī min ngatī inlahen ngaich ṙātö-ellōnre min ayī-ö tö Yāvē nö hangenlōn tö hī hēk hīnöre inrē nö aṙēḵlen hī. (1 Yôh. 1:8,9) Kūö ngih ṙinātö-ellōnre min ayī-ö öt kavē-ěre hēk öt heūlngö im linökö lōn Yāvē.
Asūp mihôiṅ ṙinātö-ellōn meh, yěm meh meuk inlahen tī më minṙöinylen nö ma-ainyre nö hayööken hī? (Ngëichköm perekrāf 15)
16. Kūö yòh öm më-eṅ hòṅ iṙūöhen löklōn Yāvē?
16 Ṙamlōn ang Yāvē yěn meukö hī ma-ainyre i linökö lōn ò, pòrô öi kihngen el ṙētak ngih manā-aṅ sakāmö. Lohten öi haṙivlōn, ngaich hayööken hī pöri ang Yāvē öi köp i linökö lōn ò. Yěn ōtre yip prötör sistör mahaṙivngölōn hī, sön pöri ayī-ö hameuktö ngam hanangenlōnre tö cha hēk aṙēlen cha inrē. Yěn yih inrē minë kanihngen nö elhôi ngam pinīhö tö hī, ngaich mihôiṅ ayī-ö holṙenre lā-al u. Halöktit u inrē öi ma-ainyre. Yēḵ hī min öi ngatī inlahen ngaich hameuktöre min ayī-ö milēḵṙen tö ngam pinīhö ngam tö halēnlöng hēk hangenlōn inrē ayī-ö tö Yāvē. Yēḵ hī inrē min öi kēken tökiröng fālen, mihôiṅ ayī-ö öi havëkö inyökenre in Yāvē hēk ṙatö-ellōnre inrē tö ò nö hangenlōn tö hī hēk höngöre inrē nö aṙēlen hī hòṅ hī öi kūö urěh i linökö lōn ò. Ta-a chěi töi ‘uh öi heūlngöre in minë tövai la-en.’ (Kal. 6:9) Yēḵ hī min öi ngatī inlahen, ngaich kirööngen min minë inkôlò hī kahëtö Yāvē.
SITIH INLAHEN ÖI IṘŪÖHEN LÖKLN YĀVĒ PÒRÔ ÖI . . .
haṙivlōn tö tī yip prötör sistör?
yěi haṙivlōn tö tī öp pīhöre?
yěi haṙivlōn tö kūö nup vanaichöre?
TINKÖÖKÖ 139 Tövai Panam Tufömngöre
a Harīki ngam minë-eny.
b Vënyu nang in tö ngam Paipöl tö minā pamīhöre nö ötkô cha-a nö ṙāngen höö. Yěn haköhngenre min cha-a tö höö, ngaich ötkô min cha-a nö pīhövö tö tahëng. Ōt pöri yip Kristīön ṙamāngö yip pīhöre kūö nup kanihngenre. Yěm hòṅ ṙūöhtö mikahkūöre ngaich mihôiṅ öm ngëichkö ngam līpöre Mihôiṅ Man Örheūheu Ṙamölōn in ngam nōt 4 ngam tö ngö kui “Inlahen Ṙamāngen Höö.”
c Mihôiṅ öm ngëichkö ngam vitiō el ngam jw.org ngam tö ngö kui Ui Hachīlöre In Minë Tötkô-en Lanāmö Ing Panam!—Tëröl Hēk Tepōra Fraënsichör.-HI