MIRŪLÖ 17
Haköptö Inlaha ngam pūlngö ngam Tēv ang Yēsū
Pōyen nuk haköptö Yēsu nö in yik tanīnöṙô, ngam Pūlngö ngam Tēv an tönghĕng lökngörit minë haköptö ò
ASUH nup chöönyö Yēsū misī nö yih nö ing panam? Hakòtô re anga-aṅ nö ngö ṙô: “Hòṅ mumkahten chin i tahëng panam inrē tö ngih tölöök inhangkö ngam pūlngö ngam Tēv; pön angu-ö tinīnngö chu.” (Lūkös 4:43) Fēken në tö fën haköptö Yēsū inlahen ngam pūlngö nö lökngörit nup ṙô ò nö mikahten.
1. Kaheūkö anga-aṅ nö Rācha. Halööknyö ṙô re Yēsū tö re nö anga-aṅ Mesayā ngam tö urĕhhangen vinënyi. (Yôhan 4:25, 26) Hameuktöre anga-aṅ nö Rācha nö sā mineūköre tö ök pròfĕt Tanīĕl nö el heūvö ò. Vë-eny nang yik haköptöre Yēsū tö ò min nö hĕng heuh nö ūichlöre nö el “kantēra kanôlò” tö cha min inrē chā-a nö ūich el kantēra Rācha. (Mëtiv 19:28) Kaheuk ngam tūmö cha nö mahayöng anga-aṅ nö “kun kiteūm,” hēk anga-aṅ nö vë-eny tö ò nö pöököre vö tö tahëng nup töt aṅ ngam kiteūm chā-a yip “tahëng kiteūm,” tö ṙô.—Lūkös 12:32; Yôhan 10:16.
2. Ngam pūlngö ngam Tēv an min kamëtö ngam tökô-en inkaha falēn. Hameukhömat hī ök Yēsū tö ngam pūlngö min nö angu-ö ma-ahetlö ngam minënyö ngam Tēv Yāvē tö nuk sinūöchlö falen Ò nö el ök panô-òṅ Ēten tö ngam sī-ö. (Mëtiv 6:9, 10) Hameuktö inlaha re ang Yēsū nö öt tö atöltuṙen tö haköptöre tö tarik kikōnyö, kikānö, tökôlò hēk yāich inrē. Pòrô anga-aṅ nöng chööḵ-öny tö yik Israel nö yih nö ing panam misī sön anga-aṅ nö sölngö röön nö in yik aṅ Samariā nö haköphöti. Chuh in yik tahëng mihëṙö ök inrē yik töt Yahūti. Öt sā inlahen yik mākūö kūönṙô anga-aṅ nöng atöltuṙen tö haköptöre.
3. Öt aṅ ngih panam ön min ngam pūlngö ngam Tēv. Pōyen nuk tinṙōlen yik mahayöng im panam inuk sakāmö Yēsū. Hayöngkaṙen inrē ök panam chūök finötnyö ò tö aṅ panam tahëng. Hòṅ vīlen ò yik tarik nö rācha, falngöre pöri anga-aṅ pò ngam pūlngö ò nö öt aṅ ngih panam. (Yôhan 6:14, 15) Vë-eny nang ök töhĕng tak anga-aṅ mahayöng nö ngö ṙô: “Rö-ö pöri ngam pūlngö Chu nö aṅhih.” (Yôhan 18:36) Vë-eny nang yik tamömrit re inrē anga-aṅ tö cha nö “öt aṅ ngih panam.” (Yôhan 15:19) Öt halöngten cha inrē anga-aṅ nö aṅhav in tö aṅtī kumyung pòrô nö chööḵ-öny tö linaklö ò.—Mëtiv 26:51, 52.
“Ngach ilööṙen nö unôichngöre tö ò, nö chuh i nup panam, tuhēt inrē, mumkahten ane inrē ahangkö ngam tölöök inhangkö ngam pūlngö ngam halīöngö.”—Lūkös 8:1
4. Holtö hanāngenlōn re min ang Yēsū nö hayöng. Kilēḵngôre Yēsū tö ò min nö kētö haneūheu yik tarik. (Mëtiv 11:28-30) Ngatī inlaha anga-aṅ nö hateung minë ṙô re. Lökten Yēsū nö halēnö cha nö kö hanghuṙen tö höö, sōtu nö piṙūtku tö nup ing panam, un yahlö lōn tö nup kanôlò ing panam, ngach kôtökūö min töm tökô-en ṙanamölōn. (Mëtiv, 5-7 mirūlö) Öt kanihnguṙen yik tarik nö yihtöre nö in Yēsū pô ò nö tö hāngenlōn tö taṙòkhöre tarik, söl in më manā-ang kūö yanāichö inrē tarik nö ṙātö ellōn re tö ò min nö öthō nö öt hameuktö miṙēlōn hēk neūkölōn re nö in cha. Yöng pinngangkūö öp min inyööngö tö Yēsū yēḵ ò min ngach nö kētöre nö Mahayöng!
Lökten i inmeuktö nup tö ṙōlkangen pinngangkūö inrē ang Yēsū nö haköptö inlahen ngam pūlngö ngam Tēv. Asuh nup pinngangkūö la-en ò? Ta-a töi ngëicha.