Öt tö reushu yin vē kūönṙô nö el në maṅ ih. Asā ranulten ngam maṅ më Kristīön misī, vīlöng yip mameukken nö “ha-aṅlö ngam Maṅ ngam Tēv.” (Inlahen 20:28) Cha-a vē minṙöinylen tö īnu tö kanöönyen re i minë ṙô ngam Tēv tö kò-òre nö mahayōm minë sīṅp ngam Tēv nö el në maṅ “öt hanlīpö, kanahanglōn pöri, öt rēhĕn nö kūö taneūngen tö yô-òv, töhōḵ pöri nö lōn.” (1 Pītör 5:1-3) Asuh nup la-en kahëken cha nö chööḵnyöten tö hī?

Haṙūötken hī yin amahten hī inrē. Mahachōḵ kūö minë maṅ yin vē minṙöinylen hēk mahakööpö hī röhta im Tēv. Akah töhëichlōn tö ngam Tēv nö kamë-ekūö cha tö ngam töt ṙanāngen la-en, öt mahakeū chööngö re nö in yip tarik hayōm re, hamòlren pöri nö im lanāmö. (2 Kòrin 1:24) Sā öp tö chumkūöṙen yōm sīṅp nö kūöten re tö nup sīṅp re, ngatī më minṙöinylen nö hòṅ akahakūö tö yip töng aṅ në maṅ.—Inchōḵ-oṙô 27:23.

Haköpten hī yin öi lök lōn ngam Tēv. Kaheuk afta yin vē minṙöinylen nö kēken nup mīting minë maṅ nö ṙamūölö alaha hī im ṙinātö ellōn. (Inlahen 15:32) Cha-a yin inrē mu-urēhĕ kūö hī in minë la-en inhānga, nö holṙen hī harūnö hī inup taṙòkhöre la-en i alaha ngam inhāngö.

Kētö inreuslö alaha hī cha-a. I cha nö ngamëchken hī tö nup hanakten hī inup ṙô ngam Tēv, mihôiṅ yin min nö chuh patī hī hēk el minë Patī-Pūlngö nö kētö hinòlṙen hī hēk ṙônyö inṙamkölōn hī tö aṅmat ngam Līpöre.—Yāköp 5:14, 15.

Rö-ö yin nöng kôngen nöng ngamëchkö minë la-en el ngam maṅ, pòn ōt inrē nup tahëng la-en cha pōyen yip minṙöinylen in cha tö kinmānu ōt in cha inrē mahakūöken mikūönöre. Lökten yin vē töchumkūöṙen kisānö nö tö hòṅ milēḵkaṙen tö hī.—1 Tösalònikē 5:12, 13.

• Asuh nup la-en vē minṙöinylen nö el në maṅ?

• Sitih inlaha aich vē minṙöinylen nö hameuktö chumkūöṙen re tö hī?

Nët krup yin më vahënyö ngam Paipöl kikōnyö Kristīön nö mahakūöken nup la-en ngam maṅ—‘mameukken hēk töhaköövö hamòlṙen.’ (Filipī 1:1, NV) Chöngṙen, nö ṙōltak më töngatī la-en kisānö hī el minë maṅ. Asuh nup la-en kahëken ngam töhaköövö hamòlṙen tö yöölen tī tö hī?

Hamòlṙen ngam manūlö-minṙöinylen yin. Tö huveu-en yin nö i tölöök la-en më töhaköövö hamòlṙen, tökô-en, hēk töteung yin nö tarik, in cha nyöre pòrô ṙālö hēk tököinyö ṙēḵti. Ṙòkhöre yin nö hakūöken minë töt ṙanāngen la-en re töchöngṙen kinë-ekūö cha el ngam maṅ. Angū-ö an lökten më minṙöinylen nö chumkūöṙen tö minë la-en i alaha ngam inköphöti hēk chinöhkö më tarik inrē.

Pōyen minë tahëng la-en cha. Ōt yip töhaköövö hamòlṙen tökētu la-en tö la-en mameukṙen nö maha-öinytö yīhi yip yamihtökūö el nup mīting. Ōt in cha tökētu la-en nö ngamëchkö minë ranöng tinköökö, ōt kamtölngö līpöre, ōt ngamëchkö minë hisāp ngam maṅ, ōt tökētu la-en nö katölhökūö më aṅ ngam maṅ tö chūök cha nö ahānga. Holṙen yip mahakūöken ngam Patī-Pūlngö yin inrē hòṅ e nö hëtö mineūkö. Tölööṙô yin inrē tö yip minṙöinylen nö hayööken yip tököinyö ṙēḵti. Höng töng hōḵ yin vē töhaköövö hamòlṙen nö la-evṙen tö nup töng sitih kinë-ekūö cha la-en, töp lökten cha nö teūngen tö minlēḵken re tö më aṅ ngam maṅ tökūö minë tölöök la-en cha.—1 Timòtī 3:13.

Mahameuktö tölöök inchōḵkūö Kristīön tarik yin. Katöllöng yin më töhaköövö hamòlṙen tökūö minë tölöök tinrīken cha. Yēḵ cha nö kētö minë minchööḵöre la-en nö el minë mīting, ngach ngönlöre ngam ṙinātö ellōn hī. Im inlaha cha nö kôten nö ahānga, in e tī cha-a nö haṙeuslö alaha hī. Kūö cha nö hōḵ nö holṙen ngam manūlö-minṙöinylen, ṙūölöre ṙôken ngam ṙanamlōn töm hinëngö inrē tö tī cha. (Efisös 4:16) Ngach unôich cha-a nö kò-òren nö sölta nö mameukṙen nö sā më minṙönylen.

• Tö sitih tinrīken aich vē töhaköövö hamòlṙen?

• Sitih inlahen aich vē hamòlṙen nö hayööken ngam maṅ hòṅ minë la-en nö sööḵ-öröön?

Chöngṙen kinakka nak nā Pôl nā Parnapas nö imat ngam töhet Līpöre Kristīön i ṙô Krīk. Kakka nan mina tarik nö sā la-en töhavötaröön mameukken, nö chamöhkö minë mu-urĕh maṅ. Kūöyòh? Kūö cha nö paṙūtalōn nö hòṅ kētö inyööken më holmaneuk re. Lökten ang Pôl nö hòṅ “havantöre nö chöhkö yip Kristīön” pön hòṅ ngëchkö inlahen cha. Hōḵ anga-aṅ nö kiröön nö pōyen tö tö kööinyu mail (km) rò-òlkūö nöng chöönyö tö inngönkö më holmaneuk re. (Inlahen 15:36) Angū-ö ön inrē kuilōn më töhavötaröön mameukken inë ṙētak hī töngamuh.

Yih cha-a nö haruhkö alaha hī. Ngòh töhĕng tak sörkit ōversīör chöhkö minë tö 20 maṅ hēk pōyen nö kö hĕng afta rò-òten nö in cha. Mihôiṅ in pōyen yanöölen öi lökten inup tinrīken cha hēk in yip pīhö cha inrē. Kalēḵ-ĕlōn yin nö hòṅ mikahtökūöre tö hī pòrò tököiny hēk ṙālö, lōnu yin inrē nö holröön hī ahangkö ngam tölöök inhāngö hēk inköptö Paipöl inrē. Holröön më minṙöinylen yin inrē vē mameukken nö i chinöhkö hēk inruhkö alaha hī inrē, kētö nup tö reuslöre alaha tī yin inrē minkahten hē el minë mīting hēk manūlö töhĕng-chuvī inrē.—Inlahen 15:35.

Hameuktö chumkūöṙen re i taṙòkhöre. Pōyen hameukti yin vē sörkit ōvörsīör tö chumkūöṙen re tö minë tinrīken minë maṅ nö im ṙô ngam Tēv. Lökten cha nö meuk kūö më minṙöinylen hēk më töhaköövö hamòlṙen nö ngëchkö sanīöpö minë la-en tö kēkaṙen hĕnghöre kētö minë tölöök inlēnö hòn lööngö kinëken minë la-en. Hayööken më painīör cha-a hòṅ cha nö mihôiṅ nö in minë la-en inhāṅnga, ṙamlōn yin inrē yĕn hang inlahen yip tufömngöre nö kū-ö urĕh nö in minë ṙô ngam Tēv. Ṙòkhöre yin cha-a vē kisānö nö keuheūttö ellōnre nö kētöre nö sā “hol alaha [hī] inrē.” (2 Kòrin 8:23) Hōtu in tömkö minë ṙinātö ellōn cha töm inlahen cha inrē nö ha-öiny ngam Tēv.—Heprāi 13:7.

• Asuh öp chöönyö vē sörkit ōvörsīör nö chöhkö minë maṅ?

• Sitih inlahen öm kēḵ yanöölen re lökten in minë inlahen cha nö chööha?

Yĕn yih nup pinlāḵngen, ilööṙen më Vamënyen Yāvē nö halēnlö inyööken yip kisānöre tö lökngöre tö u. In u anū-ö la-en nö meūkö ngam hanāngenlōn cha tö höö. (Yôhan 13:34, 35; 1 Yôhan 3:17, 18) Asuh nup talöökö tī ih kētö inyööken?

Kētö rupīö in. Hē ök tökiröng inyaichö misī nö i Yūtā, yik Kristīön aṅ Anti-òk nö söömngö nuk rupīö mineukṙen yip kisānö cha nö Kristīön aṅ Yūtā. (Inlahen 11:27-30) Ngatī inlahen īhö yĕi hang inlahen yip kisānöre mi-iyöng kūö minë tahëng pumnamö nö kihngen, ngach lökngö el minë maṅ tī öi söömtö minë rupīö nö inyööken cha yip më-el kanihngen.—2 Kòrin 8:13-15.

Kētö minë tahëng in hinòlṙen. La-en yip minṙöinylen an yip tö kamlö chūök nö i minë kanihngen nö ngëchkö yip aṅ minë maṅ yĕn ṙòkhöre cha-a nö öt fehnguṙen. La-en ngam rilīf kömitī ngam kintölngö minë inyööken nya-aṅkūö, töhet tö-òkö mak, chinhenen, inrūkui, hēk lanë-en inrē. Pōyen yip Vamë-eny, kamahanglōn re nö chuh in u anū-ö la-en inyööken nöng i pësa re ngach vītit minë patī hēk Patī-Pūlngö inrē yēḵ u nö pala-aiṙen. Löktö im hinëngö manūlö ih öi töhēngö manūlö, öi akahaiṙen töre mihôiṅ öi hayööken höö hē el kanihngen, mötlö hē el nup ṙētak ih hòṅ veūten hayöökaṙen. Rö-ö pöri öi höng hayööken yip ‘tö sā ṙinātö ellōnre’ tön yip tahëng inrē yĕi kò, kò-òren nö töt sā tinlööken ih.—Kalatī 6:10, NV.

Löknyö mat ngam töhet līpöre ṙô in inrē kētö inyööken inṙamlōn inrē. Tö hòṅ lōntö inyööken re yin vē pôḵ pinlangen. In u anū-ö ṙētak öi hòṅ yihtöre in Yāvē öi kēḵ kumlēḵ re ngam “Tēv inngëkö inrē nö ṙòkhöre.” (2 Kòrin 1:3, 4) Ṙamölōn öi katölhökūö yip töhaṙivölōn tö minë kinlēḵngô ngam Paipöl, öi kē-ĕkūö cha töm mineūkö töm Pūlngö ngam Tēv nö öt ahāṅkenre nö kētö manāngen në taṙòkhöre chanöökö tö minë löktö yanihi u inrē.—Inmeukhömat 21:4.

• Kūö yòh aich vē Vamë-eny nö ilööṙen nö kētö inyööken hē el nup pinlāngen?

• Asuh nup tī hī kò-òren kētö hanöhlö alaha cha yip töt kò-òngvah?

Urē-hĕkūöm kinpaha re ang Yēsū, nö vë-ekūö yik tö fën tak haköptöre hē Pītör, Yôhan, Antaru inrē. Vë-eny minkahngö yanihih re ang Yēsū min inup mana-aṅ sakamö, hatön ngam tökiröng intöönö anga-aṅ nö ngö ṙô: “Achīö öp öre tökô-en, tö-akaha inrē mahalanṙen öp mahayōm nup aṅ patī öp yöngṙen re, ngach ha-aṅlen cha ip ṙētak?” (Mëtiv 24:3, 45; Makös 13:3, 4) Kilēḵngôre ang Yēsū nö in yik haköptöre i inlahen ò nö “yöngṙen” cha, tö ò min nö katöllö yip mahanëkö kūö yip tamömrit ò hē öp mana-aṅ sakamö. Chīö aich cha-a mahalanṙen?

Töhachamö-elkui yip cha-a nö tamömrit Yēsū. Më “mahalanṙen” yin kamtölngö minë nya-aṅkūö tö lööngö ṙētak yanihih, nö in meh holmaneuk re lamöklōn Yāvē. Höng in yip tö-akaha mahalanṙen in öi hayönglenre yip “kameḵeṅkūö [hī] tö nya-aṅkūö ip hē nyina-aṅ.” —Lūkös 12:42.

Mahalēn yip aṅ patī ngam Tēv yin. (1 Timòtī 3:15) Kē-ĕkūö yip mahalanṙen ang Yēsū tö ngam tö langanhu la-en inlēnlö minë la-en ikūöng panam nö mupākö alaha minë töhalēnlöng la-en el patī ngam Tēv Yāvē, ngamëchkö minë chehen tö sā minë mupākö ôfis Patī-Pūlngö tö nup tahëng inrē, hĕnghöre hayöngken ngam la-en inhānga, haköpten hī nö löktö el minë maṅ. Ngatī tī cha-a nö kē-ĕkūö hī tö minë töt ṙanangen kuilōn hī. Lökten yin töngamuh vē “tökô-en hēk tö-akaha mahalanṙen” nö katöl minë nya-aṅkūö ngam ma-alaha, nö löktö in minë tö katānö līpöre minë chehetī hī ahanga, hēk löktö in minë prōkram tö hāngö hē el minë mīting hēk tökiröng manūlö.

Tökô-en yin më mahalanṙen nö kumṙapkö ngam kanô-en ṙô Paipöl tö ngam kinë-ekūö cha inrē la-en inhangkö ngam tölöök inhānga, hĕnghöre tö-akaha yin inrē nö i minë la-en kahëtö Kristu nö ikūöng panam. (Inlahen 10:42) Lökten ang Yāvē nö hakôlò minë la-en cha nö asīöp ṙôngö cha.—Isayā 60:22; 65:13.

• Achīö yip tö katöllöng tö Yēsū mahanëkökūö yik haköptö ò tö minë ṙô ngam Tēv?

• Kūö yòh aich kaheūkö më mahalanṙen nö tökô-en hēk tö-akaha?

Ik raneh senchurī, töng haroh tumtak, “yik tanīnöṙô, mā inrē” i Yerūsalem tö la-evṙen tö la-en mameukken la-en në maṅ, nö mahalēnlö nup töt ṙanāngen ṙô nö lumnökngen yik töhachāmö elkui Kristīön aṅ minë maṅ. (Inlahen 15:2) Hō-en höö nuk ṙô cha, pò cha nö hōḵ nö hachōk-okūö tö ngam töhet fanöinylö ngam Tēv. (Inlahen 15:25) Ngam töngatī tinömken inrē töngamuh.

Katöllöng töm Tēv nö löklōn ò. Më töhachāmö elkui kisānö töla-evṙen nö el ngam Mameukken La-en Në Maṅ yin tökô-en hanangenlōn töm Ṙô ngam Tēv hēk huveū-en inrē nö ngëchkö minë la-en tö kēkaṙen el minë maṅ. Kaheuk afta yin nö meukkūö höö nö ngëchkö nup lōn më holmaneuk re tö keuheūtngör chūök. Sā inlahen e ik raneh senchurī, kētu minë inlēnö lamökngörit im Paipöl, yĕn löktö i chitri hēk löktö i yip töhavötaröön mameukken tö yip tahëng inrē. Angū-ö an tö tī-ivö tö më tarik ngam Tēv nö hĕngö ellōn hĕngö inlahen inrē nö la-evṙen. (Inlahen 16:4, 5) Ngam Mameukken La-en Në Maṅ an ngamëchkö inlēnlö minë nya-aṅkūö në ma-alaha hī, mu-urĕhlö nup la-en ngam pūlngö inrē, hēk halēn vinīlö më kisānö nö in minë kamtö cha tö nup kinë-ekūö cha la-en.

Veut nö kēḵ minë inchōḵkūö ṙama-ang im töhet fanöinylöm Tēv. Havëkö inchōkūö re an töngamuh ngam Mameukken La-en Në Maṅ nö in Yāvē, ngam Tökeuheūtöre Chööngö, in Yēsū inrē ngam Kui në maṅ. (1 Kòrin 11:3; Efisös 5:23) Öt kaheūköre yin nö yöngkūö më tarik ngam Tēv. Hanòltöre pöri nö in yip tahëng töhachamö elkui Kristīön nö “tamömrit ngam Pöököre [Yēsū] i töng kū-ö ò nö kirööngöre.” (Inmeukhömat 14:4) Ṙamölōn yin vē Mameukken La-en Në Maṅ yēḵ hī vë-elkui cha.

• Achīö yik misī Mameukken La-en Në Maṅ ik raneh senchurī?

• Sitih inlahen öng töngamuh ngam Mameukken La-en Në Maṅ nö chöh inchōḵkūö re nö im Tēv?

Ṙô Heprāi ön ngam ṙô, Pētĕl, ngam tö ngö “Patī ngam Tēv.” (Ranehlö 28:17, 19) Tö löngta ön nö minënyö minë tökiröng patī mahānlö më Vamënyen Yāvē tö keuheūtngör chūök ikūö në panam nö lökngörit inchöngten hēk hinòlṙen minë la-en im inhangköm tölöök inhānga. Më Mameukken La-en Në Maṅ yin tö la-evṙen nö im tökiröng ôfis i Niū Yôrk, Amerika, ngach lökngörit in e cha-a nö ngëchkö kinëken minë la-en el minë mupākö ôfis tö la-evṙen nö ikūö minë panam. Ṙòkhöre yin më tö la-evṙen in u anu-ö chūökö nö akahka nö mikūönö Pētĕl. Sā tö hĕng mikūönö cha-a, nö iyöng, hēk holṙen re nö la-evṙen, ṙamlōn nö holkūöre nö nyā, hĕnghöre haköp mat Paipöl nö mūlöṙô.—Salmai 133:1.

Töt insā-avö ön nö chūök minë mikūönö nö kētöre. Ṙòkhöre yin më Kristīön tö la-evṙen el minë Pētĕl kikōnyö hēk kikānö inrē nö kumheūttöre nö i linöökö lōn ngam Tēv nö mameukken minë la-en nö keuheūttö ṙētak re. (Mëtiv 6:33) Öt hĕng tak in cha tö reushu, kē-ĕvkūö pöri cha-a tö chūök re nö iyöng hēk nya-aṅkūö inrē nö holtö nup tö rahëichyen rupīö inyööken cha. Ṙòkhöre cha-a nö kö kētu la-en nö el Pētĕl, yĕn el ôfis, el chūök kamhul, el chūök nyamā. Ōt in cha tö la-evṙen nö el chūök kintānö hēk vinītö uk līpöre, hēk mahalēn el patī, el chūök samöich, el chūök inkūöken vinītit vanāyö hēk tö nup tahëng inrē.

Chūök yip töt hameūheure tamānyö ngam inhangköm Pūlngö. Ngam kintölngö ngam kanô-en aṅmat Paipöl nö i taṙòkhöre tarik an tökiröng chöönyö minë Pētĕl. Töhĕng ön ngih kun līpöre nö inchōḵ elmat hī. Kūichö angu-ö nö i chööngö më Mameukken La-en Në Maṅ, ngach löktö el minë ilektrònik anu-ö nö chuh in minë tūmö yip vame-eny manah nö i tahëng ëlô nö keuheūtngör chūök, katānö nö el minë töveut tī kintān el minë Pētĕl ngach möl nö söömtu nö in minë tökirööngen tö tö 100,000 maṅ. Minë mikūönö Pētĕl yin kamëtö hinòlṙen minë taṙòkhöre la-en töt ṙanāngen ngam pinrātngöm tölöök inhānga.—Mākös 13:10.

• Achīö yip tö la-evṙen nö el Pētĕl, hēk asuh nup mineukten cha?

• Asuh öp tötṙanāngen la-en tö haṙūötkaṙen kinëken nö el minë Pētĕl?

Ṙōlkangen nun minë kamngö chūök yip töla-envö el ngam mikūönö Pētĕl, nö i inkūöken ngam inhānga i töhĕng hēk ṙōl pumnāmö. Ōt in cha tö la-entö la-en vinënyö manah, kamtān līpöre, chamôk līpöre, mahachūökngö līpöre, vamī nup tö hāngö/töngëchka, hēk ngamëchkö nup tahëng la-en inrē chamuh inup panam.

Ngam Mupākö Kömitī ön ngamëchkö minë la-en. Kētö la-en minë mupākö ôfis ön ngam Mameukken La-en Në Maṅ nö chamuh in yip tö lūöi hēk töpōyen tö tö lūöi tak minṙöinylen yip töhuveū-en, cha-a yin ṙô hī Mupākö Kömitī. Örheūheu ön ngam kömitī nö mikahtölōn ngam Mameukken La-en Në Maṅ tö sanīöpö la-en minë panam minë töhayōmka töm kömitī ngam chūök e, hēk nup töng kanihngen yamih. Lökten in u anu-ö minkahtölōn ngam Mameukken La-en Në Maṅ nö akahakūö tö nup tö hòṅ ngëchkaṙen vinënyi min nö imat nup yamih līpöre, el nup mīting, hēk manūlö töhĕng-chuvī inrē. Söömka yin më lumnökngen ngam kövöning pòti nö chöhkö nö chöhkö minë mupākö, ngach kētö inchōḵten ngam Mupākö Kömitī nö kēken minë la-en cha. (Inchōḵ-oṙô 11:14) Halēnlöng öp minkahten kahëtö ngam lumnökngen aṅ ngam tökiröng òfis nö inreuskö.

Kētu hinòlṙen nun minë maṅ mi-in e. Më kisānö tö kē-ĕvkūö nö hayōm minë la-en el ngam mupākö ôfis yin kamëtö chööngö vinīlö minë tufömngöre maṅ. Halēnlö la-en yip painīör yin inrē holre tö më misönörī, tö yip sörkit ōvörsīör më töla-evṙen inup panam me-elkatòh ngam mupākö. Halēnlö nup manūlö töhĕng-chuvī hēk manūlö pumnāmö, nginëchkö minānlö tufömngöre Patī-Pūlngö, hĕnghöre ngëchkö sinöömngö nup līpöre chamuh el nup maṅ nö mineukten nup lōn cha. Ṙòkhöre anu-ö në la-en tökēkaṙen nö el në mupākö ôfis nö inteungten lanöökö kinëken ngam la-en inhānga.—1 Kòrin 14:33, 40.

• Sitih inlaha aich më Mupākö Kömitī nö holṙen ngam Mameukken La-en në maṅ?

• Asuh nup la-en kinë-ekūö minë mupākö ôfis?

I tölngö inlaha ih öi hòṅ vë-eny ngam “tölöök inhānga” öi “kö i pumnāmö tarik, miyööngö, tum mi-ëlô tarik inrē,” pōyen tö tö 750 mi-ëlô minë līpöre tö katānö tö ih. (Inmeukhömat 14:6) Sitih löktö kanò-òṅ öi ngatī ṙôkö la-en? Lökten i yip tökeuheūtngör chūök tö la-evṙen kamūich tö yip kumheūttöre vamë-eny manah—yip Vamënyen Yāvē.

Ṙô Ingki inlēnö ön ngam tönehangrit tökūichö. Ngam Mameukken La-en Në Maṅ an ngamëchkö la-en ngam Tipārtment Kinūchö nö el ngam tökiröng ôfis ih. Mahalēnlö yip kamūich an yip tö la-envö nö el ngam tökiröng ôfis hēk el nup tö kaheng mupākö ôfis inrē. Kūö tumkangen tinrīken më kamūich in öi lööṙen, öi kūich nup töṙōlkangen tö hòṅ kūichö nup tö hō-ovö tö tarik tö keuheūtngör chūök.

Söömtu nup tökūichö nö chuh in yip vamë-eny manah. Yĕn ngach nö halööktitvö nup tö kūichö hēk hō-ovö inrē, söömtu ngach nö lökngö el nup computer nö chuh in yip vamë-eny manah i në töhĕng chuvī panam, yip tö la-evṙen nö inup chūök re nö ōt in cha vame-eny manah, ōt mahalööktit, ōt vame-ekūö nginëchkö lanööngö nup ṙô. I mana-anyre cha-a nö chöh “nup ṙô tökô-en” nup tö keuheūtnyöre ṙô nö vë-eny manah minë tö kūichö ṙô Ingki.—Mumkahten 12:10.

Haveutlöngö ngam talöököröön ngam kinūchö nö lökten im Computer. Ötkô ön ngam computer nö hachūöktö chūök yip kamūich tö yip vamë-eny manah inrē. Ngach pöri nup la-en cha nö veut nö löktö inup töhalēnlöng tiksönörī el minë computer, tö nup aṅtī chamöh nup ṙô inrē. Halēnlö ngam Multilanguage Electronic Publishing System (MEPS) yin inrē vē Vamënyen Yāvē öp chūök nup tökūichö nö mihôiṅ nö chaphötvö nö inup tö köönyu ëlô, nö holre tö nup nyat tö sāta nö in u, ngach halēnlen u nö katānö.

Kūöyòh öi harëtnyö elmat re la-evṙen tö në, nö pòrô yip tarik nö öt pōyen ṙamôtö öp ëlô? Pò e nö lōn Yāvē “tö taṙòkhöre nö hayöökaṙen, yih inrē nö im inkaha kanô-en.”—1 Timòtī 2:3, 4.

• Sitih inlahen kinūchö ön minë līpöre ih?

• Kūöyòh öi vënyö manah kinūchö minë līpöre nö itö ṙōlkangen ëlô?

Katān hĕnghöre katölngö tö köönyu ṙôken Paipöl an ngam töhalēnlöng manūlö ih nö kaheuk samyeūheu holre tö minë tahëng līpöre nöng öt ṙāyu. Mānö hēk hakūöken minë Patī-Pūlngö tö minë mupākö ôfis in inrē. Hayööken më tö köönyu ṙôken aṅ el minë Pētĕl in tö më missönörī, ngach meukten u hē ṙētak nup tökiröng pinlāḵngen. Lökten meh lohten öm pingangkūö öm ngö lōn, ‘Sitih löktö pësa ön vöh në nö ṙòkhöre?’

Öt kēḵ töhĕng in i tösöm, öt kēḵ ṙāi, öt kēḵ kaleksön inrē. Pòrò nun në ṙāi hinòlṙen yip tö la-envö tö la-en inhānga nö pōyen, sön īhö öt havëkö pësa. Pōyen tö töhĕng senchurī rô-angen, ök innëtö issue ngam Vôchtavör nö ve-eny tö ih ṙātö ellōnre tö Yāvē nö hamòlṙen ih hēk öt löktukūö inrē “öi icheū-a öt rēhĕn havëkö kūö tarik tö hinòlṙen re”—ngach kô öi öt ngatī!—Mëtiv 10:8.

Hōluṙen nun në la-en ih tö yip kamnahang lōnre nö kē-ĕti. Pōyen tarik ameū minë la-en ih inköptö Paipöl ngach kētö tīre tö pësa nö tānyö e. Ngatī inrē vē Vamë-eny nö kēnyö ṙētak re, kumlēḵ re, pësa re hēk nup tahëng chehen re inrē nö chööḵnyö tö kinëken nup lōn ngam Tēv nö inë taṙòkhöre panam. (1 Kinṙötngö 29:9) Ōt nun minë kasòng chūök inmūlö pësa el minë Patī-Pūlngö, nö chūök tī yip kamahang lōn re nö kē-ĕti. Hēk mihôiṅ lökngö el ngam vepsāit, jw.org kētö nup kuilōn tökētu. Ōt in u lamökten in yip töt yāten ṙôken aṅhin, sā ök yāich tafīösi ök ha-eū Yēsū chamaplö töng nët tāk kun pësa nö el ök chūök rupīö el patī ngam Tēv. (Lūkös 21:1-4) Töp lökten yip töng lōnu mihôiṅ nö örheūheu nö hamūllö törahëichyen ngach “kö sā ṙôken lōn re tī nö kē-ĕti.”—1 Kòrin 16:2; 2 Kòrin 9:7.

Ṙātö ellōnre in tö Yāvē min nö halöinykö ellōn yip tö lōnuvö nö ‘milēḵṙen tö ò nö aṅtī tö nup inlānen re’ nö i hinòlṙen ngam pūlngö hòṅ nup kuilōn ò nö hateūngiyö.—Inchōḵ-oṙô 3:9.

• Asuh öp löktö inrīkngöre ngam töhalēnlöng manūlö ih tö nup tahëng tinlöökö?

• Kūötö yih nup pësa lamöktö in yip kamnahang lōn re nö kē-ĕti?

Sā ngam minë-eny e nö Patī-Pūlngö, ngatī ngam lökngörit ngam töhakööpö nö in e nö ṙôtö ngam Pūlngöm Tēv—ngam kūöngö ṙô Yēsū nö haköphöti.—Lūkös 8:1.

Chūök më tarik nun nö mūl nö kēḵ ngam tökô-en vinë-ekūötēv. Lökngörit im kamngö e ngam tölöök inhangkö ngam pūlngö nö pirātiyö. (Mëtiv 24:14) Kö ṙôkö re hēk kö inlaha vinī-i re nun minë Patī-Pūlngö, nöng lēnö minānlö, ṙōl nup maṅ tö mihôiṅ nö hachūöklöngö töp töhĕng Patī-Pūlngö. Öt uroh rò-angen, in öi mānlö minë Patī-Pūlngö tö köönyu ṙòken (taneui höl i töhĕng sumkam) öi chööḵnyö tö sanīöplö ṙòken yip tarik aṅ në maṅ. Sitih löktö kanò-òṅ ön nö ngatī?—Matthew 19:26.

Mānlöng nun në Patī-Pūlngö nö löktö in nup pësa kahëtö yip kamnahanglōn re nö kē-ĕti. I ṙôken minë Patī-Pūlngö, nup kasòng chūök inmūllö pësa Minānlö Patī-Pūlngö Tökeuheūtngör Chūök. Söömtu minë pësa nö chuh el ngam mupākö ôfis hòṅ minë pësa nö lööṙen kinëti nö chuh in minë maṅ tö hòṅ mānlö hēk halööktit nup Patī-Pūlngö.

Mānlöng nun tö yip töt reushu kamëtöre yip tö ṙōlkangen tinrīken. In minë töpōyen panam halēnlöng yin më Ṙôngö Mamānlö Patī-Pūlngö. Më hamòlṙen re mamānö tötreushu kamëtöre ṙama-ang el minë maṅ nö chuh el nup tahëng maṅ im panam, sölngö nö inup tö kösngen chūökö, nö hayöngken hĕnghöre harun yip aṅ ngam maṅ nö im la-en minānö. Inup tahëng panam hēk më, Kömitī Mamānö Itö Hĕng Panam nö kētu nö hachōḵten minānö hēk inlööktit nup Patī-Pūlngö inup tö kaṙöti chūök. Hēk yip minṙöinylen tö heuveū-en nö im minānö nö hachōḵten yip aṅ nup maṅ nö asā sanīöplö nup la-en minānö, ngach yip tö elkūiyu nö hameuktö nup huneū-en re nö im la-en. Inup töng chūök nup patī tö hòṅ vīlöngö, hapōilö ṙôken re yip aṅ nup maṅ nö kētöre nö la-envö. Lökten im kumlēḵ Yāvē tö yip tarik ò kumheūṅttö re nö la-envö ön tö teunglö tī töm minānlö.—Salmai 127:1; Kòlòsī 3:23.

• Kūöyòh ön në chūök ih vë-ekūötēv nö kaheūkö nö Patī-Pūlngö invëka?

• Sitih taneūngen kinëken ön në minānlö Patī-Pūlngö inë tö vinta kūö panam?

Kaheuktukūö an ngam töhet minënyö ngam Tēv nö in minë Patī-Pūlngö vē Vamënyen Yāvē. Angū-ö an lökten ngam kuilōn ih tö minë patī nö hòṅ het, hòṅ vāyö mineūkö, hēk ngam vanāyö vinītit u nun tö sā ṙēngen inlahen kinëtö nöönyö nö mupākö alaha ngam töt ṙanāngen töhet nöönyö ò. Mihôiṅ in ṙòkhöre kētöre in u anū-ö la-en.

Unôichrit mīting më töt reushu töla-evṙen ma-ahet. Unôichrit minë mintīngö, më kisānö kikōnyö kikānö hamòltö ṙanamölōn re, fòhnyö minë törahëichyen mum el ngam Patī-Pūlngö. Hĕng heuh pöri el töhĕng afta, nö vin ngö tī më ma-ahet. Më minṙöinylen tö më töhaköövö hamòlṙen yin mahalēnlö inlahen u anū-ö la-en. Chöngṙen yin nö kēken minë la-en im inhëtö asā kinṙööngö u, tö sā ngam finòhò chōn, chinūtö el patī, kinföötö, inlēntö anūchö, sinööchö tōli, sinööchö inkūp tö minë tinmël kirki, kinvalngö minë chōn, hēk inkūöken chīṙö ngam patī. Halēnlöng pöri nö hĕngheuh itö hĕng samyeūheu ngam tökiröng lināpö. Yĕn kö rahëichyen kinëti la-en më kūön hī inrē, ngach mahaköpten cha min ayī-ö nö milēḵṙen töm chūök nöönyö ngam Tēv.—Mumkahten 5:1.

Kētöre la-evṙen in minë tö hòṅ vītitvö. Kaheuk samyeūheu ngam Patī-Pūlngö nö hòṅ ngëchka töt kanòlò alaha, lātuhēt latunyī inrē. Lökten in e angū-ö nginëcha ngam tö örheūheu inkūöken vinītit e pòn hōtu ngam patī nö vai, nö linakngöröön nup töt kamtu yanëngen. (2 Kinṙötngö 24:13; 34:10) Pò ngam töhet hēk töhaṙūötkaṙen Patī-Pūlngö nö tölöng nö chūök ngam Tēv nö ha-öinyö. Yēḵ hī kö kētötīre in ngih la-en, hameuktöre ayī-ö öi röhta in Yāvē hēk milēḵṙen tö ngam chūök ò nö ha-öinyö. (Salmai 122:1) Ngach vāyö mineukö angū-ö nö ikūö yip tarik.—2 Kòrin 6:3.

• Kūöyòh öi ötkô höhölōn tö inhëtö minë chūök hī ha-öiny ngam Tēv?

• Sitih inlēnlö ön minë inhëtö ngam Patī-Pūlngö?

Lōnu öm töre öm chöh hēk ṙūölö mikahkūöre tö minë mikah aṅmat Paipöl? Tö hòṅ mikahtökūö re öm tö inlahen öp töhĕng ṙô aṅmat ngam līpöre hēk tarik, chūökö, tö minë töng sitih tö kakka töm Paipöl? Hö-ö öm ṙung hang inlahen ngam ṙô ngam Tēv nö mihôiṅ nö hayööken hī tö nup piṙūtkö hī? Kò-òren man chöh nup sanapṙô u el ngam laipreri Patī-Pūlngö.

Hayööken hī an teūngen tö minë chehetī chamöh. Amahaiṙen man lohten öt aṅhavin tö minë līpöre vamë-eny ṙô Paipöl minë aṅ in më Vamënyen Yāvē i ëlô meh. Ngam laipreri pöri el Patī-Pūlngö tö keuheūttöre aṅ in tö minë līpöre nö holre tö minë tufömngöre. Lohten inrē nö ṙōl mihëṙö minë paipöl tövënyu manah, tövai tiksönörī hēk nup tahëng inrē chehetī chamöh. Mihôiṅ man urēhĕkūö hēk unôichrit mīting öm haköp mat nup līpöre el ngam laipreri. Ōt nup computer tö aṅhavmat tö öp Vôchtavör Laipreri. Computer prōkrām ön angū-ö nö tö keuheūtlöre aṅmat tö minë līpöre ih hēk holre tö minë inlööten chinöhö, töp lökten meh kò-òren chöh manah öp töhĕng ṙô, öp tö hĕng tôpik, öp töhĕng miröökö aṅ mat ngam Paipöl.

Yanöölen yip tufömngöre mahaköp an ngam Mīting Tinrikngen ih Öi Kristīön töm Inhāṅnga. Mihôiṅ man kēḵ inyööken re el ngam laipreri Patī-Pūlngö yēḵ meh halēn nup kinë-ekūö re. Öp mameukken ngam mīting Tinrikngen ih Öi Kristīön töm Inhāṅnga öp mahayōmken ngam laipreri. La-en ò an ngam nginëchkö e yĕn ōt minë tö tufömngöre līpöre nö lēnö ṙinā-aṅ. Anga-aṅ hēk tö öp mahaköpten meh tö Paipöl tö mihôiṅ nö hachōten meh öm chöh nup kuilōn re. Ötkô pöri minë līpöre aṅ ngam laipreri nö kē-ĕyö nö ṙa-ang el ngam Pati-Pūlngö. Hòṅ milēḵ inrē yĕi fehmat minë līpöre hēk ötkô inrē öi kūch mat u.

Vënyu nang in töm Paipöl tö hi yēḵ hī chöh minë “mikah aṅ im Tēv,” hòṅ lōnu ayī-ö chöhö e nö sā “tönyatngö töpōiṙāi chehen.” (Inchōḵ-oṙô 2:1-5) Ngam laipreri Pati-Pūlngö an kò-òren mahayööken meh yĕm hòṅ rultenre chöh.

• Asuh nup chehetī chamöh tö ōt nö el ngam laipreri Patī-Pūlngö?

• Achīö öp min tö mihôiṅ nö hachōten meh öm kēḵ inyööken re im laipreri?

Ngöṙô Yēsū Kristu tö yik tamömrit re: “Hökngen ngam ëṅāvöre yin nö yang nö ikūö tarik, hòṅ cha nö meuk nup tölöök la-en yīö ngaich ha-öiny ngam Yöng yīö, ngam el halīöngö.” (Mëtiv 5:16) I kinheūtngö ngam ṙô in lökten öi löökö inlahen tī öi kēḵ hinòlṙen in minë tufömngöre teknòlòchī, nö holre töm Internet. Ngam vepsāit ih, jw.org, ön tö aṅhav mat tö minë la-en hēk ṙinātö ellōn ih öi Vamënyen Yāvē. Asuh nup hameuknyö e?

Sanapṙô nup tö chöngṙen intöönö aṅmat Paipöl. Mihôiṅ man kòtökūö tö sanapṙô nup tö haroh tūmö hatön tarik ṙung. Tö sā në, Hēṙun Min Në Kanihngen nö Chuhngöre? hēk Kô-en Yip Rih Tökapah Min Hēk Nö Aṅ? tö hameuknyu nö imat online i tö 600 ëlô. Mihôiṅ man inrē kòtökūö töm Niū Vöörlt Trānslēsön nö kirööngen tö tö 130 ëlô hēk tö nup chehetī inkööpö mat Paipöl inrē, holre töm līpöre Asuh Nup Tökô-en Inköphöti Ṙô ngam Paipöl? tö minë tufömngöre Vôchtavör hēk Avēk! Anū-ö në līpöre tö kò-òren nö vë-evkūö hēk hāngö nö el online hēk mihôiṅ inrē nö download tö nö ṙōlkangen inlahen tö sā ngam MP3, PDF, hēk EPUB inrē. Mihôiṅ inrē öm kēnyö nup tö kaheng miyāyö līpöre hòṅ meh katölhökūö yip tökën nö haköp nö i ëlô re! Ōt nun minë līpöre nö sā Video inrē nö itö sömkangen sa-ën lengkuĕch. Mihôiṅ man kēnyen minë töhāngö vinë-ekūö Paipöl, tramā aṅmat Paipöl hēk nup tö vai music ahang meh kò-òren el ṙētak meh heūheure.

Mumkahtölōn tö inlaha la-en vē Vamënyen Yāvē. Hameuknyu nun minë tufömngöre töhāngö inlahen hēk minë video clip inlahen minë la-en tö keuheūtngör chūök, minë ṙētak inrē tö lökngöre tī tö ih öi Vamënyen Yāvē, tö minë inlahen tī ih hayööken höö hē el në pô pinlāḵngen. Meuk minë minkahtölōn man min inrē i alaha minë yamih manūlö pumnāmö tö minë kòntek infòrmēsön ngam mupākö ôfis ih.

Lökten in u anu-ö në talöökö, öi yāngö mineukö tī töm kanô-en nö söl mana-angkūö ngih panam. Yöölen tarik aṅkūö në pūlngö nö ṙòkhöre söl in më aṅkūö ngam tö ufovhukūö panam, hēk tömaròvat kūö tömaròvat panam Antarktika inrē tö yöölen. Lökten in vë-ekūötēv hòṅ ‘ngam ṙô Yāvē nö veūtöröön’ nö inë taṙòkhöre panam, nö nöönyö ngam Tēv.—2 Tösalònikē 3:1.

• Sitih inlaha öng ngam www.jw.org nö hayööken töpōyen tarik nö haköp ngam kanô-en Paipöl?

• Asūp lōn meh chahöh meh imat ngam vepsāit ih?