Achīö Aich Më Ma-ahānga Hēk Asuh Öp La-en Cha?

Lōnu Yāvē tö hī öi mikahtökūöre tö më aṅ ngam mikūönö ò aṅ el halīöngö. Më kūön ò ma-ahānga. (Yōp 38:7) Sitih ṙô öng ngam Paipöl nö vë-eny inlahen cha? Mihôiṅ aich min nö hayööken hī hēk hakihten hī inrē? Ṙòkhöre aich më ma-ahānga nö aṅ ngam mikūönö Yāvē? Ta-a töi mikahtökūöre.

1. Achīö aich më ma-ahānga?

Vīlö më ma-ahānga ang Yāvē urēhěkūö tī ò misī nö vīlö ngih panam. Sā inlahen hī öi ötkô meūkö Yāvē, ngatī ayī-ö öi öt kô meuk më ma-ahānga kūö cha nö töt maneūken. (Lūkös 24:​39b) Söm van söm köny ṙôken yin, nö kö harīkngöre tö höö. (Inmeukhömat 5:​11) ‘Hang nup töng chööngö Yāvē yin më ma-ahānga.’ (Salmai 103:20) Hang inlahen më ma-ahānga in misī nö vë-eny nang yip tarik tö ngam tölöök inhānga, hayööken cha, ṙānyen cha inrē nö ṙā-ang in nup kanihngen cha, nö hang ṙô Yāvē. Ngatī yin töngamuh nö hayööken yip Kristīön nö chöh yip tarik tö hòṅ haköp inlahen ngam Tēv.

2. Achīö ang ngam Sī-ö tö më tötlöök ma-ahānga?

Ōt yin më ma-ahānga töt kööpö hanangenlōn tö Yāvē. Tö sā ngam raneh ma-ahānga, chamòhòlre nö la-al Yāvē ‘ngam Sī-ö, Sātān inrē tö ṙô hī, ngam mahachīl në taṙòkhöre panam.’ (Inmeukhömat 12:9) Hòṅ hayöng anga-aṅ nö ikui yip tahëng, lökten ò nö tölṙô nak raneh tarik nö choholre nö la-al Yāvē. Rö-ö pöri nöng angū-ö inlahen ò, pön tölṙô më tahëng ma-ahānga inrē anga-aṅ nö choholre nö la-al ngam Tēv. Tötlöök ma-ahānga ngö ṙô in tö cha, më chamòhòlre nö la-al Yāvē. Öt halöngtuṙen an ngam Sī-ö tö më tötlöök ma-ahānga nöng ngöh nö el halīöngö tö Yāvē. Suktu pöri cha-a nö ing panam ngaich unôichngöre min nö ahëtiyö.​—Vë-evkūö Inmeukhömat 12:​9, 12.

3. Sitih inlahen tī ang ngam Sī-ö tö më tötlöök ma-ahānga nö halō-ongkūö tarik?

Löktö in më tötlöök ma-ahānga hēk më tömilūönö tī ngam Sī-ö nö halō-ongkūö tarik. Höng vamë-ekūö më tötlöök ma-ahānga in yěi kēken la-en minlūönö. Tö sā minë la-en, vinë-eny mu-unôich, chinuhu in yip tö heuveū nö ha-ōngö Sī-ö, nginëichkö eltī inrē. Ōt yip tarik tö hòṅ halankaṙen tö yip tö milūönö yěn vahavö, ōt yip tö halō-oikūö nö hōtu nö vë-ekūö yip tökapah. Ngö ṙô pöri Yāvē nö fēḵlen hī: “Ui havöötökūöre in cha yip mameuk ma-alaha, un rēhĕn i yip tömilūönö; un chöhö cha-a tö yīö, öi hòṅ hachōichngöre tö tī cha.” (La-en Lēvī 19:31) Lökten ang Yāvē nö fēḵlen hī pön hòṅ laklen hī tö ngam Sī-ö tö më tötlöök ma-ahānga inrē. Tö kunyaha elmat yin tö ngam Tēv, hòṅ kētö kanihngen hī inrē.

MIKAHTÖKŪÖRE HĒK

4. Sitih inlahen yip tölöök ma-ahānga nö hayööken hī?

Ötkô yin më ma-ahānga nö chuh i tarik nö ahangkö ngam tölöök inhānga. Mihôiṅ pöri nö hayööken hī öi chöh yip tarik tö hòṅ haköp inlahen ngam Tēv. Vë-evkūö Inmeukhömat 14:​6, 7, ngaich kakkö minë intöönö yamih:

• Kūö yòh öi hòṅ hayöökaṙen tö më ma-ahānga yěi ahangkö ngam tölöök inhānga?

• Ngönlöre öm, pöm akahakūö tö inlahen më ma-ahānga nö hayööken hī öi chöh yip tarik tö yāichö ellōn? Kūö yòh öm ngatī ṙô?

5. Ṙūöhöngre töm la-en minlūönö

Kumnyah elmat Yāvē an ngam Sī-ö tö më hol ò tötlöök ma-ahānga. Kunyaha elmat yin inrē tö hī. Vë-evkūö Lūkös 9:38-42, ngaich kakkö ngih intöönö yamih:

• Sitih inlahen tī yip tötlöök ma-ahānga kò-òren nö hakihten hī?

Kūö yòh öi hòṅ ṙūöhöngre tö nup töng sitih chehen hēk la-en kahëken yip tömilūönö. Vë-evkūö I. Chööngö 18:10-12, ngaich kakkö minë intöönö yamih:

• Ām kangen nup inlahen tī më tötlöök ma-ahānga nö haṙöingen hī, hòṅ hī öi löklōn cha? Asuh nup tumkangen tī ò nö haṙöingö tarik nö i panam meh?

• Sōḵtu in tö Yāvē öi la-evṙen tö la-en minlūönö, tölöng öng angū-ö tö lōn meh? Ngaich kūö yòh öm ngatī mufē?

Röngnyöm VITIŌ, ngaich kakkö minë intöönö yamih.

VITIŌ: “La-al Ngam” (5:02)

• Sitih lōn öm tö ngam tö nyëktu tö sā tavis nö i kël ngam kūön Pelěsa kikānö, kihngen ang tö kūö e? Kūö yòh öm ngatī mufē?

• Hòṅ sitih inlahen ök öre Pelěsa yěn hòṅ laklöre tö më tötlöök ma-ahānga?

Ilööṙen misī yik tökô-en Kristīön nö föngtö kūö nuk aṅ in re chehen tömilūönö, pön hòṅ la-al më tötlöök ma-ahānga. Vë-evkūö Inlahen 19:19 hēk 1 Kòrin 10:21, ngaich kakkö ngih intöönö yamih:

• Kūö yòh öi tö lōn meh öi ötkô aṅhavin tö nup chehen tömilūönö?

6. Mihôiṅ man la-al ngam Sī-ö tö yip tötlöök ma-ahānga inrē

Yöng kūö yip tötlöök ma-ahānga an ngam Sī-ö. Tumṙeūtöre pöri yip tölöök ma-ahānga nö hang ṙô Maiköl, ngam yöng kūö më tölöök ma-ahānga. Yēsū ngö ṙô in tö ngam tahëng minë-eny ò. Yěm hòṅ akahakūö tö ṙôken kumlēḵ Maiköl, ngaich kò-òren öm Vë-ekūö ngam Inmeukhömat 12:​7-9, ngaich kakkö minë intöönö yamih:

• Achīö öp tö mötlö kumlēḵ? Maiköl tö më ma-ahānga ò hēk ngam Sī-ö tö më tötlöök ma-ahānga ò?

• Sitih lōn öm më-eṅ, hòṅ vöö yip mahaköp nö in Yēsū, tö ngam Sī-ö tö yip tötlöök ma-ahānga ò inrē?

Mihôiṅ man la-al ngam Sī-ö tö yip tötlöök ma-ahānga inrē. Vë-evkūö Yāköp 4:7, ngaich kakkö ngih intöönö yamih:

• Hòṅ sitih inlahen öm yěm hòṅ laklöre tö ngam Sī-ö hēk tö më tötlöök ma-ahānga inrē?

MINË HAKÖP HĪ NGAICH

Hayööken hī yin më tölöök ma-ahānga. Kumnyah elmat Yāvē an ngam Sī-ö tö më tötlöök ma-ahānga, ngam minlūönö an talöökö tī ò nö halō-ongkūö tarik.

Sitih ṙô öm më-eṅ?

• Sitih inlahen yip tölöök ma-ahānga nö hayööken yip tarik tö hòṅ haköp inlahen Yāvē?

• Achīö ang ngam Sī-ö tö më tötlöök ma-ahānga inrē?

• Kūö yòh öm hòṅ ṙūöhöngre tö ngam la-en minlūönö?

NGËICHKÖ NË INRĒ

Kūö yòh öi mihôiṅ ngö ṙô tö Yēsū nö anga-aṅ Maiköl yöng kūö më ma-ahānga? Ta-a töi mikahtökūöre.

“Achīö Ang Ngam Mākūö Ma-ahānga Ang Maiköl Tö Ṙô Hī?” (El vepsāit töhakööpö)

Kô-en an ngam Sī-ö nö ōt, rö-ö nöng tötlöng nö mufē nö yamih nö elkuilōn hī.

“Kô-en Ang Ngam Nö Ōt?” (El vepsāit töhakööpö)

Töi ngëichkö inlahen ngam töhěng tak yöngnyīö nö ṙānyu nö ṙā-ang eltī më tötlöök ma-ahānga.

“Kôtökūö Anga-aṅ Töm Chö-önyre Nö Aṅ” (Chūökamahati-E, ātiköl)

Sitih inlahen ngam Sī-ö nö halō-ongkūö tarik nö löktö im minlūönö.

“Kanô-en Inlahen Ngam Minlūönö Töm Mëchik Inrē” (El vepsāit töhakööpö)