Génesis
Isaac nakayami.
21 Yavé Saranu tyee tsanguenbera kentsuyu timuwa juꞌba, uwain tsangue uraꞌ kemi. 2 Tsenñu Sara naviꞌ, na main kaꞌ kumi Abraham yumaa derukuunuren. Tsejtu Dios naaju tinbutalaa tsainu tsuve tiñu bain juntsa tinbutalaa tsaimi. 3 Tsenñu Abraham Saraꞌ kaꞌ kuñu nanu Isaac mumu pumi. 4 Tsejtu nakayañu mandishpen malu insha Dioschi señas kemi, Dios naake uudenguemuwaañuba tsanguetu. 5 Abraham 100 añu juunu uwanaa Isaac nakayami. 6 Tsenñu Sara entsandimi: Diosya inu sunden uukakaave. Tsaꞌ mitya mun iya na main miyandiñu demijaꞌ bain sundyaꞌ iba bulu uukanu detsuve. 7 ¿Maa iya Abrahamnu nakaꞌ kunu juve tyaꞌ pensa dekiñanga? Tsaanuren iya na main kaꞌ kuwayu, yumaa derukuuñu bain, timi.
Agar Ismaelba Abrahamꞌ yanu jukaꞌlarala.
8 Kaana yumaa awañu chuchu tyaikikaala. Tsejtu chuchu tyaikikaanu malunu Abraham tsamantsangue chachi waꞌkareꞌ fandangu kemi. 9 Tsaaren Egiptosha chumu shinbu Agarꞌ na, matyu Abrahamnu kaꞌ kuwañu na jumu, Isaacnu firu tiꞌ uukapuntsu katami Sara.
10 Tsejtu Sara, Abrahamꞌ junga jitu tsandimi: ¡Manda-iꞌ taawasha kemu shinbunu yaꞌ naba me-eede! ¡Entsa manda-iꞌ taawasha kemu shinbuꞌ naya in naba, ñu ti tañuba juntsa bulu deveenu jutyuve! timi.
11 Tsandiñu, Abraham tsamantsai veraꞌ tyami, Ismael bain yaꞌ nañuꞌ mitya. 12 Tsenñu Dios tsandimi: Juntsa naꞌ mitya bain, naa ñuꞌ manda-imu shinbuꞌ mitya bain pensandyatyude. Tsaꞌ mitya Sara naatiñu bain tsanguide, matyu Isaacnu seraꞌ jimulaa uwain ñunu seraꞌ jamu kuranu detsuve. 13 Tsenmin ñuchi manda-imu shinbuꞌ nanu bain, iya seewaanu tsuyu, ya bain ñuꞌ nañuꞌ mitya, timi.
14 Tsejtu ayunchi dishkepenene Abraham Agarnu pan kuwamin, animaa kika buusa bain pi puu kuwaminguemi. Tsangueꞌ yaꞌ beenbushusha pandekemi, tsenmin yaꞌ nanu bain mangumingueꞌ: Miide, tiꞌ me-eemi. Tsenñu juntsa shinbu nuka jinduꞌba mijtu ne jiindu tiba den chutyun tena Beersebasha nentsumi. 15 Tsejtu animaa kikanu pumu pi de-iiñu, tsaa yaꞌ nanu daꞌchichii panbeenu tsurekeꞌ 16 ya bain vee mujtu, junu baanatyununu jiꞌ chudimi, ya peyantsu keenandyaiꞌtu. Tsejtu yaꞌ ama chudiꞌ chunatu waawaandimi.
17 Tsenñu juntsa kaana bain waañu, Dios selusharen meemi; tsenñu Diosaꞌ anjee Agarnu paputu tsandimi: ¿Tyeengues nendu iyu, Agar? Jeetyatyude, ñuꞌ na challa naanaꞌ waañu bain Dios meeve. 18 Tsaꞌ mitya ñuꞌ nanu mangaide, tsejtu yaꞌ tyaapanu tyaikityude, matyu iya yanu tsamantsangue seewaakaanu tsuyu, timi.
19 Tsejtu Agarnu Dios main pi pusu katakaañu, jiꞌ animaa kikanu pi tyuwa mangueꞌ Ismaelnu pi kushkaami. 20 21:20-21 Tsejtu Dios juntsa nanu uraꞌ kemishtintsuñu, awaꞌ tiba den chutyu Parán tusha chumi, tsenmin arku bain yaviꞌ tyaꞌkemu tiyami. Tsenñu bene yaꞌ ama, main Egiptosha chumu naꞌmanu supungakaami. 21 ——
Abraham Abimélecba vetaꞌ vetaꞌ uraꞌ kenu tiyala.
22 Juntsa tinbutala, Abimélec Abrahamba kuinda kenu jimi. Tsenñu yaꞌ suutadu ama Ficol bain yaba bulu jimi. Tsejtu Abimélec Abrahamnu tsandimi: Ñu ti keñu bain Diosya kemishtimuñu bain mideeyu. 23 Tsaꞌ mitya, challa enuren naa inu bain, naa in kaillanu bain, naa inu bene seraꞌ jimu chachillanu bain firuꞌ ken jutyuyu tiꞌ, Diosnu pakaꞌ uwain tsanguenbera kentsuyu tide. Tsenmin iya naake ñunu uraꞌ keñuba ñu bain tsanguenu tsuyu tiꞌ, Diosnu tsandide, tsenmin challa ñuꞌ chunashu juntsa tenasha chumulanu bain tsanguenu tsuyu tiꞌ, Diosnu pakaꞌ uwain tsanguenbera kentsuyu tide, timi.
24 Tsenñu Abraham pakatu: Diosnu pakaꞌ uwain tsanguenbera kentsuyu, timi.
25 Tsejtu junuren Abraham Abimélecnu jayu jatsandyaꞌ pami, matyu Abimélecchi tiba kiikemu chachilla yanu ma pusu machiꞌkemuwa deeñuꞌ mitya. 26 Tsenñu Abimélec tsandimi: Maa ñullanu tsanguiñuba mijtuyu, naa ñu bain inu wandindyuve. Entsa kuindaya challaa mijayu, timi.
27 Tsenñu Abraham uveja bain kamin, naa wagaa bain kamingueꞌ, Abimélecnu kuwami; tsejtu juntsa malunun yala pallu vetaꞌ vetaꞌ uraꞌ kenu tiꞌ ma tsai shuwala. 28 Tsejtu Abraham yaꞌ uveja puinsha supu uveja kailla mandishpallu veekami. 29 Tsanguiñu Abimélec pakeꞌmeetu: ¿Tyeenguenaa entsa mandishpai uveja veekalaatunguiyu? timi.
30 Tsenñu Abraham tsandimi: Entsa mandishpai uveja kuwakenu juuwashu juntsaya, uwain iyaa entsa pusu kemuñuba mijakaanaa tsaave, timi. 31 Tsaꞌ mityaa juntsa tenanu Beerseba mumu vimuwaami, junaa entsa pai rukula Diosnu pakaꞌ tsanguenbera kentsuyu detiñuꞌ mitya.
32 Tsaꞌ mitya vetaꞌ vetaꞌ tsanguedaa tiꞌ depaꞌ dyamin, Abimélec, yaꞌ suutadulaꞌ ama Ficolba yalaꞌ tu Filisteasha miila. 33 Tsejtu junu Beersebanu Abraham, ma chi yaꞌ mumu tamarisku chi wajtu, Yavéꞌ mumunu pakami, naa-uwanuba tsanamu Diosnu. 34 Tsejtu Abraham Filistea tusha pureꞌ tinbu chunami.