Génesis
Sara peyañu menla.
23 Sara 127 añu chumuwaami, 2 tsejtu Quiriat-arbá tityumee, Hebrón pebulu tiitinunu peyami, Canaán tusha. Tsenñu Abraham, Sara peyañu waatu, yuj llakindyaꞌ chumi. 3 Tsejtu bene yaꞌ shinbuꞌ ujkun bulu tsuinsha puturen, mafaleꞌ, Hetnu seraꞌ jimu paandelaꞌ chuinsha jitu tsandimi: 4 Iya vee mujtu tusha chumu juꞌba, ñuiba bulu chuyu. Tsaaren inu bain chaꞌ depeñu mennu tu main miyandikaakai. In shinbunu mennu tenve, timi.
5 Tsenñu Hetnu seraꞌ jimu chachilla pakatu tsandila: 6 ¡Rukui, ñu lalanu meedide! Ñuya lalaꞌ jundalaya Dioschi miꞌkeꞌ kaya bale rukuve. Tsaꞌ mitya laachi chaꞌ depeñu mennu tujuu naaju kayu urañuba juntsanu ñuꞌ shinbunu mende. Muba laatalaya, chaꞌ depeñu mennu tujuu espanu dejutyuyu, tila.
7 Tsenñu Abraham mangujpaꞌ uidiꞌ Hetnu seraꞌ jimu paandelaꞌ ajuusha telediꞌ, yaꞌ llashkapa tunu tapaꞌkanbera waiketu 8 entsandimi: Uwain ñui bain enu in shinbunu menñu urave tenñuya, in mitya Sóharꞌ na Efrónnu 9 jiꞌ, yaꞌ tu kapasha Macpelá, tujuu aiꞌka tiidei. Tsenmala iya juntsa tu nan baleñuba paanguenu tsuyu. Tsanguetaa i bain entsa tenanu tu miyandiꞌ chaꞌ depeñu mennu tujuu ñullaꞌ kejtsapala miyandinu tsuyu, timi.
10 Tsenñu Hetnu seraꞌ jimu chachi Efrón bain junu kejtsapala putu, naa yaꞌ paandela bain, naa pebulu vinu juukapasha pumu chachilla bain, ya naatiñuba demeesa tyatu Abrahamnu entsandimi: 11 ¡Tsa jutyuve, rukui! Iya ñunu juntsa tu bain, naa junu tujuu jumu bain ne kuwakenu tsuyu. Tsaꞌ mitya iba manbelaa chumu chachilla bain demeenave naa iya ñunu uwain mekentsuñuba. Junu ñuꞌ shinbunu mende, timi.
12 Tsenñu manen Abraham junu chumulaꞌ ajuusha wayukeꞌ keewaatu, 13 kumuinchi chachilla demeenaren Efrónnu pakatu entsandimi: ¡Tsantsaya ñu inu meedika tenve! Juntsa tuꞌ mitya lushi kade tiꞌ uꞌtandinu tenve, tsenmalaa bene iya junu in shinbunu mennu tsuyu, timi.
14 Tsenñu Efrón manbakatu tsandimi: 15 Rukui, meedika: Juntsa tu 400 lepa lushi jeru baleve. Tsaaren ne juntsaꞌ mityaya vinbatyudaa. Tsaꞌ mitya ñuꞌ shinbunu junu mende, timi.
16 Tsenñu Abraham, Efrón naake paꞌñuba kuwanu shuwatu, Hetnu seraꞌ jimu chachilla dekeenaren, 400 siklu, tsandityuꞌ bain, 4.4 kilu lushi jeru lepa tene kalareꞌ paanguemi, naake yangaataa juntsangue adyuꞌ yangaamu deeñuba juntsanguetu. 17 Entsanguiñaa Efrónꞌ tu, Macpelá tenasha jumu tu, matyu Mamré chi chumu tusha jumunu pensanguiñuya pajlanu pasha, naa junu ujkun tujuu jumu bain, naa chi bain juntsa tusha chumulaya 18 Abrahamchi tene tiyala. Entsangueꞌ depuiñu naa Hetnu seraꞌ jimu chachilla bain, naa junu pebulu juukapasha pumula bain tsanguindetsu narana keenala.
19 Entsangueꞌ depuitu, bene Abraham yaꞌ shinbunu menmi, Macpelá tusha jumu tujuunu, matyu Mamré chi chunu tunu pensanguiñuya pajlanu pasha, tsandityuꞌba Hebrónsha Canaán tusha. 20 Juntsanguitaa Hetnu seraꞌ jimu chachillaꞌ tu bain, naa junu tujuu jumu bain Abraham atiꞌkami, tsejtaa chachilla depeyanmala mene menekenu.